Revelation of John 22

1Mǒkhû̌ tanaphû̌ nutôpwa̤ nè̌lṳ̌ bǎ he shihtûpwa̤ ashilô̤̌ dǒ a shělîkitrǐ kè̌shǐ nṳ̌ bòphlǔ sô̌sô̌kû̌ lǒ̤bû plò̌kishǐ nutôbô dě a ô̌ dǒ Cǒmara kû̌ asû̌phû̌ akhwǐ tòcòhtanu dě a hǎhtò̌. ^a 2Dě a shilò̤nṳ̌ dǒ wî̤̌kû dě a shilò̤nṳ̌ dǒ wî̤̌ a klè̌dû̌ aklǎmakûnu. Shilô̤̌htu ginǐ̤khôginǐ̤gî̌ bònu sǒhtûpwa̤ ô̌. Dě pṳ̂̌lalanu asǎhtò̌ dě tôněnu asǎhtò̌ shǐginǐ̤plǎ. Dě alǎ tokhlǒnu a ma̤hǎmǎ bǎ kòyò khlilèphû̌ tokhlǒ a ta̤shǐta̤sha. ^b 3Dǒ wî̤̌kûnu ta̤ dǒ a ô̌ dǒ Cǒmara a ta̤ǐsho aklanu kè̌shǐ pe tôcǒ꤮ tô̤̌. Běcǎ Cǒmara kû̌ sû̌phû̌ nutôdo a tòcòhtanu a ô̌ dǒ wî̤̌nu tôwî̤̌ akû pě dě ajû̌ tokhlǒ gǔ cabahtò̌ Cǒmara pě. ^c 4Asî gǔ kè̌shǐ Cǒmara amǐ̤sǎ pě dě kòyò gǔ wě̤ Cǒmara ami̤ dǒ asî amě̤htò̌lô̤ pě. 5Lṳmṳ̌khǐ ô̌ pe tô̤̌ akhû̌akhî, asî lǎ̤lṳ̂pe mî̌tè̌ko tô̤̌. ^d Asî lǎ̤lṳ̂pe lṳmṳ̌ ata̤lî tô̤̌, ma̤titèhî̌dě Běcǎ Cǒmara mî̌ amè̤̌bǎ asî ata̤lî hǒ, dě asî gǔ pǒ ta̤ tûjû̌pwa̤ talakhǎ pô̤̌ khwǐ tokhlǒnu pě. ^e

6Pô̤̌nuhtodě tanaphû̌ hî̌ he kû̌, “Lě̤yô̤̌ tokhlǒ numî̌ yô̤̌ dǒ alǎ̤yṳ̌ǎ dě atě̤amè̤̌ mî̌ca tokhlǒ. Běcǎ Cǒmara dǒ a ǐ piwi̤pèshè tokhlǒ kû̌ a Yôla Plò̌shǐ hǒtôpwa̤nu, pô̤̌khô a gǔ dǔlè̌lṳ̌ bǎ kû̌ ajû̌ sîtokhlǒ kû̌ yî̤khôtô̤̌ pě ta̤ gǔ ma̤kwè̌꤮ anǎ̤ hî̌tè pěnu dě, a nohè bǎ a tanaphû̌ hǒ.”

Yeshǔ gǔ hè pě awe̤akè

7Yeshǔ hî̌ kû̌, “Ganǎ̤de lô̌khô꤮, he hèphwèlǎ pě, kòyò dǒ a jûlě̤phî̌ piwi̤pèshèyô̤̌ dǒ a hî̌bǎ dǒ lî̤kû tokhlǒnu, a nǐ̤bǎ ta̤ǐshowî̤.”

8He mî̌ Khûyṳ̂ha. He kè̌shǐ ganǎ̤de ta̤nu lǒ̤꤮ bò tokhlǒ. Bǎ he kè̌shǐ ganǎ̤de hto akhanu, he dô̌gînî̤lò̤ dǒ tanaphû̌ dǒ a dǔlè̌lṳ̌ he ta̤nu tokhlǒ nutôpwa̤ a khò̌lô̤pô̤̌ kòshǐ, dě he glè̌ cabahtò̌ yǎ. 9Bǎbǎkǎlè a hî̌ he kû̌, “Caba tǎ̤ he mǎ̤, he mî̌ jû̌ tôpwa̤ dǒ asô̌sô̌ kû̌ na kû̌ na pṳ̌wè̤̌ piwi̤pèshè tokhlǒ, kû̌ kòyò lǒ̤꤮ bò dǒ a jûle̤phî̌yô̤̌ sî dǒ lî̤ nutôbǎ akû nutokhlǒ pwǎ. Cabahtò̌ dǒ Cǒmaranu.”

10Dě a hî̌ pô̤̌ he kû̌, “Lě̤yô̤̌ dǒ piwi̤pèshè shôbǐǐ nǎ dǒ lî̤hǒtôbǎ akû tokhlǒnu, bè̌hǔbè̌sè̌ tǎ̤ a tǎ̤mǎ̤ nî̌꤮, ma̤titèhî̌dě ta̤nu lǒ̤꤮bò tokhlǒ glè̌ htûhtò̌ ashěakhǎ phǔhtò̌ hǒ. 11Kòyò dǒ a ma̤ta̤sǔ tokhlǒnu noma̤ sělě pô̤̌ anu. Kòyòkhu phû̌mò̤̌ tokhlǒnu noma̤ sělě pô̤̌ yǎ. Kòyò dǒ acǒatè̤ tokhlǒnu noma̤cǒma̤tè̤ sělě pô̤̌ yǎ. Kòyò dǒ a plò̌shǐ tokhlǒnu noma̤ plò̌shǐ sělěpô̤̌ yǎ.” ^f

12Yeshǔ hî̌ kû̌, “Ganǎ̤de lô̌khô, he hèlǎ pě, he gǔ phǐhènǐ̤ ta̤cî̌htò̌ kòyò tokhlǒ kû̌ ta̤ma̤nǐ̤khû̌kǎ tokhlǒ pě. ^g Dě asî ma̤hto kwè̌ titènu, he gǔ ǐbò asî pô̤̌ a ma̤hto nupě. ^h 13He mî̌ lî̤phlǒ kòshî̌ kû̌ lî̤phlǒ gutṳ̌ hǒ. ⁱ He mî̌ awǐlǒ kû̌ jǒkòlǒ hǒ. Akòshî̌ mî̌ he hǒ, agutṳ̌ mî̌ he hǒhǒ. ^j

14“Cǒmara gǔ ǐshowî̤ kòyò dǒ a shǔpǒ̤bò ajejû nutokhlǒ pě. Asî gǔ nṳ̌ běǎ nǐ̤gû̌ sǒsǎ dǒ a ǐ kòyò yôla htûpwa̤nu tokhlǒ pě. Htodě asî gǔ nṳ̌ nǐ̤kû̌ dǒ wî̤̌ takhadû̌ nutokhlǒ akû pě. ^k 15Kòyò sô̌sô̌kû̌ akhô tô̤̌nu bǎhtû shǐ tokhlǒ, pwa̤běkhû̌ sî, kòyò cû̌sǔnṳ̌plěnṳ̌ pwa̤mǒ̤pwa̤khû sî, pwa̤ ma̤si kòyò sî, kòyò caba ta̤yô̤ta̤gî̌ sî, kòyò lǒ̤bò dǒ a mô̤ǐ tûû̌ ta̤lòhô dě a ô̌htûpwa̤ gû̌ma̤ pô̤̌nu pṳ̂̌꤮ taplǎ tokhlǒnu a gǔ ô̌ lô̌khô dǒ wî̤̌khlo pě.

16“He mî̌ Yeshǔ. Pô̤̌khô he gǔ shôbǐǐ lṳ̌bǎ ta̤dòkû tokhlǒ kû̌ ta̤we̤ta̤kè tokhlǒ ayanu, he sûlò̤ bǎ sî he mǒkhû̌ tanaphû̌ hǒ. He pṳ̌wè̤̌ khlilè mî̌ amè̤̌ Khûdawi̤ akhlialè gelò̤nu tômṳ̌tôcǒ hǒ. He mî̌ shǎtǒ̤wô̤ dǒ a lîkakha nutômè hǒ.” ^l

17Yôla Plò̌shǐ Běcǎ kû̌ khômò̤̌ phû̌mǒ̤ hî̌ kû̌, “Hèmò̌ lô̌khô.” Kòyò lǒ̤꤮ bò dǒ a ganǎ̤de ta̤ tokhlǒnu, nohî̌ lô̌khô asî kû̌, “Hèmò̌ lô̌khô.” dě kòyò dǒ a sǎôshi tokhlǒnu, hèmò̌, hèphǐ ô kwe lô̌khô shi htûpwa̤nu. ^m

Ta̤hî̌bǎ dǒ gutṳ̌kò

18Kòyò lǒ̤꤮ bò dǒ a ganǎ̤de ayô̤̌ dǒ kòyò hî̌pô̤nǎ a dǒ lî̤hǒtôbǎ akû lǒ̤꤮ bò tokhlǒnu, dǐsè̌rè̌ nǎ tě̤tě̤mè̤̌mè̤̌ lô̌khô asî kû̌, kòyò tôpwa̤pwa̤ kè̌ shû̌nṳ̌ dû̌lǒ ta̤tôcǒcǒ dǒ lî̤hǒtôbǎ akûnu, ta̤shasiwě̤, ta̤jî̌ta̤jû̌ dǒ Cǒmara hî̌lṳ̌ hto a dǒ lî̤hǒtôbǎ akû tokhlǒnu Cǒmara gǔ notṳ̌bǎ a pě. ⁿ 19Kòyò tôpwa̤pwa̤ dǒ a ma̤yû̌lò̤kè ta̤tôcǒcǒ dǒ lî̤hǒtôbǎ akû tokhlǒnu, sǒhtûpwa̤ asǎ kû̌ wî̤̌plò̌shǐ dǒ kòyò hî̌lṳ̌ dǒ lî̤hǒtôbǎ akûnu Cǒmara gǔ phî̌ tephekè kû̌ apě. A ǎbǎpe sǒhtûpwa̤ asǎ tô̤̌. A nṳ̌bǎ pe dǒ wî̤̌plò̌shǐ akû tô̤̌.

20Kòyò dǒ a khòlṳ̌ kû̌ lǒ̤bò ta̤we̤ta̤kè hǒtokhlǒ tôpwa̤nu, a hî̌ kû̌, “O, he gǔ hè pě,” Ame̤, ǒ Běcǎ Yeshǔ Khrǐ, hèlò̤mò̌.

21Běcǎ Yeshǔ Khrǐ abwǐsîrî ô̌cu pû kû̌ Cǒmara a kòyò pṳ̂̌꤮ tôpwa̤ nî̌꤮. Ame̤.