Rev 3 | KxfSCKXF | STEP | “Wě̤cû̌ lî̤nu dǒ Shadǐ ta̤dòkû a tanaphû̌ a ô̌nu,” a hî̌ he pô̤̌nu dě a hî̌ kû̌, “Ta̤we̤ta̤kè numî̌ a ô̌ dǒ pwa̤pṳ̂̌měǐ Cǒmara a yôla plò̌shǐ susô̌tôpwa̤ kû̌ shǎnu susô̌tômè a ô̌ hè. Na ma̤kwè̌ mî̌titè numî̌ he sî̌ganǎ̤. Na ô̌htûpwa̤ cǒ kû̌ he ta̤ hî̌ pô̤̌nu bǎbǎkǎlè na gû̌ hekò tô̤̌, na sô̌sô̌pwǎkû̌ kòyòsi.

Revelation of John 3

Sûcû̌ ta̤we̤ta̤kè dǒ Sadǐ ta̤dòkû a ô̌

1 “Wě̤cû̌ lî̤nu dǒ Shadǐ ta̤dòkû a tanaphû̌ a ô̌nu,” a hî̌ he pô̤̌nu dě a hî̌ kû̌, “Ta̤we̤ta̤kè numî̌ a ô̌ dǒ pwa̤pṳ̂̌měǐ Cǒmara a yôla plò̌shǐ susô̌tôpwa̤ kû̌ shǎnu susô̌tômè a ô̌ hè. Na ma̤kwè̌ mî̌titè numî̌ he sî̌ganǎ̤. Na ô̌htûpwa̤ cǒ kû̌ he ta̤ hî̌ pô̤̌nu bǎbǎkǎlè na gû̌ hekò tô̤̌, na sô̌sô̌pwǎkû̌ kòyòsi. 2 Pô̤̌nu akhû̌akhî, hǎmôô̌ pemǎ̤, ihtǒmò̌, ta̤wô̌ dǒ a ô̌kè pe kû̌ na tokhlǒnu, a glè̌ sihǒ dě ǐshû̌ǐshohtò̌ sô̌ mò̌ anu, ma̤titèhî̌dě, he kè̌shǐ kû̌ ta̤ dǒ na ma̤hto tokhlǒnu, alǒabe dǒ he Cǒmara a lô̤mô̤̌ tô̤̌. 3 Ma̤pô̤̌nudě gènè̤htò̌nṳ̌ sô̌ mò̌ ta̤dǒ kòyò sû̌ǐ hto nanu tokhlǒ kû̌ ta̤dǒ na ganǎ̤de hto nutokhlǒ. Jûǎ ta̤nutokhlǒ dě yò̤lǎ̤plǎdî̌kè nanǎ̤nu. Kè̌ na hǎmôô̌ kudǔdǔ pe numî̌ he gǔ hè dǒ naô̌ pô̤̌ pwa̤ǎhǔ tôpwa̤ nupě. He hè bǎkhò̌tè pěnu na sî̌ganǎ̤tô̤̌. ^a

4 “Bǎbǎkǎlè kòyò dǒ a ô̌htûpwa̤ plò̌shǐ dě aje mṳ̂̌plîbòpe bǎ Shadǐ ta̤dòkûkû numî̌ a ô̌pî̌tî̌ pwǎ. Asî gǔ sô̌htò̌ jebû dě a gǔ cû̌ kû̌ he pě, ma̤titèhî̌dě asî gwǎ cû̌ kû̌ he hǒ. 5 Kòyò dǒ a ma̤pè̤̌ta̤ tokhlǒnu kòyò gǔ dǐkûdǐsô̌ htò̌ asî kû̌ jehǐyò̤̌bû pô̤̌onu pě. Htodě ami̤ dǒ a ô̌ bǎ lî̤htûpwa̤ akû tokhlǒnu, he htǔpǐ̤kè bǎ yǎ tô̤̌. ^b Dǒ hepha kû̌ a mǒkhû̌ tanaphû̌ tokhlǒ a lô̤mô̤̌ pěnu he gǔ shôbǐǐ lṳ̌htò̌phlô bǎ asî tokhlǒnu kû̌, asî mî̌ hekòyò pwǎ, pô̤̌nu pě. ^c 6 Pô̤̌nudě na nò̌ku kè̌ô̌ dě ganǎ̤de lô̌khô ta̤ dǒ Yôla Plò̌shǐ Běcǎ pwe̤ǐ ta̤dòkû nutokhlǒ.”

Sûcû̌ ta̤we̤ta̤kè dǒ Philadǐlaphǐ ta̤dòkû a ô̌

7 “Wě̤cû̌ lî̤nu dǒ Philadǐlaphǐ ta̤dòkû a tanaphû̌ a ô̌nu,” a hî̌ he pô̤̌o. Dě a hî̌ kû̌, “Ta̤we̤ta̤kè numî̌ a ô̌ dǒ pwa̤plò̌shǐ pwa̤cǒtè̤ nutôpwa̤ a ô̌ hè. A pṳ̂̌měǐ Khwǐdawi̤ asò̌shî̌. Bǎ a bǔmô takha akhanu, kòyò ma̤bǐjò tôpwǎ̤꤮ tô̤̌. Dě bǎ a ma̤bǐ akhanu, kòyò bǔmôjò tôpwǎ̤꤮ tô̤̌. ^d 8 Na ma̤kwè̌ titènu he sî̌ganǎ̤ pwǎ. Takha dǒ kòyò ma̤bǐjò tôpwǎ̤꤮ tô̤̌nu, he bǔmô bǎ na. Na khû̌shiǎjǎ bǎbǎkǎlè na ganǎ̤de heyô̤̌, na khôkǔ he tô̤̌. 9 Hǎkhû̌tana a ta̤dòkû tôprṳ̂nu, a lòhôlò̤ lô̌khô anǎ̤ kû̌ pa mî̌ Yǔdaphû̌ tokhlǒ, bǎbǎkǎlè asî mî̌ Yǔdaphû̌ mè̤̌tô̤̌. ^e He gǔ nohè dô̌gînî̤lò̤ asî dǒ sî khò̌lôpô̤̌ kòshî̌ pě dě asî pṳ̂̌꤮ tôpwa̤ gǔ sî̌ganǎ̤ kû̌ he mô̤nṳ̌ sî nupě. ^f 10 He ta̤mǎlò̤ dǒ na gǔ sǎphlǒhtû ayanu, na to̤ǐ phǐmě akhû̌akhî, ta̤pò̤̌ta̤sha dǒ a glè̌ hè dǒ hǎkhû̌nu dě a gǔ ma̤kè̌kè̌bò kòyò ô̌dǒ hǎkhû̌ nutôbě bò̌bòpě akhanu, he gǔ tugǔtaka ǐ na pě.

11 “Ayî̤pebǎtô̤̌ he gǔ hè pě. Pô̤̌khô kòyò gǔ phǐtephekè na khû̌glû̌hta tô̤̌nu, pṳ̂̌měǐ wô̌ ta̤ dǒ sî nǐ̤bǎ htonu, ta̤sû̌ǐtòwòǐ dǒ atôabǎnu tokhlǒ nî̌꤮. 12 Kòyò dǒ a ma̤pè̤̌ta̤nu, he gǔ dǐhtûhtò̌ a kû̌ he Cǒmara a ta̤lṳhtò̌hô ahǐtṳ̌, htodě a gǔ ô̌ hènè bǎnu pě. ^g He gǔ wě̤nǎ he Cǒmara ami̤ dǒ alô̤. Htodě he wě̤nǎ he Cǒmara awî̤̌ Wî̤̌yarǔshôle sa ami̤nu dǒ alô̤ pě. Wî̤̌yarǔshôle asanu, a ô̌ bǎ mǒkhû̌ he Cǒmara a ô̌ dě a hèlò̤. Dě he gǔ wě̤pa dô̌ he mi̤sa dǒ alô̤ pě. ^h 13 Na nò̌ku kè̌ô̌ dě ganǎ̤de ta̤ dǒ Yôla Plò̌shǐ Běcǎ shôbǐǐ ta̤dòkû tokhlǒnu.”

Sûcû̌ ta̤we̤ta̤kè dǒ Lò̤̌diki ta̤dòkû a ô̌

14 “Wě̤cû̌ lî̤nu dǒ Lò̤dǐkǐ ta̤dòkû a tanaphû̌ a ô̌nu,” a hî̌ he pô̤̌o. Dě a hî̌ kû̌, “Ta̤we̤ta̤kè numî̌ a hè dǒ kòyò kaǎ kû̌, ‘Ame̤’ nutôpwa̤ a ô̌. A mî̌ pwa̤ dǒ a sǎphlǒcǒ dě a khòlṳ̌ cǒcǒtè̤tè̤ nutôpwa̤ a ô̌. Cǒmara nobô̌lò̤ tutṳ̌ bò ta̤lǒ̤bònu kû̌ a pwǎ. ⁱ 15 Na ma̤ hto kwè̌ mî̌titènu he sî̌ganǎ̤ pwǎ. Na sô̌sô̌kû̌ shi dǒ a gû̌ kû̌ kòyò tô̤̌tô̤̌, a gûjû̌ kû̌ kòyò tô̤̌tô̤̌, he sǎyṳ kû̌ na bǎ gû̌ tô̤̌mî̌ na bǎ gûjû̌ pwǎ. He sǎyṳ hî̌ kû̌ kè̌ gû̌ hekò dě gû̌ shapwǎ̤. Kè̌ sǎyṳ gû̌ tô̤̌ hî̌dě gû̌ tǎ̤ tîkî̌꤮ tǎ̤mǎ̤. 16 Bǎbǎkǎlè na gû̌ tô̤̌tô̤̌, na gûjû̌ tô̤̌tô̤̌. La̤lǎ̤ na la̤ tônô̤pwǎ akhû̌akhî, he htû̌plě hǎhtò̌kè na dǒ he gô̌kû pě. 17 ‘He dû̌yò̤̌htò̌sa dě he lǎ̤lṳ̂ pe tôcǒ tô̤̌, he lǎ̤lṳ̂ titètè̌nu a ô̌ bò hǒ,’ na hî̌ sî pô̤̌nu nî bǎbǎkǎlè na sǎplǎ̤, sǔ ama̤ sǎyṳgwèbǎǐ na, na hǎwǐ̤shèwè̤, na mǐ̤sǎkhǐ, na ô̌koyo dě na sî̌ganǎ̤ ǐtûû̌ nanǎ̤ tô̤̌. 18 Ma̤pô̤̌nudě he dǐsî̌ganǎ̤ htûbǎ na kû̌ pô̤̌khô na gǔ dû̌yò̤̌htò̌sa gû̌ kòyònu, hè pwî̤ hta dǒ heô̌nu. Hta numî̌ kòyò lî̌bòhto kû̌ mî̌ hǒ. Kǎtô̤̌ hè pwî̤ jebû lǎ̤kûlǎ̤sô̌ dǒ heô̌nu dě kûbǐsô̌bǐ na ta̤ô̌kôgle lǎ̤sòwò̤̌ alǎ̤nu. Pô̤̌khô na gǔ kè̌shǐ lîphlôwô̌ ayanu, hè pwî̤ǎ ta̤khû̌ mǐ̤sǎsha dǒ heô̌nu dě cînṳ̌ a dǒ na mǐ̤sǎphlǒkûnu.

19 “Kòyò lǒ̤bò dǒ he mô̤ǐ a tokhlǒnu, he sû̌ǐtòwò ǐ yǎ dě he plèǐ yǎ. Pô̤̌nu akhû̌akhî, bè̌sho na sǎphlǒ dě yò̤lǎ̤plǎdî̌ ge sô̌ nanǎ̤nu. ^j 20 Ganǎ̤de lô̌khô he ihtǒ ô̌bǎ takha lô̤mô̤̌ dě he tôglô̌ takhanu. Kòyò tôpwa̤pwa̤ kè̌ ganǎ̤de he tôglô̌ takha kè̌hî̌ dě bǔmôshěshu yǎ, he gǔ hènṳ̌ ǎcuôcu kû̌ yǎ dě a ǎcuôcu kû̌ he pě.

21 “He ma̤pè̤̌ hto dě he hǎnòò̌ kû̌ hepha dǒ tòcòhta akhû̌ hǒ. Pô̤̌nudě kòyò dǒ a ma̤pè̤̌ta̤ tokhlǒnu, he nohǎnòò̌ asî kû̌ he dǒ he tòcòhta akhû̌ nupě. 22 Na nò̌ku kè̌ô̌ hî̌dě ganǎ̤de ta̤ dǒ Yôla Plò̌shǐ Běcǎ shôbǐǐ ta̤dòkû tokhlǒnu.”