Rev 4 | KxfSCKXF | STEP | Ta̤nu tokhlǒ htodě he kè̌shǐ nǎpô̤̌ ta̤ashǔshawa̤ tôcǒ. Dǒ mǒkhû̌, takha tôbǎ htǔmô dě he ganǎ̤de alě̤pwe̤htò̌ tôcǒ dě apwe̤ sô̌sô̌kû̌ kǐlû, pô̤̌ he ganǎ̤de hto dǒ asakhû̌lû̌khanu, dě a hî̌bǎ he dě a hî̌ kû̌, “Htò̌bǒo, hǒtokhlǒ htûhtò̌ htopě dě mî̌titè bǎ htûhtò̌ kwè̌꤮ pěnu, he dǔlè̌lṳ̌ bǎ na.”

Revelation of John 4

Kòyò cubucabahtò̌ Cǒmara dǒ mǒkhû̌ shilǎ̤gǎkû

1 Ta̤nu tokhlǒ htodě he kè̌shǐ nǎpô̤̌ ta̤ashǔshawa̤ tôcǒ. Dǒ mǒkhû̌, takha tôbǎ htǔmô dě he ganǎ̤de alě̤pwe̤htò̌ tôcǒ dě apwe̤ sô̌sô̌kû̌ kǐlû, pô̤̌ he ganǎ̤de hto dǒ asakhû̌lû̌khanu, dě a hî̌bǎ he dě a hî̌ kû̌, “Htò̌bǒo, hǒtokhlǒ htûhtò̌ htopě dě mî̌titè bǎ htûhtò̌ kwè̌꤮ pěnu, he dǔlè̌lṳ̌ bǎ na.” 2 Htodě Yôla Plò̌shǐ Běcǎ pṳ̂̌mě sělě he dě dǒ mǒkhû̌nu khwǐ a tòcòhta ô̌ tôbǎ dě kòyò hǎnòò̌ dǒ akhû̌nu tôpwa̤. ^a 3 Kòyò nutôpwa̤ amǐ̤sǎ kakha sô̌sô̌kû̌ lǒ̤li̤pi̤sǐ dǒ kòyò kaǎ kû̌ Jěsôphô tômè kû̌ lǒ̤lî̤lo̤ dǒ kò kaǎ kû̌ Shadǐû tokhlǒ, htodě bǎ khwǐ tòcòhta akòshî̌nu, kǒwǒshibô ô̌ te̤we̤bò lû̌û asô̌sô̌kû̌ lǒ̤sukiji dǒ kò kaǎ kû̌ È̌môrô. 4 Khwǐ tòcòhta dǒ ashǔshawa̤ ginǐ̤shi kû̌ lǐ̤mènu a ô̌te̤we̤ kû̌ khwǐcôphǎ tòcòhtanu dě khwǐ côphǎ tòcòhta tokhlǒ akhû̌nu, mǒ̤khumǒ̤pwǎ̤ ginǐ̤shi kû̌ sò̌lǐ̤ dǒ a sô̌htò̌ jebû dě a glû̌htò̌ khû̌glû̌hta tokhlǒ hǎnòò̌ô̌ lô̌khô bǎnu. 5 Bǎnuakha, dǒ khwǐ tòcòhta nutôbǎ akûnu, shî̌lî̌bǒhtò̌, mǒgǒlayî̤̌, shî̌lî̌lò̤ lǒ̤bò. ^b Dǒ khwǐ tòcòhta alô̤mô̤nu, mî̌tè̌ko susô̌tôko amè̤̌kû̌ Cǒmara a Yôla Plò̌shǐ susô̌tômènu, ^c agè̌ plô̤̌htò̌ bǎnu. ^d 6 Bǎ khwǐ tòcòhta alô̤mô̤nu, shikoǒdû̌ aplò̌kishǐ dǒ asô̌sô̌kû̌ lǒ̤ bûsulǔ tômènu a ô̌ tôkoǒ. ^e

Ta̤htûpwa̤ lǐ̤do dǒ a mǐ̤sǎphlǒ ô̌ bò dǒ alô̤mô̤̌nu, dǒ alô̤mô̤̌mô̤̌ dǒ anô̌kòkò, a ô̌ te̤we̤ bò bǎ khwǐ tòcòhta akòshî̌nu. ^f 7 Awǐlǒ tôdonu asô̌sô̌kû̌ khî, ginǐ̤do tôdonu asô̌sô̌kû̌ pṳ̂̌phadû̌, sudo tôdonu amǐ̤sǎ sô̌sô̌kû̌ kòyò mǐ̤sǎ dě lǐ̤do tôdonu, asô̌sô̌kû̌ lě̤dû̌ dǒ a wi̤ dǒ mǒlǎ̤nu. 8 Bò̌bò lǐ̤donu, tôdo kû̌ tôdo nî̌ a děge ô̌ a bǎ susô̌, a mǐ̤sǎphlǒ tokhlǒnu, a ô̌ bò nǎ̤tôpwa̤bò, a ô̌ bò dǒ aděgelǎ̤. Asî sǎwǐ htû̌sò̌htò̌ pṳ̂̌ni̤ni̤꤮ pṳ̂̌sasa a ô̌kǔ tôplǎ꤮ tô̤̌. Dě a sǎwǐ htû̌sò̌htò̌ lô̌khô kû̌, ^g

“Běcǎ Cǒmara dǒ a ma̤jòta̤ lǒ̤꤮ bò dǒ a ô̌htûpwa̤ dǒ něhǎlaukha, dě a ô̌htûpwa̤ tǒ̤lò̤ khònò̤̌, htodě a gǔ ô̌htûpwa̤ hèpô̤̌ tôpwa̤nu, plò̌shǐ, plò̌shǐ, plò̌shǐ.” ^h

9 Ta̤htûpwa̤ lǐ̤do nî̌, a sǎwǐhtò̌ a bwǐdû̌sîrîhtû htodě bè̌dubè̌nǎ̤ dě hî̌bwǐhî̌sîrîhtò̌ Cǒmara dǒ a hǎnòò̌ dǒ khwǐ tòcòhta akhû̌ dǒ a htûpwa̤ tûjû̌pwa̤ talakhǎnu tôpwa̤. Dě bǎ asî sǎwǐhtò̌ pô̤̌o akhanu, 10 Mǒ̤khumǒ̤pwǎ̤ ginǐ̤shi kû̌ sò̌lǐ̤nu a dô̌gînî̤lò̤ dǒ pwa̤ hǎnòò̌ dǒ khwǐ a tòcòhta akhû̌ nutôpwa̤ lô̤mô̤̌ dě a cabahtò̌ kòyò dǒ a htûpwa̤ tûjû̌pwa̤nu tôpwa̤. Asî bè̌tě̤kè a khû̌glû̌hta nutokhlǒ dǒ khwǐ tòcòhta alô̤mô̤̌ dě a sǎwǐhtò̌ lô̌khô kû̌,

11 “Ǒ pa Běcǎ Cǒmara, na gwǎgwè nǐ̤bǎ ta̤bwǐdû̌sîrîhtû, bè̌dû̌bè̌htû kû̌ ta̤pô̤ta̤pwǎ̤ hǒ, ma̤titèhî̌dě na bô̌lò̤ ta̤ lǒ̤꤮ bò dě na bô̌lò̤ asî dě na bè̌ htûpwa̤ asî jû̌ tûû̌ na sǎphlǒnu.”