Rev 5 | KxfSCKXF | STEP | He kè̌shǐ lî̤ tûlû tôklo ô̌ dǒ pwa̤hǎnòò̌ dǒ khwǐ tòcòhta nutôpwa̤ a cǔtômû nutôkhô. Lî̤tûlûnu, kòyò wě̤ bò kû̌ lî̤phlǒ ginǐ̤khôginǐ̤gî̌ lǒ̤bò dě kòyò klǎiměcu lû̌û kû̌ ta̤ma̤mǎma̤dòǐ susô̌tôkǔ.

Revelation of John 5

Lî̤ tûlû tôklo kû̌ sû̌phû̌

1 He kè̌shǐ lî̤ tûlû tôklo ô̌ dǒ pwa̤hǎnòò̌ dǒ khwǐ tòcòhta nutôpwa̤ a cǔtômû nutôkhô. Lî̤tûlûnu, kòyò wě̤ bò kû̌ lî̤phlǒ ginǐ̤khôginǐ̤gî̌ lǒ̤bò dě kòyò klǎiměcu lû̌û kû̌ ta̤ma̤mǎma̤dòǐ susô̌tôkǔ. ^a 2 Dě he kè̌shǐ mǒkhû̌tanaphû̌ khû̌ǎshû̌ tôpwa̤ yî̤̌gǔhtò̌shû̌ dě a dǐsî̌ganǎ̤ bǎ kòyò kû̌, “Kòyò dǒ a gwǎ kèè̌mô bǎ kòyò ta̤ma̤mǎma̤dòǐ dǒ kòyò klǎicumě tokhlǒ dě a bǔmôhtò̌ lî̤tûlû numî̌ mò̌pè?” 3 Bǎbǎkǎlè dǒ mǒkhû̌ bǎbǎ, dǒ hǎkhû̌ bǎbǎ, dǒ lṳ̌gǎnu bǎbǎ, lî̤tûlûnu, kòyò gwǎ kû̌ ta̤ kèè̌mô yǎ tôpwǎ̤꤮ tô̤̌, kòyò dô̌ jò tôpwǎ̤꤮ tô̤̌. 4 Kòyò dǒ a gwǎgwè bǔmô lî̤tûlû dě dô̌ yǎnu a ô̌ tôpwǎ̤꤮ tô̤̌ akhû̌akhî, he hǎyî̤̌kasa kè. 5 Htodě dǒ mǒ̤pwǎ̤ tokhlǒ akla tôpwa̤nu, a hî̌ he kû̌, “Hǎ tǎ̤mǎ̤, Yǔda khlilèphû̌ khî nutôdo, Khûdawi̤ akhlilè gelò̤ tutṳ̌ tôpwa̤nu, a nǐ̤bǎ ta̤ma̤pè̤̌ hǒ, ^b dě a kèè̌kè ta̤ma̤mǎma̤dòǐ susô̌tôkǔnu dě a bǔmô bǎ pa lî̤tûlû numî̌ anǐ̤ hǒ.” ^c

6 Bǎnuakha he kè̌shǐ sû̌phû̌ tôdo ihtǒ ô̌dǒ khwǐ tòcòhta klǎmakû nutôkû. Ta̤htûpwa̤ lǐ̤donu kû̌ mǒ̤khumǒ̤pwǎ̤ tokhlǒ ô̌te̤we̤ ǐbò yǎ. ^d Sû̌phû̌ dǒ a ô̌lṳ̌htò̌ tôdo nî̌ a sô̌sô̌ kû̌ kòyò ma̤si hto lû̌ûnu. Ano̤ ô̌ susô̌tôbô, htodě a mǐ̤sǎphlǒ ô̌ susô̌tôphlǒ, hǒnumî̌ Cǒmara a yôla plò̌shǐ susô̌tômè dǒ a sûcû̌ asî dǒ gûlǎ̤ pṳ̂̌꤮ tûkû dǒ hǎkhû̌ nuhǒ. 7 Sû̌phû̌ nî̌, a cû̌phî̌ lî̤tûlû dǒ a ô̌ bǎ pwa̤hǎnòò̌ dǒ côphǎ tòcòhta akhû̌ nutôpwa̤ acǔtômû akûnu. 8 Bǎ a pṳ̂̌měǐ lî̤tûlû akhanu, ta̤htûpwa̤ kû̌ mǒ̤khumǒ̤pwǎ̤ ginǐ̤shi kû̌ sò̌lǐ̤ nî̌ dô̌gînî̤lò̤ dǒ sû̌phû̌ nutôdo a lô̤mô̤̌. Asî tôdo kû̌ tôdo, tôpwa̤ kû̌ tôpwa̤ nî̌, a lǎ̤dǒ tǐtu tegwe ô̌ htodě a ô̌ kû̌ balějôwô̤hta tokhlǒ. Balěhta tokhlǒ nî̌ a ô̌ be kû̌ ta̤numû̌. Ta̤numû̌ tokhlǒ mî̌ Cǒmara a kòyò a ta̤kwicaba nutokhlǒ hǒ. ^e

9 Asî sǎwǐ lî̤sǎwǐ asa tôshǒ kû̌,

“Na gwǎgwè kû̌ na phî̌ lî̤tûlû dě kèè̌kè ta̤ma̤mǎma̤dòǐ tokhlǒnu. Ma̤titèhî̌dě kòyò ma̤si hto na akhû̌akhî, pô̤̌khô kòyò tokhlǒ gǔ htûhtò̌ Cǒmara atanu na ma̤hǎplǎge asî kû̌ nasǐ dě kòyòhǎkhû̌phû̌ tokhlǒkhlǒ dǒ a ô̌ bǎ kòyò plô̤̌ pṳ̂̌tôplô̤̌, yô̤̌ pṳ̂̌tôyô̤̌, kòyò pṳ̂̌tôcǒ kû̌ kòyò pṳ̂̌tôkhli akla tokhlǒnu, na ma̤hǎplǎge bǎ hto kû̌ Cǒmara hǒ. ^f 10 Asî gǔ ma̤ Cǒmara a ta̤phǐta̤ma̤ ayanu, na dǐhtûhtò̌ asî kû̌ pwa̤shû̌gǎ tokhlǒ dǒ Cǒmara ashiagǎkû hǒ. Dě asî gǔ pǒta̤ dǒ hǎkhû̌nu pě.” ^g

11 Htodě, he kè̌shǐ dě he ganǎ̤de mǒkhû̌ tanaphû̌ ô̌ kû̌ asěkû kû̌mî̌ asěkû dě dô̌bǎpè̤̌bò pe alě̤pwe̤htò̌ nutokhlǒ tô̤̌. Dě asî ô̌te̤we̤ lô̌khô khwǐ tòcòhta kû̌ ta̤htûpwa̤nu lǐ̤do kû̌ mǒ̤khumǒ̤pwǎ̤ nutokhlǒ. ^h 12 Dě asî kaǎgǔ sǎwǐ shû̌ lô̌khô kû̌,

“Sû̌phû̌ dǒ kòyò ma̤si lû̌ûnu, a gwǎgwè nǐ̤bǎ pû ta̤pô̤ta̤phǎ, ta̤dû̌yò̤̌htò̌sa, ta̤sî̌ta̤jò̌, ta̤khû̌ta̤ǎ, ta̤bè̌dubè̌nǎ̤ lû̌û, ta̤bwǐdû̌sîrîhtû kû̌ ta̤htû̌sò̌htò̌ nunî̌꤮.”

13 Dě he ganǎ̤de lǒ̤bò ta̤ dǒ ta̤htûpwa̤ ô̌ nutokhlǒ dǒ a ô̌ bǎ mǒkhû̌ sî bǎbǎ, dǒ hǎkhû̌ sî bǎbǎ, dǒ hǎlǎ̤ sî bǎbǎ, dǒ shidû̌te̤we̤ alǎ̤ sî bǎbǎ, lǒ̤bò ta̤bô̌lò̤ ô̌ dǒ mǒlǎ̤ sînu bǎbǎ, a sǎwǐhtò̌ dě a hî̌ lô̌khô pô̤̌o,

“Ta̤htû̌sò̌htò̌, ta̤bwǐdû̌sîrîhtû, ta̤bè̌dubè̌nǎ̤ kû̌ ta̤pô̤ta̤pwǎ̤ nî̌ a ô̌ pû kû̌ kòyò dǒ a hǎnòò̌ dǒ khwǐ tòcòhta akhû̌ nutôpwa̤ kû̌ sû̌phû̌ nutôdo tûjû̌pwa̤ talakhǎ nî̌꤮.”

14 Ta̤htûpwa̤ lǐ̤do nî̌ a hî̌shěshu kû̌, “Ame̤” htodě mǒ̤khumǒ̤pwǎ̤ tokhlǒ dô̌gînî̤lò̤ dě cubucabahtò̌ Cǒmara kû̌ sû̌phû̌ nutôdo.