Rev 8 | KxfSCKXF | STEP | Bǎ sû̌phû̌ kèè̌mô ta̤ma̤mě a ta̤ma̤mǎma̤dòǐ akǔ susô̌tôkǔ nutôkǔ akha, dǒ mǒkhû̌nu, ta̤ô̌sǔtukǔ ô̌htò̌ yî̤ wò̌wè̌ mî̌nî̌ sushi bǎnu.

Revelation of John 8

Ta̤ma̤mě ta̤ma̤mǎma̤dòǐ akǔ susô̌tôkǔ nutôkǔ

1 Bǎ sû̌phû̌ kèè̌mô ta̤ma̤mě a ta̤ma̤mǎma̤dòǐ akǔ susô̌tôkǔ nutôkǔ akha, dǒ mǒkhû̌nu, ta̤ô̌sǔtukǔ ô̌htò̌ yî̤ wò̌wè̌ mî̌nî̌ sushi bǎnu.

2 Bǎnuakha he kè̌shǐ tanaphû̌ susô̌tôpwa̤ dǒ a ma̤ Cǒmara ata̤ma̤ dě a ihtǒ ô̌ dǒ alô̤mô̤̌ pṳ̂̌taplǎ, dě kòyò ǐ asî kǐlû susô̌tômè.

3 Dě tanaphû̌ ashǔshawa̤ dǒ a pṳ̂̌měǐ balěhta taa dǒ kòyò lǎ̤shû̌uhtò̌ kû̌ ta̤numû̌ tôpwa̤nu, a hèihtǒô̌ bǎ ta̤lṳhtò̌awǎ̤ akòshî̌nu. Kòyò ǐ dû̌wî̤ yǎ ta̤numû̌ tokhlǒ dǒ a gǔ shû̌nṳ̌be bǎ Cǒmara a kòyò plò̌shǐ lǒ̤bò tokhlǒ a ta̤kwicaba. ^a Htodě a gǔ lṳhtò̌ ta̤nutokhlǒ dǒ ta̤lṳhtò̌awǎ̤hta alô̤. Ta̤lṳhtò̌awǎ̤hta numî̌ a ô̌ dǒ khwǐ a tòcòhta alô̤mô̤̌nu. ^b 4 Ta̤numû̌ akhǔnu kû̌ kòyòplò̌shǐ tokhlǒ a ta̤kwicaba tokhlǒnu, a ô̌ dǒ mǒkhû̌tanaphû̌ nutôpwa̤ a cǔdekû dě a khǔhtò̌ wô̤̌wô̤̌ lû̌ dǒ Cǒmara a ô̌. 5 Pô̤̌nuhtodě tanaphû̌ nutôpwa̤ nî̌, a phî̌ mî̌klû̌ dǒ ta̤lṳhtò̌wǎ̤ alô̤ dě a shû̌nṳ̌bǎ dô̌ lǎ̤shû̌u ta̤numû̌ a balěhta taa hǒo akûnu. ^c Htodě a pǎ̤lò̤ dǒ hǎkhû̌ dě shî̌lî̌bǒ, mǒgǒ, shî̌lî̌lò̤ htodě tanahtû̌de ô̌htûhtò̌ bǎ hǎkhû̌nu. ^d

Kǐlû tokhlǒ

6 Bǎnuakha tanaphû̌ susô̌tôpwa̤, dǒ a pṳ̂̌měǐ kǐlû susô̌tômè tokhlǒnu ô̌ tîwî̌tòwò nǎ lô̌khô anǎ̤ dǒ a gǔ ǔhtò̌ kǐlû tokhlǒ.

7 Bǎ tanaphû̌ awǐlǒ tôpwa̤ ǔhtò̌ kǐlû akhanu, kòyò pǎ̤lò̤tě̤ siwǐ̤jǐ. Htodě kòyò pǎ̤lò̤tě̤ sǐ dǒ a sǐlò̤ kû̌ mî̌ dǒ hǎkhû̌nu. Htodě mî̌ ubòkè hǎkhû̌nu sucôtôcô, sǒmṳ̌ tokhlǒ sucôtôcô, htodě a u bò mi̤mṳ̌ kû̌ sǒdogotǒ̤ lǒ̤bò. ^e

8 Pô̤̌nuhtodě bǎ tanaphû̌ sò̌ginǐ̤ tôpwa̤ ǔhtò̌ kǐlû akhanu, ta̤tôcǒ dǒ asô̌sô̌kû̌ mî̌gè̌plô̤̌htò̌ khôlôdû̌ tômènu kòyò wîlò̤ a dǒ shidû̌shite̤we̤kû. Shidû̌shite̤we̤ sucôtôcônu a htûhtò̌ bòkè sǐ. 9 Ta̤phû̌ta̤wè̤ ô̌ dǒ shidû̌shite̤we̤kû tokhlǒnu, a sikè sucôtôcô, htodě sǒkhlidû̌ pî̌kè sucôtôcô.

10 Htodě tanaphû̌ supwa̤ tôpwa̤ ǔhtò̌ akǐlû akhanu, shǎdû̌ tômè dǒ a lîtîklî̌ asô̌sô̌kû̌ mî̌tè̌ko tômè ô̌ dǒ mǒlǎ̤ lò̤tě̤ dě a lò̤tě̤nṳ̌ dǒ shilô̤̌mǒ̤ tokhlǒ akû sucôtôcô, a lò̤tě̤nṳ̌ dǒ shipo̤hǎhtò̌ tokhlǒ akû sucôtôcô. ^f 11 Dě shǎ nutômè nî̌, ami̤ kû̌ “Ta̤khǎ,” dě shi khǎkèbò sucôtôcô. Kòyò ô lô̌khô shikhǎnu akhû̌akhî, a si dû̌wî̤kè. ^g

12 Bǎ tanaphû̌ lǐ̤pwa̤ tôpwa̤ ǔhtò̌ kǐlû akhanu, lṳmṳ̌, la, shǎ sî tokhlǒnu, a pî̌kè sucôtôcô. A ta̤lî shěkîtrî̌ tokhlǒnu, a hǎmǎkè sucôtôcô. Lṳmṳ̌sha khǐkè sucôtôcô, dě lṳmṳ̌khǐ akhanu, la, shǎ tokhlǒ a khǐkè sucôtôcô. ^h

13 Bǎnuakha he kè̌shǐ lě̤dû̌ tôbǎ wi̤ dǒ mǒlǎ̤ dě he ganǎ̤de apwe̤htò̌ kû̌, “Tanaphû̌ dǒ ashǔshawa̤nu sò̌su glè̌ ǔhǎhtò̌ kǐlû akhû̌akhî, kòyò lǒ̤bò ô̌ dǒ hǎkhû̌běkhû̌ tokhlǒ gǔ ô̌ kû̌ ta̤jî̌ta̤jû̌, ta̤jî̌ta̤jû̌, ta̤jî̌ta̤jû̌,” a pwe̤htò̌ pô̤̌nu.