Romans 1

Khûpò̌lǔ a ta̤hî̌mô̤hî̌wô̌

1He mî̌ Khûpò̌lǔ. He wě̤cû̌bǎ sî lî̤ hǒtôbǎ. He mî̌ Yeshǔ Khrǐ a jû̌ tôpwa̤. A kaǎ he kû̌ he gǔ htûhtò̌ pwa̤nophû̌ tôpwa̤, htodě a rû̌htò̌ he kû̌ he gǔ shôbǐǐlṳ̌ bǎ kòyò kû̌ Cǒmara a ta̤sǎlě̤we̤kè. 2Ta̤sǎlě̤we̤kè nî̌, Cǒmara olò̤nǎ yî̤gîpi̤hto ayô̤̌ dǒ꤮ wǐkha kû̌ apiwi̤pèshè tokhlǒ pô̤̌ a wě̤nǎ hto dǒ lî̤plò̌shǐ akûnu. 3Ta̤sǎlě̤we̤kè numî̌ amè̤̌kû̌ aphû̌khû dǒ pa Běcǎ Yeshǔ Khrǐnu awe̤akè dǒ a hèlò̤ sûlû kòyòhǎkhû̌phû̌nu tôpwa̤ hǒ, dě a hè ô̌phijǎlò̤ dǒ khwǐ Khûdawi̤ akhlialè akûnu tôpwa̤ hǒ. 4Dǒ Yôla Plò̌shǐ Běcǎ akhû̌akhî, dě bǎ Cǒmara ma̤htûpwa̤ getîkhî pa Běcǎ Yeshǔ Khrǐ dǒ ta̤si kû̌ a ta̤pô̤ta̤phǎ akhanu, a dǔlè̌lṳ̌ lû̌û kû̌ a mî̌ Cǒmara aphû̌khû tôpwa̤ mè̤̌mî̌ca hǒ. 5Dǒ Khrǐ akhû̌akhî, dě Cǒmara ǐlò̤ pa a ta̤bwǐta̤sîrî kû̌ ta̤shěkhǎ wô̌ dǒ pa gǔ htûhtò̌ pwa̤nophû̌ dǒ Khrǐ aya. Pô̤̌khô lǒ̤bò Yǔdaphû̌ mè̤̌tô̤̌ tokhlǒ gǔ yṳ̌nǐ̤nǎ̤nǐ̤ gû̌ kòyò Yeshǔ dě, asî gǔ ganǎ̤de Cǒmara ayô̤̌ ayanudě, a nohtûhtò̌ pa pwǎ. 6Cǒmara kaǎ kòyò dǒ kòyò gǔ htûhtò̌ Yeshǔ Khrǐ a kòyò tokhlǒ aklanu, sî mî̌ sî ô̌nṳ̌ padô̌ bǎnu hǒ.

7Khôbǒsû̌mô̤ ô̌ dǒ Wî̤̌rṳ̂̌me̤ akû sî, Cǒmara mô̤ǐ sî, htokhôtô̤̌ a kaǎ sî dǒ sî gǔ htûhtò̌ a kòyò hǒ.

He wě̤cû̌ bǎ bò sî lî̤hǒtôbǎ. Papha Cǒmara kû̌ pa Běcǎ Yeshǔ Khrǐ gǔ ǐ pû sî ta̤bwǐta̤sîrî kû̌ ta̤gûjû̌kabǎ nî̌꤮.

Khûpò̌lǔ kwicaba dě a hî̌bwǐhî̌sîrî Cǒmara

8Dǒ Yeshǔ Khrǐ akhû̌akhîdě, he hî̌bwǐhî̌sîrî wǐlǒ he Cǒmara dǒ sî lǒ̤꤮ bò aya hǒ, ma̤titèhî̌dě, sî ta̤yṳ̌ta̤nǎ̤nu, kòyò ganǎ̤de bò dǒ hǎkhû̌ tôbě lǒ̤ hǒ. 9Bǎ he kwicabahtò̌ Cǒmara akhanu, he gènè̤htò̌bǎ sî pṳ̂̌꤮ tôplǎ hǒ. He ma̤ mè̤̌mî̌ca pô̤̌o numî̌ Cǒmara sî̌ganǎ̤ pwǎ. He ma̤ lǒ̤sǔlǒ̤sò̌ bǎ a ta̤ma̤ kû̌ he ta̤shôbǐǐ bǎ aphû̌khû Běcǎ Yeshǔ Khrǐ a ta̤sǎlě̤we̤kè akhû̌akhî hǒ. 10He kwicaba yî̤gîpî̤꤮ Cǒmara kû̌, a kè̌ sǎphlǒô̌ kû̌ he gǔ cû̌ô̌lè kû̌ sî kè̌hî̌dě he sǎyṳ cû̌ô̌lè kû̌ sî.

11Ma̤titèhî̌dě pô̤̌khô he gǔ hè ǐ padô̌ sî Cǒmara a Yôla Plò̌shǐ asû nudě, he sǎyṳ hè ô̌lè kû̌ sî. Cǒmara a Yôla Plò̌shǐ asû ǐshû̌ǐshohtò̌ pû sî sǎphlǒ nî̌꤮. 12He sǎyṳ hî̌ titè mî̌ pa ǐkhû̌ǐǎ ma̤jè̌le̤ma̤jè̌ge kè̌khî lû̌û sî ta̤yṳ̌ kû̌ he ta̤yṳ̌ pô̤̌nu nô̤̌pwǎ. 13Pṳ̌wè̤̌ sî꤮, he sǎyṳ nosî̌ganǎ̤ sî kû̌ he ta̤yè̤lò̤nǎ dǒ he gǔ hè ô̌lè kû̌ sî pě awe̤akè numî̌ a ô̌ dû̌wî̤ hǒ. Bǎbǎkǎlè ta̤ma̤ dǐkhû̌dǐdò henu a ô̌ pe tǒ̤ khònò̤̌. Pô̤̌ he ma̤hto dǒ Yǔdaphû̌ mè̤̌tô̤̌ tokhlǒ aklanu, pô̤̌khô kòyò ô̌ dǒ sîkla nutokhlǒ gǔ htûhtò̌kû̌ ta̤dòkûphû̌ ayanudě, he sǎyṳ hè ô̌lè ma̤jè̌ bǎ kòyò nutokhlǒ pwǎ. ^a

14Grě khlilèphû̌ tokhlǒ bǎbǎ, Grě khlilèphû̌ mè̤̌tô̤̌ tokhlǒ bǎbǎ, kòyò jò̌lî̤jò̌yô̤̌ ô̌ bǎbǎ, kòyò jò̌lî̤ ô̌tô̤̌ bǎbǎ, ta̤ma̤ lò̤bǎ he dǒ he bǎ shôbǐǐlṳ̌ bǎ khlilèphû̌ pṳ̂̌꤮ tocǒ kû̌ ta̤sǎlě̤we̤kè hǒ. 15Pô̤̌nu akhû̌akhî, sî dǒ a ô̌ lô̌khô bǎ Wî̤̌rṳ̂̌me̤ akû tokhlǒnu, he sǎphlǒshû̌ shôbǐǐ padô̌ sî kû̌ ta̤sǎlě̤we̤kè awe̤akè nuhǒ.

Ta̤sǎlě̤we̤kè a ta̤pô̤ta̤phǎ

16Dǒ ta̤sǎlě̤we̤kènu akhû̌akhî, he sòwò̤̌tô̤̌, ma̤titèhî̌dě, lǒ̤꤮ bò kòyò dǒ a yṳ̌ǎ ta̤sǎlě̤we̤kè tokhlǒnu, Cǒmara ma̤hǎplǎge bò asî kû̌ a ta̤pô̤ta̤phǎ hǒ. A ma̤hǎplǎge wǐ Yǔdaphû̌ tokhlǒ, htodě a ma̤hǎplǎge pô̤̌ Yǔdaphû̌ mè̤̌tô̤̌ tokhlǒ. ^b 17Cǒmara bè̌cǒbè̌tè̤ kòyò tokhlǒ kû̌ anǎ̤ hî̌tènu mî̌ ta̤sǎlě̤we̤kè nî̌ dǔlè̌lṳ̌htò̌ hǒ. Ta̤cǒta̤tè̤ numî̌ a sahtò̌ kû̌ ta̤yṳ̌ dě a gutṳ̌ kû̌ ta̤yṳ̌. Lî̤plò̌shǐ hî̌ kû̌, “Kòyò dǒ Cǒmara bè̌cǒbè̌tè̤ ata̤yṳ̌ tokhlǒnu, asî nǐ̤bǎ ta̤ô̌htûpwa̤ asa mè̤̌mî̌ca pě.” ^c

Kòyò pṳ̂̌꤮ tôpwa̤ ma̤bò ta̤sǔ

18Cǒmara a ta̤sǎphlǒdû̌ ô̌lṳ̌htò̌ dǒ mǒkhû̌. Dě a ô̌lṳ̌htò̌ bǎ lǒ̤꤮ bò kòyò dǒ a ma̤ ta̤sǔta̤plě nutokhlǒ kû̌ kòyò dǒ a ma̤ ta̤phû̌mò̤̌shǐhtô nutokhlǒ. Dǒ asî ma̤ ta̤phû̌mò̤̌shǐhtô tokhlǒ akhû̌akhîdě, a no sî̌ganǎ̤ bǎ kòyò kû̌ ta̤tě̤ta̤mè̤̌nu tô̤̌. 19Ma̤titèhî̌dě asî lǎ̤sî̌yajò Cǒmara awe̤akènu, a ô̌lṳ̌ lî dǒ asîya, ma̤titèhî̌dě Cǒmara anǎ̤běcǎ sanǎ̤ dǔlè̌lṳ̌ lîtîklǐ bǎ asî hǒ. 20Ma̤titèhî̌dě sahtò̌ dǒ Cǒmara bô̌lò̤ hǎkhû̌ akhanu, kòyò tokhlǒ sî̌yaphlô wô̌wô̌bǎbǎ kû̌ Cǒmara ô̌ kû̌ a ta̤pô̤ta̤phǎ tûjû̌pwa̤, htokhôtô̤̌ asî sî̌ganǎ̤ phlô kû̌ a mî̌ Cǒmara a mè̤̌mî̌ca tôpwa̤hǒ. Cǒmara a ta̤pô̤ta̤pwǎ̤ tûjû̌pwa̤ tokhlǒnu kû̌ a mî̌ Cǒmara mè̤̌mî̌ca tôpwa̤nu, asî kè̌shǐjò tô̤̌ bǎbǎkǎlè asî sî̌ganǎ̤jò pwǎ. Asî kè̌shǐ Cǒmara bô̌lò̤ ta̤nutokhlǒ akhû̌akhî, asî sî̌ganǎ̤jò lô̌khô Cǒmara awe̤akè tokhlǒ pwǎ. Pô̤̌nu akhû̌akhî, lǒ̤bò ta̤dǒ asî ma̤hto tokhlǒnu, asî hî̌htôhî̌lò̤ jò petô̤̌.

21Asî sî̌ganǎ̤hto Cǒmara bǎbǎkǎlè asî bè̌dubè̌nǎ̤ lû̌û pô̤̌ Cǒmara tôpwǎ̤꤮ tô̤̌. A hî̌bwǐhî̌sîrî lû̌û tô̤̌tô̤̌. Pô̤̌nudě asî ata̤gènè̤ tokhlǒnu, a htûhtò̌ bò ta̤tṳ̌dè. Htokhôtô̤̌ asî ta̤gènè̤ tṳ̌dè tokhlǒnu, ta̤khǐsiwi̤ ma̤bǐkè asî hǒ. ^d 22Asî hî̌lò̤ ǐtû̌ lô̌khô anǎ̤ kû̌ a ta̤sî̌ta̤jò̌ ô̌, bǎbǎkǎlè a htû lô̌khô kòyò ǒò̌ phuhtò pwǎ. 23Asî tô cabahtò̌ Cǒmara dǒ a ô̌ kû̌ a ta̤bwǐdû̌sîrîhtû dě a sijòtô̤̌ tôpwa̤, bǎbǎkǎlè a cû̌ caba taplè̌tǒ̤ ta̤yô̤ta̤gî̌ dǒ kòyò bô̌ kû̌ cǔde tokhlǒ. Asî caba ta̤yô̤ta̤gî̌ dǒ asô̌sô̌kû̌ kòyò dǒ a sijò nutokhlǒ, mè̤̌tô̤̌mî̌ asô̌sô̌kû̌ htû̌phû̌yṳ̌phû̌ tokhlǒ, mè̤̌tô̤̌mî̌ asô̌sô̌kû̌ ta̤phû̌ta̤wè̤ tokhlǒ, mè̤̌tô̤̌mî̌ asô̌sô̌kû̌ wṳ̂̌tahtǎ tokhlǒ. ^e

24Pô̤̌nu akhû̌akhî, asî sǎphlǒ sǎyṳ ta̤putupatǎ phû̌mò̤̌shǐhtô hî̌tènu, Cǒmara dǐma̤ asî pwǎ. Dě asî ma̤ sòwò̤̌ ǐtûû̌ bò lû̌û tôpwa̤ kû̌ tôpwa̤. 25A tô yṳ̌ǎ Cǒmara a ta̤tě̤ta̤mè̤̌ bǎbǎkǎlè a htû̌lè̌ tèplè̌kè dě a cû̌ yṳ̌ǎ tûû̌ ta̤lòhǎlòhô. A tô caba pwǎtǒ Cǒmara dě a tô ma̤ bǎ pwǎtǒ̤ pwa̤ dǒ a bô̌lò̤ ta̤ nutôpwa̤ ata̤ma̤ pwǎ bǎbǎkǎlè a cû̌ caba dě cû̌ ma̤ bǎ tǒ̤ ta̤ dǒ Cǒmara bô̌lò̤ lû̌û tokhlǒ ata̤ma̤. Běcǎ nutôpwa̤ mî̌ kòyò htû̌sò̌htò̌ pû yǎ ajû̌jû̌ apwa̤pwa̤ nî̌꤮. Ame̤.

26Dǒ asî ma̤pô̤̌nu akhû̌akhî, Cǒmara ǐlò̤kè asî dǒ sǐshi a ta̤sǎyṳsǎbǎ dǒ a ma̤sòwò̤̌ phû̌mò̤̌ asînu a cǔdekû. Pwa̤mǒ̤ tokhlǒ bǎbǎ, a wîkè alǎ̤klô bǒsû̌ hǎmôô̌ kû̌ pwa̤khû dě pwa̤mǒ̤ kû̌ pwa̤mǒ̤ cû̌ bǒsû̌ hǎmôô̌ kè̌khî sô̌ lû̌û. 27Pwa̤khû tokhlǒnu bǎbǎ a ma̤pô̤̌nu. Asî wîkè alǎ̤klô hǎmôô̌ kû̌ pwa̤mǒ̤ tokhlǒnu dě asǐshi a ta̤sǎyṳnu a sǎyṳcû̌ hǎmôô̌ sô̌ kû̌ pwa̤khû. Pwa̤khû tokhlǒnu a ma̤ sòwò̤̌ tûû̌ kè̌khîsô̌ lû̌û tôpwa̤ kû̌ tôpwa̤. Dǒ asî ma̤ta̤sǔta̤plě pô̤̌o akhû̌akhî, Cǒmara gǔ cî̌htò̌ asî pô̤̌ a gwǎ kû̌ asînu hǒ.

28Htokhôtô̤̌ asî sî̌ganǎ̤ hto Cǒmara awe̤akè bǎbǎkǎlè, a phî̌shǐshu lô̌khô tô̤̌, a dò̌tûklû̌ akhû̌akhî, Cǒmara nopǒkè asî kû̌ asî a ta̤gènè̤ phû̌mò̤̌shǐhtô tokhlǒ dě a dǐma̤ lô̌khô asî kû̌ ta̤ dǒ a gwǎ ma̤tô̤̌ nutokhlǒ hǒ. 29Asî ta̤ô̌htûpwa̤nu a lǒbe jî̌ kû̌ ta̤tě̤ta̤mè̤̌ tô̤̌, ta̤phû̌mò̤̌shǐhtô, ta̤sǎyṳsǎbǎ phî̌sigwǐyǒsaphǎ tûû̌ aya, htodě a lǒbe kû̌ ta̤sǎkhwè̌ kòyò, ma̤si kòyò, po̤kòyò, lòhǎlòhôǎ kòyò, sǎkhěkhû̌khwè kòyò, dô̌mi̤dô̌yô̤ kòyò. 30Htodě asî hî̌pǐ̤ kòyòmi̤, sǎkhî̌ Cǒmara, ǐshoǐbě, phî̌dû̌ phî̌htò̌lǒ nǎ̤, htû̌sò̌ ǐtûû̌ anǎ̤. Asî gènè̤pô̤̌ dû̌wî̤pô̤̌ klè̌ asa tokhlǒ dǒ a ma̤ dû̌htò̌ pô̤̌ ta̤phû̌mò̤̌shǐhtô. Asî ganǎ̤de lô̌khô mǒ̤pha yô̤̌tô̤̌. 31Asî mî̌ kòyò ǒò̌ kòyò phuhtò, acǒ kû̌ ayô̤̌ tô̤̌. A ta̤mô̤ǐ kòyònu a ô̌ tô̤̌, a gwèbǎǐ kòyònu a ô̌ tô̤̌. 32Cǒmara a ta̤sû̌ta̤tòwò hî̌ kû̌ kòyò dǒ a ô̌htûpwa̤ pô̤̌nu tokhlǒ mî̌ a tôsinu a sî̌ganǎ̤ pwǎ, bǎbǎkǎlè a ma̤ sělě pô̤̌ pwǎ. Htokhôtô̤̌ kòyò kè̌ ma̤gû̌ pô̤̌nu hî̌dě asî sǎphlǒmô̤ lô̌khô pwǎ.