Romans 11

Cǒmara gwèbǎǐ Isôrělaphû̌ tokhlǒ

1Pô̤̌nudě he gǔ gwè̌ lô̌khô sî kû̌, mî̌ Cǒmara wîkè akòyò khlilèphû̌ tûû̌ ya? A wîkè nô̌ asî tîkî̌꤮ tô̤̌. Gènè̤ kè̌bǎ lô̌khô he, he mî̌꤮ Isôrělaphû̌ tôpwa̤pwa̤ hî̌mò̌mî̌ PhaAbraha akhlialè, Khûbîyame̤ akhli gelò̤ pwǎ. ^a 2Cǒmara rû̌htò̌ hto akòyò dǒ sakhû̌lû̌khanu, tokhlǒnu a wîkè bǎ lû̌û tô̤̌. Lî̤plò̌shǐ hî̌ piwi̤pèshè Khûělǐya awe̤akè numî̌ sî sî̌ganǎ̤ bǎ tô̤̌ ya? A kookashahtò̌ Cǒmara kû̌ akhlilèphû̌ Isôrěla tokhlǒ awe̤akè dě a hî̌ kû̌, 3“Ǒ꤮ Běcǎ꤮, asî ma̤sikè piwi̤pèshè dǒ na nohè asî nutokhlǒ hǒ. Asî depò̌ bò ta̤lṳhtò̌wǎ̤ tokhlǒ hǒ. A ô̌kè pwǎtǒ̤ he tôpwa̤꤮ nô̤̌ pwǎ, bǎbǎkǎlè kòyò kè̌lǎma̤si hehe.” ^b 4Dě Cǒmara hî̌shěshu getîkhî lû̌û hî̌tè? Cǒmara hî̌shěshu lû̌û kû̌, “Na ô̌kè tû̌ tôpwa̤nô̤̌ mè̤̌bǎtô̤̌, he dǐô̌kè pe kòyò susô̌tirǐ. Kòyòyô̤ dǒ kòyò kaǎ kû̌ Balǎ nu, asî hǒtokhlǒ dô̌gînî̤ û̌lò̤ cabahtò̌ gû̌ kò tô̤̌.” ^c 5Khònò̤̌ bǎbǎ a sô̌sô̌ pô̤̌nuhǒ, Cǒmara rû̌htò̌ pa kû̌ abwǐdû̌asîrîhtû tokhlǒnu, a kashǎ ô̌kèpe tîkî̌. 6Kè̌ Cǒmara ma̤hǎplǎge asî kû̌ ta̤bwǐta̤sîrî kè̌hî̌dě, yô̤̌mûyô̤̌sǎ mî̌ dǒ asî ma̤ ta̤wô̌ akhû̌akhî mè̤̌bǎtô̤̌. Dǒ asî ma̤wô̌ta̤ akhû̌khî, kè̌hî̌dě Cǒmara abwǐsîrînu, ta̤ǐkwe sû mè̤pe bǎtô̤̌.

7Pô̤̌nudě, yô̤̌mûyô̤̌sǎ mî̌ amè̤̌kû̌ ta̤ dǒ Isôrělaphû̌ kè̌lǎ ǐtûû̌ nu, a kè̌shǐ ǐtûû̌ tô̤̌. Tǒ̤pwǎ kòyò dǒ Cǒmara rû̌htò̌ asî tokhlǒ kè̌shǐ lô̌khô pwǎ. Lǒ̤꤮ bò a ô̌kè nutokhlǒ mî̌ Cǒmara no ikǒpwǐ̤ bò asî nutokhlǒ hǒ. 8Pô̤̌ lî̤plò̌shǐkû hî̌nǎ kû̌,

“Cǒmara ma̤khǐma̤shôpe̤kè asî sǎphlǒ. Asî kè̌ lô̌khô bǎbǎkǎlè a kè̌shǐ sî̌ganǎ̤ lô̌khô kû̌ kòyò tô̤̌. A ganǎ̤de gû̌ lô̌khô kòyò bǎbǎkǎlè a sî̌yaphlô kû̌ lô̌khô kò tô̤̌. Yǔdaphû̌ tokhlǒ numî̌ a sô̌sô̌ lô̌khô kû̌ hǒonu tǒ̤khònò̤.” ^d

9Htodě Khûdawi̤ hî̌ kû̌,

“Asî ma̤ pwè dě a ǎô ǐ lô̌khô shǎǎ tokhlǒnu, a gǔ htûhtò̌ ǐtûû̌ sô̌ tûû̌ asî dè̌dô pě nî̌꤮. Htodě a gǔ htûhtò̌ asî lǎ̤htò̌tukhu lò̤khǔpo̤ pě nî̌꤮. Asî tô nǐ̤bǎ geshěshu sô̌ alǐ̤ pwǐ꤮ tènu, ma̤ geshǔsô̌ asîta alǐ̤ nî̌꤮. ^e

10Pô̤̌khô asî gǔ kè̌shǐ pe tǎ̤ kòyò ta̤tě̤ta̤mè̤̌ tô̤̌nu, ma̤lakè asî mǐ̤sǎphlǒnu nî̌꤮. Nokhòbǎ wǎ̤tě̤dîjo cukǔ asî kû̌ ta̤pò̤̌ta̤sha tûjû̌pwa̤nu nî̌꤮.” ^f

11Pô̤̌nudě he gǔ gwè̌ kû̌, bǎ Yǔdaphû̌ tokhlǒ htò̌tukhu lò̤khǔpo̤ akhanu, apî̌akè lû̌ ya? Apî̌akè bǎtô̤̌. Asî ma̤tû̌ ta̤sǔ dě, Cǒmara ma̤hǎplǎge Yǔdaphû̌ mè̤̌tô̤̌ tokhlǒ, dě a ma̤ sǎkhě Isôrělaphû̌ tokhlǒ kû̌ asî pwǎ. 12Dǒ asî ma̤ ta̤sǔta̤plě akhû̌akhî, Cǒmara ǐshowî̤ dû̌wî̤ kòyò ô̌ dǒ hǎkhû̌ hǒtôbǎ hǒ. Dǒ asî lò̤jû̌kè Cǒmara a ta̤kè̌dû̌ asî akhû̌akhî, Yǔdaphû̌ mè̤̌tô̤̌ tokhlǒ nǐ̤bǎ lǒbekè Cǒmara a ta̤kè̌dû̌ǐ asî hǒ. Pô̤̌nudě htǔ꤮ lǒ̤bò Yǔdaphû̌ dǒ Cǒmara rû̌htò̌ asî nutokhlǒ gǔ yṳ̌ǎge lǒ̤bòkè Khrǐ akha pěnu, Cǒmara gǔ ǐshowî̤bò kòyò pwǐtè pěnu, gènè̤kè̌kè̌ lô̌khô mò̌.

Ta̤ma̤hǎplǎge dǒ Yǔdaphû̌ mè̤̌tô̤̌ tokhlǒ aya

13Khònò̤̌, he hî̌bǎ kû̌ sî Yǔdaphû̌ mè̤̌tô̤̌ tokhlǒ. Cǒmara no he pô̤̌ pwa̤nophû̌ tôpwa̤ dǒ Yǔdaphû̌ mè̤̌tô̤̌ tokhlǒ aya akhû̌akhî, ta̤ma̤ dǒ Cǒmara ǐ henu he gènè̤dû̌ ǐtûû̌ mî̌ca yǎ. 14Pô̤̌ Cǒmara ma̤wô̌ hto sî Yǔdaphû̌ mè̤̌tô̤̌ tokhlǒ ayanu, he kè̌shuǐ kû̌ pô̤̌khô he gǔ ma̤ sǎkhwè̌ǐ gû̌ hekhô Yǔdaphû̌ tûû̌ tokhlǒ aya, htokhôtô̤̌ pô̤̌khô he gǔ tili̤genṳ̌ asî tokhlǒkhlǒ kû̌ a gǔ nǐ̤bǎ gû̌ kòyò ta̤ma̤hǎplǎge ayanudě, he gènè̤dû̌ ǐtûû̌ mî̌ca ta̤ma̤ dǒ Cǒmara ǐ henu. 15Cǒmara wîkè asî akhû̌akhî, lǒ̤bò kòyò hǎkhû̌phû̌ dǒ ashǔshawa̤ tokhlǒnu a htûhtò̌ tèplè̌sô̌ lû̌û khô hǒ. Kè̌hî̌pô̤̌nu dě htû̌꤮ Cǒmara kaǎmô̤shǔ gesô̌ Yǔdaphû̌ hǒtokhlǒ akhapěnu, a sô̌sô̌kû̌ mî̌titè pěnu gènè̤kè̌mò̌ lô̌khô. A asô̌sô̌kè kû̌ kòyòsi htodě a htûpwa̤ getîkhî sô̌ nupě. 16Yǔdaphû̌ mî̌ asô̌sô̌kû̌ kòyò cemǔ mû̌ humǔ nutôjò. Dǒ humǔ hǒtôjò aklanu, humǔphlǒ awǐlǒ tôphlǒ dǒ kòyò lṳhtò̌ kû̌ Cǒmaranu kè̌ a plò̌shǐ hî̌nu, a plò̌shǐ bòkè tôjò pě. Yǔdaphû̌ tokhlǒnu a sô̌sô̌kû̌ pô̤̌ kû̌ sǒmṳ̌ tôsǒ nuhǒ. Sǒkhò̌wǐ̤ nî̌ a kè̌ aplò̌shǐ hî̌dě amě̤aphò tokhlǒnu a aplò̌shǐ gû̌ lǒ̤bò nô̌ tûû̌ hǒ.

17Yǔdaphû̌ tokhlǒ numî̌ asô̌sô̌kû̌ kòyò cû̌ yǒgǎkè òlǐba do aphò dě kòyò shǒlò̤ lû̌û dǒ we̤kûnu tokhlǒ dě kòyò cû̌ yǒgǎkè kû̌ òlî̌ba mi̤ aphò dǒ mi̤kla nutokhlǒ dě kòyò ge pṳ̂̌htu iculû̌û. Sî Yǔdaphû̌ mè̤̌tô̤̌ tokhlǒ numî̌, asô̌sô̌kû̌ òlǐbami̤ nuhǒ. Khònò̤̌ sî nǐ̤bǎ ta̤ǐshowî̤ dǒ Cǒmara ishowî̤kè Yǔdaphû̌ phiphu dǒ awǐkha tokhlǒ hǒ. Sî nǐ̤bǎ sô̌sô̌kû̌ sǒphò tokhlǒ cî̌ô nǐ̤khû̌nǐ̤ǎ sǒcòshi dǒ a ô̌ dǒ akhò̌wǐ̤kû dě a hè tokhlǒ nuhǒ. 18Bǎbǎkǎlè sî dǒ a mè̤̌ Yǔdaphû̌ mè̤̌tô̤̌ tokhlǒnu, sî tôbǎ hî̌bǎ bè̌dû̌bè̌pwǎ̤ dě hî̌takǎǐ Yǔdaphû̌ dǒ a mî̌ sǒphò dǒ kòyò yǒgǎkè a nutokhlǒ tô̤̌. Sî kè̌ gènè̤ htò̌yô̤̌ ǐtûû̌ sînǎ̤ hî̌dě, gènè̤htò̌sô̌ lô̌khô kû̌, sî ǐkhû̌ǐǎ sǒkhò̌wǐ̤ mè̤̌tô̤̌. Sǒkhò̌wǐ̤ ǐkhû̌ǐǎ nǐ̤ sî pwǎ. 19Sî gǔ hî̌ kû̌, “Pô̤̌khô Cǒmara pṳ̂̌htu tû̌htu henu, a yǒgǎkè sǒphò nutokhlǒ pwǎ.” 20Sî hî̌ numî̌ amè̤̌pwǎ. Bǎbǎkǎlè dǒ asî yṳ̌ǎ Khrǐ tô̤̌ akhû̌akhî, Cǒmara yǒgǎkè sǒphò dǒ a mî̌ Yǔdaphû̌nu pwǎ. Dǒ sî ta̤yṳ̌ta̤nǎ̤ akhû̌akhîdě, Cǒmara tû̌htu icu sî kû̌ sǒmṳ̌nu pwǎ. Pô̤̌nudě gènè̤dû̌ ǐtûû̌ tǎ̤ lô̌khô sînǎ̤ tǎ̤mǎ̤. 21Cǒmara kè̌ sǎleǐ tûû̌ a sǒphòli̤ dǒ a mî̌ Yǔdaphû̌ sî tokhlǒ tô̤̌ kè̌hî̌dě sî mî̌ a sǎleǐ nô̌ tô̤̌tô̤̌.

22Pô̤̌nudě gènè̤ tě̤tě̤mè̤̌mè̤̌ lô̌khô. Cǒmaranu, tôkhômî̌ a gwèbǎǐ a kòyò, tôkhônu a cî̌htò̌ shosho ǐtûû̌ a kòyò. A cî̌htò̌ ǐtûû̌ a kòyò Yǔdaphû̌ dǒ a cû̌ tephekè lû̌û tokhlǒnu bǎbǎkǎlè a sǎyṳgwèbǎǐ ǐtûû̌ sî dǒ a mî̌ Yǔdaphû̌ mè̤̌tô̤̌ nutokhlǒ. Bǎbǎkǎlè sî tô bè̌dubè̌nǎ̤ hènè lô̌khô a ta̤sǎyṳ ǐtûû̌ sînu. Kè̌mè̤̌tô̤̌dě a pè̤̌tṳ̌kè sî pě. 23Yǔdaphû̌ kè̌ htû̌tiwǐ getîkhî sô̌ Cǒmara, dě asî kè̌ yṳ̌ǎ sô̌ lû̌û hî̌nu, a gǔ dô̌bǔ icu getîkhî sô̌ asî kû̌ sǒmṳ̌ nupě, ma̤titèhî̌dě Cǒmara gǔ pṳ̂̌htu tû̌htu getîkhî sô̌ pô̤̌nu mî̌ a ma̤ jòpwǎ. 24Sî Yǔdaphû̌ mè̤̌tô̤̌ tokhlǒnu asô̌sô̌kû̌ òlǐbami̤ aphò nutokhlǒ hǒ, dě kòyò cû̌ yǒgǎkè plǒhtu iculû̌û kû̌ òlǐbadomṳ̌ nutokhlǒ pwǎ. A bǎ ma̤htû khô̌tû̌ sî kû̌ alǎ̤klô ma̤dô̌ǐ nutokhlǒ. Pô̤̌nudě Cǒmara kè̌ dô̌bǔcu getîkhî sǒphò dǒ a pě̤tṳ̌kè dǒ we̤kû nutokhlǒ numî̌ ayûkhlo pě kû̌ a ma̤htû sînu.

Cǒmara gǔ ma̤hǎplǎge Yǔdaphû̌ tokhlǒ

25Pṳ̌wè̤̌ sî, pô̤̌khô sî gǔ phî̌ htò̌yô̤̌dû̌ tǎ̤ sînǎ̤ tǎ̤mǎ̤nu, khònò̤̌ he sǎyṳ nosî̌ganǎ̤ tě̤tě̤mè̤̌mè̤̌ sî kû̌ ta̤tě̤ta̤mè̤̌ adû̌ayô̤̌ dǒ kòyò sî̌yaphlô lû̌û tô̤̌ nutôcǒ, ma̤titèhî̌dě, Cǒmara no ikǒpwǐ̤ Yǔdaphû̌ tokhlǒ. Bǎbǎkǎlè a ikǒpwǐ̤ shò̌gutǔ tǒ̤pwǎ bǎ Cǒmara rû̌htò̌ nǎhto Yǔdaphû̌ mè̤̌tô̤̌ dǒ a yṳ̌ǎ Khrǐ tokhlǒ a kòyò be hǒ pě bǎnu pwǎ. 26Htopědě, lǒ̤bò Isôrělaphû̌ nutokhlǒ nǐ̤bǎ lǒ̤bò ta̤hǎplǎge pě. A gǔ htûhtò̌ pô̤̌ piwi̤pèshè Khûyashǎya wě̤ nǎnu pě. ^g dě a hî̌ kû̌,

“Pwa̤ ma̤hǎplǎge Cǒmara a kòyò hǒtôpwa̤nu a gǔ ô̌ dǒ wî̤̌shǐû dě a hè pě. A phî̌ tephekè lǒ̤bò Phayakû akhlialè nutokhlǒ a ta̤phû̌mò̤̌shǐhtô nutokhlǒ pě.

27Bǎ he phî̌ tephekè htobò asî ta̤sǔ tokhlǒ akhapěnu, he ma̤ lǒbehtò̌ he ta̤olò̤ kû̌ asî dǒ awǐkha nutûmû hǒ.” ^h

28Yǔdaphû̌ tokhlǒ phî̌shěshu ta̤sǎlě̤we̤kè tô̤̌ akhû̌akhî, asî htûhtò̌kè pwa̤ dǒ a sǎkhě Cǒmara tokhlǒ hǒ. Bǎbǎkǎlè sîya dě Cǒmara ǐhto sî sû akhû̌akhî a nǐ̤bwǐsîrî dǒ sî Yǔdaphû̌ mè̤̌tô̤̌ tokhlǒ aya hǒ. Kè̌ kè̌sô̌mò̌ dǒ Yǔdaphû̌ tôkhô hî̌dě Cǒmara rû̌htò̌ hto asî kû̌ a kòyò hǒ akhû̌akhî, a mô̤ǐ tûû̌ asî, ma̤titèhî̌dě a olò̤ nǎhto ayô̤̌ kû̌ asî phiphudû̌ dǒwǐkha tokhlǒ hǒ. 29Ma̤titèhî̌dě Cǒmara ǐlò̤kwe hto sûnu kû̌ kòyò dǒ a rû̌htò̌ lû̌û tokhlǒnu, a hî̌bǎ tîkhlî̌ gepe ayô̤̌ tîkî̌ tô̤̌. 30A sô̌sô̌ kû̌ sî dǒ awǐkhanu hǒ, dǒ awǐkha mî̌ sî jûlě̤phî̌yô̤̌ ganǎ̤de gû̌ kò Cǒmara alě̤ayô̤̌ tô̤̌, bǎbǎkǎlè khònò̤̌ dǒ Yǔdaphû̌ tokhlǒ jûlě̤phî̌yô̤̌ ganǎ̤de gû̌ kòyò Cǒmara ayô̤̌ tô̤̌ akhû̌akhî, Cǒmara gwèbǎǐ sî Yǔdaphû̌ mè̤̌tô̤̌ nutokhlǒ hǒ. 31Pô̤̌nudě, khònò̤̌ Yǔdaphû̌ tokhlǒ ganǎ̤de pe Cǒmara ayô̤̌ tô̤̌. Dě Cǒmara gwèbǎǐ sî akhû̌akhî, tôni̤ni̤ pěnu Yǔdaphû̌ tokhlǒ gǔ nǐ̤bǎ Cǒmara a ta̤gwèbǎǐ pě. 32Ma̤titèhî̌dě pô̤̌khô Cǒmara gǔ gwèbǎǐ lǒ̤bò kòyò pṳ̂̌꤮ tôpwa̤ nudě, a dǒnṳ̌ sô̌sô̌ bò kòyò pṳ̂̌꤮ tôpwa̤ dǒ ta̤ganǎ̤de ayô̤̌ tô̤̌ apô̤kûnu hǒ.

Ta̤htû̌sò̌htò̌ Cǒmara

33Cǒmara a ta̤gwèbǎǐ, a ta̤sî̌ta̤jò̌ kû̌ a ta̤sî̌khû̌sî̌ya tokhlǒnu, adû̌ayô̤̌ mî̌ca. A tîwî̌tòwò ma̤ta̤ tokhlǒnu, kòyò sî̌yahtò̌ bò̌ tôpwa̤꤮ tô̤̌. Aklè̌ tokhlǒnu kòyò sî̌ganǎ̤ bò̌ tôpwa̤꤮ tô̤̌.

ⁱ 34Lî̤plò̌shǐkû hî̌ kû̌,

“Mò̌pè sî̌yahtûbò̌ Cǒmara asǎphlǒ ya? Mò̌pè tôpwa̤ nè̌klè̌nè̌klò bò̌ Cǒmara ya? A ô̌ nô̌ tôpwǎ̤꤮ tô̤̌.” ^j

35“Kòyò dǒ a ma̤bwǐma̤sîrî bǎ dû̌wî̤ Cǒmara dě Cǒmara tô ma̤bwǐma̤sîrî geshěshu lû̌û numî̌ mò̌pè ô̌ ya?” ^k

36Ma̤titèhî̌dě, a bô̌lò̤ ta̤lǒ̤꤮ bò, a kè̌pǒ̤ǐ ta̤lǒ̤꤮ bò kû̌ a ta̤pô̤ta̤pwǎ̤ tokhlǒ, dě dǒ a bô̌lò̤ ta̤pṳ̂̌꤮ tocǒ akhû̌akhî, kòyò htû̌sò̌htò̌ Cǒmara hǒ. Kòyò pṳ̂̌꤮ tôpwa̤ htû̌sòhtò̌ pû Cǒmara ajû̌jû̌ apwa̤pwa̤ nî̌꤮. Ame̤. ^l