Rom 12 | KxfSCKXF | STEP | Pô̤̌nudě, pṳ̌wè̤̌ sî꤮, Cǒmara a ta̤gwèbǎǐ panu, adû̌ayô̤̌ tûlû̌shû̌lě dǒ paya akhû̌akhî, he kwisǎyṳ sî kû̌ sî gǔ ǐlò̤ sî nǎ̤glǒnu dǒ Cǒmara a ô̌ pô̤̌ ta̤lṳ dǒ a htûpwa̤nu, pô̤̌ ta̤lṳ dǒ aplò̌shǐ kû̌ pô̤̌ ta̤lṳ dǒ atô lû̌sǎphlǒ a ta̤sǎyṳnu nî̌꤮. Sî tô cabahtò̌ Cǒmara pô̤̌numî̌ amè̤̌ klè̌ dǒ atôabǎ tôbô hǒ.

Romans 12

Ô̌htûpwa̤bǎ dǒ Cǒmara aya

1 Pô̤̌nudě, pṳ̌wè̤̌ sî꤮, Cǒmara a ta̤gwèbǎǐ panu, adû̌ayô̤̌ tûlû̌shû̌lě dǒ paya akhû̌akhî, he kwisǎyṳ sî kû̌ sî gǔ ǐlò̤ sî nǎ̤glǒnu dǒ Cǒmara a ô̌ pô̤̌ ta̤lṳ dǒ a htûpwa̤nu, pô̤̌ ta̤lṳ dǒ aplò̌shǐ kû̌ pô̤̌ ta̤lṳ dǒ atô lû̌sǎphlǒ a ta̤sǎyṳnu nî̌꤮. Sî tô cabahtò̌ Cǒmara pô̤̌numî̌ amè̤̌ klè̌ dǒ atôabǎ tôbô hǒ. 2 Ô̌htûpwa̤ kè̌lû̌ tǎ̤ pô̤̌ kòyò dǒ a sî̌ganǎ̤ gû̌ kòyò Cǒmara tô̤̌ nutokhlǒ alǎ̤klô ô̌htûpwa̤ nuta̤mǎ̤ nî̌꤮. Pô̤̌khô sî gǔ ô̌htûpwa̤ khô̌ kû̌ asînu dě, nohtû̌lè̌tèplè̌ sǎphlǒ khô̌kè sî ta̤gènè̤ tokhlǒnu kû̌ Cǒmaranu nî̌꤮. Sî kè̌ ma̤pô̤̌nu mî̌ sî sî̌yahè ta̤ dǒ Cǒmara sǎyṳ noma̤ sînu tokhlǒ pwǎ. Htodě sî gǔ sî̌ganǎ̤hè ta̤wô̌, ta̤ma̤mô̤ Cǒmara asǎphlǒ, kû̌ ta̤sî̌ya lǒbehè Cǒmara a ta̤sǎyṳ tokhlǒ pě pwǎ.

3 Dǒ Cǒmara abwǐsîrî khû̌khîdě a bè̌htò̌ he kû̌ he gǔ htû pwa̤nophû̌ tôpwa̤ akhû̌akhî, he shôbǐǐ bò sî pṳ̂̌꤮ tôpwa̤ kû̌, gènè̤dû̌ lǒkhlo tǎ̤ sînǎ̤ kû̌ sî tô gènè̤ lò̤ǐ tûû̌ sînǎ̤nu tǎ̤mǎ̤ nî̌꤮. Mè̤mè̤̌tôkhô sî tôbǎ gènè̤lò̤ sînǎ̤ bǎ atôabǎ nupwǎ. Gwè̌ lò̤kè̌mò̌ tûû̌ sî ta̤yṳ̌ta̤nǎ̤ dǒ Cǒmara ǐ sî numî̌ adû̌ pwǐ꤮ tènu gènè̤sô̌ lô̌khô pô̤̌nupwǎ nî̌꤮. 4 Panǎ̤glǒ mî̌ tôcǒnô̤̌ pwǎ bǎbǎkǎlè panǎ̤glǒ ayô̤agî̌ tokhlǒ numî̌ a ô̌khô̌ lû̌û. Ayô̤agî̌ tôcǒ kû̌ tôcǒnu, a ma̤ ta̤ma̤ sô̌sô̌ lû̌û tô̤̌. ^a 5 Pô̤̌nudě pa ô̌wô̤̌ô̌dû̌ bǎbǎkǎlè pa htûhtò̌kè nǎ̤glǒ tôpwa̤꤮ nô̤̌ dǒ Khrǐ akû nuhǒ. Pa icu bò lû̌û pṳ̂̌꤮ tôpwa̤hǒ. 6 Pa gǔ noǎ pa sû dǒ Cǒmara ǐbwǐ ǐsîrî khô̌lû̌û tôpwa̤ kû̌ tôpwa̤nu. Cǒmara kè̌ noshôbǐǐ kòyò tôpwa̤pwa̤ kû̌ alě̤ayô̤̌ kè̌hî̌dě, a tôbǎ shôbǐǐlṳ̌ bǎ Cǒmara ǐ lû̌û ta̤yṳ̌ta̤nǎ̤ nupwǎ. ^b 7 Kè̌ Cǒmara ǐ kòyò tôpwa̤pwa̤ a ta̤sî̌ta̤jò̌ dǒ a noma̤jè̌ lû̌û kû̌ kòyò kè̌hî̌dě, a tôbǎ ma̤jè̌ kòyò. A kè̌ ǐ kòyò tôpwa̤pwa̤ a ta̤sî̌ta̤jò̌ dǒ a gǔ no sû̌ǐ lû̌û kû̌ kòyò kè̌hî̌dě, a tôbǎ sû̌ǐ kòyò. 8 Kè̌ Cǒmara ǐ kòyò tôpwa̤pwa̤ a ta̤sî̌ta̤jò̌ dǒ a bǎ tûsû shò̌gû̌ kòyòkò kè̌hî̌dě a tôbǎ tûsû shò̌gû̌ kòyò. Kè̌ kòyò tôpwa̤ a sǎphlǒshû̌ ma̤lṳma̤tò kòyò shèphǔshèwè̤phû̌ tokhlǒ kû̌ a timî̌titè tokhlǒ kè̌hî̌dě a tôbǎ sǎphlǒshû̌ ma̤lṳma̤tò bǎ kòyò. Cǒmara kè̌ ǐ kòyò tôpwa̤pwa̤ a ta̤sî̌ta̤jò̌ dǒ a bǎ htû ikǒlǒkòdû̌ hî̌dě a tôbǎ ma̤ shapwǎ̤shèpwè̤ tûû̌. Kòyò tôpwa̤pwa̤ kè̌ a sǎyṳgwèbǎǐ ma̤jè̌ kòyò kè̌hî̌dě, a tôbǎ ma̤ dǒ ta̤sǎlě̤sǎlò̤ akû.

9 Mô̤khěmô̤khô̌ tǎ̤ kòyò tǎ̤mǎ̤ nî̌꤮. Sǎyṳ mô̤kla tǎ̤ ta̤phû̌mò̤̌shǐhtô tǎ̤mǎ̤ nî̌꤮. Dî̌klǎ měwô̌ lô̌khô ta̤wô̌ nî̌꤮. 10 Mô̤ǐ tûû̌ lû̌û pô̤̌ pṳ̌wè̤̌ hǐphòdǒkûnu nî̌꤮. Bè̌dubè̌nǎ̤ tûû̌ lû̌û tôpwa̤ kû̌ tôpwa̤ nî̌꤮. 11 Gû̌ma̤ lô̌khô Běcǎ ata̤ma̤ nî̌꤮. Cè̌klè lô̌khô tǎ̤mǎ̤ nî̌꤮. Kè̌ ma̤ Běcǎ ata̤ma̤ hǒnumî̌ bè̌shû̌sho lô̌khô sî sǎphlǒ nî̌꤮. 12 Sî ta̤kè̌shuǐ dǒ Cǒmara tîwî̌tòwò bǎ sîya hǒtokhlǒnu, sǎlě̤sǎlò̤ lô̌khô nî̌꤮. Bǎ ta̤pò̤̌ta̤sha hèbǎ sî akhanu, khòsǎdô lô̌khô, kwicaba lô̌khô pṳ̂̌꤮ tôplǎ nî̌꤮. 13 Cǒmara a kòyò tokhlǒ kè̌ hǎwě̤shèwè̤ hî̌dě, phǐjè̌ma̤jè̌ asî nî̌꤮. Kè̌ dǐǎdǐô lô̌khô shǐpwǎ̤shǐmè̤ nî̌꤮. Kaǎ hǎmôô̌ lô̌khô asî dǒ sî hǐdǒkû nî̌꤮.

14 Ǐshowî̤ tûû̌ kòyò dǒ a ma̤jî̌ma̤jû̌ sî nutokhlǒ nî̌꤮. Kwicaba dǒ Cǒmara gǔ ǐshowî̤ asî nunî̌꤮, ǐshoǐbě tǎ̤ asî tǎ̤mǎ̤ nî̌꤮. ^c 15 Sǎlě̤sǎlò̤ wô̤̌wô̤̌gû̌ kû̌ kòyò dǒ a sǎlě̤sǎlò̤ nutokhlǒ nî̌꤮. Sǎplǎ̤ wô̤̌wô̤̌gû̌ kòyò dǒ a sǎplǎ̤ nutokhlǒ nî̌꤮. 16 Ô̌htûpwa̤ wô̤̌wô̤̌ lû̌û dǒ sǎphlǒ tômè akû nî̌꤮. Phî̌htò̌lǒ tǎ̤ lô̌khô sî sǎphlǒ tǎ̤mǎ̤ nî̌꤮. Mè̤mè̤̌tôkhô, bǒsû̌khǎkhô lô̌khô kû̌ kòyò shèphǔshèwè̤phû̌ nutokhlǒ nî̌꤮. Gènè̤dû̌ tûû̌ nanǎ̤ tǎ̤mǎ̤ nî̌꤮. ^d

17 Kòyò dǒ a ma̤jî̌ nanu, ma̤jî̌ geshěshu tǎ̤ asî tǎ̤mǎ̤ nî̌꤮. Ta̤ma̤ dǒ kòyò pṳ̂̌tôpwa̤ gènè̤ kû̌ awô̌ tokhlǒnu, jî̌pwǐ̤ ma̤ lô̌khô ta̤ma̤ pô̤̌nu tokhlǒ nî̌꤮. 18 Jî̌pwǐ̤ ô̌htûpwa̤ mô̤klaǐ lô̌khô kû̌ kòyò, bǎ a jò̌ gutṳ̌ kû̌ nanu nî̌꤮. 19 Khôbǒsû̌ sî, kòyò kè̌ ma̤sha sî hî̌dě, ma̤ geshěshu tǎ̤ kòyò tǎ̤mǎ̤ nî̌꤮. Nocî̌htò̌ tûû̌ a kû̌ Cǒmara pě, ma̤titèhî̌dě lî̤plò̌shǐkû hî̌ kû̌, “Pwa̤ dǒ a ma̤ getîkhî kòyò dǒ a ma̤ ta̤phû̌mò̤̌ nutokhlǒ mî̌ he pwǎ. He ma̤ geshěshǔ kû̌ henǎ̤ pě,” ^e Běcǎ hî̌ pô̤̌nu. 20 Mè̤̌mî̌tôkhônu, pô̤̌ lî̤plò̌shǐkû hî̌ kû̌,

“Kòyò dǒ a sǎkhě na tokhlǒnu, a kè̌ hǎwǐ̤sǎǎ hî̌dě, tûlû̌ dǐǎ a nî̌꤮. A kè̌ hǎwǐ̤ sǎôshi hî̌dě, tûlû̌ dǐô̌ lû̌û nî̌꤮, sî kè̌ ma̤pô̤̌nu mî̌, a gǔ sòwò̤̌ ǐtûû̌ anǎ̤ sô̌sô̌kû̌ sî bè̌htò̌ mî̌klû̌ dǒ a ikǒkhû̌ nupě.” ^f

21 Plû ma̤pè̤̌ tǎ̤ ta̤phû̌mò̤̌ kû̌ nanǎ̤ tǎ̤mǎ̤ nî̌꤮. Ma̤pè̤̌kè ta̤phû̌mò̤̌nu kû̌ ta̤wô̌nu nî̌꤮.