Romans 13
Khrǐphû̌ tokhlǒ tô ganǎ̤de kòyò dǒ a pǒǐ lû̌û tokhlǒ ayô̤̌
1Kòyò pṳ̂̌꤮ tôpwa̤ tôbǎ jûlě̤phî̌yô̤̌ ganǎ̤de khwǐcôphǎ dǒ a pǒshipǒgǎ tokhlǒ ayô̤̌, ma̤titèhî̌dě Cǒmara kè̌ nopǒ asî tô̤̌ hî̌nu, asî htò̌htûbò̌ khwǐ tô̤̌. Kòyò dǒ a pǒshipǒgǎ khònò̤̌ tokhlǒ numî̌ Cǒmara bè̌htò̌bò asî pwǎ. 2Pô̤̌nudě, kòyò dǒ a shěshu pwa̤pǒshipǒgǎ tokhlǒ numî̌, a shěshǔ Cǒmara tîwî̌tòwò bè̌htò̌ ta̤nuhǒ. Htokhôtô̤̌ kòyò dǒ a ma̤ pô̤̌o tokhlǒnu, a bǎ khòbǎ ta̤cî̌htò̌ asî pě. 3Kòyò dǒ a ma̤wô̌ta̤ tokhlǒnu, a lǎ̤lṳ̂ ǐsha kû̌ pwa̤pǒshigǎ tokhlǒ alǎ̤ tô̤̌. Bǎbǎkǎlè kòyò dǒ a ma̤ta̤sǔ tokhlǒnu, a gǔ ǐsha asî alǎ̤ pě. Pô̤̌nudě sî kè̌ sǎyṳ ǐsha asîlǎ̤ tô̤̌ hî̌dě, ma̤ ta̤wô̌nu, dǒ sî ma̤pô̤̌nu akhû̌akhî, dě pwa̤pǒta̤ nutokhlǒ gǔ htû̌sò̌ ǐtûû̌ sî pě. 4Ma̤titèhî̌dě, pô̤̌khô a gǔ htûbwǐhtûsîrî dǒ sîya dě Cǒmara bè̌htò̌ hto sîkhwǐ nutokhlǒ hǒ. Sî kè̌ ma̤sǔ hî̌dě sî tôbǎ ǐsha mè̤̌mî̌ca hǒ, ma̤titèhî̌dě Cǒmara ǐ mè̤̌mî̌ca lû̌û ta̤siwi̤sòwò̤ dǒ a gǔ cî̌htò̌ sî pě hǒ. A mî̌ Cǒmara a pwa̤ma̤ta̤phû̌ tôpwa̤. Bǎ a cî̌htò̌ kòyò dǒ a ma̤sǔta̤ tokhlǒ pô̤̌o akhanumî̌ amè̤̌kû̌ a cî̌htò̌ bǎ Cǒmara agûlǎ̤ hǒ. 5Pô̤̌nudě, sî tôbǎ ganǎ̤de kòyò dǒ a pǒ sî tokhlǒ ayô̤̌. Dǒ sî ma̤sǔ akhû̌akhî, dě a gǔ cî̌htò̌ sî pě pô̤̌nu mè̤̌tô̤̌, pô̤̌khô sî gǔ sî̌yahèlò̤ tûû̌ pô̤̌ sînǎ̤ kû̌ ma̤pô̤̌nu mî̌ awô̌ pô̤̌nu pwǎ. 6Pô̤̌nu akhû̌akhîdě, sî tôbǎ ǐ khwǐ ta̤kûta̤mṳ̂̌, ma̤titèhî̌dě asî mî̌ a htû Cǒmara apwa̤ma̤ta̤phû̌ tokhlǒ. Htodě asî mî̌ a ǐlò̤ asǎphlǒ dě a ma̤bò ashěkhǎ kû̌ a ta̤pǒǐ ayanu pě. a 7Pô̤̌nudě, sî lǎ̤lṳ̂ ǐ kòyò tokhlǒnu, ǐ lô̌khô, kè̌ sî lǎ̤lṳ̂ ǐ sî nǎ̤běcǎ ta̤kûta̤mṳ̂̌ kè̌hî̌dě ǐ lô̌khô nî̌꤮. Sî kè̌ lǎ̤lṳ̂ǐ ta̤kûta̤mṳ̂̌ dǒ ashǔshawa̤ tokhlǒ hî̌dě tûlû̌ ǐ lô̌khô nî̌. Sî tô bè̌dubè̌nǎ̤ kòyò tokhlǒnu bè̌dubè̌nǎ̤ lô̌khô kòyò nî̌. Sî tô bè̌dû̌bè̌htû kòyò tokhlǒnu bè̌dû̌bè̌htû lô̌khô kòyò nî̌.Ta̤mô̤ǐ lû̌û tôpwa̤ kû̌ tôpwa̤
8Plî̌lîbò sînǐ̤sîshû̌ nî̌꤮, noô̌kè tǎ̤ tôcǒ tǎ̤mǎ̤ nî̌꤮. Noô̌kè pwǎtǒ̤ shû̌ dǒ sî lǎ̤lṳ̂ mô̤ǐ lû̌û tôpwa̤ kû̌ tôpwa̤ nupwǎ nî̌꤮. Ma̤titèhî̌dě kòyò dǒ a mô̤ǐ kòyònu, a ma̤ lǒbe ta̤sû̌ta̤tòwò hǒ. 9Cǒmara ta̤mǎlò̤ tokhlǒ hî̌ kû̌, “Cû̌sǔnṳ̌plěnṳ̌ tǎ̤ kòyòphû̌kòyòma tǎ̤mǎ̤ nî̌,” b “Ma̤si tǎ̤ kòyò tǎ̤mǎ̤ nî̌,” c “Ǎhǔ tǎ̤ kòyòta tǎ̤mǎ̤,” d “Sǎyṳsǎbǎ tǎ̤ kòyòta tǎ̤mǎ̤,” e lǒ̤bò ta̤hǒotokhlǒ, kû̌ ta̤mǎlò̤ dǒ ashǔshawa̤ tokhlǒ bè̌plǒbò pwǎ lû̌û tômû dě a hî̌ kû̌, “Mô̤ǐ kòyò dǒ a ô̌phǔ na kòshî̌ tokhlǒ pô̤̌ na mô̤ǐlò̤ tûû̌ nanǎ̤nu nî̌꤮.” f 10Sî kè̌ mô̤ǐ kòyònu sî ma̤sǔ pe kòyò tô̤̌ hǒ. Pô̤̌nudě kòyò dǒ a mô̤ǐ kòyònu, a gû̌ ma̤lǒbe bòkè ta̤sû̌ta̤tòwò hǒ. 11Sî bǎ mô̤ǐ kòyò ma̤titèhî̌dě khònò̤̌nu sî sî̌ganǎ̤ kû̌ shěkhǎ dǒ a lṳ̂dû̌lǒ mè̤̌mî̌ca tôcǒnu a glè̌ hèphǔ tǒ̤hǒ. Ihtǒmò̌ lô̌khô, shěkhǎ tô hǎmôô̌ mè̤̌petô̤̌ hǒ. Ta̤ma̤hǎplǎge panu, a hètǒ̤ phǔkhlo kû̌ pa yṳ̌ǎ lû̌ akha nuhǒ. 12Lṳmṳ̌khǐ glè̌ cû̌tûlû̌kè hǒ, lṳmṳ̌ glè̌ shî̌wî̤̌ hǒ. Pô̤̌nudě pa gǔ bè̌lò̤kèbò ta̤ma̤phǔmò̤̌ dǒ pa ma̤ bǎ ta̤khǐkla nutokhlǒ tǎ꤮. Dě pa gǔ kûsô̌htò̌ lô̌khô ta̤lî aje tě̤htò̌ tokhlǒnu tǎ꤮. 13Hǒtôplǎdě, pa ô̌htûpwa̤ ǎ ô shapwǎ̤ gû̌ kòyò pô̤̌ kòyò dǒ a ô̌htûpwa̤ dǒ lṳmṳ̌sha nutokhlǒ tǎ꤮. Ma̤ pwe̤rupwe̤tè̌ pwèlû bǎbǎ, ǎmuômu bǎbǎ, sǐshi a ta̤sǎyṳ phû̌mò̤̌ tokhlǒ bǎbǎ, ta̤gènè̤ putupatǎ tokhlǒ bǎbǎ, ta̤tô̤̌klǐ lû̌û tokhlǒ bǎbǎ, ta̤gènè̤ sǎkhwè̌ lû̌û tokhlǒ bǎbǎ, pa ma̤petô̤̌ tǎ꤮. 14Gû̌ kè̌lû̌ Yeshǔ Khrǐ a ta̤ô̌htûpwa̤nu nî̌꤮. Pô̤̌ sî kûsô̌htò̌ jejûnu, kûsô̌htò̌ tèplè̌ dǒ Běcǎ Yeshǔ Khrǐ dě gènè̤ pe tǎ̤ lô̌khô lṳ̂ ta̤ma̤mô̤ sǐshi a ta̤sǎyṳsǎbǎ aklè̌aklò tokhlǒ tǎ̤mǎ̤ nî̌꤮.
Copyright information for
KxfSCKXF