Romans 15

Ô̌htûpwa̤ ma̤mô̤ bǎ kòyòsǎphlǒ

1Pa dǒ a ô̌ kû̌ ta̤yṳ̌ta̤nǎ̤ sho tokhlǒnu, pa tô khòsǎdô ma̤jè̌ padô̌ kòyò dǒ a ta̤yṳ̌ta̤nǎ̤ pî̌tî̌pe dě asǎphlǒ wò̌wè̌ pe nutokhlǒ. Pa tô ma̤mô̤lò̤ tûû̌ panǎ̤ tô̤̌. 2Pô̤̌khô a gǔ htûbwǐhtûsîrî bǎ asîya, htodě pô̤̌khô asî gǔ dû̌htò̌ htûhtò̌ dǒ ta̤yṳ̌ta̤nǎ̤ akûnu, pa tô lǎ̤lṳ̂ma̤mô̤ bǎ pa pṳ̌wè̤̌ khrǐphû̌ tokhlǒ asǎphlǒ. 3Ma̤titèhî̌dě, Khrǐ anǎ̤běcǎ tûû̌ dě a ma̤mô̤ǐ tûû̌ anǎ̤ tô̤̌. Mè̤̌mî̌tôkhônu, lî̤plò̌shǐkû hî̌ kû̌, “Ta̤ dǒ kòyò pîjî̌ǐsho na tokhlǒnu, a hèbǎ tûû̌ he hǒ.” ^a 4Ma̤titèhî̌dě, lî̤plò̌shǐ dǒ kòyò wě̤ a děnukha tokhlǒnu, a wě̤nǎ dǒ a gǔ sû̌ǐtòwòǐ pa ayahǒ. Pô̤̌khô pa gǔ ô̌ kû̌ ta̤kè̌shuǐnu, lî̤plò̌shǐ ǐ hto pa ta̤khòsǎdô sǎphlǒhtû kû̌ ta̤khû̌ta̤ǎ tokhlǒ hǒ.

5He kwicaba kû̌ Cǒmara dǒ a ǐ sî ta̤khòsǎdô sǎphlǒhtûnu kû̌ ta̤khû̌ta̤ǎ tôpwa̤nu, a gǔ ma̤jè̌ tûû̌ sî pô̤̌khô sî tôpwa̤ kû̌ tôpwa̤ gǔ ô̌ lû̌û kû̌ sǎphlǒ tômènô̤̌ pô̤̌ sî kè̌lû̌ǐ Yeshǔ Khrǐ a ta̤ô̌htûpwa̤ nutokhlǒ nî̌꤮. 6Sî kè̌ ma̤pô̤̌nu hî̌dě sî gǔ htû̌sò̌htò̌ bò̌ lô̌khô pa Běcǎ Yeshǔ Khrǐ apha Cǒmaranu dǒ sǎphlǒ tômè akû kû̌ dǒ ta̤hî̌bǎhtò̌ wô̤̌wô̤̌ lû̌û tôcǒnô̤̌ akûnu pwǎ.

Ta̤sǎlě̤we̤kè dǒ Yǔdaphû̌ mè̤̌tô̤̌ tokhlǒ aya

7Pô̤̌nudě kaǎmô̤shǔǐ lô̌khô lû̌û tôpwa̤ kû̌ tôpwa̤ nî̌꤮. Pô̤̌khô kòyò gǔ htû̌sò̌htò̌ lô̌khô Cǒmara dě kaǎmô̤shǔǐ lû̌û tôpwa̤ kû̌ tôpwa̤ pô̤̌ Khrǐ kaǎmô̤shǔ hto sînu nî̌꤮. 8Ma̤titèhî̌dě, he hî̌ sî kû̌ Khrǐ hèlò̤ htû hto Yǔdaphû̌ tokhlǒ a pwa̤ma̤ta̤phû̌ hǒ, ma̤titèhî̌dě pô̤̌khô Cǒmara gǔ cǒkû̌ ayô̤̌ dǒ a olò̤ hto kû̌ asî aphiaphu děnukha tokhlǒnudě Khrǐ hèlò̤ htû pô̤̌nu hǒ. 9Htokhôtô̤̌, pô̤̌khô Yǔdaphû̌ mè̤̌tô̤̌ tokhlǒ gǔ htû̌sò̌htò̌ Cǒmara a ta̤sǎyṳ gwèbǎǐ bǎ asî ayanudě, Khrǐ hèlò̤ bǎ asîya. Lî̤plò̌shǐkû hî̌ kû̌,

“Pô̤̌nudě, he gǔ htû̌sò̌htò̌ na dǒ Yǔdaphû̌ mè̤̌tô̤̌ tokhlǒ akla pě, he gǔ htû̌sò̌htò̌ na kû̌ he ta̤sǎwǐ sîtokhlǒ pě.” ^b

10Dě a hî̌ pô̤̌ kû̌,

“Ǒ Yǔdaphû̌ mè̤̌tô̤̌ sî, sǎlě̤sǎlò̤ mò̌ kû̌ Cǒmara kòyò Yǔdaphû̌ nutokhlǒ nî̌꤮.” ^c

11A hî̌ pepe kû̌,

“Yǔdaphû̌ mè̤̌tô̤̌ sî, htû̌sò̌htò̌ lô̌khô Běcǎ, htû̌sò̌htò̌bò a pṳ̂̌꤮ tôpwa̤ nî̌꤮.” ^d

12Piwi̤pèshè Khûyashǎya hî̌ pô̤̌ sô̌ kû̌,

“Phayeshè̌ akhlialè gǔ hè ô̌lṳ̌htò̌ tôpwa̤ pě, dě a gǔ pǒnǐ̤ Yǔdaphû̌ mè̤̌tô̤̌ tokhlǒ pě. Yǔdaphû̌ mè̤̌tô̤̌ tokhlǒ gǔ kè̌shuǐ lô̌khô lû̌û pě.” ^e

13Bǎ sî yṳ̌ǎnṳ̌ Cǒmara dǒ a ma̤jè̌ sî akhanu, a mî̌ Cǒmara tôpwa̤ dǒ pa lǎ̤kè̌shuǐ a kòshî̌gutṳ̌ akhû̌akhî, a gǔ ma̤lǒbe bǎtûû̌ sî sǎlě̤sǎlò̤ kû̌ sî sǎphlǒ a ta̤gûjû̌kabǎ nî̌꤮. Htokhôtô̤̌ pô̤̌khô sî ta̤kè̌shuǐ gǔ shû̌htò̌shohtò̌ sělě pô̤̌ dǒ alô̤mô̤̌ kû̌ Yôla Plò̌shǐ Běcǎ a ta̤pô̤ta̤phǎ akhû̌akhî, pwǎ nudě he kwicaba bǎ sîya hǒ.

Khûpò̌lǔ a ta̤phǐta̤ma̤

14Pṳ̌wè̤̌ sî꤮, he yṳ̌ǎ tě̤tě̤mè̤̌mè̤̌ sî kû̌ sî ô̌htûpwa̤ lǒbe kû̌ ta̤wî̤ta̤wô̌, kû̌ ta̤sî̌khû̌sî̌ya dǒ alǒabe, dě sî sû̌ǐtòwòǐ jò lô̌khô lû̌û tôpwa̤ kû̌ tôpwa̤ hǒ. 15Bǎbǎkǎlè, Cǒmara ǐ he ta̤bwǐta̤sîrî dǒ he gǔ ma̤ ta̤ma̤nu akhû̌akhî, pô̤̌khô sî gǔ gènè̤htò̌ sô̌ tûû̌ ayô̤̌ dǒ he sû̌ǐtòwòǐ sî nutokhlǒ dě, tokhlǒkhlǒnu he wě̤lò̤ lîtîklî̌ bǎ sî hǒ. 16Cǒmara abwǐsîrî akhû̌akhî, a ǐ he ta̤ma̤ dǒ he gǔ ma̤ Yeshǔ Khrǐ ata̤ma̤ dǒ Yǔdaphû̌ mè̤̌tô̤̌ tokhlǒ akla. Pô̤̌khô Yǔdaphû̌ mè̤̌tô̤̌ tokhlǒ gǔ htûhtò̌ ta̤lṳ tôcǒ dǒ Cǒmara gǔ phî̌shǐshu yǎ, htodě ta̤lṳ tôcǒ dǒ Yôla Plò̌shǐ Běcǎ ma̤plò̌shǐ hto lû̌û dě, Cǒmara rû̌htò̌ khô̌tû̌ he kû̌ he gǔ ma̤ta̤ pô̤̌ pwa̤shû̌gǎ dǒ a shôbǐǐlṳ̌bǎ kòyò kû̌ Cǒmara a ta̤sǎlě̤we̤kè nutôpwa̤ hǒ.

17Pô̤̌nudě, dǒ he htûhtò̌ kû̌ Yeshǔ Khrǐ tôcǒnô̤̌ akhû̌akhî, he gènè̤dû̌ǐ mî̌ca ta̤ma̤ dǒ he ma̤ bǎ Cǒmaranu. 18– 19Ta̤ ashǔshawa̤ sî tokhlǒnu he hî̌bǎdû̌pwǎ̤ bǔ nô̌ kòyò tô̤̌. He hî̌bǎdû̌pwǎ̤ bǔ pwǎtǒ̤ Khrǐ ata̤ma̤ dǒ a ma̤jè̌ he awe̤akè pwǎ. Dǒ he hî̌bǎ a awe̤akè akhû̌akhî, htodě dǒ asî kè̌shǐ he ta̤ma̤ tokhlǒ, htokhôtô̤̌ dǒ Cǒmara a Yôla Plò̌shǐ ǐ he ata̤pô̤ta̤phǎ nudě, he ma̤lṳ̌bǎ asî ta̤cô̌klǐcô̌sè nutokhlǒ kû̌ ǒò̌ kitikaa nutokhlǒ akhû̌akhî, he nè̌klè̌nè̌klò bò̌pe Yǔdaphû̌ mè̤̌tô̤̌ tokhlǒ dǒ a gǔ ganǎ̤de jûlě̤phî̌yô̤̌ Cǒmara hǒ. Bǎ he cû̌ shôbǐǐlṳ̌bǎ bò kòyò kû̌ Khrǐ a ta̤sǎlě̤we̤kè akhanu, he cû̌nṳ̌ shôbǐǐlṳ̌bǎ bò kòyò pṳ̂̌꤮ tôpwa̤, pṳ̂̌꤮ todo dǒ doô̌ bǎ Wî̤̌yarǔshôlenu tǒ̤dǒ Ilǔrǐkhagǎ nutokhlǒ hǒ. 20Hǒomî̌ amè̤̌kû̌ ta̤ dǒ he sǎyṳ kè̌shuǐ ma̤ nuhǒ. Gûlǎ̤ bǎtè tûkû bǎbǎ dǒ a ganǎ̤de Khrǐ awe̤akè tô̤̌nu he shôbǐǐbǎ asî kû̌ ta̤sǎlě̤we̤kè, ma̤titèhî̌dě asô̌sô̌kû̌ hǐtômè dǒ kòyò bô̌lò̤ hto hǐkhôkòshî̌ kû̌ lǒ̤nu, he sǎyṳ cû̌ bô̌htò̌ tutṳ̌ kû̌ gûlǎ̤ dǒ kòyò bô̌lò̤ htonu tô̤̌. 21Mè̤mè̤̌tôkhô, pô̤̌ lî̤plò̌shǐkû hî̌ kû̌, “Kòyò dǒ kò hî̌ asî kû̌ a awe̤akè nò̌khôtô̤̌ tokhlǒnu, asî gǔ kè̌shǐ lû̌û pě, kòyò dǒ a ganǎ̤de nò̌khôtô̤̌ tokhlǒnu asî gǔ sî̌yaphlôhè pě,” ^f a hî̌ pô̤̌nu.

Khûpò̌lǔ tîwî̌tòwò dǒ a gǔ cû̌ô̌lè Khrǐphû̌ dǒ Wî̤̌rṳ̂̌me̤ akû nutokhlǒ

22Dǒ ta̤nu tokhlǒ akhû̌akhî, he glè̌ hè dǒ sîô̌nu ta̤ma̤ ô̌ dî̌khû̌dî̌dò taga he. ^g 23Bǎbǎkǎlè, khònò̤̌, lǒ̤bò gûlǎ̤ ô̌te̤we̤bò bǒo tôkûnu, he ma̤hto bòhǒ, he lǎ̤ma̤ gûlǎ̤gûbò̌nu a ô̌ petô̤̌. Htokhôtô̤̌ he sǎyṳ hè ô̌lè kè̌shǐ mî̌ca sî. 24Pô̤̌nudě htû̌꤮ he cû̌ dǒ Sapegǎ akhapěnu, he gènè̤ sǎyṳcû̌ô̌lè dô̌ sî pě. Htû̌꤮ he cû̌ dǒ Sapegǎ akhapěnu, he cû̌ô̌lè kû̌ sî bǎ Wî̤̌rû̌me̤ akûnu pě dě he gǔ cû̌ bô̌sû̌khǎkhô kû̌ sî tòshò̌phû̌ pě he gènè̤ pô̤̌nu. Htodě he kè̌shuǐ dǒ sî gǔ ǐ he sî ta̤ma̤jè̌ dǒ he ta̤cû̌ sělě dǒ Sapegǎ nupě, he kè̌shuǐ pô̤̌nu. 25Bǎbǎkǎlè, khònò̤̌ he cû̌ dǒ Wî̤̌yarǔshôle. Dě he gǔ cû̌phî̌ rû dǒ kòyò ma̤lṳma̤tò tokhlǒ bǎnu pě, dě he gǔ ma̤jè̌ kû̌ Cǒmara a kòyò bǎ Wî̤̌yarǔshôle akûnu tokhlǒ pě. ^h 26Ma̤titèhî̌dě, Mèsidûnǐ̤ya gǎphû̌ tokhlǒ kû̌ Akheya gǎphû̌ tokhlǒnu, a sǎphlǒshû̌ ǐcû̌ padô̌ ru tokhlǒ kû̌ Cǒmara a pwa̤plò̌shǐphû̌ dǒ a hǎwě̤shèwè̤ dě a ô̌ lô̌khô dǒ Wî̤̌yarǔshôle akû nutokhlǒ. 27Asî sǎphlǒshû̌ ma̤lṳ jî̌le. Kè̌ hî̌mè̤̌mî̌mò̌ dě, asî bǎ ma̤jè̌ Yǔdaphû̌ dǒ a yṳ̌ǎ ge nutokhlǒ hǒ. Asô̌sô̌kû̌ asî noshû̌ ô̌dû̌wî̤ Yǔdaphû̌ tokhlǒ hǒ. Ma̤titèhî̌dě Yǔdaphû̌ tokhlǒnu a dǐǎ pa tutṳ̌ Yǔdaphû̌ mè̤̌tô̤̌ tokhlǒ ta̤ǐshowî̤ dǒsû̌dǒsò̌ tokhlǒ hǒ. Pô̤̌nudě Yǔdaphû̌ mè̤̌tô̤̌ tokhlǒ shû̌ô̌ Yǔdaphû̌ tokhlǒ kû̌ a gǔ bǎ yṳ̂̌ǎ getîkhî sô̌ asî kû̌ ta̤ǐshowî̤ amè̤̌kû̌ ruhta kû̌ timî̌titè tokhlǒ hǒ. ⁱ 28Pô̤̌nudě htû̌ he ǐ kè hto ru dǒ asî cǔdekû pěnu, htodě htû̌ he sî̌ganǎ̤ mè̤̌mî̌cahto kû̌ asî nǐ̤bǎ hto rû pě akhanu, he gǔ hǎhtò̌cû̌ dǒ Sapegǎ pě, dě he gǔ nṳ̌ ô̌lè gûmṳ̂̌kû̌ sî bǎnu pě. 29He sî̌ganǎ̤ kû̌ htû̌ he hètǒ̤ dǒ sî ô̌pěnu, he gǔ phǐhènǐ̤ Khrǐ a ta̤ǐshowî̤ dǒ alǒabe nupě.

30Pṳ̌wè̤̌ sî, dǒ pa Běcǎ Yeshǔ Khrǐ kû̌ Yôla Plò̌shǐ Běcǎ a ta̤mô̤ǐ akhû̌akhî he kwisǎyṳ sî kû̌ sî gǔ kwicaba wô̤̌wô̤̌ kû̌ he pě, dě sî gǔ kwicabahtò̌ padô̌ he dǒ Cǒmara a ô̌ pě dě sî gǔ kwicaba lǒ̤sû̌lǒ̤sò̌ padô̌ dǒ heya pě nî̌꤮. 31Htodě, pô̤̌khô Cǒmara gǔ ma̤hǎplǎ he kû̌ kòyò dǒ a ô̌ dǒ Yǔda gǎkû dǒ a yṳ̌ǎ gû̌ kò Khrǐ tô̤̌ nutokhlǒ a cǔdekû nudě, kwicaba padô̌ dǒ heya nî̌꤮. Htodě kwicaba bǎ pô̤̌ ta̤dòkûphû̌ dǒ a ô̌ dǒ Wî̤̌yarǔshôle akû nutokhlǒ gǔ sǎlě̤sǎlò̤ phî̌shǐshu ta̤ma̤lṳ dǒ he sûcû̌ bǎ asî nutokhlǒ nî̌꤮. 32Kè̌ Cǒmara sǎphlǒ ô̌ kû̌ he gǔ hè ô̌lè padô̌ sî pě hî̌dě, he gǔ hèô̌ kû̌ sî tòshò̌phû̌ pě, dě he gǔ hè sǎlě̤sǎlò̤ kû̌ sî pě. Htokhôtô̤̌ he hè nǐ̤bǎ ta̤ǐkhû̌ǐǎ he dǒ asa tokhlǒ pě. 33Cǒmara a ta̤gûjû̌kabǎ ô̌cu pû kû̌ sî lǒ̤bò nî̌. Ame̤.