Romans 3

Cǒmara ma̤pô̤̌ ahî̌nu pṳ̂̌꤮ taplǎ

1Kè̌ hî̌ pô̤̌nudě, htû Yṳ̌daphû̌ tôpwa̤nu abwǐsîrî ô̌hî̌tè? Yṳ̌daphû̌ a ta̤dǔtṳ̌bě numî̌ abwǐsîrî ô̌ tôcǒcǒ ya? 2Htû Yṳ̌daphû̌ tôpwa̤ numî̌ abwǐsîrî ô̌dû̌wî̤ mî̌ca hǒ. Ta̤dǒ abwǐsîrî ô̌lǒ tôcǒnumî̌ amè̤̌kû̌ Cǒmara yṳ̌nǐ̤ pa Yṳ̌daphû̌ tokhlǒ akhû̌akhî, a shôbǐǐlṳ̌ bǎ payô̤̌ dǒ a sǎyṳ̌ pwe̤ǐlṳ̌ bǎ kòyò nutokhlǒ hǒ.

3Yṳ̌daphû̌ tokhlǒkhlǒ kè̌ cǒ ayô̤̌ kû̌ Cǒmara tô̤̌ hî̌dě, Cǒmara a ta̤olò̤ tokhlǒ phèkè bò pěya? 4A phèkè nô̌ tîkî̌tô̤̌. Kòyò hǎkhû̌phû̌ lǒ̤꤮ bò htûbò kòyò lòhǎlòhô bǎbǎ, Cǒmara cǒmî̌ca kû̌ ayô̤̌pwǎ̤. Lî̤plò̌shǐ hî̌ kû̌,

“Kòyò hǎkhû̌phû̌ gǔ hî̌ na kû̌ na hî̌bǎ bǎkhòtè̌꤮ bǎbǎ atôabǎ bò pwǎ̤, kòyò kè̌lǎnè̌ na ta̤sǔ dǒ na ma̤tôta̤ bǎkhòtè̌꤮ bǎbǎnu, kòyò lò̤jûkè nagûlǎ̤ pwǎ.” ^a

5Bǎbǎkǎlè pa Yṳ̌daphû̌ a ta̤tě̤ta̤mè̤̌ tô̤̌ tokhlǒnu a kè̌ dǔlṳ̌ lîphlô Cǒmara a ta̤tě̤ta̤mè̤̌ kè̌hî̌dě pa hî̌ǐyǎ a hî̌tè? Cǒmara sǎphlǒdû̌ dě a cî̌htò̌ pa numî̌ asǔ pwǎ, pagǔ hî̌ pô̤̌nu ya? (he hî̌bǎ pô̤̌ kòyò hǎkhû̌phû̌ lǎ̤klô hî̌nu pwǎ̤.) 6Kè̌ hî̌pô̤̌numî̌ a tôtô̤̌. Cǒmara ma̤ta̤hǒo kè̌ a tôtô̤̌ hî̌dě a cî̌htò̌tô cî̌htò̌bǎjò kòyò hǎkhû̌phû̌ hî̌tè pě? 7Kòyò tokhlǒkhlǒ glè̌ htè̌shǔ kû̌, “He ma̤ta̤tě̤ta̤mè̤̌ tô̤̌ tokhlǒnu, a dǔlè̌lṳ̌htò̌ Cǒmara a ta̤tě̤ta̤mè̤̌, htotô̤̌ a gǔ ma ô̌dû̌htò̌pô̤̌ Cǒmara a ta̤bwǐdû̌sîrîhtû kè̌hǐdě, ma̤mitèhî̌dě a cû̌ cî̌htò̌tǒ̤ pwa̤ma̤sǔphû̌, pô̤̌ henu ma̤titè̤?” 8Asî hî̌nu a kè̌ tô hî̌dě, pa lǎ̤lṳ̂hî̌ kû̌, “Pô̤̌khô kòyò htû̌sò̌htò̌ Cǒmara kû̌ a ma̤ta̤nu a tôpwǎ ayanu, tûlû̌ ma̤ lô̌khô ta̤sǔnu,” Lǎ̤lûhî̌ pô̤̌nu bǎtô̤̌. Kòyò dǒ a hî̌ pô̤̌nu tokhlǒmî̌ Cǒmara cî̌htò̌ lû̌nu a tôpwǎ. Kòyò tokhlǒkhlǒnu a dô̌bò heyô̤ kû̌ he sû̌ǐ kòyò pô̤̌nu. Bǎbǎkǎlè he sû̌ǐ bǎ kòyò pô̤̌nu mè̤̌tô̤̌.

Kòyò hǎkhû̌phû̌ cǒtè̤ tôpwa̤ tô̤̌

9Pô̤̌nudě, pa gǔ hî̌ yǎ hî̌tè? Pa Yǔdaphû̌ tokhlǒ mî̌ pa wô̌khlo kû̌ Yṳ̌daphû̌ mè̤̌tô̤̌ tokhlǒ ya? Pa wô̌khlo nô̌ tîkî̌꤮ tô̤̌. Pa dǔlè̌lṳ̌ hto kû̌ Yǔdaphû̌ bǎbǎ, Yǔdaphû̌ mè̤̌tô̤̌ bǎbǎ asî ô̌bò pwǎ dǒ ta̤sǔta̤plě a siwi̤sòwò̤ alǎ̤ pwǎ̤. 10Lî̤plò̌shǐkû hî̌ kû̌,

Kòyòcǒkòyòtè̤ ô̌ tôpwǎ̤꤮ tô̤̌. ^b 11Kòyò dǒ a ô̌ kû̌ ta̤sî̌ta̤jò̌ tokhlǒ bǎbǎ, kòyò dǒ a kè̌lǎ Cǒmara tokhlǒ bǎbǎ, a ô̌ tôpwǎ̤꤮ tô̤̌. 12Kòyò pṳ̂̌꤮ tôpwa̤ cû̌ taphekè bò kû̌ Cǒmara hǒ. Asî htûbò kòyò ô̌lǒô̌khlo pṳ̂̌꤮ tôpwa̤ hǒ. Kòyò dǒ a ma̤ ta̤wô̌nu aô̌pe tôpwǎ̤꤮ tô̤̌, tôpwǎ̤ pwǎnu a ô̌ tô̤̌. ^c 13Asî ta̤hî̌bǎ tokhlǒnu, ta̤ma̤yǒ̤sǐpi̤wô̤̌ sô̌sô̌ kû̌ na ma̤mô lṳ̌kû dě a nusohtò̌ nuhǒ. Asî cû̌ lòhǎlòhô kòyò kû̌ a ta̤hî̌buhî̌bǎ tokhlǒ. ^d Asô̌kû̌ wṳ̂̌su pè̌ kòyò dě awè̤̌nu, asî ma̤pî̌ma̤kè bò kòyò kû̌ a ta̤hî̌bǎ tokhlǒ. ^e 14Asî ata̤hî̌buhî̌bǎ tokhlǒnu, a lǒbe kû̌ ta̤ǐshoǐbě. Asî hî̌bǎ còcè̌ yô̤̌ dǒ cè̌klè ganǎ̤de yǎnu tokhlǒ. ^f 15Ma̤si kòyò tǎ꤮ kè̌hî̌dě asî cû̌ tṳplṳ̌tî̤wî̤̌ lô̌khô. ^g 16Asî cû̌ bǎtè tôkû bǎbǎ, a cû̌ ma̤pî̌ma̤kè kòyò, a cû̌ma̤ sǎplǎ̤sǎyṳ kòyò. 17Tô ô̌htûpwa̤ mô̤kla pè̤̌dû kû̌ kòyò hî̌tènu, asî sî̌ganǎ̤ gû̌kòyò tô̤̌. ^h 18Tôbǎ ǐsha Cǒmaranu asî gènè̤ kû̌ kòyò tôcǒ꤮ tô̌. ⁱ

19Pa sî̌ganǎ̤ kû̌ lǒ̤bò ta̤sû̌ta̤tòwò shôbǐǐ tokhlǒnu, ahî̌ bǎ kòyò dǒ anǐ̤bǎ ta̤sû̌ta̤tòwò nutokhlǒ ayapwǎ. Pô̤̌khô̌ pa hî̌bǎ hǎplǎkèjò tûû̌ panǎ̤ kû̌ pa ma̤ ta̤sǔ akhû̌khî tô̤̌ nudě, Cǒmara ǐlò̤ bǎ pa ta̤sû̌ta̤tòwònu pwǎ. Htotô̤̌ pô̤̌khô̌ Comara cî̌htò̌ bò kòyò ô̌ dǒ hǎkhû̌ hǒtôbě pṳ̂̌꤮ tôpwa̤ pě nudě, a ǐlò̤ pwǎ. 20Ma̤titèhî̌dě, dǒ kòyò ô̌htûpwa̤ gû̌ma̤kû̌ ta̤sû̌ta̤tòwò akhû̌akhîdě, kòyò htûhtò̌jò kòyòcǒkòyòtè̤ dǒ Cǒmara a lô̤mô̤̌nu a ô̌ tôpwǎ̤꤮ tô̤̌. Pô̤̌khô̌ pa gǔ sî̌ganǎ̤hèǐ tûû̌ pa ta̤sǔ dě Cǒmara ǐlò̤ pa pwǎ. ^j

Asî ta̤yṳ̌ta̤nǎ̤ akhû̌akhî Cǒmara ma̤cǒma̤tè̤ asî

21Bǎbǎkǎlè khònò̤̌nu, pô̤̌khô̌ kòyòhǎkhû̌phû̌ gǔ htûhtò̌ kòyòcǒ kòyòtè̤ dǒ Cǒmara a lô̤mô̤̌nu, a ma̤ khô̌tû̌ klè̌ dǒ ashǔshawa̤ tôbô kû̌ anǎ̤. Cǒmara aklè̌ numî̌ dǒ pa ganǎ̤de yṳ̌ǎ ta̤sû̌ta̤tòwò akhû̌akhî numè̤̌tô̤̌. Khûmṳ̂shě kû̌ piwi̤pèshè tokhlǒ wě̤nǎ hto dǒ lî̤plò̌shǐkû dǒ nukha pe hǒ. 22Kòyò dǒ a yṳ̌ǎ kû̌ Yeshǔ Khrǐ ma̤hto bǎ aya tokhlǒ hǒnu, Cǒmara ǐ yǎ pô̤̌ kòyòcǒkòyòtè̤ nuhǒ. Hǒomî̌ klè̌ dǒ Comara ma̤ bǎ bò kòyò dǒ a yṳ̌ǎ Yeshǔ Khrǐ nutokhlǒ aya hǒ. Dǒ Cǒmara a lô̤mô̤̌nu akhô̌ nô̌ tôpwa̤꤮ tô̤̌. ^k 23Ma̤titè̌hî̌dě kòyò pṳ̂̌꤮ tôpwa̤ ma̤ ta̤sǔta̤plě. Dě a htò̌tǒ̤bò̌ pe dǒ Cǒmara a ta̤bwǐdû̌sîrîhtûnu tôpwǎ̤꤮ tô̤̌. 24Cǒmara sǎyṳ gwèbǎǐ pa akhû̌akhî, a bè̌cǒbè̌tè̤ kwepwǎ pa pwǎ. Dǒ Yeshǔ Khrǐ rû̌htò̌ pa akhû̌akhî, pacǒpatè̤ pwǎ. 25Ma̤titè̌hî̌dě Comara dǔlè̌lṳ̌ lîtîklî̌ kû̌ Khrǐ hèlò̤ phî̌ge pahǒ pa ta̤sǔta̤plě dǒ Cǒmara cî̌htò̌ pa pě nuhǒ. Dǒ pa yṳ̌ǎ Yeshǔ Khrǐ tṳ̌sikhòsi asǎphlǒ dǒ nò̌dò̌htǔlô̤ dě a sǐlò̤ dǒ paya akhû̌akhî, Cǒmara bè̌cǒbè̌tè̤ pa hǒ. Pô̤̌khô̌ Cǒmara dǔlè̌lṳ̌ kû̌ a ma̤cǒma̤tè̤ ta̤ ayanu, anohè Yeshǔ Khrǐ hǒ. Dǒnukha mî̌, a khòsǎdô pa hǎkhû̌phû̌ tokhlǒ a ta̤sǔ. A kè̌ tûlû̌kè asî ma̤ta̤sǔnu tokhlǒ dě a cî̌htò̌ asî tô̤̌. 26Bǎbǎkǎlè khònò̤̌nu a dǔlè̌lṳ̌ kû̌ a ma̤ ta̤nu atô pwǎ ayanu, a nohè Yeshǔ kû̌ a hè khòsi dǒ kòyò pṳ̂̌꤮ tôpwa̤ aya. Pô̤̌nu akhû̌akhî, Cǒmara anǎ̤ běcǎ tûû̌ aǐlò̤ kû̌ a ma̤cǒma̤tè̤ pwǎ, dě a bè̌cǒbè̌tè̤ kòyò dǒ a yṳ̌ǎ Yeshǔ nutokhlǒ kû̌ anǎ̤.

27Kè̌hî̌pô̤̌nudě, palǎ̤phî̌htò̌mǒ tûû̌ panǎ̤nu aô̌ tôcǒ꤮ tô̤̌. Ma̤titè̤̌hî̌dě Cǒmara bè̌cǒbè̌tè̤ kòyò hǎkhû̌phû̌ kû̌ a ganǎ̤de jûlě̤phî̌yô̤̌ ta̤sû̌ta̤tòwò khû̌khînu mè̤̌tô̤̌. Mè̤̌tôkhômî̌, kòyò hǎkhû̌phû̌ yṳ̌ǎǐ, Khrǐ si bǎ pe dǒ asîya akhû̌akhî, Comara bè̌cǒbè̌tè̤ asî pwǎ. 28Ma̤titè̤̌hî̌dě kòyò hǎkhû̌phû̌ lǎ̤lṳ̂ma̤ ta̤sû̌ta̤tòwò akò dě Cǒmara bè̌cǒbè̌tè̤ asî pô̤̌nu mè̤̌tô̤̌. Dǒ asî yṳ̌nǐ̤nǎ̤nǐ̤ta̤ akhû̌akhîdě, a bè̌cǒbè̌tè̤ lû̌û pwǎ. 29Cǒmara numî̌ Yǔdaphû̌ a Cǒmara nô̤̌pwǎ ya? Mî̌ Yǔdaphû̌ mè̤̌tô̤̌ tokhlǒ a Cǒmara mè̤̌tûû̌ ya? Cǒmara numî̌ Yǔdaphû̌ mè̤̌tô̤̌ tokhlǒ aya mî̌ amè̤̌mè̤̌. 30Ma̤titè̤̌hî̌dě Cǒmara ô̌pwǎ tôpwa̤ nô̤̌pwǎ. Bǎ Yǔdaphû̌ yṳ̌ǎ Khrǐ akhanu, a bè̌cǒbè̌tè̤ lû̌û pě. Htokhôtô̤̌, bǎ Yǔdaphû̌ mè̤̌tô̤̌ tokhlǒ yṳ̌ǎgû̌ Khrǐ akhanumî̌, a bè̌cǒbè̌tè̤ kû̌ asî pěpě. ^l 31Cǒmara kè̌ bè̌cǒbè̌tè̤ pa kû̌ pa ta̤yṳ̌ta̤nǎ̤ khû̌khî pwǎ kè̌hî̌dě ta̤sû̌ta̤tòwò tokhlǒ numî̌ a phèkè bòpě hò̌? A phèkè bǎtô̤̌. Sî hî̌ tǎ̤ kû̌ a phèkè pě tǎ̤mǎ, a ma̤ shû̌htò̌shohtò̌ khlo pe pě, ma̤titè̤̌hî̌dě kè̌ pa yṳ̌nǐ̤ Yeshǔ hî̌nu pa ganǎ̤de hèwô̌ khlopô̤̌pô̤̌ ta̤sû̌ta̤tòwò.