Romans 4
Cǒmara bè̌cǒbè̌tè̤ PhaAbraha hî̌tè
1Kè̌hî̌pô̤̌nudě, pa Yǔdaphû̌ tokhlǒ apha PhaAbrahanu, pa gǔ hî̌ǐ yǎ hî̌tè? Cǒmara bè̌cǒbè̌tè̤ kòyò hǎkhû̌phû̌ kû̌ a ta̤yṳ̌ta̤nǎ̤ pwǎ pô̤̌nudě PhaAbraha kè̌shǐtṳ̌bǎ bǎ gû̌ kòyò ta̤tě̤ta̤mè̤̌ hî̌tè? 2Cǒmara kè̌ bè̌cǒbè̌tè̤ PhaAbraha kû̌ a ma̤wô̌ ta̤ akhû̌khî kè̌hî̌dě a gǔ bè̌dû̌bè̌pwǎ̤ tûû̌ anǎ̤ kû̌ a ma̤ ta̤wô̌ tokhlǒ akhû̌khî numî̌ anǐ̤ pwǎ. Bǎbǎkǎlè dǒ Cǒmara a lô̤mô̤̌nu, a phî̌htò̌mǒ kû̌ ta̤nutokhlǒ akhû̌akhînu anǐ̤ tô̤̌. 3Lî̤plò̌shǐkû hî̌ kû̌, “PhaAbraha yṳ̌ǎ Cǒmara dě dǒ ata̤yṳ̌ akhû̌akhî, Cǒmara bè̌cǒbè̌tè̤ yǎ pwǎ̤.” a 4Kòyò tôpwa̤pwa̤ kè̌ cû̌ma̤ bǎ kòyòta̤ dě kòyò kè̌ ǐ yǎ akhû̌akǎ hî̌dě, a nǐ̤bǎ akhû̌akǎ numî̌ a nǐ̤bǎkwe pô̤̌ sûnu mè̤̌ tôkhò̌꤮ tô̤̌. A ma̤ta̤ dě a nǐ̤bǎ akhû̌akǎ pwǎ. 5Bǎbǎkǎlè kòyò yṳ̌ǎ a ta̤ma̤wô̌nu tokhlǒ tô̤̌, dě a gǔ yṳ̌ǎnṳ̌ pwǎ Cǒmara dǒ a ma̤cǒma̤tè̤ ge kòyòkhu kòyòhe nutôpwa̤ pwǎ kè̌hî̌dě, Cǒmara kè̌shǐ lû̌û ta̤yṳ̌nu dě a bè̌cǒbè̌tè̤ lû̌û kû̌ anǎ̤ pě. 6Khwǐdawi̤ hî̌ sô̌sô̌kû̌ pô̤̌nu dǒawǐkha kû̌, kòyò dǒ a nǐ̤bǎ ta̤ǐshowî̤ tokhlǒ numî̌ kòyò dǒ Cǒmara bè̌cǒbè̌tè̤ asî kû̌ a ta̤ma̤wô̌ nutokhlǒ akhû̌khî mè̤̌bǎtô̤̌. 7Khwǐdawi̤ hî̌ kû̌, “Kòyò dǒ Cǒmara plûkè ata̤sǔ dě ma̤bǐ bòkè ata̤sǔ tokhlǒnu, a nǐ̤bǎ ta̤ǐshowî̤ hǒ. b 8Kòyò dǒ Běcǎ wě̤mǎnǎ bǎ ata̤sǔ tô̤̌ tokhlǒnu, a nǐ̤bǎ ta̤ǐshowî̤ hǒ.” c 9Ta̤ǐshowî̤ numî̌ nǐ̤jò pwǎtǒ̤ Yǔdaphû̌ dǒ a dǔtṳ̌aphě nutokhlǒ pwǎ ya? A nǐ̤bǎ pwǎtǒ̤ asî mè̤̌bǎtô̤̌. Yǔdaphû̌ mè̤̌tô̤̌ dǒ a dǔtṳ̌ gû̌ kòyò phě tô̤̌ nutokhlǒ mî̌ a nǐ̤ pwǎ pwǎ. Pa hî̌hto kû̌, dǒ PhaAbraha ata̤yṳ̌ akhû̌akhî Cǒmara bè̌cǒbè̌tè̤ lû̌û. d 10Kè̌ ma̤pô̤̌nuhî̌dě bǎ Cǒmara bè̌cǒbè̌tè̤ PhaAbraha akhanumî̌ atôtǐ bǎkhò̌tè? Mî̌ a bè̌cǒ wǐkhlo kû̌ ta̤dǔtṳ̌bě nuya? Tô̤̌mî̌ a bè̌cǒ nô̌ khlo ya? Abè̌cǒ nô̌ khlo bǎ tô̤̌, awǐkhlo. 11A dǔtṳ̌aphě numî̌ dǒ nô̌kò pwǎ. Bǎ a dǔtṳ̌bě nò̌khôtô̤̌ akhanu, dǒ ata̤yṳ̌ akhû̌akhî Cǒmara bè̌ a pô̤̌ kòyòcǒkòyòtè̤ tôpwa̤hǒ, pô̤̌nudě a ma̤mǎma̤dòǐ lû̌û kû̌ ta̤dǔsilǐbě pô̤̌nu tôcǒ pwǎ. Pô̤̌nudě kòyò dǒ a dǔtṳ̌ gû̌ kòyò phě tô̤̌ bǎbǎkǎlè, a yṳ̌ǎ Cǒmara tokhlǒnu, PhaAbraha htû bǎbò kòyò pô̤̌nu tokhlǒ apha hǒ. Pô̤̌nu akhû̌akhî Cǒmara bè̌cǒbè̌tè̤ asî hǒ. e 12Htokhôtô̤̌, pa Yǔdaphû̌ tokhlǒnu, pa dǔtṳ̌bě bǎbǎkǎlè pa kè̌ sǎmǒla̤ǐ ta̤dǔtṳ̌bě nutô̤̌ tokhlǒnu, PhaAbraha mî̌ a htû paphapha. Bǎ papha PhaAbraha dǔtṳ̌bě khôtô̤̌ kha a ta̤yṳ̌ta̤nǎ̤nu, pa gǔ kè̌lû̌ yǎ.Dǒ ta̤yṳ̌ akhû̌akhî, nǐ̤bǎ Cǒmara a ta̤olò̤
13Cǒmara olò̤ PhaAbraha kû̌ akhlialè tokhlǒ dǒ awǐkha kû̌mî̌ hǎkhû̌ tôběbònu, a htûhtò̌ asîta pě. Bǎbǎkǎlè dǒ asî jûǎ gû̌ma̤ ta̤sû̌ta̤tòwò akhû̌khî dě a htûhtò̌ asîta pě, a olò̤ lû̌û pô̤̌nu mè̤̌tô̤̌. Cǒmara bè̌cǒbè̌tè̤ asî kû̌ a ta̤yṳ̌ta̤nǎ̤ akhû̌akhî, a olò̤ kû̌ a ǐ asî pě pwǎ. f 14Cǒmara kè̌ olò̤ kû̌ kòyò dǒ a gû̌ma̤ ta̤sû̌ta̤tòwò tokhlǒnu a nǐ̤bǎ Cǒmara a ta̤olò̤ pě kè̌hî̌dě ta̤yṳ̌ta̤nǎ̤nu abwǐsîrî ô̌ pe tô̤̌. Ta̤olò̤nu yô̤̌mûyô̤̌sǎ ô̌pe tôcǒ꤮ tô̤̌. g 15Ma̤titèhî̌dě ta̤sû̌ta̤tòwò mî̌ a ma̤ sǎphlǒdû̌ Cǒmara. Kòyò hǎkhû̌phû̌ lṳ̂bò̌ ta̤sû̌ta̤tòwò pṳ̂̌꤮ taplǎ tô̤̌ akhû̌akhî, a ma̤sǎphlǒdû̌ Cǒmara dě a cî̌htò̌ asî pě. Ta̤sû̌ta̤tòwò kè̌ ô̌tô̤̌ mî̌ pwa̤ cû̌tûlû̌ khatûlû̌ nô̌ ta̤sû̌ta̤tòwò tôpwǎ̤꤮ tô̤̌. 16Pô̤̌nudě, pa nǐ̤bǎjò Cǒmara a ta̤olò̤ kû̌ pa ta̤yṳ̌ tôcǒ꤮ nô̤̌ pwǎ. Ma̤titèhî̌dě pô̤̌khô pa nǐ̤bǎ ta̤nu kû̌ abwǐsîrî akhû̌khî nô̤̌pwǎ ayanu, pa bǎ ô̌ kû̌ ta̤yṳ̌ta̤nǎ̤. Htokhôtô̤̌, lǒ̤bò PhaAbraha akhlialè tokhlǒnu a nǐ̤bǎbò ta̤olò̤ nupě. Kòyò dǒ a gû̌ma̤kû̌ Yǔdaphû̌ a ta̤sû̌ta̤tòwò nutokhlǒ gǔ nǐ̤bǎ tûû̌ mè̤̌tô̤̌, kòyò dǒ a yṳ̌nǐ̤nǎ̤nǐ̤ sô̌sô̌kû̌ PhaAbraha nutokhlǒ nǐ̤bǎ khlo pě. PhaAbraha mî̌ pa lǒ̤bò apha. h 17Lî̤plò̌shǐkû hî̌nǎ kû̌, “He nohtûhtò̌ na kû̌ kòyò khlilèphû̌ tôprṳ̂tôphǎ apha hǒ.” i A htû bǎ papha dǒ Cǒmara alô̤mô̤̌. Cǒmara hǒtôpwa̤ numî̌ papha PhaAbraha yṳ̌ǎ nutôpwa̤ hǒ. A mî̌ Cǒmara dǒ a ma̤htûpwa̤ getîkhî kòyòsi, htokhôtô̤̌ a hî̌bǎhtò̌ pwǎ ayô̤̌ tômû pwǎ dě ta̤ dǒ a ô̌ tô̤̌ tokhlǒnu a htûhtò̌ bò pwǎ. 18Cǒmara hî̌ PhaAbraha kû̌, “Na htû khlilèphû̌ tôprṳ̂tôphǎ apha pě. Nakhlinalè ô̌wô̤̌ô̌dû̌ asô̌sô̌kû̌ shǎ dǒ mǒlǎ̤ nutokhlǒ pě.” Cǒmara hî̌ ta̤nu alǎ̤ htûhtò̌ bǎ PhaAbraha gǔ phû̌ ô̌wô̤̌ô̌dû̌htò̌ ayanu ayû petô̤̌ bǎbǎkǎlè a yṳ̌ǎ ô̌pǒ̤ kè̌shuǐ dǒ a gǔ htûhtò̌nu. j 19PhaAbraha sî̌yatûû̌ anǎ̤ kû̌ aně ô̌ tôya̤ hǒ, a mǒ̤pwǎ̤ glè̌ sihǒ, htokhôtô̤̌ ama Mǒ̤sara bǎbǎ, a shôdôphû̌ bǎbǎkǎlè PhaAbraha ata̤yṳ̌ yû̌lò̤ bǎ tô̤̌tô̤̌. k 20PhaAbraha yṳ̌ǎ Cǒmara a ta̤olò̤nu asǎphlǒ lûhtôlûlò̤ tîkî̌꤮ tô̤̌. A ta̤yṳ̌ta̤nǎ̤nu, sǔ sǔ a shû̌htò̌shohtò̌ dě a htû̌sò̌ hî̌bwǐhî̌sîrîhtò̌ Cǒmara. 21Cǒmara ma̤ pô̤̌ a olò̤ nupě, a yṳ̌ǎ lǒ̤sû̌lǒ̤sò̌. 22PhaAbraha a ta̤yṳ̌ta̤nǎ̤ ô̌ pô̤̌nu akhû̌akhî, “Cǒmara bè̌ a pô̤̌ kòyòcǒkòyòtè̤ tôpwa̤.” l 23Dě ta̤hî̌bǎ dǒ a hî̌ kû̌, “Cǒmara bè̌ PhaAbraha pô̤̌ kòyòcǒkòyòtè̤ tôpwa̤,” Hǒtômû numî̌, kòyò wě̤ bǎtǒ̤ PhaAbraha tôpwa̤ ayanô̤̌nu mè̤̌tô̤̌. 24Ta̤hî̌bǎ hǒtômû numî̌, paya mî̌ a ô̌ pa mè̤̌capwǎ. Kè̌ pa yṳ̌ǎ kû̌ Cǒmara dǒ a ma̤htûpwa̤ getîkhî pa Běcǎ Yeshǔ dǒ ta̤si tôpwa̤ numî̌ a ǐ pa pô̤̌ kòyòcǒkòyòtè̤ tokhlǒ pě. 25Dǒ pa ta̤sǔta̤plě akhû̌akhîdě Cǒmara noma̤si kòyò kû̌ a phû̌pwa̤khû. Pô̤̌khô a bè̌cǒbè̌tè̤ pa ayanu, a ma̤htûpwa̤ getîkhî lû̌û dǒ ta̤si hǒ. m
Copyright information for
KxfSCKXF