Rom 5:12-19 | KxfSCKXF | STEP | Ma̤pô̤̌nudě, dǒ kòyò tôpwa̤ ganǎ̤de Cǒmara ayô̤̌ tô̤̌ akhû̌akhîdě, kòyò pṳ̂̌꤮ tôpwa̤ ma̤bò ta̤sǔ hǒ. Ta̤sǔta̤plě nunî̌ a dǐhtûhtò̌ ta̤si hǒ. Pô̤̌nudě dǒ ta̤sǔta̤plěnu akhû̌akhîdě, kòyò pṳ̂̌꤮ tôpwa̤ tôbǎ kè̌shǐ bò kû̌ ta̤si hǒ.

Romans 5:12-19

Ta̤si kû̌ PhaAda, ta̤htûpwa̤ kû̌ Khrǐ

12 Ma̤pô̤̌nudě, dǒ kòyò tôpwa̤ ganǎ̤de Cǒmara ayô̤̌ tô̤̌ akhû̌akhîdě, kòyò pṳ̂̌꤮ tôpwa̤ ma̤bò ta̤sǔ hǒ. Ta̤sǔta̤plě nunî̌ a dǐhtûhtò̌ ta̤si hǒ. Pô̤̌nudě dǒ ta̤sǔta̤plěnu akhû̌akhîdě, kòyò pṳ̂̌꤮ tôpwa̤ tôbǎ kè̌shǐ bò kû̌ ta̤si hǒ. ^a 13 Kòyò hǎkhû̌phû̌ ma̤wǐhto ta̤sǔ dǒ Cǒmara ǐlò̤ ta̤sû̌ta̤tòwò nò̌khôtô̤̌ nuhǒ. Bǎbǎkǎlè kè̌ ta̤sû̌ta̤tòwò ô̌tô̤̌ hî̌nu Cǒmara cî̌htò̌ nô̌ kòyò ta̤sǔ tô̤̌. 14 Sahtò̌ bǎ PhaAda ganǎ̤de Cǒmara ayô̤̌ tô̤̌ ahtukhanu, dě a tǒ̤dǒ Khûmṳ̂shě ahtukha nu, kòyò lǒ̤꤮ bò bǎsibò. Kòyò nutokhlǒ mî̌, a ma̤sǔ pô̤̌ PhaAda ma̤sǔnu mè̤̌tô̤̌ bǎbǎkǎlè asî bǎsi bò pwǎ. PhaAda mî̌ asô̌sô̌kû̌ Khrǐ dǒ a glè̌ hèlò̤pě nutôpwa̤ hǒ.

15 Bǎbǎkǎlè Cǒmara a ta̤ǐlò̤ kwe sûnu kû̌ PhaAda ma̤ta̤sǔnu ginǐ̤cǒ numî̌ a sô̌sô̌ lû̌ tô̤̌. Ma̤titèhî̌dě, dǒ kòyò tôpwa̤ ganǎ̤de Cǒmara ayô̤̌ tô̤̌ akhû̌akhîdě, kòyò bǎ si dû̌wî̤. Bǎbǎkǎlè Cǒmara abwǐsîrînu adû̌khlo pe kû̌ hǒonu. Htokhôtô̤̌ sû dǒ a hè dǒ kòyò ashǔshawa̤ tôpwa̤ a ô̌ mî̌ Yeshǔ Khrǐ nuhǒ. Dǒ abwǐsîrî khû̌khîdě, a ǐ betǐpǐ kòyò tûprṳ̂taphǎ hǒ. 16 He gǔ hî̌pô̤̌ sô̌ kû̌, Cǒmara a ta̤ ǐ kwe sûnu kû̌ kòyò tôpwa̤ ma̤ta̤sǔ numî̌ a sô̌sô̌ lû̌ tô̤̌. Bǎ a ma̤ ta̤sǔ akhanu, Cǒmara cî̌htò̌ lû̌û pô̤̌ kòyò dǒ a ma̤sǔma̤plě ta̤ tôpwa̤nu, bǎbǎkǎlè bǎ kòyò ma̤ dû̌wî̤꤮ ta̤sǔ akhanu, Cǒmara ǐ asî kû̌ abwǐsîrî a sû akhû̌akhî, a bè̌cǒbè̌tè̤ asî hǒ. 17 Dǒ pwa̤khû PhaAda ma̤ ta̤sǔta̤plě akhû̌akhî, kòyò lǒ̤bò bǎsi numî̌ atô pwǎ. Bǎbǎkǎlè kòyò dǒ a sǎphlǒô̌ phî̌shěshu Cǒmara ǐ lû̌û kû̌ abwǐdû̌ sîrîhtûnu kû̌ a ǐ lû̌û ta̤tě̤ta̤mè̤̌ a sû tokhlǒnu nî̌, a ô̌htûpwa̤ kû̌ Yeshǔ Khrǐ a jû̌jû̌pwa̤pwa̤ pě, kǎtô̤̌ a pǒ ta̤ kû̌ Yeshǔ Khrǐ pě. Ma̤titèhî̌dě kòyò tôpwa̤ dǒ a mî̌ Khrǐnu, a ma̤ bǎ hto ta̤ dǒ paya hǒ.

18 Pô̤̌nudě kòyò tôpwa̤ amè̤̌kû̌ PhaAda nî̌ ma̤sǔta̤ tôcǒ akhû̌akhî, Cǒmara cî̌htò̌ kòyò pṳ̂̌꤮ tôpwa̤ hǒ. Pô̤̌nudě, kòyò tôpwa̤ dǒ amè̤̌kû̌ Yeshǔ Khrǐ nî̌ a ma̤hto ta̤tě̤ta̤mè̤̌ tôcǒ akhû̌akhî, Cǒmara bè̌cǒbè̌tè̤ bò kòyò pṳ̂̌꤮ tôpwa̤ hǒ, dě asî nǐ̤bǎ lô̌khô ta̤htûpwa̤ tûjû̌pwa̤ pě. 19 Ma̤titèhî̌dě dǒ kòyò tôpwa̤ ganǎ̤de Cǒmara ayô̤̌ tô̤̌ akhû̌akhî, kòyò pṳ̂̌꤮ tôpwa̤ htûhtò̌bò ta̤sǔta̤plě a phû̌mǒ̤phû̌khû tokhlǒ hǒ. Bǎbǎkǎlè dǒ kòyò tôpwa̤ ganǎ̤de Cǒmara ayô̤̌ akhû̌akhî, Cǒmara bè̌cǒbè̌tè̤ bò kòyò pṳ̂̌꤮ tôpwa̤ hǒ.