Rom 6 | KxfSCKXF | STEP | Kè̌ ma̤pô̤̌nu hî̌dě, pa gǔ hî̌ hî̌tè? Pô̤̌khô Cǒmara abwǐsîrî gǔ dû̌htò̌ ayanudě, pa tôbǎ ma̤ sělě hèpô̤̌ ta̤sǔ ya?

Romans 6

Dǒ Yeshǔ Khrǐ akhû̌akhîdě pa ô̌htûpwa̤

1 Kè̌ ma̤pô̤̌nu hî̌dě, pa gǔ hî̌ hî̌tè? Pô̤̌khô Cǒmara abwǐsîrî gǔ dû̌htò̌ ayanudě, pa tôbǎ ma̤ sělě hèpô̤̌ ta̤sǔ ya? 2 Pô̤̌nu mè̤̌tô̤̌. Pa mî̌ asô̌sô̌kû̌ kòyò dǒ a si dě a ma̤ sělě jòpe ta̤sǔ tô̤̌ nutôpwa̤ hǒ. Pô̤̌nudě pa cû̌ ô̌htûpwa̤ ma̤ sělě jòpe ta̤sǔ hî̌tè? 3 Mè̤̌tô̤̌mî̌, sî shôpe̤ hǒ ya? Bǎ pa lǒ̤bò ju panǎ̤ kû̌ shi akha numî̌ pa dǔlè̌lṳ̌ kû̌ pa kû̌ Yehsǔkhrǐ htûhtò̌ tôcǒ nô̤̌ hǒ, dě pa si kû̌ lû̌û numî̌ sî sî̌ganǎ̤ pwǎ yahî̌? 4 Pô̤̌nu akhû̌akhî bǎ pa jushi akhanu, a sô̌sô̌ kû̌ pa si kû̌ Khrǐ hǒ, dě kòyò lǔǐ lò̤ pa kû̌ Khrǐ dǒ lṳ̌kû hǒ. Dǒ papha Cǒmara a ta̤bwǐdû̌sîrîhtû pô̤phǎ akhû̌akhî, pô̤̌ a ma̤htûpwa̤ getîkhî sô̌ Khrǐ dǒ ta̤si akûnu, a gǔ dǐ ô̌htûpwa̤ pa nutokhlǒ kû̌ ta̤htûpwa̤ asa pě. ^a

5 Kè̌ pa si kû̌ Khrǐ dǒ a ta̤si akû hǒ kè̌hî̌dě pa si ihtǒhtûpwa̤ gesô̌ tě̤tě̤mè̤̌mè̤̌ kû̌ a pě. 6 Ma̤titèhî̌dě, pô̤̌khô ta̤sǔ a ta̤pô̤ta̤phǎ ashû̌ashonu gǔ pǒǐ pe pa tô̤̌nu, htokhôtô̤̌ pô̤̌khô pa gǔ htû pe ta̤sǔ a jû̌ tô̤̌nu, sî sî̌yahto kû̌ pa ta̤ô̌htûpwa̤ ali̤nu, Cǒmara ma̤sihtò̌ hto kû̌ Khrǐ hǒ. 7 Ma̤titèhî̌dě, bǎ kòyò tôpwa̤pwa̤ si akhanu, ta̤sǔ a ta̤pô̤ta̤phǎ pǒǐ jòpe lû̌û tô̤̌ hǒ.

8 Pa si kû̌ Khrǐ akhû̌akhî, pa yṳ̌ǎ kû̌ pa ô̌htûpwa̤ kû̌ a hǒ. 9 Ma̤titèhî̌dě pa sî̌ganǎ̤ kû̌ Khrǐ ihtǒgesô̌ dǒ ta̤si dě a sijò petô̤̌. Ta̤si mǒ̤pha pǒǐ jòpe lû̌û tô̤̌ hǒ. 10 Dǒ Yeshǔ si akhû̌akhî, ta̤sǔ a ta̤pô̤ta̤phǎ shû̌sho lò̤jû̌ bòkè a lǎ̤ hǒ. A si tôplǎ dě ahtoaphlǔ bòkèhǒ, a lǎ̤lṳ̂si petô̤̌. Bǎbǎkǎlè khònò̤̌ a htûpwa̤ dě a ô̌htûpwa̤ bǎ dǒ Cǒmara aya hǒ.

11 Sô̌sô̌kû̌ nuhǒ, sî tô hî̌lò̤ǐ lô̌khô sînǎ̤ kû̌, ta̤sǔ ata tokhlǒnu, pa bǎbè̌kè a pô̤̌ kòyòsi dǒ a ma̤jòpe ta̤sǔ tô̤̌nu. Bǎbǎkǎlè sî kû̌ Yeshǔ Khrǐ mî̌ sî htûhtò̌kè lû̌û ta̤ tôcǒ nô̤̌ hǒ akhû̌akhî, sî tôbǎ ô̌htûpwa̤ ma̤lî ma̤kakhahtò̌ lô̌khô Cǒmara. 12 Pô̤̌nudě, pô̤̌khô sî gǔ ma̤ pe ta̤sǎyṳ putupatǎ phû̌mò̤̌ tokhlǒ tô̤̌nu, nopǒǐ pe tǎ̤ sî nǎ̤glǒ dǒ a sijò kû̌ ta̤sǔnu tǎ̤mǎ̤ nî̌꤮. 13 Ǐ tǎ̤ sî nǎ̤glǒ ayô̤agî̌ dǒ ta̤phû̌mò̤̌shǐhtô gǔ noǎ lû̌û kû̌ a ta̤wè̤̌ta̤htò dǒ lǎ̤ma̤ ta̤sǔ tokhlǒ ayanu tǎ̤mǎ̤ nî̌꤮. Cǒmara ǐhto na ta̤ô̌htûpwa̤ asa akhû̌akhî, ǐ lô̌khô sî nǎ̤glǒnu dǒ a ô̌nu. Ǐ bò sî nǎ̤glǒ ayô̤agî̌ nutokhlǒ lǒ̤bò dǒ Cǒmara a ô̌nu, dě pô̤̌ sî noǎ ta̤wè̤̌ta̤htònu, noǎ lô̌khô sî nǎ̤glǒ tě̤ta̤nu dǒ sî lǎ̤ma̤ ta̤tě̤ta̤mè̤̌ aya nî̌꤮. 14 Sî ô̌htûpwa̤ dǒ ta̤sû̌ta̤tòwò alǎ̤ mè̤̌petô̤̌, sî ô̌htûpwa̤ dǒ Cǒmara abwǐsîrî alǎ̤ hǒ. Pô̤̌nudě ta̤sǔnu a htû pe bǎ sîběcǎ tô̤̌.

Ta̤cǒta̤tè̤ ajû̌ tokhlǒ

15 Pô̤̌nudě pa kè̌ ô̌pe dǒ ta̤sû̌ta̤tòwò alǎ̤ tô̤̌, pa ô̌ dǒ ta̤bwǐta̤sîrî alǎ̤ hǒ kè̌hî̌dě, khònò̤̌ pa ma̤ ta̤sǔ mî̌ anǐ̤ pwǎ hò̌? Pô̤̌nu mè̤̌tô̤̌. 16 Sî sî̌ya bǎnô̌tô̤̌ ya? Bǎ sî ǐlò̤ sînǎ̤ dǒ kòyò tôpwa̤pwa̤ a cǔdekû dě sî gǔ htû a jû̌ akhanu, sî ganǎ̤de kòyò ayô̤̌ mî̌ a nǐ̤pe bǎtô̤̌. Sî bǎ ganǎ̤de pwǎtǒ̤ ayô̤̌ pwǎ, mè̤̌bǎtô̤̌ya? Pô̤̌nudě bǎ sî htû ta̤sǔ ajû̌ akhanu, a sûcû̌kè sî dǒ ta̤si pě. Bǎbǎkǎlè sî kè̌ ganǎ̤de Cǒmara ayô̤̌ hî̌dě a gǔ nohtûpwa̤ sî dǒ sî ma̤tô a sǎphlǒ nupě. 17 He hî̌bwǐhî̌sîrî Cǒmara, ma̤titèhî̌dě, dǒ awǐkha sî htûbǎ hto ta̤sǔ ajû̌ tôplǎ, bǎbǎkǎlè khònò̤̌ sî ganǎ̤de lǒ̤sû̌lǒ̤sò̌ Cǒmara a ta̤sû̌ǐ asa dǒ sî nǐ̤bǎ nu tokhlǒ hǒ. 18 Cǒmara bôphlǔ plûhǎhtò̌cû̌kè sî kû̌ ta̤sǔta̤plě a jû̌nu hǒ. Khònò̤̌ sî htûkè ta̤tě̤ta̤mè̤̌ ajû̌ hǒ.

19 He hî̌bǎ sî kû̌ lṳmṳ̌shî̌ lṳmṳ̌hǎ a ta̤hî̌bǎ tokhlǒ, ma̤titèhî̌dě sî mî̌ kòyò hǎkhû̌phû̌ dě, sî sî̌yaphlôyû gû̌ kòyò Cǒmara a ta̤tokhlǒ tô̤̌ akhû̌akhî, he hî̌bǎ bǎ sî pô̤̌nu pwǎ. Dǒ awǐkha mî̌ sî nohtû sî nǎ̤glǒ ayô̤agî̌ tokhlǒ kû̌ sîběcǎ dǒ a phû̌mò̤̌shǐhtô nutokhlǒ ajû̌, sî noma̤ asî kû̌ ta̤putupatǎ phû̌mò̌shǐhtô tokhlǒ dě sî ma̤sǔma̤plě bò Cǒmara a ta̤sû̌ta̤tòwò pṳ̂̌꤮ tocǒ. Pô̤̌nudě khònò̤̌ sî nǎ̤glǒ ayô̤agî̌ tokhlǒnu nohtû a kû̌ Běcǎ dǒ awô̌ nutôpwa̤ ajû̌ nunî̌꤮. Pô̤̌khô sî gǔ htûhtò̌ kòyòplò̌shǐ ayanudě, nohtûhtò̌ mò̌ sî nǎ̤glǒ ayô̤agî̌ nutokhlǒ kû̌ ta̤tě̤ta̤mè̤̌ ajû̌ nunî̌꤮. 20 Bǎ sî htû ta̤sǔta̤plě ajû̌ akhanu, ta̤tě̤ta̤mè̤̌ aběcǎ pǒ ǐ bǎ sî tô̤̌. 21 Bǎnukha na nǐ̤bǎ gû̌ kòyò ta̤wî̤ta̤wô̌ tôcǒ꤮ tô̤̌. Dǒ na ma̤ pô̤̌nu akhû̌akhî, khònò̤̌dě sî gènè̤ sòwò̤̌ǐ tûû̌ sînǎ̤ hǒ. Ta̤ma̤ pô̤̌nu tokhlǒ mî̌ a sûcû̌ kòyò dǒ ta̤si tûjû̌pwa̤ agûlǎ̤ pwǎ. 22 Bǎbǎkǎlè khònò̤̌ Cǒmara bôphlǔ plûhǎhtò̌cû̌kè sî dǒ ta̤sǔta̤plě ajû̌ hǒ. Dě sî htû Cǒmara a jû̌ sa tokhlǒ hǒ. Dǒ sî htû pô̤̌o akhû̌akhî, a nǐ̤bwǐnǐ̤sîrî dǒ sîya mî̌ a sûcû̌ sî dǒ ta̤ô̌htûpwa̤ aplò̌shǐ a klè̌dakûnu hǒ. Dě pa ô̌htûpwa̤ dǒ aplò̌shǐ akhû̌akhî, a nǐ̤bwǐ bǎ sîya mî̌ sî nǐ̤bǎ yôla htûpwa̤ tûjû̌pwa̤nu hǒ. 23 Ma̤titèhî̌dě, ta̤sǔ akhû̌akǎ mî̌ ta̤si. Bǎbǎkǎlè ta̤bwǐta̤sîrî asû dǒ Cǒmara ǐlò̤ kwe pa numî̌ yôla htûpwa̤ tûjû̌pwa̤ dǒ pa Běcǎ Yeshǔ Khrǐ akû nuhǒ.