Romans 7

Ta̤khòmò̤̌khômi̤ alǎ̤kè̌lû̌

1Pṳ̌wè̤̌ sî, lǒ̤bò sî tokhlǒnu sî sî̌ganǎ̤ htobò ta̤sû̌ta̤tòwò akhû̌akhî, ta̤ dǒ he glè̌ hî̌ bǎ sî tokhlǒnu, sî sî̌ganǎ̤ tě̤tě̤mè̤̌mè̤̌ hto bòhǒ. Kòyò tôpwa̤ kè̌ si nò̌khôtô̤̌nu, ta̤sû̌ta̤tòwò tokhlǒ pǒǐ pe lû̌û pwǎ. 2Hî̌kûmṳ̂̌ mò̌, pwa̤mǒ̤ dǒ a khamǎ̤ hto tôpwa̤nu, ta̤sû̌ta̤tòwò pṳ̂̌měǐ yǎ kû̌, awṳ̂ kè̌ si nò̌khôtô̤̌nu a bǎ bè̌kè awṳ̂ tô̤̌. Bǎbǎkǎlè kè̌ awṳ̂ sikè hî̌dě a hǎplǎkè kû̌ ta̤khamǎ̤ a ta̤sû̌ta̤tòwò hǒ. 3Pô̤̌nudě, bǎ awṳ̂ ô̌htûpwa̤ pe akhanu, a kè̌ cû̌ khamǎ̤khô̌ kû̌ pwa̤khû dǒ ashǔshawa̤ tôpwa̤ hî̌dě kòyò gǔ hî̌ yǎ kû̌ pwa̤mǒ̤ dǒ a cû̌sǔnṳ̌plěnṳ̌ pwa̤khû. Bǎbǎkǎlè, kè̌ awṳ̂ sihǒ dě a hǎplǎkè kû̌ ta̤khamǎ̤ a ta̤sû̌ta̤tòwònu hǒ. A kè̌ cû̌phî̌ tèplè̌ awṳ̂ tôpwa̤ bǎbǎ, kòyò hî̌ pe nô̌ yǎ pô̤̌nutô̤̌.

4Pô̤̌nudě, he pṳ̌wè̤̌ sî, bǎ Khrǐ si dǒ nò̌dò̌htǔlô̤ akhanu, a sô̌sô̌ kû̌ sî si kû̌ yǎ akhû̌akhî, sî ô̌pe dǒ ta̤sû̌ta̤tòwò a ta̤pǒta̤sû alǎ̤ tô̤̌ hǒ. Khònò̤̌ sî htûhtò̌kè tôcǒ꤮ nô̤̌ kû̌ a dǒ Cǒmara ma̤htûpwa̤ getîkhî lû̌û dǒ ta̤sinu tôpwa̤ hǒ. Dǒ ta̤ma̤htûhtò̌ pô̤̌o akhû̌akhî, sî gǔ sǎhtò̌phôhtò̌ lô̌khô ta̤ dǒ awô̌ tokhlǒ dě a htûbwǐ htûsîrî bǎ dǒ Cǒmara aya hǒ. 5Ma̤titèmî̌ pa sî̌ganǎ̤hè ta̤sû̌ta̤tòwò hî̌ pa akhû̌akhî, bǎ pa ô̌htûpwa̤ pô̤̌ kòyò hǎkhû̌phû̌ a sǐshiphěyî̌ a ta̤sǎyṳsǎbǎ akhanu, pa ta̤sǎyṳsǎbǎ phû̌mò̤̌ tokhlǒ sǔ sǔ a ô̌wô̤̌hè. Dě ta̤ hǒtokhlǒnu, a sûcû̌ pa dǒ larakû tûjû̌pwa̤ pwǎ. 6Bǎbǎkǎlè khònò̤̌nu, Cǒmara ma̤hǎplǎ pa kû̌ ta̤sû̌ta̤tòwò hǒ, ma̤titèhî̌dě pa si kû̌ Khrǐ akhû̌akhî, ta̤sû̌ta̤tòwò comě pa sô̌sô̌ pô̤̌ dǒwǐkhanu a nǐ̤petô̤̌ hǒ. Cǒmara ma̤hǎplǎge pa kû̌ ta̤sû̌ta̤tòwònu, dě Yôla Plò̌shǐ Běcǎ ma̤jè̌ pa kû̌ klè̌ asa nutôbô hǒ akhû̌akhî, pa ma̤hto ata̤ma̤ hǒ. Pa ma̤ Cǒmara a ta̤phǐta̤ma̤ kû̌ dǒ pa ganǎ̤de gû̌ma̤ kû̌ ta̤sû̌ta̤tòwò aklè̌ li̤ nutôbô akhû̌akhînu mè̤̌petô̤̌.

Ta̤sû̌ta̤tòwò kû̌ ta̤sǔta̤plě

7Ma̤pô̤̌nudě pa gǔ hî̌ hî̌tè? Ta̤sû̌ta̤tòwò mî̌ asǔ pwǎ pa gǔ hî̌ pô̤̌nu ya? Pa hî̌ pô̤̌numî̌ a tôtô̤̌. Na ma̤ pô̤̌numî̌ asǔ ta̤sû̌ta̤tòwò kè̌ nè̌lṳ̌ tô̤̌ hî̌nu, ta̤ dǒ he ma̤sǔ hto kwè̌꤮ titènu he sî̌ganǎ̤ getîkhî tûû̌ nô̌tô̤̌. Hî̌kûmṳ̂̌, “Sǎyṳsǎbǎ tǎ̤ kòyò ta tǎ̤mǎ̤ nî̌,” ^a kè̌ ta̤sû̌ta̤tòwò wě̤lṳ̌ pô̤̌o tô̤̌ hî̌dě, sǎyṳsǎbǎ kòyòta numî̌ a htû ta̤sǔnu, he sî̌ganǎ̤ tô̤̌. 8Bǎbǎkǎlè he htû pwa̤ma̤sǔphû̌ akhû̌akhî, ta̤sû̌ta̤tòwò hî̌ he kû̌ sǎyṳsǎbǎ tǎ̤ kòyòta tǎ̤mǎ̤ a hî̌dě, he sǎyṳsǎbǎ shû̌shû̌. Ma̤pô̤̌nudě ta̤sû̌ta̤tòwò kè̌ ô̌tô̤̌ hî̌nu, ta̤sǔ nî̌ a ta̤siwi̤sòwò̤ ô̌ nô̌ tô̤̌, a si pwǎ. 9Dǒ awǐkhanu, he sî̌ganǎ̤ Cǒmara a ta̤sû̌ta̤tòwò tô̤̌ akhû̌akhî, he ô̌htûpwa̤ tô pwǎ Cǒmara asǎphlǒ pwǎ, he gènè̤ tûû̌ pô̤̌nu. Bǎbǎkǎlè bǎ ta̤mǎlò̤ hètǒ̤ akhanu, ta̤sǔ aklè̌ hènu dǒ he ta̤ô̌htûpwa̤ akû dě he sikè dǒsû̌dǒsò̌ tôkhô hǒ. 10He kè̌shǐ kû̌ Cǒmara ǐlò̤ ta̤mǎlò̤ tokhlǒnu, he shò̌tò̤̌ kû̌ a sûcû̌ pa dǒ ta̤htûpwa̤ tûjû̌pwa̤ aklè̌, bǎbǎkǎlè gutṳ̌nu sûcû̌ pwǎ he dǒ ta̤si pwǎ.

11Ma̤titèhî̌dě, ta̤sǔ kè̌shǐ akhwèwô̌ dǒ a gǔ gètè̤ǐ ta̤mǎlò̤nu akhû̌akhî, a lô̌ǐplò̤ǐ pwǎ he, htodě a noǎ ta̤mǎlò̤ nudě a ma̤sikè he pwǎ. ^b 12Pô̤̌nudě, ta̤sû̌ta̤tòwò mî̌ aplò̌shǐ. Dě ta̤mǎlò̤ tokhlǒ numî̌ aplò̌ashǐshǐ, acǒatè̤ dě atôabǎ pwǎ.

Ta̤shěta̤pě̤ ô̌ dǒ pakû

13Kè̌hî̌pô̤̌nudě, ta̤ awî̤awô̌ numî̌ a ma̤ sikè he ya? A ma̤sibǎ he mè̤̌tô̤̌. A ma̤sikè he numî̌ ta̤sǔta̤plě pwǎ. A noǎ Cǒmara a ta̤sû̌ta̤tòwò dǒ awô̌ dě a lô̌ǐ ma̤sikè he pwǎ. Ma̤titèhî̌dě pô̤̌khô he gǔ sî̌ganǎ̤ tě̤tě̤mè̤̌mè̤̌ kû̌ ta̤ dǒ he ma̤hto nutokhlǒ mî̌ a sǔhǒ nudě, Cǒmara ǐlò̤ ta̤mǎlò̤ pwǎ. Pô̤̌nudě dǒ ta̤mǎlò̤nu akhû̌akhîdě, he gǔ kè̌htò̌ kû̌ ta̤sǔ nî̌ a phû̌mò̤̌ mî̌ca.

14Pa sî̌ganǎ̤ kû̌ Cǒmara a Yôla Plò̌shǐ ǐlò̤ pa ta̤sû̌ta̤tòwò nutokhlǒ bǎbǎkǎlè he mî̌ hǎkhû̌phû̌ dǒ a sijò tôpwa̤ pwǎ. He mî̌ asô̌sô̌kû̌ jû̌ dǒ kòyò shaǎ cû̌kè yǎ kû̌ a gǔ cû̌htû bǎ ta̤sǔta̤plě běcǎ nutôpwa̤ ajû̌ pwǎ. 15Ma̤titè̌ he cû̌ ma̤tǒ̤ ta̤sǔ pô̤̌onu, he sî̌ganǎ̤ tûû̌ henǎ̤ tô̤̌. Ma̤titèhî̌dě he ma̤ pô̤̌ he sǎyṳ ma̤nu mè̤̌tô̤̌. Ta̤ dǒ he sǎyṳ ma̤ tîkî̌꤮ tô̤̌ tokhlǒnu he cû̌ma̤ma̤. ^c 16Ta̤ dǒ he sǎyṳ ma̤tô̤̌ tokhlǒ dě he cû̌ma̤tǒ̤ numî̌ a dǔlè̌lṳ̌ kû̌ ta̤sû̌ta̤tòwònu, awô̌ pwǎ he sǎphlǒ a tôbǎ pô̤̌nu hǒ. 17Pô̤̌nudě, kè̌hî̌kû̌mî̌ pwa̤ dǒ a ma̤ ta̤hǒo tôpwa̤ numî̌ he mè̤̌tô̤̌. Hǒo numî̌ ta̤sǔ dǒ a ô̌ dǒ hekûnu tôpwa̤ ma̤ pwǎ. 18Dǒ hephěheyî̌ a ta̤sǎyṳsǎbǎ akûnu, he sî̌ganǎ̤ kû̌ ta̤wô̌ ô̌ tôcǒ꤮ tô̤̌, ma̤titèhî̌dě he sǎyṳ ma̤wô̌ta̤ bǎbǎkǎlè he ma̤pè̤̌tô̤̌. 19Ta̤wô̌ dǒ he sǎyṳ ma̤ yǎ mî̌, he ma̤ yǎ tô̤̌, he cû̌ ma̤ khô̌ dǒ ta̤phû̌mò̤̌shǐhtô dǒ he sǎyṳ ma̤ yǎ tô̤̌ tokhlǒ. 20Kè̌ he ma̤ pô̤̌ he sǎyṳ ma̤nu tô̤̌ numî̌, a ma̤ nutôpwa̤ mî̌ he mè̤̌mî̌ca mè̤̌tô̤̌. Hǒo numî̌ ta̤sǔ ô̌ dǒ hekû nutôpwa̤ ma̤ pwǎ.

21Pô̤̌nudě he kè̌shǐ kû̌ ta̤sǔ dǒ kòyòhǎkhû̌phû̌ lǎ̤klôma̤ sapunṳ̌ tûû̌nu a ma̤ dǒ hekû. Bǎ he sǎyṳ ma̤wô̌ta̤ akhanu, he kè̌shǐ còcè̌ ta̤phû̌mò̤̌ ô̌ dǒ hekû. 22Dǒ he sǎphlǒkûnu he mô̤ǐwô̌꤮ Cǒmara a ta̤sû̌ta̤tòwò. 23Bǎbǎkǎlè he kè̌shǐ lǎ̤klô ma̤sapunṳ̌ ta̤sǔ dǒ ashǔshawa̤ tôcǒ dǒ a noma̤ he nǎ̤glǒ ayô̤agî̌ tokhlǒ kû̌ ta̤phû̌mò̤̌shǐhtô tokhlǒ. Lǎ̤klô ma̤sapunṳ̌ ta̤sǔnu ashěapě̤ kû̌ he sǎphlǒ dǒ a sǎyṳma̤ ta̤wô̌nu. Ta̤sǔ alǎ̤klô ma̤sapunṳ̌ mî̌, a shěpè̤̌kè lû̌û dě a nohǎhtò̌kè he kû̌ ta̤sǔ dǒ alǎ̤klô ma̤sapunṳ̌ ajû̌ hǒ. Dě ta̤sǔ dǒ alǎ̤klô ma̤sapunṳ̌ nî̌ a ô̌ dǒ he nǎ̤glǒ ayô̤agî̌ tokhlǒ akû. 24Ǒ ho! he cû̌ htû ta̤sǔ ajû̌ pô̤̌o nî̌ ajě jî̌ he. Ta̤sǔ dǒ a ô̌ hekû dě a sûcû̌ he dǒ ta̤sinu, mò̌pè tôpwa̤ gǔ ma̤hǎplǎge bò̌ he ya? 25He hî̌bwǐhî̌sîrî Cǒmara, ma̤titèhî̌dě dǒ pa Běcǎ Yeshǔ Khrǐ akhû̌akhîdě, a ma̤hǎplǎge he hǒ.

Pô̤̌nudě ta̤ma̤htûhtò̌ anǎ̤ kû̌ he mî̌ pô̤̌hî̌tèhî̌dě he sǎphlǒ nî̌ a sǎyṳ ma̤ còcè̌ pwǎ Cǒmara a ta̤sû̌ta̤tòwò, bǎbǎkǎlè hephěheyî̌ a ta̤sǎyṳsǎbǎnu a ma̤ còcè̌pwǎ ta̤ dǒ alǎ̤klô ma̤ ta̤sǔ sapunṳ̌ tokhlǒ pwǎ.