Rom 8 | KxfSCKXF | STEP | Pô̤̌nudě khònò̤̌, kòyò dǒ a htûhtò̌ kû̌ Yeshǔ Khrǐ tôcǒ꤮ nô̤̌ tokhlǒnu, Cǒmara cî̌htò̌ pe yǎ tôkhò̌꤮ tô̤̌.

Romans 8

Ta̤ô̌htûpwa̤ dǒ Yôla Plò̌shǐ Běcǎ akû

1 Pô̤̌nudě khònò̤̌, kòyò dǒ a htûhtò̌ kû̌ Yeshǔ Khrǐ tôcǒ꤮ nô̤̌ tokhlǒnu, Cǒmara cî̌htò̌ pe yǎ tôkhò̌꤮ tô̤̌. ^{▼▼lî̤plò̌shǐ ali̤kû hî̌ pô̤̌ kû̌, “Kòyò dǒ a ô̌htûpwa̤ tô pô̤̌ Yôla Plò̌shǐ Běcǎ a ta̤sǎyṳ dě a ô̌htûpwa̤ pô̤̌ phěyî̌ a ta̤sǎyṳsǎbǎ phû̌mò̤̌nu tô̤̌ tokhlǒ”} 2 Ma̤titè̤̌hî̌dě dǒ pa htûhtò̌ kû̌ Yeshǔ Khrǐ tôcǒ꤮ nô̤̌ hǒ akhû̌akhî, Cǒmara a Yôla Plò̌shǐ ma̤ hto bǎ paklè̌ dǒ asa tôbô hǒ. Htodě a ma̤hǎplǎge hto he kû̌ ta̤sǔ alǎ̤klô dǒ a sûcû̌hto he dǒ ta̤si dǒsû̌dǒsò̌ akû nuhǒ. 3 Dǒ ama̤hî̌tè akhû̌akhî hî̌dě, pô̤̌khô pa gǔ ô̌kǔbǎ dǒ pa ma̤ ta̤sǔ ayanu, pa ganǎ̤de gû̌ma̤ kû̌ ta̤sû̌ta̤tòwò akò dě, a ta̤siwi̤sòwò̤ dǒ a gǔ ma̤jè̌ bǎ panu aô̌tô̤̌, ma̤titèhî̌dě a ta̤shû̌ta̤shǒ ma̤pî̌kè phěyî̌ a ta̤sǎyṳsǎbǎnu akhû̌aǎ ô̌ tô̤̌. Pô̤̌nudě Cǒmara ma̤ kû̌ anǎ̤, a nohèlò̤ a phû̌pwa̤khû dě a hèlò̤ sûlû anǎ̤ pô̤̌ hǎkhû̌phû̌ sô̌sô̌kû̌ pa dǒ a lǎ̤klôma̤ ta̤sǔ tokhlǒ. Bǎbǎkǎlè ta̤sǔ lǎ̤klô pǒjò lû̌û tô̤̌. A hè khòbǎ pa ta̤sǔta̤plě, dě a ma̤pî̌kè ta̤sǔ a ta̤pǒ pa nutokhlǒ hǒ. ^{▼▼Lî̤ dǒ kòyò wě̤ wǐlǒ akòshǐ dǒwǐkha tokhlǒnu, kòyò shû̌nṳ̌lǒ pô̤̌ kû̌, “Kòyò dǒ a ô̌htûpwa̤ pô̤̌ Yôla Plò̌shǐ Běcǎ tô̤̌ dě a ô̌htûpwa̤ pô̤̌ phěyî̌ a ta̤sǎyṳsǎbǎ mè̤̌tô̤̌ tokhlǒnu, Cǒmara cî̌htò̌pe lû̌û tô̤̌.”} 4 Pô̤̌khô pa gǔ ma̤lǒma̤be bò ta̤sû̌ta̤tòwò ata̤kwi tokhlǒnu, Cǒmara ma̤ hto dǒ paya hǒ. Pa dǒ a ganǎ̤de gû̌ma̤ pe nǎ̤glǒphěyî̌ a ta̤sǎyṳsǎbǎ tô̤̌ tokhlǒnu, dě pa ma̤ pô̤̌ Yôla Plò̌shǐ Běcǎ nè̌klè̌nè̌klò pa tokhlǒ ayanu, Cǒmara ma̤ hto bòkè bǎ pa hǒ.

5 Kòyò dǒ a ô̌htûpwa̤ pô̤̌ nǎ̤glǒphěyî̌ a ta̤sǎyṳ phû̌mò̤̌ tokhlǒnu, a gènè̤ còcè̌ pwǎ ta̤sǎyṳsǎbǎ dǒ a phû̌mò̤̌ tokhlǒ pwǎ. Bǎbǎkǎlè kòyò dǒ a ô̌htûpwa̤ pô̤̌ Yôla Plò̌shǐ Běcǎ nè̌klè̌nè̌klò lû̌û tokhlǒnu, a gènè̤ còcè̌ pô̤̌ Yôla Plò̌shǐ Běcǎ a ta̤sǎyṳ nutokhlǒ pwǎ. 6 Kòyò dǒ a gènè̤ còcè̌ nǎ̤glǒphěyî̌ a ta̤sǎyṳsǎbǎ phû̌mò̤̌ tokhlǒnu, a ô̌htûpwa̤ bǎ pe kû̌ Cǒmara tûjû̌pwa̤ tô̤̌. Bǎbǎkǎlè kòyò dǒ Yôla Plò̌shǐ Běcǎ pǒǐ a ta̤gènè̤ tokhlǒnu, a nǐ̤bǎ ta̤pè̤̌ta̤dû hǒtôhtu pě, htokhôtô̤̌ a gǔ ô̌plǒ kû̌ Cǒmara tûjû̌pwa̤ pě. 7 Ma̤titèhî̌dě, kòyò dǒ a gènè̤ còcè̌ nǎ̤glǒphěyî̌ a ta̤sǎyṳ phû̌mò̤̌ tokhlǒnu, a htûhtò̌ pwa̤sǎkhî̌ Cǒmara. Ma̤titèhî̌dě a jûǎ gû̌ Cǒmara a ta̤sû̌ta̤tòwò tôkhò̌꤮ tô̤̌. A jûǎ mò̌ mî̌ a jûǎ bò̌gû̌ kò tô̤̌tô̤̌. 8 Kòyò dǒ a nopǒ anǎ̤ kû̌ phěyî̌ a ta̤sǎyṳsǎbǎ phû̌mò̤̌ tokhlǒnu, a ma̤sǎlě̤sǎlò̤ bò̌nô̌ Cǒmara tôkhò̌꤮ tô̤̌.

9 Bǎbǎkǎlè, sîdě, phěyî̌ a ta̤sǎyṳsǎbǎ phû̌mò̤̌ pǒǐ bǎ sî tô̤̌. Cǒmara a Yôla Plò̌shǐ kè̌ ô̌htûpwa̤ dǒ sîkû hî̌dě, a Yôla Plò̌shǐ Běcǎ gǔ pǒǐ sî pě. Mò̌pèpè̌ bǎbǎ, dǒ a nǐ̤bǎ gû̌ kòyò Khrǐ a Yôla Plò̌shǐ tô̤̌ tokhlǒnu a htû bǎ Khrǐ ta tô̤̌. 10 Bǎbǎkǎlè Khrǐ kè̌ ô̌htûpwa̤ dǒ sîkû hî̌dě, sî yôla dǒ a ô̌ dǒ sîkû tokhlǒnu a htûpwa̤ tûjû̌pwa̤ pě, ma̤titèhî̌dě Cǒmara bè̌cǒbè̌tè̤ hto sî hǒ. Dǒ sî ta̤sǔ akhû̌akhîdě sî nǎ̤glǒ nu, a gǔ sikè pě bǎbǎkǎlè sî htûpwa̤ tûjû̌pwa̤ pě. 11 Cǒmara dǒ a ma̤htûpwa̤ getîkhî Yeshǔ Khrǐ dǒ ta̤si tôpwa̤ a Yôla Plò̌shǐ Běcǎ kè̌ ô̌htûpwa̤ dǒ sîkû hî̌dě, sî nǎ̤glǒ a si pě bǎbǎ, dǒ Yôla Plò̌shǐ Běcǎ ô̌htûpwa̤ dǒ sîkû akhû̌akhî, Cǒmara ǐ sî ta̤htûpwa̤ pě. ^c

12 Ma̤pô̤̌nudě khô sî, ta̤ma̤ lò̤bǎ pa dǒ pa bǎ ô̌htûpwa̤ pô̤̌ Yôla Plò̌shǐ Běcǎ hî̌ panu. Pa tôbǎ ô̌htûpwa̤ pô̤̌ sǐshiphěyî̌ a ta̤sǎyṳsǎbǎ phû̌mò̤̌ nutô̤̌. 13 Ma̤titèhî̌dě, kè̌ sî ô̌htûpwa̤ pô̤̌ sî phěyî̌ a ta̤sǎyṳsǎbǎ phû̌mò̤̌ hî̌nu, sî sikè pě. Bǎbǎkǎlè dǒ Yôla Plò̌shǐ Běcǎ ma̤jè̌ hto sî hǒ dě sî kè̌ ma̤sikè nǎ̤glǒphěyî̌ a ta̤sǎyṳsǎbǎ phû̌mò̤̌ tokhlǒ numî̌, sî htûpwa̤ nô̌ pě. 14 Ma̤titèhî̌dě, kòyò dǒ a ô̌htûpwa̤ pô̤̌ Cǒmara a Yôla Plò̌shǐ nè̌klè̌nè̌klò lû̌û tokhlǒ numî̌ Cǒmara a phû̌mǒ̤phû̌khû tokhlǒ hǒ. 15 Ma̤titèhî̌dě Yôla Plò̌shǐ Běcǎ dǒ Cǒmara ǐ sînu, a noǐshǔǐsha sô̌ sî pô̤̌ jû̌nu mè̤̌tô̤̌. ^d Bǎbǎkǎlè, Yôla Plò̌shǐ Běcǎ ma̤htûhtò̌ hto sî kû̌ sî htûhto Cǒmara a phû̌mǒ̤phû̌khû akhû̌akhî, a bè̌ kèhto sî pô̤̌ a phû̌mǒ̤phû̌khû tokhlǒnu hǒ. Dǒ Yôla Plò̌shǐ Běcǎ akhû̌akhîdě, pa kaǎ Cǒmara kû̌, “Abǎ, pha” pô̤̌ sîpha sanǎ̤ tôpwa̤ numî̌ anǐ̤ hǒ. ^e 16 Yôla Plò̌shǐ Běcǎ khòlṳ̌, shôbǐǐlṳ̌ bǎpô̤̌ kû̌ pa sǎphlǒ kû̌ pa mî̌ Cǒmara a phû̌mǒ̤phû̌khû tokhlǒ, pô̤̌nudě. 17 Khònò̤̌ pa kè̌ htû aphû̌ali̤ dě a gǔ ǐ pa a ta̤ǐshowî̤ û̌tě̤û̌ca dǒ a bè̌ wô̌ bǎ pa nutokhlǒ pě. A ǐ ta̤ǐshowî̤ dǒ aphû̌ali̤ tokhlǒ tô nǐ̤bǎ nutokhlǒ pě. Htokhôtô̤̌ û̌tě̤û̌ca dǒ a měgle tûjû̌pwa̤nu pa nǐ̤bǎ pô̤̌ kû̌ Khrǐ pě. Kè̌ pa khòjî̌khòjû̌ wô̤̌wô̤̌ kû̌ Khrǐ hî̌dě pa nǐ̤bǎ wô̤̌wô̤̌kû̌ ta̤bwǐdû̌sîrîhtû kû̌ a pě.

Cǒmara ǐ pa ta̤bwǐdû̌sîrîhtû

18 He kè̌shǐtṳ̌bǎ kû̌ ta̤jî̌ta̤jû̌ dǒ pa khòbǎ khònò̤̌ nî̌, kè̌ he jèbǎ kû̌ Cǒmara gǔ dǔlṳ̌ pa ta̤bwǐdû̌sîrîhtû htû̌꤮ nô̌kòpě hî̌dě, ta̤jî̌ hǒo nî̌ he bè̌ pe yǎkû̌ ta̤tôcǒ꤮ tô̤̌. 19 Lǒ̤꤮ bò Cǒmara bô̌lò̤ sǒmṳ̌wû̌bô, ta̤phû̌ta̤wè̤ kû̌ kòyò pṳ̂̌꤮ tôpwa̤ nî̌, a sǎphlǒshû̌ ô̌yṳ̂̌ kè̌shuǐ jî̌ kû̌ Cǒmara dǔlè̌lṳ̌htò̌ a phû̌mǒ̤phû̌khû tokhlǒ pě. 20 Lǒ̤꤮ bò Cǒmara bô̌lò̤ ta̤ tokhlǒnu a bǎ pî̌kèbò pě. Asî sǎyṳ tǒ̤dǒ ta̤pî̌ta̤lṳ̂̌ pô̤̌nu bǎtô̤̌ bǎbǎkǎlè Cǒmara ma̤htûbò asî pô̤̌ ata̤ tîwî̌tòwò ô̌nǎ nuhǒ. ^f 21 Bǎbǎkǎlè lǒ̤bò ta̤bô̌lò̤ tokhlǒnu a kè̌shuǐ kû̌, pô̤̌khô a gǔsigǔso tô̤̌nu, Cǒmara ma̤hǎplǎge asî pě dě a ǐ asî ta̤pili kû̌ ta̤bwǐdû̌sîrîhtû dǒ asô̌sô̌kû̌ aphû̌ tokhlǒ nupě.

22 Pa sî̌ganǎ̤ kû̌ lǒ̤bò ta̤bô̌lò̤ tokhlǒnu, a ta̤kookasha ata̤sha dǒ asô̌sô̌kû̌ pwa̤mǒ̤ phû̌ô̌ hǐphusha dě a kaǎgǔhtò̌nu pě. A ta̤kiǐkoo lô̌khôpe tǒ̤lò̤ khònò̤̌. 23 Lǒ̤꤮ bò ta̤bô̌lò̤ nutokhlǒ kookasha tûû̌ mè̤̌tô̤̌, pa lǒ̤꤮ bò bǎbǎ, pa mî̌mî̌ kookasha pwǎ. Pa dǒ a nǐ̤bǎ Yôla Plò̌shǐ Běcǎ amè̤̌kû̌ Cǒmara ǐ kwe sû dǒ awǐlǒ tokhlǒnu bǎbǎ, pa kookasha dǒ sǎphlǒkûkû. Pa ô̌pǒ̤kè̌shuǐ kookasha Cǒmara kû̌ htû̌꤮ a gǔ hè bǔǐ pa kû̌ aphû̌ pě tôni̤, kû̌ htû̌꤮ a hèǐ pa nǎ̤glǒ asa pě nuhǒ. ^g 24 Sahtò̌ bǎ Cǒmara ma̤hǎplǎge panu, pa kè̌shuǐ dǒ a gǔ ma̤ bǎ pa nutokhlǒ pěnu. Bǎbǎkǎlè kòyò tôpwa̤pwa̤ kè̌ nǐ̤bǎ hto ta̤ dǒ a kè̌shuǐnu, a lǎ̤lṳ̂ ô̌pǒ̤kè̌shuǐ pe bǎ tô̤̌. Kòyò ô̌pǒ̤kè̌shuǐ ta̤ dǒ kòyò nǐ̤bǎ htohǒnu a ô̌ tôpwǎ̤꤮ tô̤̌. 25 Bǎbǎkǎlè pa kè̌ kè̌shuǐ ta̤ dǒ pa nǐbǎ a tô̤̌ tokhlǒnu, pa bǎ sǎphlǒhtû ô̌pǒ̤kè̌shuǐ yǎ pwǎ.

26 Pô̤̌nudě, bǎ pa khû̌shiǎjǎ akhanu, Yôla Plò̌shǐ Běcǎ hè ma̤jè̌ pa. Pa tô kwicaba Cǒmara titènu pa sî̌ganǎ̤tô̤̌ bǎbǎkǎlè Yôla Plò̌shǐ Běcǎ kwisanǎ̤bǎ pa gûlǎ̤. Bǎ a kwibǎ paya akhanu, yô̤̌sǎ dǒ pa hî̌ htò̌lṳ̌ jòtô̤̌ tokhlǒnu a koo htò̌lṳ̌ bǎ pa dǒ Cǒmara ô̌. 27 Htodě Cǒmara dǒ a kè̌lǎ ma̤kè̌kè̌ pa sǎphlǒ a ta̤gènè̤ tôpwa̤nu, a sî̌ganǎ̤ wô̌bǎ ta̤ dǒ Yôla Plò̌shǐ Běcǎ sǎyṳ kwibǎ paya nutokhlǒ, ma̤titèhî̌dě Yôla Plò̌shǐ Běcǎ kwibǎ Cǒmara a kòyò plò̌shǐ tokhlǒ aya pô̤̌ Cǒmara a ta̤sǎyṳô̌ nupwǎ.

28 Kòyò dǒ a mô̤ǐ Cǒmara, dě Cǒmara kaǎ yǎ kû̌ ta̤yè̤lò̤nǎ aya tokhlǒnu, ta̤ma̤htûhtò̌ anǎ̤ kû̌ asî pwî̌tètè̌ bǎbǎnu, Cǒmara ma̤ bǎ ta̤wô̌ dǒ asî ayapwǎ numî̌, pa sî̌ganǎ̤ pwǎ. 29 Ma̤titèhî̌dě, kòyò dǒ a glè̌ yṳ̌ǎ Cǒmara tokhlǒnu a sî̌ganǎ̤ nǎ wǐhǒ. Htokhôtô̤̌ a bè̌lò̤nǎ hto asǎphlǒ dǒwǐkha kû̌ a nohtûhtò̌ sô̌sô̌kû̌ asî kû̌ aphû̌khûnu pě hǒ. Pô̤̌nudě aphû̌khûhǒo htûhtò̌kè phû̌wè̤̌pwǎ̤ tôpwa̤ dǒ apṳ̌wè̤̌ tûprṳ̂taphǎ akla tokhlǒ hǒ. 30 Htokhôtô̤̌, kòyò dǒ Cǒmara bè̌lò̤nǎ hto asǎphlǒ kû̌ asî dǒwǐkha tokhlǒnu, a kaǎ asî dǒ a gǔ htûhtò̌kè a kòyò hǒ. Htodě kòyò dǒ a kaǎ tokhlǒnu, a bè̌cǒbè̌tè̤ hto asî hǒ. Htokhôtô̤̌ kòyò dǒ a bè̌cǒbè̌tè̤ hto tokhlǒnu, a ǐhto asî kû̌ a ta̤bwǐdû̌sîrîhtû tokhlǒ hǒ.

Cǒmara ata̤mô̤ǐ

31 Kè̌hî̌pô̤̌nudě, lǒ̤꤮ bò ta̤dǒ he hî̌ hto sî tokhlǒnu, pa gǔ gènè̤ hî̌tè? Cǒmara kè̌ ô̌cu dǒ pa tôkhô kè̌hî̌dě, mò̌pè tôpwa̤ shěpě̤jò pa pě ya? 32 Cǒmara hǒtôpwa̤ nî̌ aphû̌ kû̌ anǎ̤ dě a sǎleǐ lû̌û tô̤̌ dě a ǐlò̤kè aphû̌ dǒ pa lǒ̤꤮ bò aya, kè̌ a ǐlò̤kwe pa kû̌ aphû̌khû Yeshǔ Khrǐ kè̌hî̌dě, lǒ̤꤮ bò ta̤ dǒ a ô̌kè dǒ ashǔshawa̤ tokhlǒnu, a gǔ ǐ lò̤kwe pô̤̌ pa pě mè̤̌tô̤̌ ya? 33 Kòyò dǒ Cǒmara rû̌htò̌ asî tokhlǒ nî̌ mò̌pè tôpwa̤ hè bè̌jò asî ta̤sǔ ya? Pwa̤ dǒ a bè̌cǒbè̌tè̤ asî mî̌ Cǒmara hǒ. 34 Pô̤̌nudě, mò̌pè glè̌ cî̌htò̌ asî ya? Kòyò cî̌htò̌ jò asî tôpwǎ̤꤮ tô̤̌. Ma̤titèhî̌dě, Yeshǔ Khrǐ mî̌ pwa̤ dǒ a si bǎ pa ta̤sǔ aya tôpwa̤, htokhôtô̤̌ Cǒmara ma̤htûpwa̤ getîkhî lû̌û dǒ ta̤si tôpwa̤. Dě Cǒmara ǐ lû̌û gûlǎ̤ dǒ acǔtômû tôkhô. Pô̤̌khô Cǒmara gǔ ma̤jè̌ panu, Yeshǔ nṳ̌ kwisǎyṳ bǎ pa gûlǎ̤ hǒ. 35 Mò̌pè tôpwa̤ ma̤tephekèjò Yeshǔ Khrǐ a ta̤mô̤ǐ panu ya? Bǎ pa khòbǎ ta̤pò̤̌ta̤sha akhanu bǎbǎ, ta̤jî̌ta̤jû̌ akha nubǎbǎ, kòyò ma̤jî̌ma̤jû̌ pa akhanu bǎbǎ, ta̤hǎwǐ̤shèwè̤ bǎbǎ, shôdô kûsô̌ bǎbǎ, ta̤tirǐsò̌ ǐshǔǐsha akhanu bǎbǎ, kòyò ma̤si ma̤mǎ̤ pa akha nubǎbǎ, kòyò ma̤tephekèjò pa kû̌ Yeshǔ Khrǐ ata̤mô̤ǐ panu tôpwa̤꤮ tô̤̌. 36 Lî̤plò̌shǐkû hî̌ kû̌,

“Dǒ sîkhû̌sîkhî dě, pa kè̌shǐbǎ kû̌ ta̤si tinǐ̤mṳ̌hǎ. Kòyò gènè̤ pa kû̌ kòyò hǒo nî̌ asô̌sô̌kû̌ sû̌phû̌ dǒ kòyò glè̌ ma̤si yǎnu,” ^h a hî̌ pô̤̌nu.

37 Lǒ̤bò ta̤hǒtokhlǒ htûhtò̌ bǎbǎkǎlè Khrǐ dǒ a mô̤ǐ pa tôpwa̤ akhû̌akhî, pa ma̤pè̤̌ bòmǔtegle ta̤hǒtokhlǒ pě. 38 Ta̤si bǎbǎ, ta̤htûpwa̤ bǎbǎ, mǒkhû̌ tanaphû̌ bǎbǎ, khînǎkhîno bǎbǎ, ta̤htûhtò̌ khònò̤̌ tokhlǒ bǎbǎ, htû̌꤮ nô̌kòpě tokhlǒ bǎbǎ, ta̤pô̤ta̤phǎ tokhlǒ bǎbǎ, he yṳ̌ǎ tě̤tě̤mè̤̌mè̤̌ kû̌ a ma̤tephekèjò pa kû̌ Cǒmara ata̤mô̤ǐ tô̤̌. 39 Ta̤ ô̌ dǒ mǒlǎ̤ tokhlǒ bǎbǎ, a ô̌ dǒ hǎkhû̌ tôbě alǎ̤ tokhlǒnu bǎbǎ, ta̤bô̌lò̤ dǒ ashǔshawa̤ tokhlǒ bǎbǎ, dǒ pa Běcǎ Yeshǔ Khrǐ ma̤hto ta̤ dǒ paya akhû̌akhî, lǒ̤bò ta̤ hǒtokhlǒ nî̌ a ma̤tephekhô̌jòkè pa kû̌ Cǒmara a ta̤mô̤ǐ tô̤̌.