Rom 9 | KxfSCKXF | STEP | He kû̌ Khrǐ htûhtò̌ lû̌û tôcǒ nô̤̌ hǒ akhû̌akhî, he hî̌bǎcǒ hî̌bǎtè̤ pwǎ sî pwǎ. He lô̌ǐ bǎ sî tô̤̌. Yôla Plò̌shǐ Běcǎ pǒǐ sû̌ǐ he sǎphlǒ, dě he sǎphlǒ nî̌ a hî̌měhî̌gle kû̌ he ta̤hî̌bǎ numî̌ atô pwǎ.

Romans 9

Cǒmara kû̌ a kòyò saprṳ̂saphǎ tokhlǒ

1 He kû̌ Khrǐ htûhtò̌ lû̌û tôcǒ nô̤̌ hǒ akhû̌akhî, he hî̌bǎcǒ hî̌bǎtè̤ pwǎ sî pwǎ. He lô̌ǐ bǎ sî tô̤̌. Yôla Plò̌shǐ Běcǎ pǒǐ sû̌ǐ he sǎphlǒ, dě he sǎphlǒ nî̌ a hî̌měhî̌gle kû̌ he ta̤hî̌bǎ numî̌ atô pwǎ. 2 He sǎplǎ̤nǎ̤bǎ jòjě꤮ tô̤̌. Abǎsha he sǎphlǒnu, a hǎmǎ jò pe tô̤̌ hǒ. 3 Ma̤titèhî̌dě, dǒ he pṳ̌wè̤̌ Yǔdaphû̌, amè̤̌kû̌ hekhlilè tûû̌, hesǐheshi tûû̌ tokhlǒ ayanu, Cǒmara kè̌ ǐshokè he mî̌ anǐ̤ pwǎ, htodě Cǒmara kè̌ bè̌tephe he kû̌ Khrǐ dě asî gǔ nǐ̤mò̌ ta̤ma̤hǎplǎge pě kè̌hî̌dě a bè̌tephe he mî̌ anǐ̤ pwǎ, he sǎyṳ khòbǎ jî̌ dǒ asîya hǒ. 4 Asî mî̌ Isôrělaphû̌ tokhlǒ. Cǒmara bǔǐ asî pô̤̌ aphû̌ali̤ sanǎ̤ nuhǒ. Dě a dǔlè̌lṳ̌ bǎ asî kû̌ a ta̤bwǐdû̌sîrîhtû hǒ. Cǒmara ǎměma̤mě hto shǎǎ kû̌ asî hǒ dě a ǐlò̤ hto asî kû̌ a ta̤sû̌ta̤tòwò hǒ. Asî nǐ̤bǎ ta̤caba aklè̌aklò dǒ ta̤lṳhtò̌ hôkû dě a nǐ̤bǎ lô̌khô Cǒmara a ta̤olò̤wǎ̤lò̤ tokhlǒ hǒ. ^a 5 Asî phiphu khlilè mî̌ Hebrǔ akhlialè dǒ ami̤dû̌ dǒ꤮ wǐkha tokhlǒ. Bǎ Khrǐ hè ô̌phijǎlò̤ pô̤̌ kòyò hǎkhû̌phû̌ akhanu, a hèô̌ dǒ asî akhlialè akû. A mî̌ Cǒmara dǒ a pǒǐta̤ lǒ̤bò tôpwa̤, dě kòyò htû̌sò̌htò̌ pû a tûjû̌pwa̤ talakhǎ nî̌꤮. Ame̤.

6 Kè̌hî̌pô̤̌nudě, Cǒmara ma̤hǎpò̌kè a ta̤olò̤wǎ̤lò̤nu kû̌ Yǔdaphû̌ tokhlǒ hǒ ya? A ma̤pî̌kè bǎ tô̤̌. Ma̤titèhî̌dě lǒ̤꤮ bò Isôrělaphû̌ dǒ akhlilè gelò̤ dǒ Phayakû a ô̌ tokhlǒnu, a htûhtò̌bò Cǒmara kòyò mè̤̌mî̌ca pṳ̂̌꤮ tôpwa̤ mè̤̌bǎtô̤̌. 7 Lǒ̤bò akhlialè gelò̤ dǒ PhaAbraha a ô̌ tokhlǒnu bǎbǎ, a htûbò PhaAbraha aphû̌ pṳ̂̌꤮ tôpwa̤ mè̤̌bǎtô̤̌. Mè̤mè̤̌tôkhô, Cǒmara olò̤ kû̌, “Nakhlinalè tokhlǒnu a gǔ hèlò̤ tutṳ̌ dǒ KhûIsè̌ a ô̌ pě.” ^b 8 A sǎyṳ hî̌ yô̤̌mûyô̤̌sǎ hî̌tè hî̌dě, kòyòhǎkhû̌phû̌ phû̌ô̌ dě akhlilè gelò̤ tutṳ̌ dǒ PhaAbraha sǐshi tokhlǒnumî̌, Cǒmara aphû̌ali̤ lǒ̤bò pṳ̂̌꤮ tôpwa̤ mè̤̌bǎtô̤̌. Tǒ̤pwǎ kòyò dǒ a ô̌phijǎlò̤ pô̤̌ Cǒmara a ta̤olò̤wǎ̤lò̤ nutokhlǒmî̌ kòyò gǔ bè̌ asî pô̤̌ PhaAbraha akhlialè pwǎ. 9 Ma̤titèhî̌dě, Cǒmara olò̤wǎ̤lò̤ ayô̤̌ kû̌, “Dǒ ashěakhǎ lò̤tôlò̤bǎ pěnu, he hè sô̌ pě dě Mǒ̤sara phû̌ô̌ tûû̌ a phû̌pwa̤khû pě.” ^c

10 Tǒ̤hǒonô̤̌ mè̤̌bǎtô̤̌, Mǒ̤ribè̌kha phû̌ô̌ sagwè̌ hto apwa̤khû sò̌ginǐ̤ hǒ, dě apha mî̌ tôpwa̤ nô̤̌ pwǎ. Apha mî̌ papha Phaisè̌ dǒ awǐnu tôpwa̤ hǒ. 11 – 12 Bǎ aphû̌ nusò̌ginǐ̤ ô̌phijǎlò̤ nò̌khôtô̤̌ akha, htodě bǎ aphû̌ nusò̌ginǐ̤ ma̤ ta̤sǔ kû̌ ta̤wô̌ khôtô̤̌ akhanu, Cǒmara hî̌nǎ wǐ amǒ̤ kû̌, “Awè̤̌pwǎ̤ tôpwa̤ bǎma̤ bǎ apṳ̌ nutôpwa̤ ata̤ma̤ pě.” ^d Pô̤̌khô kòyò gǔ sî̌ganǎ̤ kû̌ Cǒmara rû̌htò̌ jû̌꤮ tûû̌ asǎphlǒ pô̤̌ a ta̤yè̤lò̤nǎ hto nudě, a ma̤hto pô̤̌ a ta̤yè̤lò̤nǎ nuhǒ. Dǒ kòyò tôpwa̤pwa̤ ma̤hto ta̤tôcǒcǒ akhû̌akhî, dě a rû̌htò̌ lû̌û mè̤̌tô̤̌. Mè̤mè̤̌tôkhônu, a ô̌ dǒ Cǒmara a cǔdekû dě a rû̌htò̌ lû̌û pwǎ. 13 Lî̤plò̌shǐkû hî̌ kû̌, “He mô̤ǐ tûû̌ Khûya̤kò, he sǎkhěkè KhûĚtò̌,” ^e ahî̌pô̤̌nu.

14 Kè̌ ma̤pô̤̌nudě pa bǎ hî̌ hî̌tè? Cǒmara ma̤ ta̤ tôkǔ, acǒtô̤̌, pa gǔ hî̌ pô̤̌nu ya? Pa hî̌ pô̤̌nu mî̌ atô tô̤̌. 15 Ma̤titèhî̌dě, tôplǎkha a hî̌ Khûmṳ̂shě kû̌,

“He gǔ gwèbǎǐ kòyò tôpwa̤pwa̤ dǒ jû̌꤮ he sǎphlǒ lǎ̤gwèbǎǐ lû̌û nutôpwa̤ pě. He ma̤jè̌kwe kòyò tôpwa̤pwa̤ dǒ jû̌꤮tûû̌ he sǎphlǒ sǎyṳ ma̤jè̌kwe nutôpwa̤ pě.” ^f

16 Pô̤̌nudě pa lǎ̤nǎla̤ǐ tûû̌ pa kòyòhǎkhû̌phû̌ a ta̤sǎyṳ, mè̤̌tô̤̌dě, ata̤ jî̌pwǐ̤jî̌le tokhlǒ numî̌ anǐ̤ tô̤̌. Ta̤lǒ̤bò dǒ pa lǎ̤nǎla̤ǐ numî̌ tǒ̤pwǎ Cǒmara a ta̤sǎyṳ gwèbǎǐ pwǎ. 17 Ma̤titèhî̌dě lî̤plò̌shǐ kû hî̌ Khwǐpharû kû̌, “Pô̤̌khô he gǔ dǔlè̌lṳ̌ǐ tutṳ̌ he ta̤pô̤ta̤phǎ tokhlǒ kû̌ na, htokhôtô̤̌ pô̤̌khô hemi̤ gǔ lṳ̌shilṳ̌gǎ bò dǒ hǎkhû̌běkhû̌ nudě, he no na kû̌ khwǐ pwǎ,” ^g a hî̌ lû̌û pô̤̌nu. 18 Ma̤pô̤̌nudě Cǒmara gwèbǎǐ kòyò jû̌꤮ tûû̌ a sǎyṳgwèbǎǐnu, a ma̤ ikǒpwǐ̤ kòyò dǒ jû̌ a sǎyṳ ma̤pwǐ̤ǐ kòyò nutokhlǒ pwǎ.

Cǒmara a ta̤sǎphlǒdû̌ kû̌ a ta̤sǎyṳ gwèbǎǐ

19 Dǒ sîklanu a gǔ gwè̌ nòpwǎ he kû̌, “Kè̌ ma̤pô̤̌nudě ma̤titèdě a cû̌ bè̌pepe pa ta̤sǔ ma̤titè? Mò̌pè tôpwa̤ gǔ ma̤tě̤tṳ bò̌ a sǎyṳ ma̤ta̤nu ya?” 20 Bǎbǎkǎlè he gǔ hî̌ na kû̌, na mî̌ kòyò hǎkhû̌phû̌ pwǎ. Na̤ lǎ̤lṳ̂hî̌ pi̤jî̌ geshěshǔ Cǒmara pô̤̌nutô̤̌. Gopo̤hǎ tômènu, kè̌ a hî̌ geshěshǔ pwa̤bô̌ lû̌û nutôpwa̤ kû̌, “Na cû̌bô̌ he pô̤̌o ma̤titè?” ^h A hî̌ geshěshu pô̤̌o numî̌ anǐ̤ tô̤̌. 21 Hǎpèè̌ tôbô̌nu, a ô̌ dǒ pwa̤bô̌gopo̤hǎ nutôpwa̤ a cǔdekû pwǎ, a gǔ bô̌gopo̤ jû̌꤮ a sǎyṳ bô̌nu mî̌ anǐ̤ pwǎ. Hǎpèè̌ tôbô̌ akûnu, a gǔ bô̌gopo̤ dǒ kòyò noǎ khô̌tû̌ a pwèbǎ akha nubǎbǎ, mè̤̌tô̤̌dě a gǔ bô̌gopo̤ dǒ kòyò gǔ noǎ a lṳmṳ̌shî̌ lṳmṳ̌hǎ aya nubǎbǎ, a bô̌ jû̌꤮ tûû̌ asǎphlǒ sǎyṳ bô̌ numî̌ anǐ̤ pwǎ.

22 Cǒmara sǎyṳ ma̤ jû̌꤮tûû̌ asǎphlǒnu, anǐ̤ pṳ̂̌taplǎ. A sǎyṳ dǔlè̌lṳ̌ bǎ kòyò kû̌ a ta̤sǎphlǒdû̌ htodě a sǎyṳ nosî̌ganǎ̤ kòyò kû̌ a ta̤pô̤ta̤phǎ tokhlǒ. Bǎbǎkǎlè kòyò dǒ a bǎ khòbǎ lû̌û ta̤sǎphlǒdû̌ pě, dě a bǎ tǒ̤dǒ ta̤pî̌ta̤lṳ̂̌ pě tokhlǒ ayanu, a dǔlè̌lṳ̌ tèplè̌ khô̌bǎ asî kû̌ a ta̤khòsǎdô, a ta̤khòsǎdô sǎphlǒhtû tokhlǒ. 23 Pô̤̌khô Cǒmara gǔ dǔlè̌lṳ̌ bǎ kòyò dǒ a sǎyṳgwèbǎǐ lû̌û nutokhlǒ kû̌ a ma̤ cô̌klǐcô̌sè bǎ asî pwǐ꤮ tènu dě, a khòsǎphlǒhtû bǎ jî̌ asî. A rû̌htò̌ nǎ wǐhto asî hǒdě a ǐ asî kû̌ a ta̤bwǐdû̌sîrîhtûnu pě. 24 Pa mî̌ kòyò dǒ Cǒmara kaǎ pa tokhlǒ hǒ. A kaǎ tǒ̤ Yǔdaphû̌ tokhlǒ aklanu mè̤̌tô̤̌, dǒ Yǔdaphû̌ mè̤̌tô̤̌ tokhlǒ aklanumî̌, a kaǎǐ pwǎ. 25 Pô̤̌ Cǒmara nohî̌ piwi̤pèshè Khûyûshǐya kû̌,

“Dǒ awǐkha asî mî̌ a htû hekòyò mè̤̌tô̤̌, bǎbǎkǎlè he gǔ kaǎ asî kû̌, ‘hekòyò’ pě, htokhôtô̤̌, dǒ awǐkha dě asî mî̌ kòyò dǒ he mô̤ǐ a tokhlǒ mè̤̌tô̤̌, bǎbǎkǎlè khònò̤̌ he kaǎ asî kû̌, ‘kòyò dǒ he mô̤ǐ asînu’ pě.” ⁱ

26 “Gûlǎ̤ dǒ he hî̌hto sî dǒ꤮ wǐkha kû̌, ‘sî mî̌ hekòyò mè̤̌tô̤̌’ nutôkûnu, khònò̤̌dě he gǔ kaǎ asî kû̌ ‘Cǒmara dǒ a htûpwa̤ tôpwa̤ a phû̌mǒ̤phû̌khû tokhlǒ’ hǒ,” ^j piwi̤pèshè Yṳ̂ěla̤ hî̌ pô̤̌nu.

27 Piwi̤pèshè Khûyashǎya hî̌ Isôrělaphû̌ tokhlǒ awe̤akè kû̌,

“Isôrělaphû̌ tokhlǒnu, a ô̌dû̌wî̤ asô̌sô̌kû̌ lǒ̤sîmî̌ dǒ shidû̌te̤we̤ ahtunu, bǎbǎkǎlè Cǒmara ma̤hǎplǎge asî tîkî̌phû̌ nô̤̌ pě. ^k 28 Ma̤titèhî̌dě, Cǒmara gǔ cî̌htò̌ phwèkè hǎkhû̌nu pě.” ^l

29 Pô̤̌khô piwi̤pèshè Khûyashǎya hî̌nǎ hto kû̌,

“Běcǎ dǒ a sî̌jò̌ta̤ lǒ̤꤮ bò tôpwa̤ kè̌ sǎleǐ kû̌ pakhlipalè tokhlǒ tô̤̌ numî̌, pa htûhtò̌ sô̌sô̌kû̌ pô̤̌ a cî̌htò̌ bòkè Wî̤̌sadû kû̌ Wî̤̌gamû̌ranu pwǎ.” ^m ^{▼▼Wî̤̌kûphû̌ tokhlǒ ma̤ ta̤phû̌mò̤̌shǐhtô akhû̌akhî Cǒmara ma̤pî̌kèbò wî̤̌nu ginǐ̤wî̤̌}

Isôrělaphû̌ kû̌ ta̤sǎlě̤we̤kè

30 Kè̌ ma̤pô̤̌nudě, pa gǔ hî̌ hî̌tè? Yǔdaphû̌ mè̤̌tô̤̌ tokhlǒnu, a kè̌lǎǐ kû̌ kòyò klè̌ dǒ Cǒmara bè̌cǒbè̌tè̤ kòyò nutôbô tô̤̌ bǎbǎkǎlè asî nǐ̤bǎ hǒ. Dǒ asî ta̤yṳ̌ta̤nǎ̤ akhû̌akhîdě Cǒmara bè̌cǒbè̌tè̤ asî hǒ. 31 Bǎbǎkǎlè Yǔdaphû̌ tokhlǒnu, pô̤̌khô a nǐ̤bǎ Cǒmara a ta̤bè̌cǒbè̌tè̤ asî ayanudě, asî jî̌pwǐ̤ gû̌ma̤ lô̌khô ta̤sû̌ta̤tòwò tokhlǒ bǎbǎkǎlè a nǐ̤bǎ jò tôkhò̌꤮ tô̤̌. 32 A cû̌ nǐ̤bǎ tô̤̌ ma̤titèhî̌dě asî jî̌pwǐ̤ kè̌lǎ ta̤tě̤ta̤mè̤̌nu, a nǎla̤ǐ gû̌ lô̌khô ta̤yṳ̌ tô̤̌. Mè̤mè̤̌tôkhô, asî nǎla̤ǐ lô̌khô ta̤wô̌ dǒ asî ma̤ nutokhlǒ alô̤ pwǎ. Asî htò̌tukhubǎ “Lǒ̤ lǎ̤htò̌tukhu tômè.” 33 Pô̤̌ lî̤plò̌shǐkû hî̌ Me̤shǐya awe̤akè kû̌,

“Kè̌mò̌ lô̌khô, he dǐô̌ lǒ̤ tômè dǒ Wî̤̌shǐû akû pě, dě kòyò gǔ htò̌tukhu a pě, dě a ma̤lòkhǔpo̤ kòyò pě.

Bǎbǎkǎlè kòyò dǒ a yṳ̌ǎ lû̌û tokhlǒnu, a tǒ̤dǒ ta̤sǎphlǒpî̌ agûlǎ̤ tôkhò̌꤮ tô̤̌.” ^o