Titus 1
1He mî̌ Khûpò̌lǔ, he wě̤cû̌ bǎ na lî̤ hǒtôbǎ. He mî̌ Cǒmara ajû̌ kû̌ Yeshǔ Khrǐ a pwa̤nophû̌ tôpwa̤. Cǒmara rû̌htò̌ he dě a nocû̌ ma̤jè̌ he kû̌ kòyò dǒ a rû̌htò̌ lû̌û nutokhlǒ a ta̤yṳ̌ta̤nǎ̤, dě a gǔ sî̌ganǎ̤ lô̌khô ta̤tě̤ta̤mè̤̌. Ta̤cǒta̤tè̤ numî̌ a ma̤jè̌ asî dǒ a gǔ ô̌htûpwa̤ tô kû̌ Cǒmara asǎphlǒ nutokhlǒ hǒ. 2Ta̤cǒta̤tè̤nu a ǐ asî ta̤kè̌shuǐ dǒ asî gǔ nǐ̤bǎ yôla htûpwa̤ tûjû̌pwa̤ talakhǎ aya hǒ. Bǎ hǎkhû̌ ô̌htûhtò̌ nò̌khôtô̤̌ akhanu, Cǒmara dǒ a lô̌ǐta̤ tôkhò̌꤮ tô̤̌ tôpwa̤nu, a olò̤ nǎ hto kû̌ a gǔ ǐ pa ta̤htûpwa̤nu hǒ. 3Cǒmara dǒ a ma̤hǎplǎge pa hǒtôpwa̤ dǐsî̌ganǎ̤ bǎ pa ta̤we̤ta̤kè numî̌, a shěkhǎ tôbǎ dě a yṳ̌ǎnṳ̌ he dě a nolò̤ he dǒ he gǔ dǐsî̌ganǎ̤ bǎ sî kû̌ ta̤we̤ta̤kènu hǒ. 4Khûtǐtu, he wě̤cû̌ lî̤ hǒtôbǎ dǒ naô̌. Na ta̤yṳ̌ta̤nǎ̤ asô̌sô̌kû̌ pa tôcǒ꤮ nô̤̌ akhû̌akhî, nanu a asô̌sô̌kû̌ hephû̌ sanǎ̤ kû̌ henǎ̤. a pha Cǒmara kû̌ pwa̤ma̤hǎplǎge pa Yeshǔ Khrǐnu gǔ pû na ta̤bwǐta̤sîrî kû̌ ta̤gûjû̌kabǎ nî̌꤮.Khûtǐtu ta̤ma̤ bǎ Grete shikhokhû̌
5He bè̌kè hǒ na bǎ Grete shikhokhû̌ numî̌ pô̤̌khô na gǔ cû̌ tiwǐ ma̤tô̤ma̤bǎ htophlǔkè bò ta̤ dǒ a lǎ̤lṳ̂ma̤pe dǒ wî̤̌nu pṳ̂̌tôwî̤̌ akû nutokhlǒ pwǎ. Dě na gǔ bè̌htò̌ ta̤dòkû mǒ̤khumǒ̤pwǎ̤ tokhlǒ pô̤̌ he nè̌klè̌nè̌klò hto nanu nî̌꤮. 6Ta̤dòkû ikǒlǒkòdû̌ tokhlǒ numî̌ asî bǎ mè̤̌ kòyò dǒ kòyò lǎ̤bè̌ ta̤sǔ dǒ asîlô̤nu a tôbǎ ô̌ tô̤̌. Ama bǎ ô̌pwǎ tôpwa̤꤮ nô̤̌, aphû̌ tokhlǒ numî̌ a bǎ htû pwa̤yṳ̌ǎta̤phû̌ dě asî mi̤ bǎ lṳ̌dǒ awî̤awô̌, mè̤̌tô̤̌mî̌ a bǎ nò̌kudu tô̤̌, htodě a bǎ mè̤̌ kòyò dǒ a ganǎ̤de yô̤̌ tokhlǒ. b 7Ma̤titèhî̌dě, ta̤dòkû ikǒlǒkòdû̌ tôpwa̤nu, ta̤ma̤ lò̤bǎ a dǒ a tôbǎ ma̤ Cǒmara a ta̤phǐta̤ma̤ akhû̌akhî, kòyò lǎ̤bè̌ a ta̤sǔ mî̌ a tôbǎ ô̌ tô̤̌. Ikǒpwǐ̤ kû̌ sǎphlǒ dû̌htò̌phwè tokhlǒnu a tôbǎ ô̌ tô̤̌, bǎ ǎmuôpô̌ tô̤̌, bǎpo̤bǎplè kòyò tô̤̌, bǎ pṳ̂̌sigwǐǎ ru dǒ kòyòkhû̌ tô̤̌. 8Mè̤̌mè̤tôkhô, a tôhtû kòyò dǒ a kaǎmô̤shǔ shǐpwǎ̤shǐmè̤, a tôhtû kòyò dǒ a mô̤ ta̤ dǒ awô̌, a tôbǎ ta̤khòjobò̌ǐ anǎ̤, a tôbǎ ô̌ kû̌ ta̤tě̤ta̤mè̤̌ kû̌ ta̤plò̌shǐ kû̌ ta̤sè̌rè̌ ǐbò̌ anǎ̤, 9Pô̤̌khô a gǔ ǐkhû̌ǐǎbò̌ kòyò kû̌ ta̤sû̌ǐtòwòǐ dǒ atô tokhlǒ, htokhôtô̤̌ pô̤̌khô a gǔ sû̌ǐtòwòǐ getîkhîjòsô̌ kòyò dǒ a hî̌ takǎshěshu ta̤we̤ta̤kè hǒtokhlǒ ayanu, a tôbǎ yṳ̌ǎ pṳ̂̌měǐ wô̌ ta̤we̤ta̤kè dǒ kòyò yṳ̌ǎnṳ̌ a dě pô̤̌ kòyò sû̌ǐ hto lû̌û nutokhlǒ. 10Ma̤titèhî̌dě kòyò dǒ a hî̌ takǎshěshu ta̤ tokhlǒnu a ô̌ dû̌wî̤. Asî nutokhlǒmî̌, a hî̌bǎ ta̤ dǒ yô̤̌mûyô̤̌sǎ ô̌tô̤̌ tokhlǒ, dě a hî̌bǎ lòhǎlòhô bò kòyò. Kòyò pô̤̌nu tokhlǒmî̌, ǎtakǐ, pa kè̌shǐjò asî bǎtè hî̌dě, asî nutokhlǒmî̌, a hî̌bǎ shû̌tuklǔ lô̌khô kû̌ pô̤̌khô kòyò gǔ nǐ̤bǎ ta̤hǎplǎge ayanu, kòyò bǎ dǔtṳ̌aphě, a hî̌ lô̌khô pô̤̌nu tokhlǒ akla nuhǒ. 11Tôbǎ noô̌sǔtukǔ asî ta̤hî̌bǎ nutokhlǒ, ma̤titèhî̌dě ta̤sû̌ǐtòwòǐ dǒ a tô sû̌ǐ tô̤̌ tokhlǒnu, asî cû̌sû̌ǐ kòyò akhû̌akhî, asî cû̌ ma̤shû̌shǎ ma̤dǐdòbò kòyò hǐphû̌phòphû̌ pṳ̂̌꤮ tôpwa̤ a ta̤yṳ̌ta̤nǎ̤. Asî sǎyṳ nǐ̤bǎ lô̌khô ru dě a cû̌ma̤lè sû̌ǐ kòyò pwǎ. 12Asî Grete klǔphû̌ piwi̤pèshè akla tôpwa̤nu a hî̌ kû̌, “Grete klǔphû̌ tokhlǒmî̌ kòyòlòhô pṳ̂̌taplǎ, asî mî̌ asô̌sô̌kû̌ ta̤mi̤ta̤mò̤̌ dǒ a khuhe phû̌mò̤̌ tokhlǒ htodě asî mî̌ kòyò cèklèlôbô̌phû̌ dǒ a ǎlǒ̤ô̌kè tokhlǒ.” 13A hî̌ ta̤ hǒtokhlǒ numî̌ a tôpwǎ akhû̌akhî, pô̤̌khô asî gǔ ô̌cǒô̌tè̤ dǒ ta̤yṳ̌ta̤nǎ̤ akûnu sû̌ǐshû̌ asî nî̌꤮. 14Htodě pô̤̌khô asî gǔ wîkè Yǔdaphû̌ a ta̤dô̌kènè̤ dǒ awǐnu nutokhlǒ, htodě pô̤̌khô asî wîkè ta̤mǎlò̤ dǒ kòyò htè̌shěshu ta̤tě̤ta̤mè̤̌ nutokhlǒ ta̤hî̌bǎ nutokhlǒ ayanu, sû̌ǐshû̌ asînu. 15Kòyò tôpwa̤pwa̤ dǒ a mṳ̂̌plî dǒ Cǒmara a lô̤mô̤̌nu, ta̤lǒ̤꤮ bò mṳ̂̌plî bò dǒ aya hǒ. Bǎbǎkǎlè kòyò dǒ a mṳ̂̌plî gû̌ kòyò tô̤̌ dě a yṳ̌nǐ̤nǎ̤nǐ̤ gû̌ kòyò tô̤̌ tokhlǒnu, dǒ ayanu a mṳ̂̌plî tôcǒ꤮ tô̤̌. Asî ta̤sǔ tokhlǒnu a ma̤ phû̌mò̤̌bò nṳ̌sô̌ asî ata̤gènè̤ kû̌ asǎphlǒ dǒ a sî̌ganǎ̤ ta̤wî̤ kû̌ ta̤phû̌mò̤̌ nuhǒ. 16Asî hî̌ kû̌ a sî̌ganǎ̤ Cǒmara bǎbǎkǎlè ta̤ma̤ dǒ asî ma̤ tokhlǒnu a ô̌lṳ̌htò̌ kû̌ asî sî̌ganǎ̤ Cǒmara tîkî̌꤮ tô̤̌. Asî nutokhlǒmî̌ lǎ̤ma̤yǒ̤sǐpi̤wô̤̌, htodě kòyò dǒ a ganǎ̤de kû̌ kòyò ayô̤̌ tô̤̌ tokhlǒ, asî glè̌ ma̤ta̤ awô̌ tocǒcǒnu a ma̤bò̌ kû̌ kòyò tô̤̌.
Copyright information for
KxfSCKXF