Titus 2
Bǎphǐbǎma̤ bò mǒ̤pwǎ̤ kû̌ phijǎ tokhlǒ aya
1Bǎbǎkǎlè Khûtǐtu, na dě sû̌ǐ tôbǎ kòyò kû̌ ta̤sû̌ǐtòwòǐ dǒ acǒatè̤ nutokhlǒ nî̌꤮. 2Pô̤̌khô mǒ̤pwǎ̤ pwa̤khû tokhlǒ gǔ jî̌ sarashapwǎ̤ lô̌khô anǎ̤, pô̤̌khô kòyò gǔ bè̌dubè̌nǎ̤ asî, dě pô̤̌khô asî gǔ khòpè̤̌ lô̌khô asǎphlǒ nudě, sû̌ǐtòwòǐ lô̌khô asî nî̌꤮. Asî tô ô̌ kû̌ a ta̤yṳ̌ta̤nǎ̤ dǒ ashû̌asho, asî tô lǒbe kû̌ ta̤mô̤ǐkò, asî tô khòjî̌khòjû̌ khòsǎphlǒhtûbò̌ lô̌khô. 3Pô̤̌nudě, pô̤̌khô pwa̤mǒ̤ mǒ̤pwǎ̤ tokhlǒ gǔ bè̌sû̌bè̌sǎ a ta̤ô̌htûpwa̤ dǒ a tô ô̌htûpwa̤ dě bè̌plò̌shǐ lô̌khô sǎphlǒ dǒ Cǒmara ô̌ ayanudě, sû̌ǐtòwòǐ lô̌khô asî nî̌꤮. Htodě asî tô dô̌ ta̤yô̤ta̤gî̌ tô̤̌, a tô htû shisǐkhǎ ajû̌ tô̤̌. Kòyò tô ma̤wô̌ta̤ pô̤̌hî̌tènu, asî tô sû̌ǐ kòyò. 4Asî kè̌ ma̤pô̤̌nu mî̌ pwa̤mǒ̤ mǒ̤pwǎ̤ hǒtokhlǒnu, a sû̌ǐjò padô̌ pwa̤mǒ̤ nějǎ tokhlǒ kû̌ asî tô mô̤ǐ tûû̌ lô̌khô awṳ̂ kû̌ aphû̌ali̤ tokhlǒ hî̌tè pwǎ. 5Pô̤̌khô kòyò gǔ pîjî̌ǐsho tǎ̤ Cǒmara alě̤ayô̤̌ tǎ̤mǎ̤nu, pwa̤mǒ̤ mǒ̤pwǎ̤ hǒtokhlǒnu, a bǎ sû̌ǐbǎ pwa̤mǒ̤ nějǎ tokhlǒ. Dě a bǎ sû̌ǐ asî kû̌ alô̌khô bǎ htû pwa̤mǒ̤ tokhlǒ dǒ a pǒǐpè̤̌ asǎphlǒ, asî sǎphlǒ bǎ mṳ̂̌plî, asî bǎ htû ma dǒ a kè̌khwè̌ nǐ̤wô̌ ahǐaphò, asî bǎ ma̤ta̤ dǒ awô̌, dě a bǎ jûlě̤phî̌yô̤̌ awṳ̂ ayô̤̌. 6Pô̤̌nudě, ǐkhû̌ǐǎ padô̌ pwa̤khû nějǎ tokhlǒnu kû̌ a gǔ khòpè̤̌ jòǐ gû̌ lô̌khô asǎphlǒ. 7Na nudě, na ma̤ta̤ titètè̌ bǎbǎ, pô̤̌khô pwa̤khû nějǎ tokhlǒ gǔ kè̌lû̌mò̌mṳ nanu dě, ma̤ pwǎ ta̤wô̌ nutokhlǒ nî̌꤮. Bǎ na sû̌ǐtòwòǐ kòyò akhanu, bè̌cǒcǒ na sǎphlǒ htodě jî̌ shapwǎ̤pû nanǎ̤ nî̌꤮. 8Bǎ na sû̌ǐtòwòǐ kòyò akhanu, pô̤̌khô kòyò gǔ kè̌lǎ bè̌jò pe na ta̤sǔ tô̤̌nu, hî̌bǎcǒcǒ nayô̤̌ nî̌꤮. Na kè̌ ma̤pô̤̌nu hî̌dě asî lǎ̤hî̌ phû̌mò̤̌ pawe̤pakè a ô̌petô̤̌ akhû̌akhî, asî gǔ sòwò̤̌kè pwǎ. 9Kòyò dǒ a htû jû̌ tokhlǒnu a ma̤ titètè̌ bǎbǎ, a tôbǎ dǐpǒ anǎ̤ kû̌ aběcǎ dě asî bǎ ma̤tô aběcǎ tokhlǒ asǎphlǒ. Asî bǎ klî̌shǔ htè̌shěshu aběcǎ tô̤̌. 10Asî tô ǎhǔǎhǐ aběcǎ ata tô̤̌, mè̤̌mè̤tôkhônu, pô̤̌khô aběcǎ gǔ yṳ̌ǎ tě̤tě̤mè̤̌mè̤̌jò sî ayanu, asî tô ô̌htûpwa̤ wî̤wô̌ bǎ aběcǎ. Kè̌ ma̤pô̤̌nu hî̌dě kòyò gǔ htû̌sò̌htò̌ǐ bò Cǒmara dǒ a ma̤hǎplǎge pa hǒtôpwa̤ a ta̤sû̌ǐtòwòǐnu dǒ ta̤pṳ̂̌꤮ tocǒ akû pě. 11Ma̤titèhî̌dě pô̤̌khô Cǒmara gǔ ma̤hǎplǎge kòyòhǎkhû̌phû̌ lǒ̤꤮ bò ayanu, a dǔlè̌lṳ̌hto abwǐsîrî hǒ. 12Cǒmara abwǐasîrî, a sû̌ǐ pa kû̌ pa gǔ wîkè klè̌ dǒ a phû̌mò̤̌ tokhlǒ kû̌ hǎkhû̌ a ta̤sǎyṳsǎbǎ tokhlǒ. Khònò̤̌dě Cǒmara abwǐsîrî sû̌ǐ pa kû̌ pa tô pǒǐpè̤̌, pa tô khòbò̌pè̤̌ jò pa sǎphlǒ. Dě pa tô ô̌htûpwa̤ cǒcǒtè̤tè̤, htokhôtô̤̌ pa tô ô̌htûpwa̤ pô̤̌ atô Cǒmara sǎphlǒnu. 13Bǎ pa ô̌pǒ̤kè̌shǔǐ ta̤ǐshowî̤ alṳmṳ̌ni̤ amè̤̌kû̌ htû̌꤮ papha Cǒmaradû̌ kû̌ pwa̤ma̤hǎplǎ pa Yeshǔ Khrǐ a ta̤bwǐdû̌sîrîhtû gǔ hè ô̌lṳ̌htò̌ pě akhanu, pa bǎ ô̌htûpwa̤ pô̤̌ a hî̌ panu tokhlǒ. 14Pô̤̌khô a gǔ ma̤hǎplǎge pa dǒ ta̤phû̌mò̤̌shǐhtô lǒ̤꤮ bò tokhlǒ akû, a htokhôtô̤̌ pô̤̌khô a gǔ ma̤ mṳ̂̌plî ge sô̌ pa dě pa gǔ htûhtò̌ a kòyò, kǎtô̤̌ pa gǔ sǎphlǒshû̌ ma̤ta̤ dǒ awô̌ tokhlǒ ayanu, a tṳ̌sikhòsi bǎ anǎ̤ dǒ paya hǒ. b 15Sû̌ǐtòwòǐ padô̌ lô̌khô asî nutokhlǒ. Ǐkhû̌ǐǎ bǎ asînu. Tṳ̂mṳ̂̌ lô̌khô asî dě noǎ bò na ta̤siwi̤sòwò̤nu nî̌꤮. No gènè̤pî̌tî̌ tǎ̤ kòyò kû̌ nanǎ̤ tǎ̤mǎ̤ nî̌꤮.
Copyright information for
KxfSCKXF