Titus 3
Ma̤ ta̤ dǒ awô̌
1Pô̤̌khô ta̤dòkûphû̌ tokhlǒ gǔ nopǒ ǐ lô̌khô anǎ̤ kû̌ khwǐcaphǎ tokhlǒ dě a gǔ jûǎ lô̌khô asîyô̤̌, htokhôtô̤̌ pô̤̌khô asî ô̌ tîwî̌tòwò lô̌khô anǎ̤ dǒ a ma̤wô̌ta̤ pṳ̂̌꤮ tôcǒ ayanu, dǐ gènè̤bǎ sô̌ asî nî̌꤮. 2Dǐ gènè̤bǎ pô̤̌sô̌ asî kû̌ nopîjî̌ǐsho tǎ̤ kòyò tôpwa̤ tǎ̤mǎ̤ nî̌꤮. No sè̌rè̌ lô̌khô asî kû̌ ta̤klî̌ lû̌û nutokhlǒ nî̌꤮. Htodě noô̌ lô̌khô asî kû̌ sǎphlǒ ta̤sǎdôhôbî̌, dě no dǔlè̌lṳ̌ bǎ kòyò kû̌ asî a ta̤khòsǎdô a ta̤shò̌lò̤ sǎphlǒ mè̤̌mî̌ca nutokhlǒ kû̌ kòyò pṳ̂̌tôpwa̤ nî̌꤮. 3Ma̤titèhî̌dě dǒ awǐkha pa tokhlǒ mî̌ kòyò nòdû̌pwǎ kòyò jûlě̤phî̌yô̤̌ tô̤̌ tokhlǒ. Pa mî̌ kòyò dǒ a gû̌ sǔ kû̌ kòyò lòhô tokhlǒ akò. Pa htû kòyò dǒ a sǎlě̤sǎyṳ ma̤mô̤ ǐtû̌ anǎ̤ tokhlǒ ajû̌ hǒ. Pa ô̌htûpwa̤ ma̤bòkè shěkhǎ kû̌ pa ma̤ ta̤phû̌mò̤̌shǐhtô kû̌ ta̤sǎkhěkhû̌khwè kòyò tokhlǒ hǒ. Kǎtô̤̌ kòyò sǎkhě pa dě pa sǎkhěshǔ kòyò. 4Bǎbǎkǎlè bǎ Cǒmara dǒ a ma̤hǎplǎge pa hǒtôpwa̤ a ta̤sǎyṳgwèbǎǐ kû̌ ata̤mô̤ pa ô̌lṳ̌htò̌ akhanu, a ma̤hǎplǎge pa hǒ. 5Ta̤dǒ a ma̤hǎplǎge pa numî̌ pa nǎ̤běcǎ tûû̌ ma̤ ta̤tě̤ta̤mè̤̌ akhû̌khî mè̤̌tô̤̌, amè̤̌kû̌ a sǎyṳgwèbǎǐ pa akhû̌khî, a ma̤hǎplǎge pa pwǎ. Dǒ Yôla Plò̌shǐ Běcǎ a ta̤pô̤ta̤phǎ akhû̌akhî, dě a cǔbò pa, htodě a ǐ pa ta̤ô̌phijǎlò̤ asa kû̌ ta̤ô̌htûpwa̤ asa tokhlǒ. 6Yeshǔ Khrǐ dǒ a ma̤hǎplǎge pa hǒtôpwa̤ akhû̌akhîdě, Cǒmara sǎphlǒshû̌ glǒlò̤gǎlò̤ yûkakwepwǎ a Yôla Plò̌shǐ dǒ palô̤ pwǎ. 7Cǒmara bè̌cǒbè̌tè̤ pa kû̌ abwǐdû̌asîrîhtû akhû̌khî hǒ. Pô̤̌nudě khònò̤̌ pa nǐ̤bǎ pa ta̤kè̌shuǐ dǒ a mè̤̌ yôla htûpwa̤ û̌tě̤û̌ca tûjû̌pwa̤ talakhǎnu hǒ. 8Ta̤hî̌bǎ numî̌ acǒatè̤. Pô̤̌khô kòyò dǒ a yṳ̌nǐ̤nǎ̤nǐ̤ Cǒmara tokhlǒ gǔ bè̌sû̌bè̌sǎ dě dǔlè̌lṳ̌ lô̌khô asǎphlǒ dǒ a gǔ ma̤ ta̤wô̌ tokhlǒ ayanu, he sǎyṳ dǒ na gǔ bè̌sû̌bè̌sǎ sû̌ǐ tě̤tě̤mè̤̌mè̤̌ kòyò kû̌ ta̤we̤ta̤kè nutokhlǒ. Ta̤nutokhlǒ mî̌ awô̌ dě a htûbwǐhtûsîrî mî̌ca dǒ kòyò pṳ̂̌꤮ tôpwa̤ aya. 9Bǎbǎkǎlè sè̌rè̌ lô̌khô sînǎ̤ kû̌ ta̤hî̌bǎ htè̌kè̌khî nòdû̌lû̌û nutokhlǒ kû̌ ta̤dô̌khlidô̌lè dǒ ahtû tokhlǒ. Htodě sè̌rè̌ lô̌khô ta̤to̤klî̌ lûcû̌peshe kè̌khî lû̌û kû̌ ta̤sû̌ta̤tòwò akò nutokhlǒ nî̌꤮, ma̤titèhî̌dě ta̤nutokhlǒ mî̌ abwǐsîrî ô̌ tôcǒ꤮ tô̤̌. A nòdû̌ pwǎ. 10Kòyò tôpwa̤pwa̤ dǒ a dǐ ô̌htò̌ ta̤hǎpò̌htò̌shî tokhlǒnu, dǐsè̌rè̌ a ginǐ̤plǎ htodě dǒ nô̌kònu bǒsû̌pe tǎ̤ kû̌ a tǎ̤mǎ̤ nî̌꤮. 11Na sî̌ganǎ̤ tě̤tě̤mè̤̌mè̤̌ kû̌ kòyò pô̤̌nu tokhlǒ mî̌ kòyò dǒ a ma̤tèplè̌kè ta̤tě̤ta̤mè̤̌ dě a ma̤ sělě lô̌khô ta̤sǔ pwǎ. Htokhôtô̤̌ ata̤sǔ tokhlǒnu a khòlṳ̌ lû̌û kû̌ a mî̌ kòyò ta̤sǔô̌ tôpwa̤hǒ.Ta̤sû̌ǐtòwòǐ dǒ gutṳ̌kò tokhlǒ
12Htû̌ he nohèlò̤ Khûaratema mè̤̌tô̤̌dě Khûtǔkǐkǔ dǒ naô̌ pě akhanu, jî̌pwǐ̤ hè wǐ dǒ heô̌ bǎ Wî̤̌ni̤kapòlisô nupě nî̌꤮, ma̤titèhî̌dě he bè̌lò̤ hto he sǎphlǒ kû̌ gǎwô̤̌kha pěnu, he gǔ cû̌ô̌ bǎnu pě. a 13Jî̌pwǐ̤ htǒkhû̌htû̌ǎ ma̤jè̌ma̤kwe lǎpû pwa̤cî̌htò̌ ta̤ Khûye̤nǎ̤ kû̌ Khûapò̌lǔ a ta̤cû̌ta̤ge ayanu nî̌꤮. Htokhôtô̤̌ kè̌ tîwî̌tòwò bǎ pô̤̌ ta̤ dǒ asî lǎ̤lṳ̂ nutokhlǒ nî̌꤮. b 14Pô̤̌khô pa Grete khrǐphû̌ hǒtokhlǒ gǔ noǎjò kû̌ kòyò ashěakhǎ dǒ a ma̤ ta̤wô̌ tokhlǒ ayanu, tôbǎ sû̌ǐ padô̌ asî htodě pô̤̌khô a gǔ ma̤jè̌bò̌ padô̌ kòyò dǒ a lǎ̤lṳ̂ mè̤̌mî̌ca nutokhlǒ, htokhôtô̤̌ pô̤̌khô asî gǔ ô̌htûpwa̤ nòdû̌ tǎ̤ kû̌ ta̤ dǒ abwǐasîrî ô̌tô̤̌ nutokhlǒ aya tǎ̤mǎ̤nu, tô sû̌ǐ padô̌ asîsî. 15Kòyò dǒ a ô̌ kû̌ he lǒ̤꤮ bò bǒo tokhlǒ sûhè padô̌ na ata̤hî̌mô̤hî̌wô̌. Dě sûcû̌ tutṳ̌ pa ta̤hî̌mô̤hî̌wô̌nu dǒ ta̤dòkûphû̌ dǒ a mô̤nǐ̤ pa nutokhlǒ a ô̌ nî̌꤮. Cǒmara abwǐasîrî ô̌pû kû̌ sî nî̌꤮.
Copyright information for
KxfSCKXF