Genesis 18:1-16
Shǐtèmè̤ sò̌su hèô̌lè kû̌ PhaAbraha
1Tôni̤kha PhaAbraha ô̌ dǒ Khûmè̤mare asǒmṳ̌dû̌ plò̌shǐ kòshî̌ nutôkû. Dě bǎ lṳmṳ̌htǔ gǎgû̌ akhanu, a hǎnòò̌ô̌ bǎ hǐphû̌ takha kòshî̌ dě Cǒmara tûjû̌pwa̤ hèô̌lṳ̌htò̌ bǎ lû̌û. 2Dě a kè̌cû̌ dě a kè̌shǐ kòyòpha sò̌su ihtǒ ô̌phǔ kû̌ lû̌û. Bǎ a kè̌shǐ asî akhanu, a tuplṳ̌tewě̤ cû̌kè̌shěshǔ kaǎmô̤shǔ asî, dě dǒ ta̤bè̌dubè̌nǎ̤ asî aya, a dô̌gînî̤ û̌lò̤ dǒ hǎkhû̌. a 3Dě a hî̌ kû̌, “Ǒ꤮ he Běcǎdû̌, na kè̌ kè̌shǐ kû̌ he gwǎ dǒ nalô̤mô̤̌ hî̌dě, khòsǎdô cû̌tûlû̌ tǎ̤ he mǎ̤nî̌꤮, nṳ̌ô̌kǔ gûmṳ̂̌ mò̌ dǒ najû̌ hǐdǒkûnu nî̌꤮. 4He nophî̌hè bǎ sî shi pě dě cǔbò lô̌khô kû̌ sîkhò̌lôpô̤̌ dě hǎmôô̌lò̤ lô̌khô teděsǎ bǎ sǒmṳ̌lǎ̤nu pěnî̌꤮. 5He gǔ phî̌hè bǎ sî lǎ̤ǎlǎ̤ô tokhlǒ, dě sî ǎ nǐ̤khû̌nǐ̤ǎ gesô̌ dě hǎhtò̌cû̌ sělě sô̌ sîklè̌ pě nî̌꤮. Sî hètǒ̤ kû̌ he dě he sǎyṳ dǐǎdǐô nǐ̤ sî pwǎ꤮.” Dě asî hî̌shǔ lû̌û kû̌, “O awô̌ hǒ, kè̌ hî̌ pô̤̌nudě tûlû̌ ma̤pô̤̌ na hî̌ nunî̌꤮.” 6Hǒtôplǎ dě PhaAbraha tuplṳ̌tewě̤ khlè̌nṳ̌tô dǒ ahǐphû̌kû dě a hî̌ Mǒ̤sara kû̌, “Phî̌hè phwèmò̌ bǔkû̌lǎmǔ acè̌nu bǒo shǐginǐ̤ jwè̌. Cîmǔmò̌, ma̤mò̌ mû̌ dě shû̌ǎ mò̌ yǎ.” 7Htodě a khlè̌cû̌ pô̤̌ dǒ pṳ̂̌ saprṳ̂ô̌ dě a cû̌pṳ̂̌ pṳ̂̌phaphû̌ bû̌suklǔtû̌ tôdo dě a nocû̌ tîwî̌tòwò kû̌ ajû̌ tôpwa̤. 8Dě a phî̌hèǐ pṳ̂̌nṳ̌shi khlǒ kû̌ pṳ̂̌nṳ̌shicè̌ kû̌ pṳ̂̌yî̌ dǒ kòyò phôǎhto nudě a hèǐ kû̌ shǐtèmè̤ nusò̌su. Bǎ shǐtèmè̤ ǎ ô akhanu a dě a ihtǒô̌ bǎ asî kòshî̌ sǒmṳ̌lǎ̤nu. 9Asî gwè̌ lô̌khô lû̌û kû̌, “Na ma Mǒ̤sara lè?” Dě a hî̌shǔ asî kû̌, “A ô̌ dǒ hǐphû̌kûnu.” 10Bǎnu sò̌sukla tôpwa̤ numî̌ Cǒmara tûjû̌pwa̤ dě a hî̌ KhûAbraha kû̌, “Htû̌ něbǎpě pô̤̌ khònò̤̌kha pěnu, he ge mè̤̌caca sô̌ dǒ na ô̌ pě. Dě nama Mǒ̤sara gǔ phû̌ô̌lò̤nṳ̌ phû̌pwa̤khû tôpwa̤ pě.” b Bǎ a hî̌ pô̤̌nu akha, Mǒ̤sara dò̌anò̌ku bǎ hǐphû̌ takha kòshî̌ bǎ asî nô̌kònu. 11Bǎnukha PhaAbraha kû̌ Mǒ̤sara sò̌ginǐ̤ nî̌ a mǒ̤pwǎ̤ bò hǒ dě Mǒ̤sara nî̌ pwa̤mǒ̤ lǎ̤klô hè pe tô̤̌ akhû̌akhî, aphû̌ ô̌jò pe tô̤̌ hǒ. c 12Pô̤̌nu akhû̌akhî, dě Mǒ̤sara sǎyǎ̤hǔ tû̌ anǎ̤ dě a gènè̤ kû̌, “He mǒ̤pwǎ̤ hǒ. Hewṳ̂ mî̌ a mǒ̤pwǎ̤ hǒhǒ. Pô̤̌nudě he gǔ hǎmôô̌ kû̌ adě a cû̌ma̤mô̤ jò pe hesǎphlǒ hětè?” d 13Hǒtôplǎ dě Cǒmara tûjû̌pwa̤ hî̌ PhaAbraha kû̌, “Ma̤titè Mǒ̤sara sǎyǎ̤ dě a cû̌hî̌tǒ̤ kû̌, ‘khònò̤̌ he mǒ̤pwǎ̤ hǒ dě he phû̌ô̌jò penô̌tô̤̌ ya?’ 14Cǒmara tûjû̌pwa̤ ma̤jòta̤ tô̤̌ numî̌ a ô̌ nǒnǒ ya? Pô̤̌ he shôbǐǐkè hto na kû̌ htû̌ něbǎpě pô̤̌ khònò̤̌kha pě, he hè sô̌ dǒ na ô̌ pě dě Mǒ̤sara phû̌ô̌lò̤ phû̌pwa̤khû tôpwa̤ pě.” e 15Mǒ̤sara ǐsha dě a hî̌lòhôbǐkè tûû̌ kû̌, “He sǎyǎ̤ bǎtô̤̌.” Bǎbǎkǎlè a hî̌shǔ lû̌kû̌, “Tô̤̌, na sǎyǎ̤ mè̤̌caca.”PhaAbraha kwisǎyṳ kudǔdǔ bǎ Wî̤̌sǐdû aya
16Bǎ kòyò nutokhlǒ ihtǒ hǎhtò̌cû̌ akhanu, asî kè̌cû̌ tôtǐ dǒ Wî̤̌sǐdû ô̌nu tôkhô dě PhaAbraha gû̌sûcû̌kû̌ asî.
Copyright information for
KxfSCKXF