Luke 4:16-30
Wî̤̌ Na̤sôrè̤̌phû̌ yṳ̌ǎ Yeshǔ tô̤̌
(Matè̌ 13:53-58; Makǔ 6:1-6)
16Běcǎ Yeshǔ gesô̌ dǒ Wî̤̌na̤sôrè̤̌ bǎ a lǎ̤dû̌htò̌ ǐ nutîwî̤̌. Bǎ Yǔdaphû̌ lṳmṳ̌dǔ ▼▼Yǔdaphû̌ a lṳmṳ̌dǔ mî̌ mô̤gètè̤
akha, pô̤̌ alǎ̤klô ô̌nu, a cû̌nṳ̌ dǒ ta̤cabahǐkû. Bǎ a glè̌ ihtǒ dô̌htò̌ Cǒmara alě̤ayô̤̌ akhanu, 17Kòyò ǐ yǎ lî̤tûlû dǒ piwi̤pèshè Khûyashǎya wě̤nǎ dǒ awǐkhanu tôbǎ. A bǔmô lî̤tûlû nutoklo dě a kè̌shǐ kòyò wě̤nǎ lî̤ tômṳ̂ dǒ a hî̌ kû̌, 18“Běcǎdû̌ Yôla Plò̌shǐ ô̌ dǒ hekû, ma̤titè̌hî̌dě a rû̌htò̌ he kû̌ he gǔ shôbǐǐ bǎ kòyò pwa̤shèwè̤phû̌ tokhlǒ kû̌ ta̤sǎlě̤we̤kènu hǒ. Kòyò dǒ a pṳ̂̌ dǒlò̤tě̤ lû̌û dǒ apô̤kû tokhlǒ gǔ nǐ̤bǎ ta̤hǎplǎge aya, kòyò dǒ a mǐ̤sǎkhǐ tokhlǒ gǔ mǐ̤sǎlî sô̌ aya, kû̌ kòyò dǒ a ma̤jî̌ma̤jû̌ lû̌û tokhlǒ gǔ nǐ̤bǎ ta̤hǎplǎge ayanu a nohè he dǒ he gǔ shôbǐǐ bǎ asî hǒ. b 19Kǎtô̤̌ Cǒmara nohè he dǒ he gǔ shôbǐǐ dǔsî̌ya bǎ kòyò kû̌ Běcǎ gǔ ma̤hǎplǎge ǐtûû̌ a kòyò nu ashěakhǎ hètǒ̤hǒ.” c 20Dě Běcǎ Yeshǔ khû̌tûlû gesô̌ lî̤tûlû nutoklo dě a ǐgesô̌ dǒ pwa̤kè̌pǒ̤ǐ ta̤cabahǐ nutôpwa̤ a cǔdekû dě a hǎnòò̌lò̤. Kòyò lǒ̤bò ô̌ dǒ ta̤cabahǐkû nutokhlǒ kè̌jèwè̤ǐbò yǎ. 21Dě Yeshǔ hî̌ lô̌khô asî kû̌, “Cǒmara alě̤ayô̤̌ dǒ sî ganǎ̤de he dô̌ bǎ sî hǒtômṳ̂ numî̌ a lǒhtò̌behtò̌ khò̌tôni̤ hǒ.” 22Kòyò lǒ̤꤮ bò ganǎ̤de tokhlǒnu, kòyò htû̌sò̌htò̌ǐ bò lû̌û pṳ̂̌tôpwa̤, dě a ta̤hî̌bǎmô̤ hî̌bǎnǐ̤꤮ nu, kòyò ǒò̌ kiti̤kaa lǒ̤bò dě asî hî̌ lô̌khô kû̌, “A mî̌ Phayṳ̂tǎ aphû̌pwa̤khû pwǎ yahî̌?” 23Dě a hî̌shěshu asî kû̌, “He yṳ̌nǐ̤nǎ̤nǐ̤ tě̤tě̤mè̤̌mè̤̌ kû̌ sî gǔ hî̌ he kû̌ yô̤̌sǎkhěkhô̌ tômṳ̂ dǒ a hî̌ kû̌, ‘Ta̤khû̌sara꤮ ma̤hǎmǎ tûû̌ nanǎ̤.’ Htodě sî gǔ hî̌pô̤̌ he kû̌, ‘ta̤ma̤cǒklî̌ dǒ pa ganǎ̤de na ma̤ dǒ Wî̤̌kaperanò̤ akû nutokhlǒnu, ma̤lṳ̌ dô̌ bǎpa bǎ na dû̌htò̌ǐ wî̤̌ tîwî̤̌ akûnu꤮’” pô̤̌nu pě. 24Dě Yeshǔ hî̌ pô̤̌ kû̌, “He hî̌cǒcǒ sî, Cǒmara a piwi̤pèshè bǎtè꤮ tôpwa̤ bǎbǎ, adokûphû̌ kaǎshěshu yǎ tôpwǎ̤꤮ tô̤̌. d 25He hî̌cǒcǒ sî dǒ piwi̤pèshè Khûělǐya ahtukha nu, gǎko suně kû̌ lasusô̌ dě gǎwǐ̤gǎko jî̌jû̌ ô̌htò̌ dǒ Isôrělagǎ tôgǎ. Bǎnu htukha, dǒ Isôrěla gǎkû nu, pwa̤mǒ̤khwè̌ ô̌꤮ dû̌wî̤. e 26Bǎbǎkǎlè Cǒmara nocû̌tô piwi̤pèshè Khûělǐya dǒ pwa̤mǒ̤khwè̌ nutokhlǒ a ô̌ tôpwǎ̤꤮ tô̤̌. Cǒmara nocû̌ tô pwǎ lû̌û dǒ pwa̤mǒ̤khwè̌ dǒ a ô̌ dǒ Wî̤̌sharata, Sidûgǎkû nutôpwa̤ a ô̌ pwǎ. f 27Htodě, dǒ Isôrělagǎkû, bǎ piwi̤pèshè Khûilǐshè̌ htukhanu kòyò nǐ̤bǎ akrôǎ tokhlǒnu a ô̌ dû̌wî̤ bǎbǎkǎlè Cǒmara ma̤hǎmǎ bǎ asî tôpwǎ̤꤮ tô̤̌, a ma̤hǎmǎ bǎ pwǎ Shǔrǐgǎphû̌ Khûne̤ma̤ tôpwa̤ nô̤̌ pwǎ.” g 28Dě lǒ̤bò kòyò ô̌ bǎ ta̤cabahǐkû nutokhlǒ ganǎ̤de Yeshǔ hî̌bǎ nutokhlǒ akhanu, asî sǎphlǒdû̌ jî̌le. 29Asî ihtǒ dě cî̌hǎhtò̌kè Yeshǔ dǒ Wî̤̌khlo, dě asî cî̌hǎhtò̌ lû̌û dǒ asî lǎ̤ô̌ǐ wî̤̌ khôplò̤lô̤ tôkû. Dě asî gènè̤ cû̌ shò̌lò̤tě̤kè lû̌û dǒ shô̌lǎ̤, 30Bǎbǎkǎlè a hǎhtò̌cû̌kè bǎ kòyò saprṳ̂dû̌ nutokhlǒ aklǎmakû.
Copyright information for
KxfSCKXF