Mar 12:28-34 | KxfSCKXF | STEP | Bǎnuakha pwa̤sû̌ǐ ta̤sû̌ta̤tòwò asara ô̌ bǎnu tôpwa̤ dě a ganǎ̤de asî htè̌ lû̌û. A kè̌shǐ kû̌ Yeshǔ hî̌ geshěshu jò sadukè̌sî akhû̌akhî, a gwè̌ Yeshǔ kû̌, “Ta̤mǎlò̤ lǒ̤꤮ bò akla numî̌ alṳ̂dû̌lǒ mî̌ bǎtè tômûya?”

Mark 12:28-34

Ta̤mǎlò̤ dǒ alṳ̂dû̌lǒ tômû

(Matè̌ 22:34-40; Lǔka 10:25-28)

28 Bǎnuakha pwa̤sû̌ǐ ta̤sû̌ta̤tòwò asara ô̌ bǎnu tôpwa̤ dě a ganǎ̤de asî htè̌ lû̌û. A kè̌shǐ kû̌ Yeshǔ hî̌ geshěshu jò sadukè̌sî akhû̌akhî, a gwè̌ Yeshǔ kû̌, “Ta̤mǎlò̤ lǒ̤꤮ bò akla numî̌ alṳ̂dû̌lǒ mî̌ bǎtè tômûya?”

29 Dě Yeshǔ hî̌shěshu lû̌û kû̌, “Ta̤mǎlò̤ dǒ alṳ̂dû̌lǒ mî̌ titè dě, ‘Ǒ꤮ Isôrělaphû̌ sî, gana̤de lô̌khô Běcǎ ô̌ pwǎtǒ̤ pa Běcǎ Cǒmara tôpwa̤ nô̤̌ pwǎ. ^a 30 Dě mô̤ lǒ̤sû̌lǒ̤sò̌ sî Cǒmara kû̌ sî sǎphlǒ lǒ̤꤮ bò, mô̤ lǒ̤sû̌lǒ̤sò̌ a kû̌ sî ta̤ô̌htûpwa̤ lǒ̤꤮ bò, mô̤ lǒ̤sû̌lǒ̤sò̌ a kû̌ sî ta̤gènè̤ lǒ̤꤮ bò, mô̤ lǒ̤sû̌lǒ̤sò̌ a kû̌ sîta̤khû̌ta̤ǎ lǒ̤꤮ bò,’ ^b hǒonumî̌ ta̤mǎlò̤ awǐlǒ tômû dǒ alṳ̂dû̌lǒ nuhǒ. 31 Ta̤mǎlò̤ ginǐ̤mûtômû mî̌, ‘sî bǎ mô̤ǐlò̤ sî hǐphòwò̤shî̌ tokhlǒ pô̤̌ sî mô̤ǐlò̤ tûû̌ sînǎ̤nu.’ ^c Ta̤mǎlò̤ dǒ alṳ̂dû̌lǒ pô̤̌o dǒ ashǔshawa̤ numî̌ a ô̌ petô̤̌.”

32 Pwa̤sû̌ǐ ta̤sû̌ta̤tòwò asara nutôpwa̤ hî̌shěshu Yeshǔ kû̌, “Sara꤮ na hî̌ numî̌ atôtǐ jî̌jî̌, na hî̌ kû̌ Cǒmara ô̌ pwǎtǒ̤ tôpwa̤꤮ nô̤̌, Cǒmara dǒ ashǔshawa̤nu a ô̌ pe tôpwǎ̤꤮ tô̤̌ na hî̌ numî̌ amè̤̌mî̌ca hǒ. ^d 33 Pa bǎ mô̤ lǒ̤sû̌lǒ̤sò̌ pa Cǒmara kû̌ pa sǎphlǒ lǒ̤꤮ bò, kû̌ pa ta̤gènè̤ lǒ̤꤮ bò kû̌ pakhû̌paǎ lǒ̤꤮ bò. Htokhôtô̤̌ pa bǎ mô̤ǐ kòyò dǒ ashǔshawa̤ tokhlǒ pô̤̌ pa mô̤ǐlò̤ tûû̌ panǎ̤nu mî̌ awô̌khlo pekû̌ lǒ̤꤮ bò pa shû̌gǎ ta̤phû̌ta̤wè̤ tokhlǒ kû̌ mî̌, lǒ̤bò pa ma̤lṳhtò̌ ta̤ dǒ ashǔshawa̤ tokhlǒ numî̌ he sî̌ya,” ^e a hî̌shěshu lû̌û pô̤̌nu.

34 Yeshǔ kè̌shǐ kû̌ kòyò nutôpwa̤ hî̌shěshu jò dě a hî̌ lû̌û kû̌, “Na phǔ genṳ̌ phǔtînî̤̌꤮ bǎ dǒ Cǒmara a shilǎ̤gǎkû hǒ,” a hî̌hto lû̌û dě dǒnô̌kònu kòyò gwè̌bǔ pe Yeshǔ tôpwǎ̤꤮ tô̤̌. ^f