Mar 14:53-65 | KxfSCKXF | STEP | Dě asî kaǎcû̌ Yeshǔ dǒ pwa̤shû̌gǎ ikǒdû̌lǒ tôpwa̤ a ô̌. Dě pwa̤shû̌gǎ ikǒlǒkòdû̌ tokhlǒ kû̌ Yǔdaphû̌ a ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ lǒ̤꤮ bò hèô̌plǒô̌cu bò lû̌û bǎnu.

Mark 14:53-65

kòyògwè̌ Yeshǔ

(Matè̌ 26:57-68; Lǔka 22:54-55, 22:63-71; Yṳ̂ha 18:13-14, 18:19-24)

53 Dě asî kaǎcû̌ Yeshǔ dǒ pwa̤shû̌gǎ ikǒdû̌lǒ tôpwa̤ a ô̌. Dě pwa̤shû̌gǎ ikǒlǒkòdû̌ tokhlǒ kû̌ Yǔdaphû̌ a ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ lǒ̤꤮ bò hèô̌plǒô̌cu bò lû̌û bǎnu. 54 Khûpetarǔ gû̌cû̌ tûcû kû̌ Yeshǔ akò dě a cû̌nṳ̌ tǒ̤ bǎ pwa̤shû̌gǎ ikǒlǒkòdû̌ nutôpwa̤ ahǐ we̤kû dě a cû̌ hǎnòò̌ ushǔ gû̌ kòyò mî̌ bǎ kòyò ô̌pǒ̤ta̤ bǎnu tokhlǒ.

55 Pwa̤shû̌gǎ ikǒlǒkòdû̌ tokhlǒ kû̌ lǒ̤bò kòyò dǒ a htûdû̌htûpwǎ̤ tokhlǒ, pô̤̌khô asî gǔ cî̌htò̌ ma̤si Yeshǔ ayanudě, asî kè̌lǎ hî̌lòhô lô̌khô Yeshǔ ata̤sǔ tokhlǒ. Bǎbǎkǎlè asî kè̌shǐ lû̌ta̤sǔ tocǒ tô̤̌. 56 Asî kòyò saprṳ̂saphǎ hèbè̌ phô̌phô̌ lô̌khô Yeshǔ ta̤sǔ bǎbǎkǎlè kòyò dǒ a hè kè̌lǎ lô̌khô Yeshǔ ata̤sǔ tokhlǒ a ta̤hî̌bǎ sînu a sô̌sô̌lû̌û tôpwǎ̤ tô̤̌.

57 Kòyò tokhlǒkhlǒ ihtǒ dě nè̌phô̌phô̌ bò lû̌ta̤sǔ dě a hî̌ lô̌khô kû̌, 58 “Pa ganǎ̤de a hî̌ kû̌, ‘he ma̤ lò̤tě̤pro̤kè ta̤lṳhtò̌hô dǒ kòyòhǎkhû̌phû̌ ma̤htò̌ nutômè dě suni̤ akûnu he gǔ bô̌htò̌ khô̌ dǒ ashǔshawa̤ tômè, dǒ kòyòhǎkhû̌phû̌ bô̌htò̌ kû̌ acǔde tô̤̌nu tômè pě,’ a hî̌ pô̤̌nu.” ^a 59 Bǎbǎkǎlè asî bè̌ lû̌ta̤sǔ tokhlǒnu a sô̌sô̌lû̌û tômû̌ tô̤̌.

60 Pwa̤shû̌gǎ ikǒdû̌lǒ nutôpwa̤ ihtǒ dǒ kòyò lǒ̤bò a lô̤mô̤̌ dě a gwè̌ Yeshǔ kû̌, “Na hî̌ geshěshu kòyò hèbè̌ na ta̤sǔ nutokhlǒ tômû̌꤮ tô̤̌ ma̤titè? Kòyò hè nè̌le̤nè̌ge na ta̤sǔ numî̌ na ganǎ̤de tô̤̌ ya?” 61 Bǎbǎkǎlè Yeshǔ bè̌dò̌tûklû̌ bǎ yǎ pwǎ, a hî̌bǎ geshěshu lû̌û tômû̌꤮ tô̤̌.

Dě pwa̤shû̌gǎ ikǒdû̌lǒ nutôpwa̤ gwè̌ pô̤̌ sô̌ yǎ kû̌, “Na mî̌ Cǒmara dǒ kòyò htû̌sò̌htò̌ yǎ tôpwa̤ aphû̌pwa̤khû Khrǐ dǒ a ma̤hǎplǎge kòyò nu tôpwa̤ ya?”

62 Dě Yeshǔ hî̌shěshu lû̌û kû̌, “O, he mè̤̌kǎ. Dě sî gǔ kè̌shǐ Kòyòphû̌khû mî̌ he gǔ hǎnòò̌ bǎ Cǒmara dǒ a ô̌ kû̌ a ta̤pô̤ta̤phǎ nutôpwa̤ a cǔtômû nutôkhô pě, dě sî gǔ kè̌shǐ he glè̌ dò̌hè mǒkhû̌ a poǒlṳ̌ pě.” ^b

63 Pwa̤shû̌gǎ ikǒdû̌lǒ nutôpwa̤ cî̌hǎyè̌ aje ^{▼▼pwa̤shû̌gǎ ikǒdû̌lǒ tôpwa̤ cî̌hǎyè̌ aje pô̤̌hî̌numî̌, Yeshǔ hî̌sǔma̤sǔ Cǒmara hǒ a gènè̤ dě a dǔlè̌lṳ̌ bǎ kòyò pô̤̌nu.} Dě a hî̌ kû̌, “pa lǎ̤lṳ̂pe kòyò dǒ a gǔ khòlṳ̌ lû̌ta̤sǔ tôpwǎ̤꤮ tô̤̌. 64 A hî̌bǎ gunò̤ anǎ̤ pô̤̌ Cǒmara tôpwa̤ numî̌ sî ganǎ̤de bòhǒ dě mî̌ sî gènè̤ lô̌khô hětè?”

A hî̌hto pô̤̌nu dě asî pṳ̂̌tôpwa̤ hî̌shěshu lû̌û kû̌ ata̤sǔ ô̌ dě tôbǎ ma̤sikè pwǎ yǎ. ^d 65 Kòyò dǒ ashǔshawa̤ tokhlǒ sahtò̌ htǔplî̌ yǎ, htodě cobǐ lû̌ mi̤sǎ dě hto lû̌û. Asî hî̌ lô̌khô Yeshǔ kû̌, “Taya hî̌kè̌kè̌, mò̌pè tôpwa̤ hto na ya?” Htodě kliphû̌ dǒ a ô̌pǒ̤ta̤ tokhlǒ pṳ̂̌cû̌ yǎ dě plǎ̤ pô̤̌ lû̌û.