Matthew 15:21-28
Khana khlilèphû̌ pwa̤mǒ̤ tôpwa̤ ata̤yṳ̌
(Makǔ 7:24-30)
21Běcǎ Yeshǔ hǎhtò̌cû̌kè kû̌ gûlǎ̤ bǎ a ô̌phǔ te̤we̤bò kû̌ Wî̤̌tǔrǔ kû̌ Wî̤̌shǐdṳ̂ nutûkû. 22Dě Khana khlilèphû̌ pwa̤mǒ̤ ô̌ dǒ gǎ bǎnu tôpwa̤ hè dǒ Běcǎ Yeshǔ a ô̌ dě a hè kaǎgǔ kwisǎyṳhtò̌ lû̌û kû̌, “Ǒ꤮ Běcǎ, Khwǐdawi̤ aphû̌khû, sǎyṳgwèbǎǐ mò̌ he nî̌꤮ khînǎ dò̌ hephû̌pwa̤mǒ̤ dě a ma̤shû̌ jî̌jî̌.” 23Bǎbǎkǎlè Běcǎ Yeshǔ hî̌shěshu lû̌û tômû̌꤮ tô̤̌. Dě akhôphijǎ tokhlǒ hè dě kwisǎyṳ lû̌û kû̌, “No gekè pwa̤mǒ̤nu tôpwa̤, a gû̌ yî̤̌kǒyî̤̌sa cǎkǎ pa no.” 24Dě Běcǎ Yeshǔ hî̌shěshu pwa̤mǒ̤ nutôpwa̤ kû̌, “Cǒmara nohè pwǎ he bǎ Isôrělaphû̌ dǒ asô̌sô̌kû̌ sû̌phû̌ hǎmǎ tokhlǒ aya pwǎ.” 25Dě pwa̤mǒ̤ nutôpwa̤ hè dô̌gînî̤lò̤ dǒ Běcǎ Yeshǔ lô̤mô̤̌ dě a hî̌ lû̌û kû̌, “Ǒ꤮ Běcǎ, khòsǎdô ma̤jè̌ mò̌ he nî̌꤮.” 26Dě Běcǎ hî̌shěshu lû̌û kû̌, “Pa phî̌kè phû̌ tokhlǒ ashǎǎ dě dǐǎ kû̌ shǐ tokhlǒ numî̌ a gwǎtô̤̌.” 27Dě a hî̌shěshu kû̌, “Amè̤̌kǎ, Běcǎ bǎbǎkǎlè shǐ tokhlǒ numî̌ a ǎbǎ tônô̤̌ aběcǎ shǎǎ lò̤gǔlò̤wṳ̂̌ dǒ dîwǎ̤lǎ̤ nutokhlǒ nô̤̌pwǎ.” 28Hǒtaplǎdě Běcǎ Yeshǔ hî̌shěshu lû̌û kû̌, “Pwa̤mǒ̤, na ta̤yṳ̌ta̤nǎ̤ shû̌sho jî̌jî̌! Pô̤̌ na kwinu a gǔ htû bǎ na hǒ꤮.” A phû̌pwa̤mǒ̤ ô̌shû̌ô̌mô̤ ge wô̌wô̌ bǎbǎ hènè bǎ Běcǎ hî̌ lû̌û akhanu.
Copyright information for
KxfSCKXF