Mat 21:1-11 | KxfSCKXF | STEP | Bǎ Běcǎ Yeshǔ kû̌ akhôphijǎ tokhlǒ hètǒ̤phǔ kû̌ Wî̤̌yarǔshôle akhanu, a hètǒ̤ lô̌khô dǒ Dobetaphake dǒ a ô̌ bǎ Òlǐba khôlôkhû̌nu. Yeshǔ nohè wǐ akhôphijǎ sò̌ginǐ̤ dě a hî̌ asî kû̌,

Matthew 21:1-11

Běcǎ Yeshǔ mî̌ Me̤shǐya hènṳ̌ dǒ Wî̤̌yarǔshôle

(Makǔ 11:1-11; Lǔka 19:28-38; Yṳ̂ha 12:12-19)

1 Bǎ Běcǎ Yeshǔ kû̌ akhôphijǎ tokhlǒ hètǒ̤phǔ kû̌ Wî̤̌yarǔshôle akhanu, a hètǒ̤ lô̌khô dǒ Dobetaphake dǒ a ô̌ bǎ Òlǐba khôlôkhû̌nu. Yeshǔ nohè wǐ akhôphijǎ sò̌ginǐ̤ dě a hî̌ asî kû̌, 2 “Hènṳ̌ wǐ lô̌khô do dǒ alô̤mô̤̌nu tôdo, sî hè nṳ̌nṳ̌ kû̌ sî gǔ kè̌shǐ kòyò comě mǐû̌lǎmǒ̤ tôdo kû̌ aphû̌phapî̌tî̌ ô̌sûkhû̌ padô̌ lû̌û bǎnu tôdo pě. Bôphlǔ a dě cî̌gebò dǒ heô̌ bǒo. 3 Kòyò tôpwa̤pwa̤ kè̌ hî̌ sî tôcǒcǒ hî̌dě, shôbǐǐlṳ̌ bǎ lû̌û kû̌ Běcǎ lǎ̤lṳ̂ asî hî̌pô̤̌nu, sî kè̌ hî̌ pô̤̌numî̌ a plûge tûû̌ sî tôplǎ nô̤̌pě.”

4 Ta̤hǒonu a gǔ ma̤lǒhtò̌behtò̌ piwi̤pèshè a ta̤hî̌nǎ kû̌,

5 “Shôbǐǐlṳ̌ bǎ Wî̤̌shǐûphû̌ tokhlǒ kû̌, ‘kè̌mò̌ lô̌khô, sî khwǐcôphǎ hè dǒ sî ô̌ hǒ. A mî̌ a sǎdôhôbǐ dě a dò̌ hèǐ mǐû̌lǎ. Dě a dò̌ hèǐ aphû̌pî̌tî̌ tôdo.’” ^a

6 A khôphijǎ nusò̌ginǐ̤ cû̌ma̤ pô̤̌ a hî̌ asî nu. 7 Asî cî̌genǐ̤ mǐû̌lǎmǒ̤ kû̌ aphû̌ dě asî dahtò̌ lô̌khô ajekhlo dǒ mǐû̌lǎ tokhlǒ awǎ̤tě̤khû̌ dě Běcǎ htò̌hǎnòò̌ bǎnu. 8 Kòyò saprṳ̂dû̌ tokhlǒ dalò̤ lô̌khô ajekhlo tokhlǒ dǒ klè̌dakû. Tokhlǒkhlǒdě a pě̤gǎ lô̌khô sǒphòphû̌ tokhlǒ dě dalò̤ dǒ klè̌dakû. 9 Kòyò cû̌ wǐ dǒ Běcǎ alô̤mô̤̌ tôprṳ̂tôphǎ, a gû̌kû̌ dǒ nô̌kò tôprṳ̂tôphǎ dě a kaǎgǔ lô̌khô kû̌,

“Hûsè̌na, htû̌sò̌htò̌ lô̌khô Khwǐdawi̤ aphû̌khû.”

“Běcǎ dǒ a hè kû̌ Cǒmara ami̤ tôpwa̤nu, ta̤ǐshowî̤ gǔ lò̤bǎ pû a nî̌꤮” ^b

“Hûsè̌na, htû̌sò̌htò̌ lô̌khô Cǒmara dǒ a ô̌ dǒ mǒkhû̌ a gûlǎ̤htò̌yô̤̌lǒ nutôpwa̤.”

10 Bǎ Běcǎ Yeshǔ nṳ̌ dǒ Wî̤̌yarǔshôle akhanu, Wî̤̌yarǔshôlephû̌ tôwî̤̌lǎ̤bò sǎphlǒ tîrî̌sò̌ bò dě asî gwè̌ kû̌, “A mî̌ mò̌pè?”

11 Kòyò saprṳ̂dû̌ hî̌shěshu kû̌, “A mî̌ Yeshǔ. A mî̌ piwi̤pèshè dǒ a ô̌ dǒ Galilè̤̌gǎ, Na̤sôrè̤̌ wî̤̌nu tôpwa̤.”