Mat 21:33-46 | KxfSCKXF | STEP | “Ganǎ̤de pô̤̌ lô̌khô yô̤̌sǎkhěkhô̌ dǒ ashǔshawa̤ nutôshǒ. Bǎtaplǎnu hǔkla běcǎ dǒ a shǒǐ a sîpî̌mṳ̌ tokhlǒ ô̌tôpwa̤. A te̤we̤bǐ bò a awe̤nu, dě a pho ǐ ahǎkû tûkû dǒ a gǔ wǐ̤htò̌ kû̌ sîpî̌shi aya, htodě a bô̌htò̌ǐ hǐphû̌htò̌yô̤̌ dǒ kòyò lǎ̤ô̌pǒ̤kè̌ kû̌ we̤ aya tômè. Htodě a dǐlô̤̌lò̤ǎ awe̤nu kû̌ pwa̤ma̤we̤ tokhlǒ dě a hǎhtò̌cû̌kè dǒ gǎshǐshawa̤ tôgǎ.

Matthew 21:33-46

Ta̤dô̌nè khěkhô̌ dǒ pwa̤ma̤ǎ sîpî̌phǎ dǒ ajî̌ tokhlǒ

(Makǔ 12:1-12; Lǔka 20:9-19)

33 “Ganǎ̤de pô̤̌ lô̌khô yô̤̌sǎkhěkhô̌ dǒ ashǔshawa̤ nutôshǒ. Bǎtaplǎnu hǔkla běcǎ dǒ a shǒǐ a sîpî̌mṳ̌ tokhlǒ ô̌tôpwa̤. A te̤we̤bǐ bò a awe̤nu, dě a pho ǐ ahǎkû tûkû dǒ a gǔ wǐ̤htò̌ kû̌ sîpî̌shi aya, htodě a bô̌htò̌ǐ hǐphû̌htò̌yô̤̌ dǒ kòyò lǎ̤ô̌pǒ̤kè̌ kû̌ we̤ aya tômè. Htodě a dǐlô̤̌lò̤ǎ awe̤nu kû̌ pwa̤ma̤we̤ tokhlǒ dě a hǎhtò̌cû̌kè dǒ gǎshǐshawa̤ tôgǎ. ^a 34 Pô̤̌khô pwa̤dakǎǎ awe̤ tokhlǒ gǔ běǎ a sǒsǎ tokhlǒnudě, bǎ shěkhǎ phǔhè dǒ tô běǎplǒ sîpî̌sǎ akha nu, a nohè a jû̌ tokhlǒ dǒ pwa̤dakaǎ hǔkla tokhlǒ a ô̌.

35 “Pwa̤dakaǎ hǔkla tokhlǒnu a pṳ̂̌ hǔkla běcǎ a jû̌ tokhlǒ dě a po̤ lû̌û tôpwa̤, a ma̤sikè lû̌û tôpwa̤, tôpwa̤ dě a wî lû̌û kû̌ lǒ̤. 36 Tôplǎdě a nohè dû̌wî̤ khlo jû̌ tokhlǒ dǒ asî ô̌ dě a hèdû̌wî̤ khlo kû̌ a hè wǐ nutokhlǒ bǎbǎkǎlè pwa̤dakaǎ hǔkla nutokhlǒ ma̤jî̌ma̤jû̌ asî sô̌sô̌kû̌ a hè wǐ nutokhlǒ pwǎ. 37 Dǒnô̌kò tôplǎdě, a nohè a phû̌pwa̤khû dǒ asî ô̌. ‘Hephû̌ kû̌ henǎ̤ mî̌ asî bǎ bè̌dubè̌nǎ̤ ǐsha khlo pwǎ kǎpě,’ a hî̌ pô̤̌nu.

38 “Bǎbǎkǎlè bǎ pwa̤dakaǎ hǔkla tokhlǒ kè̌shǐ lû̌û akhanu, asî hî̌ kè̌khî lû̌û kû̌, ‘a mî̌ pwa̤ dǒ a nǐ̤bǎ û̌tě̤û̌ca nutôpwa̤ pě, cû̌! Cû̌ma̤sikè yǎ tǎ꤮, dě pa gǔ phî̌ a û̌tě̤û̌ca pě tǎ꤮,’ a hî̌ lô̌khô pô̤̌nu. 39 Dě a pṳ̂̌ lû̌û dě a cî̌htò̌kè lû̌û dǒ we̤khlo dě a ma̤sikè lû̌û.

40 “Pô̤̌nudě htû̌꤮ hǔkla běcǎ hètǒ̤ pěnu, a gǔ ma̤ asî hî̌tè pě?”

41 Pwa̤shû̌gǎ ikǒdû̌ tokhlǒ kû̌ Yǔdaphû̌ ta̤caba ikǒlǒkòdû̌ tokhlǒ hî̌shěshu kû̌, “A gǔ ma̤jî̌ma̤jû̌, ma̤sikè kòjî̌kòjû̌ nutokhlǒ pě. Dě a gǔ plû khô̌ akòyònu kû̌ pwa̤dakaǎ hǔkla dǒ a gǔ ǐpè̤̌ geǎ bǎ lû̌û ta̤sǎta̤phô hǎhtò̌ ashěakhǎ nutokhlǒ pě.”

42 Běcǎ hî̌ asî kû̌, “Lî̤plò̌shǐ kû hî̌ kû̌,

‘kòyò ma̤htò̌ hǐ dě lǒ̤ dǒ asî wîkè lû̌û nutômè nî̌ a htûhtò̌ lǒ̤ dǒ a tûhtû̌mě bò hǐtômè hǒ. Hǒnumî̌ Běcǎ Cǒmara ma̤ta̤ pwǎ, dě a ma̤ta̤ hǒo numî̌ a cô̌klǐcô̌sè jî̌.’ ^b

Lî̤plò̌shǐkû hî̌ pô̤̌omî̌ sî dô̌nô̌ gû̌ kòyò tôkhò̌ tô̤̌꤮ ya? Sî bǎ dô̌ pwǎ.”

43 “Pô̤̌nudě he hî̌ sî mǒkhû̌ shilǎ̤gǎkû dǒ sî tô nǐ̤bǎnu Cǒmara gǔ phî̌sigwî̌ sî pě. Dě a gǔ ǐ kû̌ kòyò dǒ a jûlě̤phî̌yô̤̌ Cǒmara ayô̤̌ nutokhlǒ pě. 44 Kòyò dǒ a lò̤tě̤ dǒ lǒ̤ nutômè alô̤nu, akhwǐ gǔ la̤gǎ pě, bǎbǎkǎlè lǒ̤ nutômè gǔ lò̤tě̤ dǒ lû̌ûlô̤ pěnu, akhwǐakrû̌ gǔ mǔ sipwǐ bò pě.” ^{▼▼kòyò wě̤ lî̤phě dǒ꤮ nukha tokhlǒkhlǒnu, kòyò kè̌shǐ lî̤plò̌shǐ hǒtôplô ô̌pabǎ tô̤̌}

45 Bǎ pwa̤shû̌gǎ ikǒlǒkò dû̌ tokhlǒ kû̌ Pharishè̌phû̌ tokhlǒ ganǎ̤de Běcǎ Yeshǔ hî̌khěkhô̌ akhanu, asî sî̌ganǎ̤ kû̌ Běcǎ hî̌khô̌ asî. 46 Dě asî kè̌lǎǐ lô̌khô klè̌ dǒ a glè̌ pṳ̂̌ Yeshǔ bǎbǎkǎlè Yeshǔ mî̌ piwi̤pèshè tôpwa̤, kòyò saprṳ̂ tokhlǒ lî̤̌ yṳ̌ǎ lô̌khô pô̤̌nu akhû̌akhî, asî ǐsha kòyò saprṳ̂ nutokhlǒ alǎ̤.