Rev 15 | LEU | STEP | Lana xunavata si, ne kaalum e saxa fakalimaanan lava a savat e ne ipul. A angelo pisiguak, ri lisan a mu lagafan pisiguak aava ri fataxapiak. A mu lagafan aanabe' ri fataxapiak senaso la yaan ri fataxapin a faisok siri a maraleian sina Piran i taa taxapus.

‏ Revelation of John 15

A Lagafan Fataxapiak I Taa Savat

1 Lana xunavata si, ne kaalum e saxa fakalimaanan lava a savat e ne ipul. A angelo pisiguak, ri lisan a mu lagafan pisiguak aava ri fataxapiak. A mu lagafan aanabe' ri fataxapiak senaso la yaan ri fataxapin a faisok siri a maraleian sina Piran i taa taxapus. 2 E ne xalum a mo malaan sena laman taasaxa, a vesanan pana ‘galaas’ xuvul pana fata. E nari aava ri fo fa'onam a vupung patak e a maaradaang ina e xuluna xakatan ina isina, ri taxa tigina la xasing ina laman ‘galaas’ aanabe'. E ri taxa tao a mo ri xalie pana ‘haap’ aava Piran fo tavai nari pana. 3 E ri yangan a yanganan si Moses aava sisiak sina Piran e a yanganan sina Natuna Sipsip. A malaan:

“Nano, no Piran pana Maana Gutan Xapiak.
A Faisok siim a molava e roxo xasingit.
Nano, no Piran ina paamuian a maana rabuna xapiak.
A mu vilaana siim ri xaradak e ri tuuna paaliu.
4 Memai, a maana rabuna xapiak ri taa matautan nano
e maana rabuna xapiak ri taa kuus fati a isaam.
Senaso nano sang mon, no Piran Taap.
E maana mu rabuna xapiak,
ri taa tamana savat xe siim e ri taa tamana nangus nano.
Senaso maana vilaana xaradak siim fo savat la matavas.”
5 Lamina maana mo aanabe', ne kaalum xe laa'ui lana xunavata e pave a Tang Lifu Lotu, pana Nobina Taap Xasingit aava nobina ina Mo Tawaane Taap, a talakas paaliu. 6 E ti lana lifu lotu moxo, nari mu angelo pisiguak ri savat pana maana lagafan pisiguak siri. A mu angelo aave ri toxan a marapi aava vesanan pana ‘linen’ e a marapi siri taxa lang e ri piau ta vusiit paaliu. E vaxa ri pis a famareri pana yowang ‘gol’. 7 E saxa ina mo to talafaat a tavai nari mu angelo saxa saxa pana ‘dis gol’ pisiguak aava bas pana maraleian sina Piran; a Piran aava to vulai, vulai. 8 E a miridingan sina Piran e a gutan sina a fabas a Tang Lifu Lotu aapave pana bun e piau ta mo a fexaxaas sena laak lana fefexaxaas sena maana lagafan sina mu angelo pisiguak ri taa taxapus.