‏ Luke 10

Jises suniy oro lau ma ndro tonoh la-uh (72) ala ta amekes lahou ta Kindrei

1Udu hamon ta idoh ano badeh, Laban tiye i toro lau ma ndro tonoh la-uh (72) le, ano iy suni uru la-uh, la-uh a se, ala mwena tan ala bolo iri kon tinan ari ari, ma hawe iri kon kameh iy ilih aliy. 2Ma iy tiye i toro anya, “Ado katou, nyamon solo-an labai ndruni in bolo bilin, arile lau solo-an bwe, ta gok ta akohok nyamon nane doh bwe. Eme ya ado kasolom ki ta Laban ta kati bilin, ta iy kasuni lau kala katukumwi iri nyamon tan. 3Eme ado kala! Jo suni ado i buku iri nadu sipsip ala bolo iri mwi badu lokei. 4Ado badeh, sakohok kohei ta ndrahu luk sawek, ya ado sakohok kohei ta ndrahu lakou sawek, ya ado badeh, sakohok ku-i kati ado ale; ya i buku none ado adek ala badeh, ado sare rasi sasumon ma sasehek sahou luluwen hawe ndramak. Ado badeh, kadek kales le kala. 5Ya i buku none ado anya kala ra-em asiu, badeh, ado katiye anya, ‘Ado mwasin? Nyosowan udu la-u ado.’ 6Ya i buku none are ndramak mwasin udu aliy, iy aseken ado badeh, mwasin tado kudu tan kudu gwek; ya i buku none ndramak baseken sahou mwasin tado bwe, ado kakuhi sahou mwasin nane keme hamon ja. 7Ya i buku none iri lau mwasin ado aliy, asumon ado badeh, ado kala kado asiu toro kado gwek; kaimon sasah, ka-un sasah oro anyohan ado. Tasah, ndramak ibo gok, iri lau mwan ma badih kameh anyohan iy na nyamon, ma adeu sihinen i tan ta gok. Ado badeh, sasar sala mada asiu ra-em sala ra-em.

8“Ya, buku none ado ala bolo kon tinan, iri kasumon ado, saba nyamon iri adeu badeh, ado kaimon le. 9Ma ado kamekes iri lau sik udu tiri kamwenen, ma hawe ado katiye tiri, ‘Tondrok ta Kindrei badeh, ndrame mirihik tado.’ 10Arile, ki buku none ado kala kon tinan, ya iri baseken ado bwe, badeh, udu ndra bolo kon tinan nane badeh, ado katiye anya, 11‘Aso anyas ndren ta kon tinan tado udu kati aso iu, ta leheya ki mada ado, tasah ado badeh, baseken sahou, ma ado ndrandra-i labai. Ma ale, ado badeh, ki tanan, ta tondrok ta Kindrei badeh, ndrame mirihik tado. Arile, ado badeh, baseken bwe.’ 12Eme jo katiye tado kamwenen, na len Kindrei edeu lau ala ta mada sahou eme kameh, kon tinan dah kameh bwese maha-an laba tinan labai sakalawi maha-an asahan tiri lau ndra-in badu kon tinan Sodom mene ja!

13“Eme ya, ado lau badu kon Korasin, hawe ado lau badu kon Betsaida, ado katou! Sisi-in tinan labai kameh ewek bwele-e ado. Tasah, ki buku none lau ra-on mene kala kon tinan Tair hawe Saidon ma kamekes lahou tinan buku none jo ndramekes ereu ndrokowa ado, sebwe ndra bwena iri lau badu kon ma lubuk doh ndrasin awin bokodon, ma ndratahi iri na koloweh, ta leheya buku none iri tikisi handru ta kandriyen ndra-in tiri mene, iri ndrabwidiy. 14Arile, na len Kindrei le tanan ta adeu lau ala ta mada sahou, ado kameh bwese maha-an udu bwele-en labai ja ta kon Tair hawe kon Saidon. 15Ya ado lau badu Kapena-um, sebwe iri lau ra-on ja kameh bwese nyara ado ili loken ili kandrah nadeh? Bwe handru en! Kindrei kameh akahei ado ala bolo jih, kon tiri lau ndra-in amak ado aliy.

16“Ya are lau anuhun ado badeh, iy anuhun jo ale; ya are lau baseken ado bwe, i buku none iy badeh, baseken jo bwe ale. Ma hawe are lau baseken jo bwe, iy ale, baseken Kindrei bwe le, iy ndramak nane suni jo eme dah.”

17Ano udu badeh, oro lau ma ndro tonoh la-uh (72) nane ame asahan, eme oro sekesek andra-i labai ma oro tiye i ta Jises anya, “Laban, iri malawin ndra-in ale badeh, anuhun boho aso, ya ame len na boto-on ta nyaram.”

18Eme Jises tiye toro, “Jo badeh, anyolom boto-on ta tama balik Satan badeh, taku udu kandrah eme andri, i buku none kalik takamek. 19Ado kanuhun! Jo badeh, ndratehei boto-on handru ndrawek tado, ta ado winiyan adek bwele-e mwak ndra-in, hawe adek bwele-e sabiyep; ma boto-on ta sakalau boto-on ta balik; ya eme ari lakou winiyan batok tado bwe. 20Arile, ado badeh, sasekesek ta ado badeh, sakalawi boto-on ta malawin ndra-in, ndri-iy, arile ado badeh, kasekesek, tasah nyara ado badeh, ndratorowenei udu kandrah.”

Jises idih na sekesek ta Malawin Ndrabun

(Metiu 11:25-27; Metiu 13:16-17)

21Na len doh badeh, Jises idih labai na sekesek ta Malawin Ndrabun, eme iy tiye, “Tama, ou Laban badu munyak ma kandrah! Jo masiye ou! Tasah, ou tone lakou dah ta mada iri lau ta tanan, ma hawe iri lau anya iri tanan labai, ya ou leheyani i tiri nah, tana iri lakou bwe. Ehe, idoh asahan na seken tam le. 22Tama ndratehei lakou mari ndrame minek. Ya ari ndramak ja winiyan bala tanan jo bala mwasin bwe. Tama le badeh, tanan jo udu mwasin labai. Ma ari ndramak ja winiyan bala tanan tama bala mwasin bwe; jo nadun le ari tanan iy, hawe oro lau le jo ndranyowonyani oro ndrala mada taman, oro le tana oro tama.”

23Ano iy tubuni batalan i toro lau tan le, eme iy tiye i toro, “Sekesek handru i toro are lau an hamon ame kameh anyolom lakou ado ndratou asahan eme lewan dah! 24Ya eme jo katiye tado, iri propet hawe iri kabin mene badeh, aseken labai ta atou lakou ado atou na dah, arile iri batou bwe. Ma hawe iri aseken labai ta anuhun iri sahou ado anuhun dah, arile iri banuhun bwe.”

Sahou sokek ta ndramak badu kon Samariya

25Ano, ndramak ari tanan ta leheya kandriyen tiri Juwis ales ere loke none Jises. Eme iy anya, “Ndramak ta leheya, jo kamekes sasah handru, ya kohak kudu le buku doh?”

26Eme Jises tiye i tan, “Torowenei udu bolo tarou malen mene, ou ndratou, tiye i buku sah handru?”

27Ano ndramak nane dah anya, “Tiye badeh, i buku doh:

‘Ou aseken Laban tam Kindrei na ndrinem mari, ma na koham handru mari, ma na boto-on tam mari, ma hawe na budon tam mari.’ ^a
Ma ano ja,

‘Ou aseken iri lau ari ari badu hawem, i le buku, ou aseken ou le.’ ” ^b
28Eme Jises anya, “Ou badeh, tiye amwenen labai, ya i buku none ou amekes iri lakou mari doh, idah kameh, koham udu le buku doh.”

29Arile, ndramak ta leheya kandriyen tiri Juwis doh badeh, anya kaleheya iy le, anya iy ndra ari ai. Eme iy ndremenya Jises anya, “Are oro le handru badu hawek? Ya eme jo kaseken oro.”

30Ano Jises tiye i hamon i tan, i buku doh: “Ndramak ari badeh, anya kedek kudu Jerusalem kili Jeriko. Eme iy edek ili badeh, iri lalou ado san tawi iy, ma bene-ei lakou tan marakon. Eme iri adai iy andra-i labai imek i kei ra-ei, ma iri ruwani iy udu api. Ya iri atobwak au. Ya iy ndramak nane doh amadin udu ka-u san mirihik anya kimek. 31Ano, pris ari badeh, edek san nane eme. Iy edek eme badeh, anyolom ndramak nane, arile iy abelek i san bilisiu iu ai. 32Ano ja, ndramak ari badu boho kamen ta Libai edek san doh, eme ja. Eme iy anyolom ndramak dah, ale, arile iy abelek i san bilisiu iu ai. 33Arile, udu ja, ndramak ari badu kon Samariya edek eme amwenen ta ndrahune ndramak dah udu aliy, iy atou ndramak doh. Eme iy tikisi ndramak doh, labai. 34Eme iy ili hawen badeh, solowei ndrelekei hawe waen i badan, ano sawei na kari kolau. Eme iy bwese-ei ndramak dah, i bwele-e donki tan, ma tiyani iy ili asiu ra-em ta ndrahu iri lau. Eme iy atondrok iy. 35Udu len ari ja badeh, ndramak dah atehei luk ma lunek (K20) i ta ndramak ta asiu dah. Ano iy tiye ta ndramak ta asiu dah, anya, ‘Ou atondrok iy ya i buku none jo eme hamon, idah kameh jo edeu saluwe luk tam, ou ndrakahei ndra-au ta atondrok iy kewek hamon.’

36“Ya ou anya, udu bolo oro lau ma taloh doh, are handru amekes kandriyen mwasin i ta ndramak nane, iri lalou adai iy doh?”

37Eme ndramak ta leheya kandriyen tiri Juwis doh, anya, “Iy ndramak ala ili aseben iy en.”

Ano Jises tiye sahou i tan i buku doh, “Ou ala amekes kandriyen ki le buku iy ndramak nane amekes doh!”

Jises udu asiu ta Mata uru Mariya

38Ano, Jises hawe oro lau tan, adek san au ala bolo kon ari badeh, badih ari nyaran Mata, iy luhi oro ala asiu tan. 39Ma nadu tinen badih ari badeh, udu aliy ale, ya nyaran Mariya. Iy edek eme manyah udu kati Jises anuhun iy asehek sahou. 40Eme Mata badeh, nunu-uh ta nadu tinen baseben iy ta amekes lahou hawen bwe. Eme iy ili hawe Jises tiye i tan anya, “Laban, ou batou nadu tine titili jo ta amekes lakou mari kada-ah bwe? Ou tiye iy keme kaseben jo!”

41Ano Laban tiye, “Mata, ou tikisiy ma ou nunu-uh ta lakou solo-an labai. 42Kandriyen ari le doh, udu ta Mariya ta anuhun sahou, idoh kandriyen mwasin, ya jo winiyan batiye iy ta aliy bwe.”