‏ Mark 15

Jises ales udu mada Pailat

(Metiu 27:1-2; Metiu 27:11-14; Luk 23:1-5; Jon 18:28-38)

1Ano na mandraben handru badeh, iri tinan tiri pris hawe iri batun tinan ma iri lau ta leheya kandriyen tiri Juwis ma hawe iri kansol rayah ame atukum atilik nyala iri. Ano ma iri sawei Jises ma tiyani iy ili, ma atehei iy ili mine Pailat. 2Eme Pailat ndremenya iy, “Ou kabin tiri Juwis, neh?” Eme Jises anya, “Ou ndrasehek badeh kabwai.”

3Eme iri tinan tiri pris badeh, asehek sahou solo-an boto-on i bada Jises. 4Eme Pailat ndremenya iy ja i buku doh, “Ou ari sahou ta tiye deh bwe? Ou anuhun sahou solo-an labai iri asehek i badam.”

5Arile Jises batiye randra sahou bwe, idoh mesekei Pailat abudon solo-an labai.

Pailat atehei Jises iu ili ta kei tondreh

(Metiu 27:15-26; Luk 23:13-25; Jon 18:39-19:16)

6Eme ya na len ta nyamon tinan, i buku none kandriyen tan, eme iy ruwani ndramak ari badu bolo kou eme len, i buku are ndramak iri aseken ta aliy. 7Eme na len doh badeh, ndramak ari nyaran Barabas in bolo kou hawe iri lau rayah ta amekes bahun i bada gabman ta atondrok. Iri mene adai ndramak imek udu bolo len ta bahun.

8Eme iri lau solo-an ame hawe Pailat ma anya kandremenya iy ta iy katehei ndramak ki mine iri, i buku none iy ndramekes bwena ndra-au ndra-au. 9Eme iy tiye i tiri, “Aha aseken jo karuwani kabin tiri Juwis kewek mine aha?” 10Pailat asehek i buku doh, tasah iy ndratanan, ndrine iri tinan tiri pris badeh, ndra-in ta Jises, ma iri tiyani iy eme mada sahou.

11Arile iri tinan tiri pris badeh, sosokok iri lau solo-an dah anya ja, Pailat karuwani Barabas ki mine iri ai. 12Eme Pailat ndremenya iri ja, “Ya jo kamekes sasah ki ta ndramak ala aha aloh iy kabin tiri Juwis?”

13Eme iri arah ja anya, “Katahi iy ki bada kei tondreh!” 14Eme Pailat tiye i tiri, “Buku sah handru, saba lakou ndra-in handru iy mesekei?” Arile bwai, iri sarakau i loken le gwek anya, “Katahi iy ki bada kei tondreh!”

15Ya eme Pailat anya kamekes iri lau solo-an nane dah kasekesek, eme ma iy ruwani Barabas i mine iri ai. Arile iy atehei Jises ili mine iri lau ta bahun, ta iri ka-um iy na malou sakabuk i bek. Ano iy atehei Jises ili mine iri lulik ta atideh iy kili bada kei tondreh.

Lau ta bahun bobose Jises

(Metiu 27:27-31; Jon 19:2-3)

16Eme oro lau rayah ta bahun aluwi iy eme len i bolo asumwe Pailat (idoh asiu tinan ta atukum tiri Rom ). Eme ma oro luhi iri lau solo-an solo-an ta bahun dah ame. 17Eme iri atehei kolau ari saraman lawe-en ili la-un. Ano iri tabuwi bada malou bobodon i se buku none barak ma atehei ili batun. 18Eme ma iri wendreya ta asore ma abelek iy ma sarakau anya ja, “Ou kabin tiri Juwis, ou areu le buku doh len mari!” 19Eme iri ubwi iy na bala banap i batun ma omor iy, ma iri atehei bwili ndru-u iri i andri ma wendreya ta atudun iy. 20Iri bobose iy ano, iri tolowei kolau saraman nane udu la-un iu, eme ma iri tani kolau tan amwenen ili hamon i badan. Eme iri sirini iy iu i len ta kadai iy ki bada kei tondreh.

Iri tatahi Jises i bada kei tondreh

(Metiu 27:32-44; Luk 23:26-43; Jon 19:17-27)

21Eme iri adek ala badeh, iri ndruni ndramak ari nyaran Saimon badu Sairini. Iy badeh, edek udu kon munyak tinan eme, ya iy badeh, tama Aleksandra ma hawe Rupus. Eme iri andrekei iy bwese-ei kei tondreh ta Jises. 22Eme iri andrei Jises ili kon ari aloh Golgata, moson ta aliy iri aloh, “Kon ta bwisi bar ta ndramak.” 23Eme iri atehei waen hawe gwa ari nyakadan aloh mer tubuniy i hawen anya iy ka-un, arile iy banyuwiy bwe. 24Eme ma iri atahi iy i bada kei tondreh, ano iri andrei kolau tan i andri ma iri amekes laki na aliy, ta are winiyan andrei lakou ta Jises.

25Iri atahi Jises doh na mada an ndro ari na mandraben. 26Eme iri atahi sahou tanan ta bobose i bada kei tondreh i buku doh, “Idah Kabin tiri Juwis.” 27Ya udu hawen ale iri atahi uru lau la-uh ta bahana ado kabeden. Ari ereu minen salin, ya ari ereu minen kamweu. 29Eme ya iri lau adek mirihik badeh, nyokoda batu iri ili eme ma bobose Jises i buku doh, “Ehe! Ou adeh mene anya ou kameh tohowei asiu tinan ta Kindrei eme andri, ano kameh ou tutuniy ja na bolo len taloh le. 30Ya abo, ou sebenei ou amwenen, ma ou ame andri ta kei tondreh badeh!”

31Ya eme ale iri tinan tiri pris bobose iy i tiri ari ari ma hawe iri lau ta leheya kandriyen tiri Juwis bobose iy i buku doh, “Iy sebenei iri rayah, arile iy winiyan basebenei iy amwenen bwe! 32Taha kanyolom, Krais kabin ta Isra-el iy keme andri ta kei tondreh, ya eme ahi kanyolom ma budon tahi handru ki tan!” Ya uru lau ma la-uh sukik areu hawen ale badeh, asehek sahou ndra-in i tan ale.

Nyala imek ta Jises

(Metiu 27:45-56; Luk 23:44-49; Jon 19:28-30)

33Ano ya an eme udu le alih badeh, lulik tubuluhi kon marakon udu gwek winiya mada an i taloh na beyeh. 34Eme na mada an taloh na beyeh badeh, Jises arah boto-on labai anya,

“Eloi, Eloi, lama sabaktani?”
moson ta aliy i buku doh,

“Kindrei tek, Kindrei tek, buku sah handru ya ou ruwani jo?” ^a
35Eme iri lau ra-on areu mirihik anuhun sahou tan ma anya, “Aha kanuhun, iy aloh Alaija.”

36Eme iy ari sakaliye ili badeh, lomwani konyei idih na waen titi-in. Eme iy atehei ili no-o banap ma atehei ili bohon ta iy ka-un, eme ma iy anya, “To kareu op, to kanyolom, idah kameh Alaija barame baratalou iy barame andri ta kei tondreh deh bwe.”

37Eme Jises anyar bohon i loken, eme ma kohan ano ma iy imek.

38Kala doh amwenen kolau tinan badu bolo asiu tinan ta Kindrei atarah i ma lusi ereu loken eme andri. 39Eme ndramak ari tinan ta bahun badeh, ales ere mwena ta kei tondreh badeh, anyolom Jises nane anyar ma imek i buku sah. Eme ma iy anya, “Handru labai, ndramak kede-eh Nadu Kindrei handru!”

40Ma ale iri badih rayah ale areu len anyolom. Ya udu bolo iri

badih nane doh badeh, Mariya badu Makdala ma hawe Salome ma hawe Mariya tine i loweu Jemis ma Joses. 41Oro badeh, an hamon ta Jises udu ndra Galili o-on ma aseben iy, ma ale hawe iri badih solo-an ame hawen ame Jerusalem.

Jises i lek

(Metiu 27:57-61; Luk 23:50-55; Jon 19:38-42)

42Eme kon a beyeh ai, len ta lowosa len ta amunyau ai. 43Eme ya Josep badu Arimateya eme, ya iy badeh, tinan ari badu hawe iri kansol, ma iy badeh, abe-en ma anya katou tondrok ta Kindrei. Iy banoh bwe, eme iy ili hawe Pailat ta ndremenya bada kei. 44Eme Pailat nunu-uh tasah iy anya, Jises ndramak handru nadeh. Eme iy luhi tinan ari ta bahun eme ya iy ndremenya iy, ta Jises ndramak luluwen ndra-au deh bwe. 45Eme iy anuhun ndramak tinan ta bahun anya Jises badeh, ndramak handru. Ano Pailat tiye ta Josep badeh, kili kabwese-ei bada kei ai. 46Eme ya Josep sihinei kolau ra-ei belen eme iy andrei Jises eme andri. Ano iy su-i iy na kolau nane dah, eme iy bwese-ei Jises ili bolo lek ndramak ari doh ihiy in bolo munu bek. Ano iy tundruwi bek tinan ari ili turuki madan. 47Eme ya Mariya badu Makdala hawe Mariya tine Joses badeh anyolom ndrahune Jises nane nyahani iy in aliy ale.