‏ Matthew 14

Herot anya Jises badeh, Jon ta alomwa

(Mak 6:14-29; Luk 3:19-20; 9:7-9)

1Kala doh iri lau mwan ma badih badu kon Nasaret atehei kona iri i ta Jises, Herot Antipas ndramak ta in bwena ta kon tinan Galili, iy anuhun kundruh ta iri lakou Jises amekes. 2Eme ya iy asehek ta iri lau ta gok tan, “Ndramak doh iy Jon ta alomwa le ai. Iy ndramak ja ereu bolo lek ndrame loken. Eme ya iy ndrakohok boto-on ta amekes iri lahou tinan doh.”

3Ehe, Herot abudon buku doh. Tasah, bwena ndra-au o-on iy tiye iri tawi Jon ta alomwa, ma sawei iy ma atehei iy i bolo asiu lulik. Herot amekes doh, tasah iy sudi udu nadu tinen Pilip nyaran Herodiyas. 4Eme ma Jon asehek ta Herot i buku doh, “Ou ndrandra-i tasah, ou sudi udu nadu tinem!” 5Herodiyas aso-ok ta Herot kidi Jon. Arile, Herot bwalen ma iy inoh. Tasah, lau solo-an badu Isra-el atehei budon boto-on anya Jon badeh, propet.

6Na len ari, iri kabin ra-on ame aimon nyamon hawe Herot. Na len oro ame atukum doh ta abudon len tine Herot tuwi iy. Ya na len doh, nadu Herodiyas badih eme idi mana ta amekes ndrine oro kabin nane kasekesek. Herot sekesek labai ta mana tan nane. 7Eme ya iy edeu wurah i tan ma iy amekes sahou randra hawen i buku doh, “Jo tandrakan handru, saba lakou ou ndremenya jo ta aliy, jo winiyan atehei ewek tam.” 8Eme ya iy ili ndremenya tinen ta iy kamekes ki buku sah handru. Tinen atehei budon i tan. Eme ya iy ili asehek ta Herot ma oro kabin nane, “Jo aso-ok ou adai Jon ta alomwa ma ou atehei batun ki bolo bwekei, ya ou atehei keme tek.”

9Herot anuhun sahou doh ya ndrinen andra-i labai. Arile iy abudon ta iy nane ndratandrakan ereu mada oro kabin aimon nyamon hawen nane, ya iy bwalen akohok bwilima ta tobolowe sahou tan nane iy ndrasihidiy. Eme ya iy tiye toro lau tan ta bahun ta kala kabwidi buku le sahou ta badih nane ndrasehek. 10Eme lau ta bahun tan ala ma iy sani bale Jon ereu bolo asiu lulik. 11Eme ya iri kuhi batun ereu bolo bwekei raben eme, ma iri atehei i mine nadu badih nane, ma iy bwese-ei ili hawe tinen. 12Ya oro lau ta Jon, badu hamon tan, ame bwese-ei bada kei le, ya oro ala ahi iy i lek ano oro ala tiye ta Jises.

Jises nyohonei iri lau ma lamawa (5,000)

(Mak 6:31-44; Luk 9:10-17; Jon 6:1-13)

13Jises anuhun buku iri ndradai Jon ndramak, eme ma iy ruwani kon nane ma iy suni ndron ra-ei ili kon ari doh lau aliy bwe. Iy ma oro lau tan badu hamon tan le ala. Arile iri lau solo-an anuhun saba kon Jises ndrala aliy, ma iri ruwani kon tinan tiri ma iri adek ala takaleh iy. 14Eme Jises anya ki amik, iy atou iri lau solo-an labai, ma iy tikisi iri, ma iy amekes iri lau bada iri ndra-in amwenen. 15Kon abeyeh ya oro lau ta Jises ame tiye tan i buku doh, “Kon dah lau aliy bwe, ya mirihik an iu i andri ai. Ou tiye iri lau kede-eh ka-au kala bolo kon lau an aliy ma iri kasih niri nyamon.”

16Arile Jises tiye toro lau tan i buku doh, “Tasah handru ya iri ka-au? Ado kadeu niri nyamon.”

17Eme oro tiye tan, “Naso nyamon solo-an bwe, arile kada-ah limeh jabi ramen hawe ni ma la-uh le.”

18Eme iy tiye toro, “Ado kandrei jabi ramen hawe ni nane keme minek.”

19Eme ya Jises tiye tiri lau mwan ma badih ta kamanyah ka-en andri bada bwidiu. Eme iy kuhi jabi ramen ma limeh ma hawe ni ma la-uh nane, ya iy anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah ma iy edeu ili mine oro lau tan, ma oro lau tan adeu i niri lau mwan ma badih. 20Iri mari aimon ma ndrine iri idih. Ya iri tukumwi tikibwah nane i se asahan bwak ma ronoh la-uh. 21Kane iri lau mwan mara-ei aimon nyamon badeh ma lamawa (5,000), idoh bondrek iri badih ma nah bwe.

Jises edek bwele-e gwa

(Mak 6:45-52; Jon 6:16-21)

22Eme Jises tiye toro lau tan kasandroh kala bolo ndron, ma oro ka bwena kala kapa gwa bilisiu. Ya iy le udu hamon ta atiye iri lau ka-au. 23Iy tiye iri lau mari au ano iy le ari iu ili bwele-e mandrei, ta iy kasolom. Mada an amai iu i andri, iy le ari udu bwele-e mandrei nane. 24Ndron ndra-au ndrala len labai, ma jor ale udu bwena eme ma bayau nyokoda ndron andra-i labai. 25Mirihik boho len, Jises edek bwele-e gwa ili hawe oro lau tan nane. 26Arile, oro atou iy edek bwele-e gwa, ma oro anoh andra-i labai, ma oro totoreh. Oro anya, “Nyam! Nyam!” Oro anoh ma oro arah andra-i labai. 27Arile, suwi labai Jises aloh i toro i buku doh, “Ndrine ado kamunum! Jo, jo! Ado sanoh!”

28Eme Pita asumon bohon i buku doh, “Laban, buku none ou handru eh, mwasin ou tiye, ya jo kedek bwele-e gwa kewek hawem.” 29Eme Jises tiye i tan, “Ou ame.” Eme ya Pita ruwani ndron, ma iy edek bwele-e gwa ili hawe Jises. 30Arile iy atou jor boto-on labai ya iy inoh, ma iy atuh sese ili bolo gwa, eme iy aloh i buku doh, “Laban, ou sebenei jo!”

31Suwi labai Jises atehei minen ma tawi Pita. Eme iy tiye tan i buku doh, “Ou budon tam boto-on handru bwe. Tasah handru budon la-uh asahan tam?” 32Eme uru ma la-uh sandroh ala bolo ndron, ma jor amondrei. 33Eme ma oro lau areu bolo ndron nane asolom i ta Jises ma oro anya, “Handru labai, ou Nadu Kindrei handru.”

Jises bwidi iri lau solo-an badu Genesaret amwenen

(Mak 6:53-56)

34Jises hawe oro lau tan ala bilisiu, ma oro asos loboho kon Genesaret. 35Iri lau badu kon doh atou Jises, ma iri seleyani iy, ma iri atehei sahou ili kon mari badu mirihik, ma iri tiyani iri lau mari abo sik ame hawen. 36Eme iri ndremenya Jises boto-on labai ta iy kalelei iri lau nane sik udu tiri katehei le mine iri kili kiri awin tan. Eme iri lau mari nane ateu awin tan, iri asahan amwenen ja.