Luke 22:47-52
47Tango Yesu azalaki naino koloba, bato ebele penza bayaki ; mpe moto oyo bazalaki kobenga kombo Yuda, oyo azalaki moko ya bapostolo zomi na mibale, ye moto azalaki liboso na bango. Apusanaki pene-pene ya Yesu mpo na kopesa ye beze. 48Kasi Yesu alobaki na ye : —Yuda, oteki Mwana na Moto na beze ? 49Tango bato oyo bazalaki pembeni ya Yesu bamonaki makambo oyo elingaki kosalama, batunaki ye : —Nkolo, olingi tobundisa bango na mipanga ? 50Bongo moko na kati na bango abetaki mosali ya mokonzi ya banganga-Nzambe mpe akataki ye litoyi ya mobali. 51Kasi Yesu alobaki : —Tika kosala bongo ! Asimbaki litoyi ya moto oyo azokaki, mpe abikisaki ye. 52Mpe alobaki na bakonzi ya banganga-Nzambe, na bakonzi ya bakengeli ya Ndako ya Nzambe, mpe na bampaka oyo bayaki kokanga ye : —Boni, nakomi motomboki mpo boya kokanga ngai na mipanga mpe banzete na maboko ?
Copyright information for
LinMNB