1Ti 1 | LlaSC | STEP | Likarkar nwa, fiɗa Bulus ni ɓahone Krisiti Yeso ya, nga nkee Kaa an kon nkweera yaande ma Krisiti Yeso yaa nɗǝn tisǝ kango a sani ya.

1 Timothy 1

1 Likarkar nwa, fiɗa Bulus ni ɓahone Krisiti Yeso ya, nga nkee Kaa an kon nkweera yaande ma Krisiti Yeso yaa nɗǝn tisǝ kango a sani ya.

2 Nǝn nyora ngǝ Timatawus auwane tene a ɗaan ma lau na ɓongtǝra wa.

Kwasira ma nyorataara ma naupa fiɗa Kaa Papani ma Krisiti Yeso Ankundi yaande.

Hob wanto wa a Duura Malǝmma Fǝɗkǝta Parasa

3 Nga nǝ kǝna ngǝsǝ a fer nǝ kosǝ Makidoniya wa, a kaɗ kǝnso Afisa me ngǝ nkee ɓaataka me ɓǝn fǝɗkǝ fǝɗkǝra paara ra ɗǝm ra, 4 hana ɓǝ ti nwa a tikaa ma ɓǝɗɗo kauwo ɗǝnta sirta u feɗefeɗe semra wa. Mbusǝsa ǝn wo ma renǝta maɗ, yǝ wosaa ma se wiiyo a tinima Kaa u yǝsǝ ma lau na ɓongtǝra wa ra. 5 Pa mbu kwaasǝ nǝ nkeesǝ ɓa ǝn yauta, u ǝn fiɗsǝ a kuɗa fin nwa, ma senta yaɓ ta ma ɗǝm na ɓongtǝra u ɓong nwa. 6 Ɓaata ɓǝ lee mbusǝsan ɓǝ kang a mara kwalakwala ra. 7 Ɓǝn taa me ɓǝ kaɗ malǝma masaka Kaa sa, pa ɓǝ maa mbu ɓǝn kansǝ a si ɓa ra, hana kaɓǝn sensǝ nga ɓǝ maan siso.

8 Ndǝ maan me Masaka yǝ kwalari, me ete yǝ tomsǝ tinima yaɓ nǝn. 9 Ndǝ maan me ɓaa nyor masaka men ɓan ma ɓongtǝra ɓa ra, pa men ɓaa ɓǝ kura handa ra ɓa, ma ɓan kidsa ɓa, ɓaa ɓǝ maa Kaa ra ɓa, ma ɓaa ma tentenato ɓa, ma ɓaa ɓǝn na mbarta Kaa ra ɓa, ɓaa ɓǝn toɗsǝ papamse ɓose ma mamamse ɓose ɓa, ma ɓan toɗ ɓeta ɓa, 10 ma pǝlauwa ma parata ɓǝn tǝrsǝ ɓaatǝ ma parata a ɓosa ɓa, ma toona ɓǝn tǝrsǝ ɓaatǝ toona a ɓoso ɓa, ma ɓan tang ɓeta ɓǝ fang ɓa, ma ɓan paapara ɓa, ma ɓan nkee mbu sem keke ra ɓa, ma mbu nsaad u same keke ma fǝɗkǝra ɓa ra, 11 u nwa yǝ keke ma mara kwalari Kaa nanǝsǝ ra.

Kwasira Kaa ra a Bulus ni.

12 Nǝ hima Krisiti Yeso Ankundi yaande, yaa yǝ nanǝsǝ kokrokto ya, me nǝ ma ɓongtǝra, yǝ taunǝ me naa tom tinima. 13 Hana ka a fer siso nǝsǝ an kan mbuka kwalakwala a ɗuura Krisiti ra ya, ɗǝm nǝn na kongsa ɓan ɓǝɗ ɓǝsa, nǝn mbu sem ɗaura ɓa, pa Krisiti weɗa nǝ yauta, me a fer siso nǝ maa mbuka ra, ɗǝm nǝ na ɓongtǝra a Krisiti ni ra. 14 Kwasira Ankundi yaande ra, wo a ɗuura na dem dem, ke ma na ɓongtǝra to wa ma yauta u a Krisiti Yeso ni wa.

15 U nwa ndǝ mara ɓongtǝra ra, pamman hana yam ni yǝ kon ma kuɗa fin. Krisiti Yeso wo a kaɗo put ntaandi wa me, yǝ kon nkweera ɓaa ma tenatenato ɓa, u nii na nǝ faɗ ɓǝsǝ nsaad wa. 16 Pa me maso Kaa yǝ weɗanǝ yauta nii na samto nǝ faɗsǝ ɓeta nsaad tentenato ya, Krisiti Yeso yǝ weɗa kungsǝto sǝmo usu a ɗuura na me nǝ kaɗ mǝɗkǝra a wiiyo ɓaa ɓǝka na ɓongtǝra a sani ɓa, ɗǝm ɓa taa huurtu pakarese wa. 17 Waso a Kuɓ pakarese wa, yaa yǝ woɗɗa ra ya, nga wǝr ra, yǝn Kaa ɓongtǝra ɓa fin mbusa u kiya kon mbarta wa ma kwangto feɗefeɗe semra wa. A kaɗ maaso.

18 Timatawus auwane, nǝn nkee ngǝ mbu ɓa, me ngǝ maa mbu ɓa nasǝ wanto a ɗuura nga ra, mee me ngǝ dimin kǝngǝ nkaa ngǝ tom kǝɗ usu ɓongɓong, 19 ngǝ ma ɓongtǝra ma kuɗa fin. Pa ɓaata ɓǝ ɓisi mbu sǝsan, wa ɓǝ tǝblǝ na ɓongto ɓoson. 20 A ɗaaso ɓoso ǝn Himnayas ma Askandari, u nǝ nasǝ Shaitan me yǝɓǝ na kongsa me ɓǝ maa me ɓǝ nkee mbu ka kwalakwala a ɗuura Kaa ra.