1Ti 3 | LlaSC | STEP | Wan mara ɓongtǝra ra. Yaa yǝn taasǝ me yǝ kaɗ kuɓ kwang kwang a ɓan kwau ɓan ɓǝɗ Yeso ɓa ni ya, yǝ taa tinima yabman.

1 Timothy 3

Wiina ɓan ɓǝɗ Yeso ɓa

1 Wan mara ɓongtǝra ra. Yaa yǝn taasǝ me yǝ kaɗ kuɓ kwang kwang a ɓan kwau ɓan ɓǝɗ Yeso ɓa ni ya, yǝ taa tinima yabman. 2 Wiine Kwang ya tomon ɗat yǝ kaɗ ya sem ma mbu ɓaa kasa sǝr ɓa ra, yaa yǝsǝ ma toone fin nya, yaa semma nfiima ra ya, yǝn ma ɗuura ira, yaa ɓan yausǝsǝ ya, yaa yǝn konsǝ waa ya, yǝn nkaa yǝ fǝɗkǝ ɓeta, 3 yǝ wee mbu kasa taa ɓa ra, yaa yǝn kǝrsǝ kito yara, pa yaa ma senda yaɓ ya, sem yaa yǝn tǝmɓasǝ ɓeta kito ya ra, ɗǝm ǝn yaa yǝn yausǝ koɓa ya ra. 4 Tomon ɗat yǝ kaɗ yaa yǝn maasǝ ɓǝɗɗo ma taanda ira ya, yaa yǝn tisǝ emɓǝsa ɓaa kura ee nya. 5 Me ete yǝ maa yǝ ɓǝɗ ma taanda ira ra, pa kiya maa yǝ ɓǝɗ ma kwau ɓan ɓǝɗ Kaa ɓa miniu? 6 Tomon ɗat, ǝn tom yaa yǝ konsǝ nfaata nfiinfii yara, me tom yǝ too ɗuura ira yǝ nwii a kankiita nga u Shaitan wa ra. 7 Wiine pamme yǝ kaɗ yaa hana ɓaa ɓǝn ɓǝɗ ɗaa Yeso ra ɓa, ɓǝ kan mbuka yaɓ a ɗuura ira, tom pa yǝ kana ɗuura waara, ɗǝm yǝ nwii a wiito Shaitan wa ra.

8 Maso ɗǝm wiina ɓan tom tinima a han ɓan ɓǝɗ ɗaa ɓǝ kwausǝ ɓa, ɓǝ kaɗ hoota ɓaa ɓeta ɓǝn waando ɓǝsǝ ɓa, ɗǝm ɓǝ naɓǝ mbarta, sem ɓaa ɓǝn weesǝ mbraa emngwate inabi ma dem ra, yǝ tom yaa ma neme falang ya ra. 9 Tomon ɗat ɓǝ maa mbu ɓǝ masǝ ɓa, ma ɓongtǝra to u ɓaa weɗasǝ a talte wa ma senda fin. 10 Me kǝ ndǝ tau ete yǝ kaɗ wiine, ɓaa ka sengge nhe, pa me ɓa taasǝ ma mbuka u kaa sa sǝr wa ra, pa a tau yǝ kaɗ yǝ tom tinima a ɗuura ɓan kwau ɓǝɗ Yeso.

11 Ɗǝm toona ɓosa ɓǝkǝ kaɗ ɓaa ma senta yaɓ ɓa, ɓǝ tom ɓan tangta ɓa ra, ɓǝ tom ɓaa ɓǝn masǝ ee ɓose ɓa, ɗǝm ɓǝ tom ma ɓongtǝra a mbu ɓǝn tomsǝ ɓa nsaad.

12 Yaa yǝn tomsǝ tinima a han ɓan kwau ɓǝɗa Yeso ɓa ya, yǝ tom ma toone fin, yǝ nkaa yǝ ɓǝɗ ma emɓǝsa ma taanda ira yaɓ. 13 Wiina ɓǝ tomsǝ tinima yaɓ a ɓan kwau ɓǝɗ Yeso ɓa niya, ɓǝn taa ɗǝnta yaɓ nkweera ɓose, ɓǝn kan mara ɗuura kǝɗ a ɗuura na ɓongtǝra ɓoso a Almaseho Yeso ni.

14 Kanǝ ti senda me kǝnǝ wo a ngani sem ma kirora, nǝn nyor ngǝ mara ra me, 15 menǝ wo nakǝn da, pa ngǝ maa me, ɗǝɗa ɓeta pamsǝ me ɓǝ ɓǝɗ ma nkweera ɓora a ɗuur Kaa ra u yǝsǝ ɗaan a ɓan ɓǝɗ Kaa ɓa. U nwa ǝn nsaara ma kunda ɓongtǝra ra. 16 Pǝno semra, ɓongto ɓaa weɗasǝ a talte a ɗuura haato wando ma Kaa ra yǝ kwang.
Yǝ weɗa ee usu nga ete,
Wis Kaa wa, yǝ weɗa ndǝ me yǝ keke.
Ɓan timira Kaa ɓa, ɓǝ wǝrsǝn ma nuuwa ɓosa.
Pa ɓaa nkee mara ira a put ntaandi wa nsaad,
Ɓeta dem hana na a put ntaandi wa, ɓǝ waando ma sasen,
Pa ɓaa too a ko ɓoti a liura.