1 Timothy 5

Na senda wa a ɗuura kiu toona ɓa, wiina ma hoota

1Ngǝ kwaakǝ yaa yǝ faɗ ngǝsǝ ya ra, pa a kan ma sase nga yǝn paange. A ɓǝɗ ma ɓaata ɓeta nga ɓaata ɓǝnga, 2A ɓǝɗ ma toona ɓǝ faɗ ngǝsǝ ɓa nga maa ɓǝnga, ɓaata toona ɓa ɗǝm nga ɓona ɓǝnga, ma kuɗa ɗekɗek ra.

3A kwasi toona ker ɓosa woɗsǝ ɓa, ɓaa ɓǝ sema ma yaa ke ra ɓa. 4Pa me kiu toone ya yǝma emba hana sirta ngǝ ɓǝ fǝɗkǝ ɗǝɗa Kaa ra a ntiiri me ɓǝ maa ɗǝɗa ɓǝka ɓǝɗ ma papamse ma sirta ma kaakǝta ɓosa me maaso kwalari a Kaa ni. 5Kiu toone yǝn taasǝ kwasira ya ǝn yaa yǝ sem ma yaa kiya kwasi a ntaadiwa ra, pa yǝ ti kango a Kaa ni ɗǝm yǝ se wii pǝrta ma kaa yǝn kǝna Kaa me yaa kwasi. 6Pa kiu toone ya yǝn kaɗsǝ kaɗo nepto wa, yǝ woɗɗon hana ka yǝsǝ ma huurtu siso. 7A ti ɓeta ɓǝ tom mbu ɓa, me ɓǝ tom mbu ɓaa kasa sǝr ɓa ra. 8Pa yaa yǝ kwasisǝ taanda ira ra ya, hana haato usu raya, yǝ rǝnǝ na ɓongtǝra usun ɗǝm yǝ faɗ yaa yǝ na ɓongtǝra ra yan.

9Kiu toone nya a nyor ɗǝnda ɗaan a kiuwa toona ɓa ra, me yǝ kan meta pu mindike ra, ɗǝm yǝ kaɗ keke ma kerisi, 10ɗǝm ɓaa maa mbu yaɓ yǝn tomsǝ ɓan, nga kwasi em ɓisi wa, pa ɗǝm yǝn kon waa, yǝn kwasi ɓan tinima Yeso ɓa, yǝn kwasi ɓa ɓǝsaa kongsa ɓa, ɗǝm yǝn tom mbu nsaad u kwalari wa.

11Kiu toone yǝ nkoora ya, ngǝ ɓǝ nyor ɗǝnda ɗaan a likarkar nyorsǝ ɗǝnta u kiu toona wa ra, me maabiri ɓose ɓaa ma Almaseho nǝn ɓǝkǝ taa me ɓǝ ko a kera. 12Me mbusa tom maason ɓǝkǝ win kiita ee ɓoso, me ɓǝ kau waa ɓoso ntiiri u kiuto wan. 13Ɗǝm, ɓǝkǝ fǝɗkǝ kaɗ sal wa, ɓǝkǝ ɓǝɗ hitsa hitsa, pa sem mbusǝ maɗ ɗa, ɓǝn kana a mbu sem ɓoso ra, ɓǝn kan mbusa ɓolɓol u tom me ɓǝ kan da wa. 14Me maaso, nǝn nkee kiu toona ɓǝ nkoora ɓa, ɓǝ nsaa kera, ɓǝ haa emba, ɓǝ maa ɓǝ ɓǝɗ ma em ɓoso me a na ɗuura wara ɓaatakera. 15Ɓaata kiu toona ɓa, ɓǝ wee kǝrton ɓǝn ɓǝɗ Shetan.

16Me tooneke kǝn yaa yǝn nasǝ ɓongtǝra ya, u yǝsǝ ma kiu toona a haato ɓoso wa, a lee yǝɓǝ kwasi. Pa me ɓan ɓǝɗ Kaa ɓa, ɓǝ taa ɗǝɗa ɓaa kwasi kiu toona ɓa, ɓaa ɓǝsǝ semma ɓan kwasira raɓa.

17Wiina kwau ɓan ɓǝɗ Yeso ɓong ɓa, ǝɓǝ na kwangto dem, nga ɓaa ɓǝn nkee mara Kaa ra ma fǝɗkǝra ira ɓa. 18Me Likarkar Kaa wa nkee me, “A liki ee naa yǝn subsǝ koma wa ra,” Ɗǝm “An tinima ya pamman me a kwana.” 19Ngǝ waando ra, me ɓaa wosǝ ma kaura a ɗuura wiine ke ra, me ɓeta raɓ hana taatǝn ɓǝ wosǝ ɓosa ra. 20Pa ɓaa ɓǝ tomsǝ mbu tentenato ɓa, ngǝ ɓǝ nkee a wii ɓaata wa a talte, me ɓaata ɓǝ kura kokto.

21Nǝn nkee ngǝ a wiiyo a Kaa ni, ma Krisiti Yeso, ma ɓantimira Kaa u yǝ taausǝ ya, a ma mara ra, semma waando ɗuura wara, ɗǝm ngǝ tom mbuka u kaa weɗa waando ɗuura atike wara.

22Ngǝ tom a hade ngǝ tau ete nga ti neme ra, ɗǝm ngǝ waando ngǝ kana tentenato ɓaata wara. A ma ɗuura nga ɗekɗek.

23A lee wee mbraa wa sedɗe, pa ngǝ pǝta wee mbraa emngwate inabi ma ngeek me siyo kuɗa nwaango nfee wa.

24Tentenato ɓaata wa, fiɗin ɓong a talte, me kankiita wo a wii ɓoson, pa tentenato ɓaata wa ǝn maa ma ndiira. 25A ɗǝɗa fin da, kǝngǝ wǝr mbu yaɓ ɓa a talte, hana ka sem a talte ra, a nkaa nhuukǝ ra yǝ kǝ fiɗi.