1Ti 6 | LlaSC | STEP | Nsaad ɓaa ɓǝsaa kunda hoota ɓa, tomon yaɓ ɓǝ na kwangto ɓan tanda ɓoso nga pamsǝ wa, me tom ɓaa nkee mbuka kwalakwala ɗǝnda Kaa ra ma fǝɗkǝra ndan ra.

1 Timothy 6

1 Nsaad ɓaa ɓǝsaa kunda hoota ɓa, tomon yaɓ ɓǝ na kwangto ɓan tanda ɓoso nga pamsǝ wa, me tom ɓaa nkee mbuka kwalakwala ɗǝnda Kaa ra ma fǝɗkǝra ndan ra. 2 Ɓaata hoota ɓan taanda ɓoso ɓǝ nasǝ ɓongtǝra ɓa, ɓǝ weɗa ɗuura kwakwa ra ɓan taanda ɓosa me ɓǝn ɓaa na ɓongtǝra ɓa. Me maaso, pamme sǝ ɓǝ tom tinima u faɗsǝ yaɓ wa, me ɓaa ɓǝsǝ ke ma ɓosa ɓa ǝn ɓaa ma ɓongtǝra ɓa, ɗǝm ɓaa nyoo ɓǝ. Nwa ǝn mbu kǝnga fǝɗkǝ a ɗuura ira ɓa, kǝɓǝ kǝna ɓǝ tomo.

Waando koɓa wa

3 Me atike yǝn fǝɗkǝ mbuka ɓol sem mara Ankundi yaande Yeso Krisiti ɓa ra, ɗǝm u pam ma fǝɗkǝra Kaa wa ra, 4 yǝ kung ma nik ɗuura wan, ɗǝm yǝ maa mbuka ra. Yǝma senda kwalakwala u renǝta yǝn wosǝ ma kisa a ɗuura mara ra u rǝmara, renǝta, sǝrma, ma matamse ɓolɓol wa, 5 ma renǝta nfee ma ɓaa senta ɓota kaɗsǝ sal ɓa, ɗǝm ɓǝ sem ma ɓongtǝra ra. Ɓǝn ɗim me ɓǝɗ Kaa ǝn ɗǝɗa kǝ ɓaa taa kǝnaa ra.

6 Pa ɓǝɗɗo Kaa wa ma himara a kuda ǝn kuɓ kwang kǝna ya. 7 Me ndǝ wo ma mbukake a kaɗo put ntaandi wa ra, ɗǝm ndǝ fiɗ ma mbukake ɗaan da. 8 Pa me ndǝ ma mbuseya ma lukta, ndǝ na himara a siso. 9 Pa ɓaa ɓǝn taasǝ me ɓǝ tom ma kǝnaa ɓa, ɓǝn kan a pǝtara ɗǝm ɓǝn nwii ɓǝ naa a wiita ɗeura hautǝma ra ɓolɓol u kǝ ɓǝn wo tǝblǝra ma woɗɗa wa. 10 Me waando koɓa wa nsaad ǝn ntiiri kwanatiro ya. Ɓaata men waando koɓa wa, ɓǝ lee na ɓongtǝra ɓoran ɗǝm ɓǝ tii ee ɓoso a kuɗa tebtebra dem.

Bulus yǝ ti Timatawus mbu kiya tomɓa

11 Pa ngase eɗ Kaa ya, a hik ee nwango a mbu ɓǝsa nsaad, a tom kaɗo keke a wiiyo a Kaa ni, ngǝ tom mbun tǝsǝ Kaa ɓa, ngǝ se wiyo ma na ɓongtǝra to wa, ma yauta, a kaa kuɗa ɗǝm a tom nlaa ma ɓeta. 12 A kweetǝ, kweeto u na ɓongtǝra wa. A ma ɓongtǝrato huurtu u pakarese wa u ɓaa yar ngǝsǝ a fer ngǝ nasǝ ɓongtǝra wa a wiiyo a ɓeta dem nwa. 13 Nǝn nkee ngǝ a wii Kaa wa, yaa yǝn nasǝ huurtu a mbusa nsaad ya, ma a wiiyo a Krisiti Yeso yaa yǝ kansǝ ɓongtǝra a wii Buntus Bilatus wa a mbu yǝ maasǝ ɓa ya. Nǝn nkee ngǝ me, 14 a ma mbu Kaa yǝ nkeesǝ me tom ɓa usu sem ma lamɓo hana mbu ɓaa kaa saa sǝr ɓa ra ndub fer Ankundi yaande Yeso Krisiti kiya wo ɓa, 15 fer kiya wo wa, Kaa yǝsǝ ma saltǝra ya, ǝn sase fin kuɓu, kuɓ, kuɓsa wa, ma yaa yǝsǝ Ankundi yaande yaa yǝ faɗsǝ nsaad ya, 16 Sase fin mbusa ɓongtǝra nya, yaa yǝ woɗɗa ra ya, ɗǝm yaa yǝsǝ ham ɗekɗek ɓa ya, u yaake yǝn wǝrsǝsǝ wara hana kiya wǝr wara. A sani kwangto ma kuɓsutu pakarese wa. A kaɗǝnso.

17 A nkee ɓa ɓǝsǝ ma kǝnaa put ntaandi nga waso ɓa, ɓǝ too ɗuura ra hana ɓǝ ti kango a kǝnaa u kiya nkaa yǝ feɗ wa ra, pa ɓǝ ti kango a Kaa ni, yaa yǝn nasǝ mbusa nsaad me ndǝ kura nepto ya. 18 Əɓǝ nkee ɓǝ tom ɓeta mbu kwalari ɓa, me ɓǝ taa tinima kwang u yaɓ ɓa. Ɓǝ na ɓeta saltǝra neme hoo, sǝ ɓaa kǝna waso ma hana yamni. 19 Ma maaso ɓǝkǝ kwau kǝna ee ɓoso u kǝɓǝn tom ntiiri kaɗa wo tǝro a wiiyo wa, me ɓaa taa huurtu u feɗefeɗe semra wa.

20 Timatawus, a sengge mbu ɓaa tisǝ a nemasǝ nga ɓa. A hik ee nwaango a kanmǝra hautǝma u sem mara Kaa ra, ɓǝn nkee me, ǝn maa mbuka ɓong wa, pa sem maaso ra, 21 maaso ɓaata a mbu ɓǝn tomsǝ ɓa ɓǝ lee ɓongtǝran.

Yauta Kaa ta a kaɗ ke ma saase.