2Ti 3 | LlaSC | STEP | Pa ngǝ maa mbu ɓa me, ɓaa kǝ wee kongsa a tǝromse feɗefeɗe ya dem.

2 Timothy 3

Tentenato ɓeta wa a tǝromse feɗefeɗe wa

1 Pa ngǝ maa mbu ɓa me, ɓaa kǝ wee kongsa a tǝromse feɗefeɗe ya dem. 2 Ɓeta ɓǝkǝ waando ee ɓoso, ɓǝ waando koɓa, ɓǝ nheuwe, ɓǝ too ɗuura ɓora, ɓǝ sǝr ɓeta, ɓǝ naa kwangto paapa ma maa ra, ɓǝ naa himara ra, ɓǝ kuraa kokto Kaa wa ra, 3 ɓǝ sem ma yauta ra, ɓaa ɓǝn masǝ ɓaatǝ a kuti ɓa, ɓǝn tǝblǝ dǝnta ɓaata, ɓǝn maa ɗuura ɓora ra, ɓǝn tom kwanatiro, ɓǝn tom simbira ma mbu yǝsǝ yaɓ ɓa, 4 ɓǝn fang ɓeta, ɓǝn kura handa ra, ɓǝn kung ma too ɗuura wa, ɓǝn waando kura nebto ɓoso a faɗ waando Kaa wa, 5 ɓǝn weɗa nga ɓǝ ɓan ɓǝɗ Kaa ɓa ntaandi, pa lau siko ɓoso wa ɓǝn renǝ kwangto Kaa wa. A tom mǝbmǝb ma kamǝra ɓeta sǝra.

6 Pa ɓaata a nkamara ɓeta sǝra ɓǝn kana ɗuur sa ɓetasa ɓǝ nlaa toona ɓaa ɓǝ wee nuwara ɓa, ɓaa ɓǝ kungsǝ ma tentenato ɓa, ɗǝm ɓǝ ti senta ɓora a nɗeura a mbu kwalakwala ɓa ɓolɓol, 7 ɓaa fǝɗkǝra nfee pa ɓǝ nkaa ɓǝ maa ɓongtǝra ra. 8 Nga Yannes ma Yambres ɓǝ tomsǝ simbira Musa wa, maaso ɗǝm ɓet ɓa ɓǝn tom simbira ma na ɓongtǝra ɓoso. Kamǝra ɓeta sǝra senta ɓosa nfaan, ɓongtǝra ɓosa ǝn u sal wa. 9 Pa ɓǝ ko mǝbmǝb ra, ɓaa kǝɓǝ maa ma hautǝma ɓosa naakǝn a talte nga ɓaa maasǝ u Yannes ma Yambres wa.

Na humta a feɗefeɗe wa

10 Ngase, ngǝ maa fǝɗkǝra nan nsaad, ma kaɗo nwaanon, ma mbu Kaa yǝn taasǝ me nǝ tom ɓa, ma na ɓongtǝra nwaano wa, ma sǝmo, ma yauta, ma kaa kuɗa wa, 11 ma kongsa a nema a ɓaa ɓǝ mbisisǝ Yeso ɓa ni, ma mbu taanǝsǝ a Antakiya ma Ikoniya ma Listira ɓa, hana maso Ankundi yǝ kon nǝ nkweeran a mbusǝsa nsaad. 12 Tumo, hanan yamni yaayǝn taasǝ me yǝ tom kaɗo u tǝsǝ Kaa wa a Krisiti Yeso ni ya, kiya taa kongsa dem, 13 pa ɓan kwanatiro ɓa ma ɓan nlaa ɓeta ɓa, kwanatiro ma nlaa ɓeta ɓose kǝ tǝblǝ a faɗ u nfee wa, ɗǝm ɓǝkǝ nlaa ɓeta ɓaa kǝɓǝ nlaa kǝn. 14 Pa waa ngǝ to, a se wiiyo ma mbu ngǝ fǝɗkǝsǝ ɓa, ɗǝm ma mbu ngǝ yausǝ ma siso ɓa, me ngǝ maa ɓaa ngǝ fǝɗkǝsǝ a ɓoni ɓan, 15 ɗǝm a fer ngǝ sǝn auwe wa nhun ngǝ maa likarkar ɗekɗek Kaa wan, u kǝngǝn ti ngǝ wee nuuwa men kon nkweera wa ma lau na ɓongtǝra a Krisiti Yeso ni wa. 16 Nsaad Likarkar Kaa wa, fiɗ a Kaa ni lau Wis usu ɗekɗek wa, ɗǝm yǝ kwalari men fǝɗkǝra ɓeta wa, ma kwaakǝra ma siko, me a tom kaɗo keke a wiiyo a Kaa ni wa, 17 me an ɓǝɗ Kaa ya, yǝ tom kungsǝ, yǝ kaɗsǝ yǝn war hana iring tinima kwalari na ya.