Act 3 | LlaSC | STEP | Kakake Bitrus ma Yohanna ɓǝn koko a taanda hit ɓǝɗ Kaa Urshalima wa a fer ɓaa Yahudawa ɓa ɓǝn tomsǝ kǝnara wa si kaa kausǝ.

Acts 3

Bitrus yǝ roɓ pura an kǝnara ya

1 Kakake Bitrus ma Yohanna ɓǝn koko a taanda hit ɓǝɗ Kaa Urshalima wa a fer ɓaa Yahudawa ɓa ɓǝn tomsǝ kǝnara wa si kaa kausǝ. 2 Pa ate ke kǝn u ɓaa haa sǝsǝ pura wa ɓan ko sǝsǝ a inntii un yarsǝ me YAƁ a hit ɓǝɗ Kaa Urshalima wa me yǝ kǝna koɓa a ɓaa ɓǝn kansǝ a taanda sǝra me ɓǝ tom kǝnara ɓa 3 Yǝ wǝrsǝ Bitrus ma Yohanna ɓǝn kankan wa; pa yǝ ɓǝ kǝna koɓa. 4 Bitrus yaa sengge a nuuwa, Yohanna ma maaso kǝn. Pa Bitrus yaa nkee me, “Ətǝ sengge” 5 Pa eɗ kaya yǝ ti nwaa me kiya taa mbuka a ɓoni.

6 Pa Bitrus yaa nkee me, “Koɓa nǝ sem sǝra, pa mbu nǝsǝ ɓa ǝn siso kǝnǝ ngǝ nawa. A ɗǝnda Yeso Krisiti eɗ Nazarat ya, a sikǝ.” 7 Pa yǝ ma nem isi a seya ya yaa nik ɓoti, nok kǝnso natsa isa ma nkwiiti isi a kang kwakwa. 8 Yǝ pur ɓoti yǝ ntii siko. Pa ɓǝ ko ke ma ɓosa a tanda hit ɓǝɗ Kaa Urshalima wa, yaa siko ma puro yǝn toosǝ ɗǝnda Kaa ra. 9 Ɓeta nsaad ɓǝ wǝrsǝsǝ yaa siko yǝn too ɗǝnda Kaa ra wa, 10 ɓaa maa me ǝn sase yǝn kaɗsǝ yǝ tom kǝnara a inntii hit ɓǝɗ Kaa Urshalima wa un yar sǝ me YAƁ wa, pa ɓǝ kung ma nhiinyanhiinya to ma mbu tasǝsǝ ɓa.

Bitrus yǝ kan ɓaa ɓǝsa ngwang ma sase ɓa

11 Pa pura kara yǝ maasǝ Bitrus ma Yohanna wa, pa ɓeta nsaad ɓǝ tom mbu wedara ɓa ɓǝn wo ma monne a ɓoni a ham ɓǝn yarsǝ me inntii kaɗ Sulemanu ya wa. 12 Pa Bitrus yǝ wǝrsǝ wa yǝ ɓǝ nkee me, “Parata Isra’ila ra, ǝn mbi tomsǝsǝ nhiinyanhiinyau? Ən mbi sǝn nhiitisǝ nuuwa maaso nga ma kwangto waato hana ma ɓongtǝra ta tǝ tisǝ eɗ ɗa ya siki wau? 13 Kaa Ibrahim ya, Kaa Ishaku ya, ɗǝm Kaa Yakubu ya, Kaa pap ɓǝnda ya, yǝ toosǝ hoora ira Yeso wa, u sǝ nasǝ me a toɗ ya, saa ɓisi a wiiyo a Bilatus ni, yaa ka Bilatus yǝn yau me kiya lee me yǝ taa sǝ ma mbuka ra. 14 Sǝ ɓisi yaa yǝsǝ ɗekɗek u Kaa wa ma ɓongtǝra ya me sǝ lee an tod ɓeta ya. 15 Sǝ tod yaa yǝn nasǝ huurtu ya, pa Kaa yǝ nik sǝ a tiinan ǝn taase tǝ wǝrsǝ mbusǝsa ɓa. 16 Ma lau ɓongtǝra a ɗǝnda Yeso ra wa, eɗ ɗa ya sǝ wǝrsǝsǝ ya saa maa ya yaa ɓaa kangsǝsǝ kwakwa ya. Yǝ na ɓongtǝra a ɗǝnda Yeso ra payǝ taa roɓo. Na ɓongtǝrato a Yeso niwa tisǝ yǝ taa roɓo nga nsaad sǝn wǝrsǝsǝ wa.

17 “Waso, ɓaata ɓǝna nǝ maan me mbu sǝn tom sǝ ɓa sem ma maa waso ra, nga wiina ɓǝsa ɓǝ tomsǝ wa. 18 Pa u nwa ndǝ mbu Kaa yǝ kungsǝ yǝ nkeesǝ ma lau ɓan nawanto ɓa wa, ɓǝn nkee me, Almaseho kiya wee kongsa. 19 Pa sǝ kon nfaata, sǝ kang a Kaa ni me yǝsǝ soɓ tentenato waaso, me Ankundi kiyǝ sǝ paki wis a maabiri yaa se wa 20 ɗǝm me kiya timi Almaseho yaa yǝ tausǝ ya Yeso. 21 Pa Yeso kiya kaɗ ɓoti a liura ndub fer Kaa kiya werkǝ nfiinfiita mbusa ta, nga yǝ weesǝ nkee tangtang wa ma lau Wis Kaa wa ɓan nawanto ɓa wa. 22 Me Musa yǝ nkee me, ‘Ankundi Kaa ɓǝsa kiyǝ sǝ nik an nawanto ya nga niina a ɗaaso ɓet ɓǝsa wa; Saa kura mbu nsaad kiyǝ sǝn nkee ɓa. 23 Nsaad yaa yǝ kura sǝ An nawanto ya ra wa, yǝ ɓaarǝ yǝ tom fin a ɗaaso ɓet Kaa ɓa ra.’

24 “Maso ɗǝm, nsaad ɓan nawanto ɓa nii a Samaila nga ɓaata dem ɓǝ nkeesǝ wa, ɓǝ wee nkeen a mbun tom sǝn tom ɓan. 25 Ən saase em ɓan nawanto ɓa ma waa u Kaa yǝ nkeesǝ papamse yase wa. Yǝ nkee Ibrahim me, ‘Lau nkaama ɓet ɓǝnga wa nsaad a put ntaandi wa kǝɓǝ taa saltǝra.’ 26 Pa Kaa yǝ niksǝ hoora ira wa yǝ ntii ya timi a sani me yǝsǝ na saltǝra ma lau kǝrto hana yamni yǝ lee mbu kwalakwala yǝn tomsǝ ɓa.”