Act 8 | LlaSC | STEP | Shawulu yǝ kǝnso yǝ yawan me a tod Istifanus. A fersiso kongsa dem niisǝ a ɗuura ɓan ɓǝɗ Kaa ɓa Urshalima ɓa, nsaad ɓǝ mono a lee ɓahona ɓǝ yaasǝ ɓǝ ko Yahudiya ma Samariya.

Acts 8

1 Shawulu yǝ kǝnso yǝ yawan me a tod Istifanus.

Ɓaa na kongsa ɓan ɓǝɗa

A fersiso kongsa dem niisǝ a ɗuura ɓan ɓǝɗ Kaa ɓa Urshalima ɓa, nsaad ɓǝ mono a lee ɓahona ɓǝ yaasǝ ɓǝ ko Yahudiya ma Samariya. 2 Ɓan ɓǝɗ Ankundi ɓa ɓǝ hok Istifanus ɓǝ tee dem meen sase. 3 Pa Shawulu yǝ ntii ɓǝɗ ɓan ɓǝɗ Ankundi ɓa, yǝn ɓǝɗ ɗuur sa ɗuur sa, yǝ wiin parata ma toona yǝ ɓǝ neuwe.

Filibus yǝ Samariya

4 Ɓan ɓǝɗ Ankundi ɓǝ weesǝsǝ ɓa ɓǝn nkee mara kwalari ra a han ɓǝ kosǝ ɓa nsaad. 5 Filibus yǝ ko a ur Samariya wa yǝn nkee mara Almaseho ra kǝnso 6 Pa ɓet ɓǝ kwausǝ dem ɓa ɓǝ kurasǝ mbu Filibus nkeesǝ wa, ɗǝm ɓǝ wǝr sǝ mbu nhiinyanhiinya yǝn tomsǝ ɓa, ɓǝ wo kwang ma sase me ɓǝ kura mbu yǝn nkeesǝ ɓa. 7 Wis nsaamse wa ɗǝm a fiɗ a maabiri a ɓeta ni ma yaulira dem, ɗǝm puuta ma ɓaa natsa sirsǝ ɓaa ɓǝ roɓɓo. 8 Me maaso hurkuɗa a tom dem a ur siso.

Siman ǝn tom mbu nhiinyanhiinya ma wis nsaaya ɓa

9 Kǝnso ka yaake kǝn ǝn yarsǝ me Siman yǝn tomsǝ siuto ur siso wa yǝn weɗa ɓaa Samariya ɓa mbu nhiinyanhiinya ɓa ma wis nsaamse wa. Yǝn heu yǝn nkee me yǝn yaake kwang, 10 pa nsaad ɓeta, wiina ma ɓaa ngeek ngeek ɓa, ɓǝn nasǝ kwangto ɓǝn nkee me, “Eɗ ɗa kwangto usu wa fiɗ a Kaa ni ǝn siso ɓǝn nkeesǝsǝ me ya Kwangya wa.” 11 Ɓǝn ɓǝɗsǝ me ka yǝn tom ɓǝ mbu nhiinyanhiinya ɓa nfee ma wis nsaa wa. 12 Pa ɓǝ na ɓongto ma Filibus mbu yǝ nkee ɓǝsǝ mara kwalari u a kuɓsutu Kaa wa ma ɗǝnda Yeso Krisiti ra, ɓaa ɓǝ tom baptisma, nsaad parata ma toona. 13 Siman sase ma nkweera ira yǝ na ɓongto ɓaa a tom baptisma. Pa yǝ ɓǝɗ Filibus hana yǝ ko na, yǝn wǝr mbu wedara ɓa ma mbu nhiinyanhiinya ɓa u kwang kwang Filibus yǝn tomsǝ ɓa.

14 Pa ɓahona ɓǝsǝ Urshalima ɓa ɓǝ kura me ɓaa Samariya ɓa ɓǝ yau ɓǝ kon mara Kaa ran wa, ɓǝ tung Bitrus ma Yohanna a ɓoni. 15 Ɓǝ kansǝ wa, ɓǝɓǝ tom kǝnara me ɓǝ taa Wis Kaa wa, 16 me fersiso Wis Kaa wa wo sundu a yake ni Samariya ra; ɓaa tom baptisma ma ɗǝnda Ankundi Yeso ra. 17 Pa Bitrus ma Yohanna ɓǝ tii nema ɓosa a ɗuura ɓora, ɓǝ kon Wis Kaa wa.

18 Pa Siman yǝ wǝrsǝ me Wis Kaa wa ɓaa na ma lau ɓahona ɓǝ tisǝ neme wa, yǝɓǝ na koɓa 19 yǝ nkee me, “Sǝnǝ na kwangto siso kǝn me hana yamni me nǝ tisǝ neman kiya kon Wis Kaa wa kǝn.”

20 Pa Bitrus yaa kakka: “A lee koɓa sǝnga sǝ wod ke ma ngiinga, mee ngǝn sen me ko kǝ ngǝ nkaa ngǝ tiri saltǝra Kaa ra ma koɓa! 21 Ngǝ sem ma taa mbuka wa a tinima mara, me kuɗa nga sem keke ma Kaa ra. 22 A kon nfaata ma mbu kwalakwala sǝsa ngǝ kǝna Ankundi. Minda kiyǝ ngǝ lee tenatenato nwaango ngǝsǝ ma siso a kuɗa wa. 23 Me nǝ wǝrǝ ngǝ kungsǝ ma kuɗa teptep ra, ɗǝm ngǝ hoora a tenatenato.”

24 Pa Siman ya kak yaa nkee me, “A kǝna Ankundi meen niina me mbu ngǝ nkeesǝ ɓa ǝnǝ nteera.”

25 Ndiira Bitrus ma Yohanna ɓaa ɓǝ maasǝ ɓongtǝra a ɗuura mara kwalari Ankundi wa, Bitrus ma Yohanna ɓǝ kang Urshalima ɓǝn nkee mara kwalari Kaa ra a em ura a put Samariyawa.

Filibus Ma yaa Itiyofiya ya

26 Pa an timira Ankundi ya yǝ nkee Filibus, “A nii ngǝ ko a ɗǝɗa u fiɗsǝ ma lau Urshalima ra a ham a ko Gaza wa.” 27 Pa yǝ nii yǝ faɗ ɗa, yǝn kosǝn kowa yǝ pamma eɗ Itiyofiya ke yǝn yaa kwang ya, ɗǝm yǝn an nhii mbusa kuɓ toone Itiyofiya wa. Yǝ wo Urshalima me yǝ nyoo Kaa, 28 pa yǝ sa ɗǝɗa me kiya kang wa yǝ kaɗsǝ a keke pir usu wa yǝn kau likarkar an nawanto Ishaya wa. 29 Pa Wis Kaa wa yǝ nkee Filibus, “Ngo a yaa yǝsa a keke piro siya ni ko ngǝ nǝɗ kwang ma sase.”

30 Pa Filibus yǝ moon yǝ ngwang ma sase yǝ kura yǝn kau likarkar an nawanto Ishaya wa. Yaa taa me, “Ngǝ maa mbu ngǝn kausǝ ɓa nǝu?”

31 Yǝ nkee me, “Kǝnǝ maa nau, ndub me yaake yǝ weɗanin?” Pa yǝ yar Filibus yǝ taa ɓǝ kaɗ ke ma sase.

32 Eɗ kaya kayǝn kau mbu ɓa a likarkar Kaa wa yǝ nkee me,
“Ɓaa kosǝsǝ nga tǝmnka a han nǝnga,
ɗǝm nga tǝmnkaa ɓan nhiisǝsǝ mora wa yǝ seu,
yǝ wil ee isi ra.
33 A mbu ɗuura waara ɓǝ tomsǝsǝ ɓa nsaad ɓǝ kansǝ kiita yaɓ wara.
Yaa kiya kan a ɗuura tuwa ɓǝsa niu?
Me huurtu usu ɓaa toon a put ntaandi wa.”

34 Eɗ kwang siya yǝ taa Filibus, “Ənǝ nkee, komkom ǝn yamni an nawanto ya yǝn kansǝ a ɗuura irau, ee usu hana yaake ɓolǝu?” 35 Pa Filibus yǝ ntii ka wo a likarkar Kaa wa yǝn nkee mara kwalari ra a ɗuura Yeso ra.

36 – 37 Ɓǝsaa siko a ɗǝɗa wa, ɓǝ wo a han mbraa ka eɗ kaya yaa nkee me, “A sengge mbraa wa tomtomni ngǝnǝn tom baptisma rau?” ^{▼▼Ɓaa ɓan nyora ntiiri ɓa ɓǝ sookǝ me, Filibus yaa nkee me, “Me ngǝ na ɓongton ma senda nga nsaad, kǝ ngǝ tomo.” Eɗ Kwang kaya yaa nkee me, “Nǝ na ɓongton me Yeso krisiti ǝn Au Kaa ya.”} 38 Pa ya kwang siya yǝ nkee me ɓaa nǝɗ ma keke pir usu wa. Pa eɗ kaya ke ma Filibus ɓǝ ham ɓǝ ko a han mbraa ka ɓa Filibus yaa tom baptisma. 39 Ɓǝ fiɗsǝ a mbraa kawa wa, Wis Kaa wa nok kǝnso yǝ too Filibus ya faɗ sowet, Yaa Kwang kaya yǝ ɓaarǝ yaa wǝr ɗǝm ra, pa yǝ faɗ wiiyo ma siko usu ya kwalo. 40 Filibus ɗǝm yǝ ɓaarǝ yǝ weɗa ee usu Azotus yaa sikoo yǝn nkee mara kwalari ra a ura nsaad pa yǝ kan Kaisariya.