Acts 9

Kon nfaata Shawulu wa

1Pa Shawulu yǝ faɗ wiiyo ma na kokto me kiyǝ tod emfǝɗkaa Ankundi ɓa. Yǝ ko a kuɓ kwang nek mbusa ya ni 2yaa taa ɗǝɗa me aa na likarkar yaa ko a ɓan wiiya a hitsa kwau Yahudawa sa ni Dimaska. Yǝ tom maaso me yǝn yau me yǝ ma nsaad hana toone hana parata ɓaa ɓǝn ɓǝɗsǝ ɗǝɗa Ankundi ra ɓa yǝ ɓǝn wo Urshalima nga pursuna. 3Yǝ tomsǝ ngwang kiya kan Dimaska wa, sem ma maa usu ra wedwedɗo fiɗ ɓoti a liura a wed a leurǝ. 4Yǝ nwii a putu yǝn kura kwaro ǝn nkeesǝ me, “Shawulu, Shawulu ngǝn nanǝ kongsa meen mbiu?”

5Shawulu yaa taa me, “Ngǝn yamniu, Ankundi?”

Yaa kak me, “Nǝn Yeso, yaa ngǝn nasǝsǝ kongsa ya.” 6“Waso a nii ngǝ kan a ɗaaso uru wa, ɓaa kǝ ngǝ nkee mbu kǝ nga tom ɓa.”

7Ɓaa ka ɓǝsǝ ke ma Shawulu ɓa ɓǝ nkaa ɓǝ kan mbuka ra; ɓǝn kura kanmǝran pa ɓǝ wǝr yaake ra. 8Shawulu yǝ nii a putu, pa yǝ wilsǝ nuuwa wa yǝ nkaa yǝ wǝr mbuka ra. Pa ɓaa ma neme ɓa wiin ɓa kan a ɗaaso ur Dimaska wa. 9Yǝ tǝr taatǝn yǝ wǝraa handa ra, ɗǝm yǝ se mbuka hana yǝ wee mbraa ra.

10Kǝnso Dimaska aufǝɗke Yeso ke kǝn ǝn yarsǝ me Hananiya. Ankundi yǝ yarsǝ a rotǝma me, “Hananiya!”

Yǝ nkee me, “Oi, Ankundi.”

11Ankundi yaa nkee me, “Ngo a ɗuur Yahuda wa u yǝsǝ a Ɗǝɗa Kǝɗ sǝra ngǝ taa yaake yǝ fiɗ Tarsus ǝn yarsǝ me Shawulu, yaa kǝnara. 12A rotǝma ima yǝ wǝr yaake ǝn yarsǝ me Hananiya yǝn wowo yaa ti neme a sani yǝ taa wǝr handa wa.”

13Hananiya yǝ kak same, “Ankundi, Nǝ kura mara a ɗuura eɗ sisi ran ma mbu yǝn tomsǝ kwalakwala a ɓan ɗekɗek ɓa a Urshalima. 14Pa yǝ wo a ham ɓa ma kwangto kuɓsa nek mbusa sa me yǝ ma nsaad ya yǝ yarsǝ ɗǝnda nga ya.”

15Pa Ankundi yǝ nkee Hananiya me, “Ngo! Eɗ sisi nǝ tausǝn me yǝ tom an tinima yaane kiya ko ma ɗǝnda a ɓaa ɓǝn Yahudawa ra ɓa ma kuɓsa ɓosa ma ɓaa Isra’ila ɓa. 16Kǝnaa weɗa kongsa kiya wee meen ɗǝnda na ra.”

17Pa Hananiya yǝ ko a ɗuur ka wa yǝ kana. Yǝ tisǝ neme a ɗuura Shawulu ra wa, yǝ nkee me, “Ate yaane Shawulu, Ankundi Yeso yaa yǝ weɗasǝ ee usu a ɗǝɗa a fer ngǝn wosǝn wo a ham ɓa wa ya, yǝ timi nǝ me ngǝ ɓaarǝ ngǝ wǝr handa ɗǝm, pa ngǝ kung ma Wis Kaa wa.” 18Nok kǝnso mbuka a ham nga ntaa ra tirira a nuuwa Shawulu sa, pa yǝ ntii wǝr handa wa ɗǝm. Yǝ nii kǝɗ aa tom baptisma, 19pa ndiira yǝ sesǝ mbuseya kwakwato usu a kanga.

Shawulu yǝ Dimaska ma Urshalima

Shawulu yǝ tǝr dem ma ɓan ɓǝɗ Kaa ɓa Dimaska. 20Tom kwaɗ ɗa yǝ ti nkee mara Kaa ra wa a hitsa kwau Yahudawa sa me Yeso ǝn Au Kaa ya. 21Nsaad ɓaa ɓǝ kurasǝsǝ ɓa ǝn tom ɓǝ mbu nhiinyanhiinya ɓa ɓǝ taa me, “Ən sase kayǝn hansǝ ɓaa Urshalima ɓa ɓaa ɓǝn yarsǝ ɗǝnda Yeso ra ɓarau? Ka yǝ wo a ham ɓa me yǝɓǝ ma yaa ko kuɓsa nek mbusa sa ɓǝ neu rau?” 22Shawulu yǝ toma soko ma maa mara Kaa ra wa yǝ kweetǝ me yǝ ti Yahudawa ɓǝsǝ a put Dimaska ɓa ɓǝ yau me Yeso ǝn Almaseho.

23Ndiira tǝrsǝ dem wa, Yahudawa ɓǝ kǝr ɗǝɗa mee ɓǝ kaa todɗo 24pa Shawulu yǝ kura. Pǝrtǝra ma kaa ɓǝn warsǝn wara a inntii uru ya me ɓaa todɗo. 25Pa emfǝɗkaa ɓǝsa ɓaa too a pǝrtǝra a karkadango ɓaa sa tal ma nkaa ra.

26Yǝ wosǝ Urshalima wa, yǝn taa me kiya tǝmɓa ɗuura ma ɓan ɓǝɗ Kaa ɓa, pa ɓǝn kura kokto usu, me ɓǝ yau me ǝn ɓongtǝra yǝ kang au fǝɗ ken ra. 27Pa Barnaba ya to yaasa wo a ɓahona ni. Yǝ nkee ɓǝ mbu tomsǝ ma Shawulu a ɗǝɗa ɓa yǝ famsǝ ma Ankundi wa ma mbu Ankundi yǝ nkeesǝsǝ ɓa, ma mara Kaa u Shawulu yǝ nkeesǝ ɓeta Dimaska a ɗuura Yeso ra kokto semra wa. 28Pa Shawulu yǝ kaɗ ke ma ɓosa ɓǝn siki ura ura Urshalima, ɓǝn nkee mara a ɗǝnda Ankundi ra kokto semra. 29Nfee ɓǝn tom renǝta ma Yahudawa ɓaa ɓǝn kansǝ ee Helenawa ɓa, pa ɓǝn taa me ɓǝ kaa todɗo. 30Pa ɓaata ɓǝsa ɓǝ kurasǝ maaso wa, pa ɓa too ɓaa saa ko Kaisariya ɓa tung Tarsus.

31Pa ɓan ɓǝɗ Kaa Yahudiya, ma Galili ma Samariya ɓa ɓǝ taa hurhurto. Me ǝn naɓǝ kokrokto ma naˈnkwiiti wa ma lau Wis Kaa wa, ɓǝ tomaa soko ma kura kokto Ankundi wa.

Iniyas ma Tabita

32Bitrus yǝ saa siko a ura ura wa pa yǝ ko a ɓan ɗekɗek ɓa ni lidda. 33Kǝnso yǝ pam ma puura kǝ ra ǝn yarsǝ me Iniyas, yǝma meeta kurkurun yǝ nkaa yǝ siki ra. 34Bitrus yaa nkee me, “Iniyas, Yeso Krisiti yǝ roɓ ngǝn. A nii ngǝ too ɗikra nga.” Nok kǝnso Iniyas yǝ nii kǝɗ. 35Nsaad ɓa ɓǝsa a put Lidda ma ɓaa sharon ɓa ɓǝ wǝrsǝsǝ wa ɓǝ kang ɓǝ ɓǝɗ Ankundi.

36A put Yoffa wa aufǝɗke ke kǝn ǝn yarsǝ me Tabita, ǝn sen me Dokas ya yǝn tomsǝ mbuka yaɓ ya yǝn ɗim ma kwasi hanhanta wa. 37Pa yǝ si yǝ woɗɗo, ɓaa soo ɓaa ti a hit ɓoti wa. 38Ur Lidda wa yǝ ngwang ma Yoffa, pa ɓan ɓǝɗ Ankundi ɓa ɓǝ kurasǝ me Bitrus yǝ Lidda wa, pa ɓǝ timi ɓeta raɓ me ko ɓa kǝna me, “Komkom nga wo waso!”

39Pa Bitrus yǝ ko ke ma ɓosa, pa yǝ kansǝ wa ɓaa saa ko a hit ɓoti wa. Nsaad toona ker ɓosa wodsǝ ɓa ɓǝ leurǝsǝsǝ, ɓǝn tete ɓǝn weɗasǝ lukta u Dokas yǝ werkǝ ɓǝsǝ fer yǝ sǝ ma huurtu nding wa.

40Pa Bitrus yǝɓǝ nkee me ɓǝ fiɗ ntaandi nsaad; pa yǝ kwirsǝ yǝ tom kǝnara a Kaa ni. Yǝ kǝrtǝ a wodɗa toone sǝra, yaa nkee me, “Tabita a nii.” Pa yǝ will nuuwa isa, yǝ wǝr Bitrus yǝ nii yǝ kaɗ ɗa. 41Pa yaa kwasi yaa ma nema isa yaa niki me yǝ nǝɗǝ. Pa yǝ yar ɓaa ɗekɗek ɓa, ma toona ker ɓosa wodsǝ ɓa yǝɓǝ na Dokas ma huurtu. 42Mbusa a tom mbu maa a put Yoffa nsaad, ɓeta dem ɓǝ na ɓongtǝra ma Ankundi. 43Pa Bitrus yǝ tǝr dem Yoffa a ɗuur yake ǝn yarsǝsǝ me Siman yǝn werkǝ ntaamse ya.