Act 1 | LlaSC | STEP | A likarkar nwaano a ntiiri wa, Tiyafulus, nǝ nyor ngǝ mbusa nsaad a ɗuura Yeso yǝ ntii sǝ yǝ tomra ma mbu yǝ fǝɗkǝsǝ ɓa

Acts 1

Ɓaa too Yeso a ko ɓoti

1 A likarkar nwaano a ntiiri wa, Tiyafulus, nǝ nyor ngǝ mbusa nsaad a ɗuura Yeso yǝ ntii sǝ yǝ tomra ma mbu yǝ fǝɗkǝsǝ ɓa 2 pakare ɓaa too sǝsǝ a faɗ a liura ya, ndiira yǝ nkee sǝ mbu ka tom ɓa nsaad ma lau Wis Kaa wa a ko a ɓahona isa ni u tausǝ wa. 3 Ndiira kongsa isa wa, yǝ weɗa ee usu ɓahona yǝɓǝ nkee mbusa ɓol ɓol u ɓǝka maa me yǝ ɗanyǝn, yǝ weɗa ee usu a ɓoni a fer tǝrma pakurun wa ɗǝm yǝɓǝ kan mara a ɗuura kuɓsutu Kaa wara. 4 Pa kaa fin ka yǝn sesǝ mbuseya ma ɓosa wa, pa yǝɓǝ nkee me, “Sǝ lee Urshalima nok ra, sǝ war fer Paane kiyǝsǝn tung Wis Kaa wa nga yǝ nkeesǝsǝ me kiyǝsǝ tung wa, nga sǝn kurasǝ nǝn kansǝ wa. 5 Me Yohanna yǝ tom baptisma ma mbraa, pa tǝro ngeek a wiiyo wa kǝsǝ tom baptisma ma Wis Kaa wa.”

6 Pa ɓǝ pamsǝ a han fina wa, ɓaa taa me, “Ankundi, ngǝn yau me ngǝ kang ɓaa Isra’ila ɓa kuɓsutu ɓosou?”

7 Pa yǝɓǝ nkee me, “Sem sase kǝsa maa meeta ma tǝro u Paane yǝ tisǝ ma kwangto usu wara. 8 Pa kǝsǝ kon kwangto a fer Wis Kaa wa wosǝ a sani wa; kǝsǝ tom ɓan nkee mara mbusǝ wǝrsǝ a ɗuura na ɓa Urshalima ma Yahudiya ma Samariya, a ko a peɗepeɗe put ntaadiwa ya.”

9 Ndiira yǝ nkeesǝ mbusǝsa maaso wa, ɓaa too ɓoti ɓǝn wǝr wǝrǝ ɗǝm liuta aa liki a han ɓǝsǝ ɓa.

10 Pa ɓǝsa sengo a liura ɓoti yǝn taasǝn taa wa sem ma maa ɓoso ra pa ɓǝ wǝr ɓaataka raɓ ɓǝ tungsǝ lukta pengpeng ɓǝ nǝɗsǝ kwang ma ɓosa. 11 Ɓǝ nkee me, “Ɓaa Galili ɓa, sǝn nǝɗ mbi a ham ɓa sǝn sengǝsǝ liurau? Yeso ya ɓaa tosǝsǝ a sani a faɗ a liura ya kiya kang nga sǝ wǝrsǝ yǝn taasǝn taa a liura wa.”

Ɓaa tau Matiyas yǝ paki Yahuda

12 Pa ɓahona ɓǝ kang Urshalima ɓǝ fiɗsǝ a yol ǝn yarsǝ me Zatunwa sem mǝbmǝb ma Urshalima ra. ^{▼▼Mǝbmǝb to ɓaa Yahudawa ɓa ɓǝka nkaa ɓǝ siki kaa wiiya ɓosa wa} 13 Ɓǝ kansǝ wa ɓǝ kana hit ɓoti wa a han ɓǝn kaɗsǝ ɓa. Ɓaa ɓǝsǝ kǝnso ɓa ǝn Bitrus ma Yohanna ma Yakubu ma Andarawus ma Filibus ma Toma ma Bartalamawus ma Matta ma Yakub au Halfa ya ma Siman Zaloti ^{▼▼Zaloti. Siman yǝ fin a ɗaaso ɓaa Yahudawa ɓa ɓan yarsǝ me Zaloti ɓa, ǝn ɓosa ɓǝ tǝmɓa sǝ ɗuura me ɓǝ kon nkweera ɓaa Yahudawa ɓa a kuɓsutu ɓaa Romawa ɓa.} ma Yahuda au Yakubu ya. 14 Ɓǝn kwau nfee me ɓǝ tom kǝnara ma ɓongtǝra wa, ɓǝ ke ma toona ma Maryamu maa Yeso ya ma ɓaata ɓǝsa.

15 A tǝro siso Bitrus yǝ nii kǝɗ a ɗaaso ɓeta ɓan ɓǝɗ Kaa ɓa ɓaa kwausǝ ɓa ɓǝ kanan pusa pu a nhaa puasa (120) 16 pa yǝ ɓǝ nkee me, “Ɓaata ɓǝna, Likarkar Kaa wa tomon ɗat a kungu nga Wis Kaa wa yǝ nkeesǝ ma lau Dauda tangtang wa, a ɗuura Yahuda ra, me yǝ weɗa ɗǝɗa ɓaa ɓǝ masǝ Yeso ɓa 17 kayǝ fin a ɗaaso yau kanɗǝn tom mbu fina a mara Kaa ra.”

18 (Ma nsaa yǝ taasǝ a tinima kwalakwala ma wa, Yahuda yaa tiri putu siso, pa yǝ nwii ma ɗuura kuɗa a pama, ntiiyata nsaad a tuk a putu. 19 Pa ɓet nsaad Urshalima ɓa ɓǝ kurasǝ mbusǝsa maaso wa ɓǝ yar hansǝsa ma ee ɓose me Akaldama, ǝn nkee me, put monma wa.)

20 Bitrus yǝ nkee me, “Ɓaa” nyoron a likarkar Zabura wa,
A lee han ɓisa yǝ tomsal;
ǝn lee yaa ke yǝ kaɗ kǝnso ra,
“‘Yaa ke ɗǝm yǝ too tinima imma ra.’

21 Me maaso paman yaɓ ndǝ ngwaɗ fin a ɗaaso ɓet kaɗsǝ ke ma ɓosa a siko yau ma Ankundi Yeso fer nɗǝsǝ ke wa, 22 ntiisǝ a ɗuura Yohanna An tom baptisma ya a ko a fer Yeso ɓaa tosǝsǝ a faɗ wa, fin a ɗaaso ɓet ɓa wa yǝ wǝr sase niinyo a tina wa ke ma taase.”

23 Pa ɓǝ yar ɓeta raɓ: Yusufu ǝn yarsǝsǝ me, Barsaba (ɗǝm ɓa masǝ me Yustus) ma Matiyas. 24 Pa ɓǝ kǝna Kaa me, “Ankundi, ngǝ maa kuɗa hana yamni ran. Ətǝ weɗa yamni a ɗaaso ɓaa raɓ ɓa u ngǝ tausǝ wa 25 me yǝ kang yǝ tom tinima ɓahone, Yahuda yǝ leesǝ yǝ ko a han yǝ tausǝ me kiya ko ɓa.” 26 Pa ɓǝ tom tauwo a ɗaaso ɓoso, pa Matiyas yǝ taa sase pa yǝ tǝmɓa ma ɓahona pu haa fin sǝ ɓa.