Acts 4

Bitrus ma Yohanna a wii Sadukiyawa ɓa

1A fer kuɓ nek mbusa wa ɓǝsa kanmǝra ma ɓahona wa, kuɓsa nek mbusa sa ma kuɓ kwang an war hit ɓǝɗ Kaa Urshalima wa ma Sadukiyawa ɓǝ wo a Bitrus ma Yohanna ni. 2Daa ɓǝsǝ dem me ɓahona ɓǝn fǝɗkǝ ɓeta mara me ɓeta ɓǝkǝ nii a tina nga Yeso yǝ niisǝ tina wa kǝn. 3Pa ɓǝ ma Bitrus ma Yohanna ma ɗikira ɓǝɓǝ neuwe, me handa a wee nhe. 4Ɓeta dem ɓǝ kurasǝ mara sǝra wa ɓǝ na ɓongton, ɓaa sokǝsǝ a ɗuura ɓora ɓa ɓeta kanan pusa pu pu wonon. 5Handa weesǝ wa kuɓsa ma wiina ma malǝmma fǝɗkǝra Musa sa ɓǝ kwau Urshalima. 6Hannana kuɓ kwang nek mbusa ya yǝ kǝnso, ma Kayafa ma Yohanna ma Alekzanda ma ɓaata u ɓǝsa haato kuɓ kwang nek mbusa sa wa. 7Pa ɓǝ ti me a wo ma Bitrus ma Yohanna a wiyo a ɓoni pa ɓǝ ntii taawo “Ma kwangto naa wau, hana ɗǝnda yamnirau sǝn tomsǝ mbu ɓau?”

8Pa Bitrus, yǝ kungsǝ ma Wis Kaa wa yǝɓǝ nkee me, “Kuɓsa ma wiina ɓeta ɓa! 9Me sǝ yartǝ me tǝ nkee mbu tomsǝ naso ɓa me mbu yaɓ tomsǝ pura ra ɓa me tomtomniu yǝ roɓ sǝu, 10pa sǝ maa u nwa, sase ma nsaad ɓet Isra’ila ɓa: Ma lau ɗǝnda Yeso Krisiti eɗ Nazarat ya sǝ kwaakǝ sǝsǝ ya, u Kaa yǝ nik sǝsǝ a tina wa, ǝn siso eɗ yǝ nǝɗsǝ a wii waso yǝ roɓsǝ wa. 11Ndǝ sase
“‘Ɗungara u saase ɓan mara ɓa sǝ mbisǝsǝ wa,
ǝn siso yǝ kangsǝ yaɓ a timra hito ra wa.’

12“Kon nkweera wa sem kǝn ka taa a yaake ni wa ra, me ɗǝnda kǝ ra sem kǝn a put ntaadiwa nasǝ ete me kiya taa kon nkweera wa ra.” 13Pa ɓǝ wǝrsǝ kokrokto Bitrus ma Yohanna wa ɓǝ maa me ɓǝ semma maa mbuka wa ra ǝn ɓeta maɗ, ɓǝ tom mbu wedara ɓa ɓǝ too senda ɓǝ maa me ɓet ɓa ɓǝ ke ma Yeso. 14Pa ɓǝ wǝrsǝ yaa ɓaa roɓ sǝsǝ siya yǝ kǝɗ a wii ɓoso wa ɓǝ maa mbu kǝ ɓaa nkee ɓa ra. 15Pa ɓǝ nkee me ɓǝ fiɗ a ur Sadukiyawa wa pa ɓǝn kan a ɗaaso ɓoso. 16Pa ɓǝn taa ɓaatǝ, “Kǝnɗǝ tom mbi ɓet ɓau? Nsaad hana yamni Urshalima yǝ maa mbu nhiinyanhiinya ɓǝ tomsǝ ɓan, ndase ɗǝm ndǝ renǝ ra. 17Pa me ndǝ sa mbu ɓa faɗo a wiiyo wa a ɗaaso ɓeta wa, kǝnɗǝ ɓǝ wiin ngwee me ɓǝ nkee yaake mara ma ɗǝnda Yeso ra ɗǝm ra.”

18Pa ɓǝ yar Bitrus ma Yohanna ɓǝ nawanto me ɓǝ nkee mara hana ɓǝ tom fǝɗkǝra a ɗǝnda Yeso ra ɗǝm ra. 19Pa Bitrus ma Yohanna ɓǝ kak ɓǝ nkee me, “Sǝ kankiita nkweerase wa tomon keke a Kaa ni tǝ ɓǝɗ mbusǝ nkeesǝ ɓa a lee u Kaa wau? 20Me taasǝ tǝ nkaa tǝ roo seu a mbu tǝ wǝrsǝ tǝ kura ɓa ra.”

21Ndiira ɓǝ naɓǝsǝ kokto wa ɓǝ lee ɓǝ faɗa. Ɓǝ maa mbu kǝɓa tom ɓǝ maa ɓǝ na kongsa ɓa ra, me ɓeta nsaad ɓǝn nyoo Kaa a mbu tomsǝ ɓa. 22Me yaa ɓaa roɓ sǝsǝ ma nhiinyanhiinyato siya yǝ faɗ meta pwakurun nǝn.

Kǝnara ɓan ɓǝɗ Kaa ɓa

23Bitrus ma Yohanna lee ɓǝsǝ wa, ɓǝ kang a ɓet ɓosa ni ɓǝ nkee mbu nsaad kuɓsa nek mbusa sa ma wiina a hit Kaa wa ɓa ɓǝ nkee ɓǝsǝ wa. 24Pa ɓǝ kurasǝ maaso wa, ɓǝ nik kwar ɓoso ɓǝn kǝna Kaa me, “Ya kwangya Ankundi, ngǝ marsǝ liura ma putu ma aulaara ma mbu ɗaan ɓa nsaad. 25Ngǝ kan ma Wis Kaa wa ma lau ee hoora nga wa pate Dauda wa yǝ nkee me,
“‘Me mbi ɓaa ɓǝn Yahudawa ra ɓa ɓǝn nfiisǝu
haato ɗǝm ɓǝn sen mbu sal ɓau?
26Kuɓsa a put ntaandi wa ɓa ɓǝn tomo a waro ma kito,
ɓandawiiya ɓosa ɓǝ kwau a han fina
ɓǝ yauma Ankundi ra
ma ɗǝm Almaseho isi ra.’

27Ɓongtǝra, kuɓu Hiridus ma Buntus Bilatus ɓǝ kwau ke ma ɓaa ɓǝn Yahudawa ra ɓa ma ɓet Isra’ila ɓa ɓǝ yauma hoora ira Yeso yaa ɗekɗek ya ra, u ngǝ ti sǝsǝ Almaseho wa. 28Ɓǝ tom mbu kwangto nwaango ma mbu tǝngǝsǝ me a tom ɓa. 29Ankundi a sengge waso ɓǝ kwetǝ me ɓǝ na kokto hoota nga ɓǝ nkee mara nga ra, A yau hoota nga ɓǝ nkee mara nga kokto semra. 30A mel nem yaange, u roɓ ɓeta wa ngǝ ɗǝm weɗa mbu nhiinyanhiinya ma weɗara ɓa ma lau ɗǝnda hoora nga ɗekɗek Yeso wa.”

31Ndiira ɓǝ tomsǝ kǝnara wa, a han ɓǝ kwausǝ ɓa a nya. Pa nsaad ɓaa ɓǝ kung ma Wis Kaa wa ɓǝ tomma nkee mara Kaa ra wa kokto semra.

Ɓan ɓǝɗa ɓǝ ma senda fin

32Nsaad ɓaa ɓǝ nasǝ ɓongto ɓa ɓǝma kuɗa fin ma senda fin, yaake yǝ senaa me mbu yǝ sǝ ɓa sem usu fin ɓǝsa ra, ɓǝn ɓaa mbusa nsaad a han fina. 33Ma kwangto ɓahona wa ɓǝ faɗ wiiyo ma na ee a ɗuura Ankundi Yeso ra niinyo a tiina wa, kwasira Kaa ra kwang a ɗuura ɓora nsaad. 34Yaake sem kǝn yǝn taasǝ mbuka a ɗaaso ɓoso wa ra. Me ɓaa ɓǝsǝ ma nyanya hana ɗuur sa ɓa ɓǝn fang ɓaa wo ma koɓa ɓǝ taasǝsa 35ɓǝ ti a wiiyo a ɓahona ni ɓǝn ɓaa hana yamni ya pamsǝ me aa kwasi ya.

36Yusufu eɗ Balawe ya yǝ fiɗ Sayifurus u ɓahona ɓǝn yarsǝsǝ me Barnaba (u ǝn sen me Au naˈnkwiiti ya). 37Yǝ fang peekǝra mbu yǝsǝ ɓa yaa wo ma koɓa isa nsaad yǝ nhii a wii ɓahona wa.