Jam 5 | LlaSC | STEP | Sǝ kura waso, saa ɓan kǝnaa ɓa, sǝ pomo sǝ tee me kongsa ǝn wosǝn wo a ɗuura saa ra.

James 5

Wiin ngwee wa ɓan kǝnaa ɓa

1 Sǝ kura waso, saa ɓan kǝnaa ɓa, sǝ pomo sǝ tee me kongsa ǝn wosǝn wo a ɗuura saa ra. 2 Kǝnaa waaso nhoon, ɗǝm lǝkǝmta ɓǝ kǝu lukta sǝsan. 3 Zinariya ma Azurfa waaso ran ngan. Rango usu yǝn weɗa me maabiri yaase kiya rang maaso maabiri yaa ngǝ yǝ kǝɗ nga ara. Sǝ kwau kweerase koɓa a feɗefeɗe tǝro ya. 4 Sǝ sengge! Ɓaa ɓǝ waasǝsǝ nyaayo u sǝ waando sǝ ɓǝ kwan da ɓa, ɓǝn tete ndiira waaso. Or ɓaa ɓǝ tomsǝsǝ tinima nyaayo ɓa kana a ngwee a yaa kwang ya Ankundi yaande ya nin. 5 Sǝ kaɗa put ntaadiwa ma kura nepto wa. Sǝn se sǝn wee mbu tǝsǝsǝ ɓa, yaa sǝ nsee nkweerasen nga naa, wa sǝn war kaa kǝ sǝn nǝng ɓa. 6 Sǝn kankiita ɓaa ɓǝ tom mbuka ra ɓa, ɗǝm sǝ tod ɓeta, ɓaa ɓǝn bisisǝ ee ra ɓa.

Sǝ sǝmo ma kǝnara

7 Ɓaata ɓǝna, sǝ sǝmǝ, sǝ war wo Ankundi yaande wa. Sǝ wǝr sǝmo an nyaanyo ya yǝn warsǝ nyaanyo usu a tom ya, yǝn war ma sǝmo tiwo a ntiiri wa ma u feɗefeɗe wa. 8 Saase ɗǝm, sǝ sǝmǝ sǝ nǝɗ kwakwa a ɓongtǝra waaso, me wo Ankundi yaande wa, tomon nkwang. 9 Ɓaata ɓǝna, sǝ tom nhurunhuru ɓaatǝ ra, me tom ɓaa sǝ kan kiita ra. An Kankiita ya yǝ kǝɗ a inntii!

10 Ɓaata ɓǝna, sǝ too mǝɗkǝra sǝmo kongsa wa u ɓan nawanto ntiiri ɓa, ɓǝ kansǝ a ɗǝnda Ankundi yaande ra wa. 11 Nga sǝ masǝ wa, tǝn nkee ɓeta me ɓaa ɓǝ sǝmsǝ ɓaa naɓǝ saltǝran. Sǝ kura sǝmo Ayuba tomsǝ wan, ɗǝm sǝ wǝr mbu Ankundi yaande yǝ tomsǝsǝ a feɗefeɗe wan. Ankundi yaande yǝ kungsǝ ma mayamayato ma nyorataara.

12 Mbu faɗsǝ nsaad ɓa, ɓaata ɓǝna, sǝ kong kuu hana ma liura ra, hana ma put ntaandi wa ra, hana mbuka ɓol ra. A lee “Ee” yǝ tom Ee, “Awo” yǝ tom “Awo” Me sem maaso ra, Kaa kǝ sǝ kan kiita sǝ kaɗ mbu sala.

Sǝ kǝna ma na ɓongto wa

13 Yaake kǝn a ɗaaso waaso yǝ kansǝ a kongsa wau? Yǝ tom kǝnara. Yaake kǝn a ɗaaso waaso yǝsǝ ma hur kuɗa wau? A lee yǝ kǝɗ pin nyoo Kaa wa. 14 Yaake kǝn yǝsǝ sem kwakwa ra wau? A lee yǝ yar wiina hit ɓǝɗ Kaa ɓa, ɓǝ wo ɓa tom kǝnara a ɗuura ira, ɗǝm ɓaa puk yaro a ɗǝnda Ankundi ra yaande. 15 Kǝnara u tomsǝ ma na ɓongtǝra wa ki ya roɓ yaa sem kwakwa ra ya. Ankundi yaande ki ya niki. Me ka yǝ tom mbu tenatena ɓan, Kaa ka lee a senda. 16 Pa me maaso, sǝ nkee tentenato waaso ɓaatǝ, ɗǝm sǝ tom kǝnara ɓaatǝ me sǝ roɓɓo. Kǝnara yaa yǝsǝ keke a wiiyo a Kaa ni ya, yǝma kwangto ɗǝm ǝn tom tinima.

17 Iliya yǝn ete nga ndase. Kakake yǝ tom kǝnara ma na ɓongtǝra wa, me ǝn roo tiwo ra, pa tiwo roo a put siso ra meeta taatǝn ma pekǝra. 18 Ɗǝm yǝ tom kǝnara, pa liuta yǝ na tiwo, ɗǝm putu yǝ na mbuseya. 19 Ɓaata ɓǝna, me yake kiya lee ɗǝɗa ɓongtǝra ra, a lee yaake yaa sa kang a ɗǝɗa. 20 Sǝ ɗim ma mbu ɓa. Yaa yǝ kangsǝ ya ma tentenato ya fin a ɗǝɗa yaɓ ra ya, ka ti yǝ noo woɗɗa, ɗǝm a liki tentenato usu dem.