John 16

1“Nǝ nkeesǝ mbu ɓa nsaad me tom pa sǝ kang ma nɗiira a naɓongtǝra waaso ra. 2Ɓaa kǝsǝ pǝǝ a hitsa kwau Yahudawa sa. Pǝno sem ra, fer usu ǝn wowo, me nsaad yaa yǝ toɗsǝsǝ ya, kǝ yǝ nkee me, yǝn tom tinima Kaa ma. 3Ɓǝ kǝ tom maaso me ɓǝ maa Paapa hana niina ra. 4Nǝ nkeesǝ mbu ɓa, me fer usu kanan, sǝ ɗim me nǝ wee nkeen. Nǝ nkeesǝ mbu ɓa tǝng a ntiiri ra, me nǝ ke ma saase.

Tinima Wis Kaa wa ma

5“Waso nǝn koko a yaa yǝ timinǝsǝ ya ni, hana maaso yaake fin a ɗaaso waaso yǝ taanǝ me, ‘Ngǝ ko nau ra?’ 6Kuti yaase kung ma kuti tebtebto ya, me nǝ nkeesǝsǝ mbu sǝsa wa. 7Pa nǝn nkeesǝ ɓongtǝra, ko nwaano kǝsǝ tom yaɓ me Ankwasira siyaa, yǝ wo ra, ndub a ndiira faɗɗo nwaano wa. Pa me nǝ faɗɗan kǝnǝsǝ tung yǝ wo. 8A fer Ankwasira kiyaa wo ya, kiyaa weɗɗa ɓet a put taandi wa ɓa, me senta ɓota sem keke a ɗuura tenatenato ra, ma a ɗuura kaɗɗo keke a wiiyo a Kaa ni ɓa, ma ɗǝm a ɗuura kiita ra. 9A ɗuura mara tenatenato ra, me ɓeta ɓǝ na ɓongtǝra ma niina ra. 10A ɗuura kaɗɗo keke a wiiyo a Kaa ni ɓa ɗǝm, me nǝ ko a Paapa ni a han sǝ ɓaarǝ sǝnǝ wǝr ɗǝm ra ɓa. 11A ɗuura kiita ra ɗǝm, me ɓaa wee kan kiita wa, yaa yǝn tomsǝ kuɓsutu put taandi wa ɓa ya.

12Nǝ ma mbusa dem u peesǝ me kǝnǝ sǝn nkee wa, pa sǝ nkaa sǝ too nga waso ra. 13Pa me Wis ɓongtǝra wa, yǝ won, ki yǝsǝ ɓǝɗ a mbu nsaad u ɓongtǝra wa, me sem me yǝn kan me nkweera ira ra, pa kiyǝ nkee mbu yǝn kurasǝ ɓa maɗ, ɗǝm ki yǝsǝ nkee mbu tom sundu ra ɓa. 14Kiyǝ nǝ too ma lau too a mbu yǝsǝn waano ɓa, yǝsǝ nkee me sǝ maa. 15Mbu nsaad Paapa yǝsǝ ma siso ɓa, ǝn waano. Ən siso nǝ nkeesǝ me Wiso, kiyǝ too a mbu yǝsǝn waano ɓa, yǝsǝ nkee me sǝ maa.

16“Me tomon singǝ sǝnǝ wǝr ra, pa me tomon singǝ ɗǝm, kǝsǝ nǝ wǝrǝ.”

kuɗa Tebtebto ra, kiyǝ kang kuɗa pengpeng ra

17Pa ɓaata emfǝɗkaa ɓa ɓǝ nkee ɓaatǝ me, “Yǝn sen mbiu yǝ nkee me, ‘Me tomon singǝ sǝ nǝ wǝrǝ ra, me tomon singǝ ɗǝm sǝ kǝnǝ wǝrǝ,’ yǝ nkee ɗǝm me, ‘Nǝn koko a Paapa ni’?” 18Pa ɓǝ faɗ wiiyo ɓǝ tom aa taa ɓaatǝ wa, ɓǝn nkee me, “Yǝn sen mbiu yǝ nkee me, ‘me tomon singǝu’? Ai, ndǝ maa mbu yǝn nkeesǝ ɓa ra.”

19Yeso kǝn yǝ maan me emfǝɗkaa ɓisa ɓǝn yau me ɓǝkaa taa, pa me maaso yǝɓǝ nkee me, “Nwa sǝn taa ɓaatǝ a mbu nǝ nkeesǝ ɓa me, ‘Me tomon singǝ sǝ nǝ wǝr ra, pa me tomon singǝ ɗǝm, kǝ sǝnǝ wǝr wau’? 20Nǝn nkeesǝ ɓongtǝra, kǝsǝ tee sǝ tom kuɗa tebteb ra, pa ɓet put taandi wa ɓa, ɓǝkǝ hur kuɗa. Kǝsǝ tom kuɗa tebteb ra, pa kuɗa tebteb saa kǝ kang hur kuɗa wa. 21Me toone kiyǝ haa, yǝn kura kuɗa sira dem, me fer haa usu kanan. Pa me yǝ haa au isin, yǝn hura ma kuɗa sira ira, me yǝ haa au isin a put taandi wa. 22Pa yǝ maaso a saani. A fer waso saa kuɗa tebteb ra, pa kǝnǝ ɓaarǝ nǝsǝ wǝr ɗǝm, a fer siso kǝsaa hur kuɗa, ɗǝm yaake sem kǝn, kiyaa kon hurkuɗa saa a saani ra. 23A kaa sǝsa sǝnǝ taa mbuka ɗǝm ra. Nǝn nkeesǝ ɓongtǝra, Paane kiyǝ sǝ na nsaad mbu sǝn taasǝ a ɗǝnda na ɓa. 24Nding waso sǝ taa mbuka ma ɗǝnda na ra. Sǝ kǝna, ɗǝm sǝkǝ taa, me hurkuɗa waaso aa tom kungsǝ kungsǝ.

25“Nǝ tomma kan mara wa ma mǝɗkǝta me nǝ sǝ weɗɗa mbu ɓa ma, pa fer usu ǝn wowo, u kǝnǝnsǝn kan mara a talte a ɗuura Paapa ra wa, ɗǝm nǝ ɓaarǝ nǝsǝ kan mara ma mǝɗkǝta ɗǝm ra. 26A kaa sǝsa sǝkǝ tom kǝnara ma ɗǝnda na. Sǝkǝ kǝna Paapa ma nkweerase, tom ɗaɗ me niina nǝ tom kǝnara a ɗuura saa ra. 27Sem maaso ra, me Paapa ma nkweera ira yǝn yausǝ, me sǝn yaunǝ, ɗǝm sǝ na ɓongtǝra me nǝ fiɗ a Kaa ni. 28Nǝ fiɗ a Paapa ni, nǝ kan a put taandi wa, pa waso nǝn lee put taandi wa, kǝnǝ kang a Paapa ni.”

29Pa emfǝɗkaa Yeso ɓa, ɓǝ nkee me, “Waso ngǝn kan a talte, sem ma mǝɗkǝra ɗǝm ra. 30Pa waso tǝ maan me ngǝ maa mbusan nsaad, sem me ete yǝ taa ngǝ mbuka nhe ra me ngǝ wee maa senda kuɗa ete ran. Ən siso mbu kwasǝ tǝ nasǝ ɓongtǝra me ngǝ fiɗ a Kaa ni wa.”

31Yeso yǝɓǝ kak me, “Hankara waso, sǝ na ɓongtǝra niu?” 32Fer usu ǝn wowo, yǝ wee won, u hana yamni kiyaa mon yǝ ko ɗur usu wa, sǝ kǝnǝ lee fin mana. Hana maaso, nǝ sem fin mana ra, Paapa yǝ ke ma niina.

33“Nǝn nkeesǝ mbu ɓa ma, me a nani sǝ taa hurhurto. A put taandi wa sǝn wee kongsa, pa sǝ kaɗ ma sǝmo, me nǝ nkaa put taandi wan.”