Luk 11 | LlaSC | STEP | A ferko Yeso yaa hamka yǝn kǝna Kaa. Yǝ pedsǝwa ate fin a ɗaaso emfǝɗkaa ya nkee me, “Ankundi, ǝtǝ fǝɗkǝ kǝna Kaa wa kǝn ngaa Yohanna yǝ fǝɗkǝsǝ emfǝɗkaa ɓǝsa wa.”

Luke 11

Fǝɗkǝra Yesora a ɗuura kǝnara ra

1 A ferko Yeso yaa hamka yǝn kǝna Kaa. Yǝ pedsǝwa ate fin a ɗaaso emfǝɗkaa ya nkee me, “Ankundi, ǝtǝ fǝɗkǝ kǝna Kaa wa kǝn ngaa Yohanna yǝ fǝɗkǝsǝ emfǝɗkaa ɓǝsa wa.” 2 Yeso yǝ ɓǝ nkee me, “Me sǝ kǝ tom kǝnara, sǝ nkee me,
“‘Paapa, ɗǝnda nga a too,
kuɓsutu nwaago yǝ wo.
3 Ətǝ na hana kaa na ɓa mbuseya tuka ɓa.
4 Ətǝ lee tentenato waato,
nga tǝn leesǝ ɓaa ɓǝn tom tǝsǝ tenatenato ɓa.
Ɗǝm ngǝ tǝn ko a ham pǝtara ɓa ra.’”

5 Pa Yeso yǝɓǝ nkee me, “A nkee me yaake a ɗaaso waso yǝ ma siki, paya ko a sani a pampǝrte ya nkee me, ‘Sikane, ǝnǝ na kwan nkaadǝng taatǝn, 6 me sikaaneke fiɗa siko yǝkǝ tǝra nani, panǝ sem ma mbuse kǝnasa na ɓa ra.’ 7 “Paya ɗaan ya kǝyaa nkee me, ‘Ngǝ nǝ rǝkara, inntii neusǝ, nase ma emɓǝna tǝ wee tǝron, na nkaa nani nǝgǝ na mbuka ra.’ 8 Nǝn nkeesǝ, hana yaa na me yǝ sikisi ra, kǝya nii ya na mbu yǝn taasǝɓa me ɗǝnda ira ǝn tǝblǝra.” 9 “Pa nǝn nkeesǝ me, sǝ kǝna, ɓaa kǝ sǝ na. Sǝ kǝrǝ, sǝ kǝ taa. Sǝ hoɓ inntii, ɓaa kǝ sǝ wili. 10 Me hana yamni yaa yǝ kǝnasǝ ya, kaa na, yaa yǝ kǝrsǝ ya, ki yǝ taa; ɗǝm yaa yǝ hobsǝ inntii ya, kaa wili.

11 “Ən yamni a ɗaaso waso paapamse, me auwesi kǝna sǝ nsenyo, ki yaa sa na nsaa a nsenyou? 12 Hana me yǝ taa sumbara kǝya na neneyou? 13 Me saase ɓaa kwalakwala ɓa, sǝn maa sǝ na mbusa kwalari em ɓǝsa, pa me maaso, Paase a liura ya, ki yǝsǝ na Wis Kaa wa ɓaa ɓǝ kǝna sǝsǝ wa!”

Yeso ma Kuɓ nsaamse wa

14 Kakake Yeso yǝn hik nsaa u ǝn tisǝ ete yǝ nkaa yǝ kan da wa. Pa nsaa susu faɗsǝ wa, eɗ yǝn kanara siya yǝ kana, pa ɓet kwausǝ dem kǝnso ɓa, ɓǝ tom mbu weɗara ɓa. 15 Pa ɓaata ɓosa ɓǝ nkee me, “Ma lau Ba’alzabul kuɓ nsaamse wa, yǝn hiksǝ nsaamse wa. ^{▼▼Baˈalzabul ǝndǝ ndanda kuɓ nsaamse wa ra.}” 16 Ɓaata ɓaa pǝta ɓǝn taasǝ me yǝɓǝ weɗa mbu nhiinyanhiinya ɓa, me a weɗa me mbu ngǝn tomsǝ ɓa fiɗ a liura.

17 Yeso me yǝ maa senta ɓotan nwa, yǝɓǝ nkee me, “Hana kuɓsutu nawa, u yǝ ɓaasǝ raɓ a ɗuura atekerto wa, kuɓsutu siso kiyǝ tǝblǝ, ɗǝm nsaad uru, hana ɗuur nawa, u ɓaasǝ raɓ a ɗuura atekerto wa, kiyǝ nwii. 18 Me Shaitan yǝ ɓaa nkweera iran raɓ, kuɓsutu usu kǝ nǝɗ miniu? Nǝn nkeesǝ mbu ɓa me sǝn nkee me, nǝn hik wis tenatenawa ma Kuɓ nsaa wa. 19 Waso me nǝn hik nsaamse ma lau Baˈalzabul kuɓ nsaamse wa, yaa emfǝɗkaa ɓǝsaa ma lau nyamni nwa ɓǝn hiksǝu? Me maaso, ndǝ ɓosa kǝ ɓaa kaɗ ɓan kankiita ɓǝsaa ɓa. 20 Pa me nǝn hik nsaamse ma lau kwangto Kaa wa, yaa kuɓsutu Kaa wa won a saanin.

21 “Me eɗ kokrok ya, yǝ haa mbu kito ɓisa, yǝn war taanda ira, mbu ɓisa kǝ kaɗ kwakwa. 22 Pa me yaa yǝ faɗsǝsǝ kokrokto ya, yǝ wo yaa hobɓo, kiyǝ kon mbu kito ɓisa, u yǝ tisǝ kangngo a si ɓa, ɗǝm kiyaa haa mbu ɓisa, yǝ ɓaa ɓet ɓisa. 23 “Yaa yǝ sem ke ma niina ra ya, yaa atekerto ma nase, ɗǝm yaa yǝ kwasi nǝ kwauwo ra ya, yǝn yasǝn yasǝ.

24 “Me wis nsaa nwa yǝ fiɗ a maabiri ete yan, yǝn ko a sanglo han mbraa semra ɓa, yǝn kǝr ham kiyaa nwii ɓa, pa yǝ taa ra. Pa yǝkǝ nkee me, ‘Kǝnǝ kang a ɗuur nǝ fiɗsǝ wa.’ 25 Me yǝ kangan, yǝ wǝr ɗuur kawa kwausǝ ɗekɗek, ɗǝm mbusa a han fina. 26 Pa yǝ ko yǝ haa ɓaata nsaamse ɓa mbutu u faɗsǝsǝ kwalakwalato ɓa, pa ɓǝ kan ɓǝ kaɗ kǝnso. Pa feɗefeɗe kaɗo eɗ kaya wa, kǝ faɗ u ntiiri wa tǝblǝra.”

27 A feɗefeɗe Yeso yǝ nkeesǝ mbusǝsa wa, tooneke a ɗaaso ɓeta wa ya yar yǝ nkee me, “Saltǝra yǝ ko a toone yǝ haa ngǝsǝ ya u yǝ na ngǝsǝ tootawa.” 28 Ya kak ya nkee me, “Kaa yǝn naa saltǝra a ɓaa ɓǝn kurasǝ mara Kaa ra ɓa, ɓǝ yau ma susu ya.”

Mǝɗkǝra Yunana ra

29 Ɓeta sokǝsǝ kwauwo wa, Yeso ya nkee me, “Ɓet kaareyase ɓa, ɓǝ ma kwanatiro. Ɓǝn taa ɓǝ weɗa mbu nhiinyanhiinya ɓa. Pa ɓaa ɓǝ weɗa mbu nhiinyanhiinya ka ra, ndub u Yunana wa. 30 Nga Yunana yǝsǝn mbu weɗara ɓa, a ɓaa Nineba ɓa wa, maaso ɗǝm Au Ete ya kiyaa tom mbu weɗara ɓa a ɓet kaareyase ɓa. 31 Kuɓ toone u put Sheba wa, kiya nii a kaa kiita ɓa ma ɓet kaareyase ɓa, yǝɓǝ weɗa me ɓǝ tom keke ra, me yǝ fiɗ mǝbmǝb, me wo yǝ kura maawo Sulemanu nwa, pa waso yaa yǝ faɗsǝ Sulemanu ya, yaa ham ɓa. 32 A kaa kiita ɓa, ɓet Nineba ɓa kǝɓǝ nii ke ma ɓet kaareyase ɓa, ɓǝ weɗa ɓet kaareyase ɓa, me ɓǝ tom keke ra, me ɓosa ɓǝ kon nfaatan a mara Kaa Yunana nkee ɓǝsǝ ran, pa waso yaa yǝ faɗsǝ Yunana ya, yaa ham ɓa.

Mara Yesora yǝ nga ara nǝksǝ a arkumta

33 “Yaa kǝ sem kǝn kǝ ya nek arkumta pa ya ti a han nhuukǝta ɓa, hana ya ti a kunda talo ra. Pa me maaso yǝ kǝ ti ɓoti a ɓǝ tiya ɓisa, me ɓaa ka wo ɓa ɓǝ kǝ wǝr han ɗekɗek ɓa. 34 Nuu nwaago ndǝ arkumra maabiri ɓa. Me nuunwa sǝ nga kwakwa, maabiri nyaange nsaad ɗǝm kǝ kung ma ɗekɗek to. Pa me ɓǝ tǝblǝn, maabiri nyaange ɗǝm kǝ kung ma tikra. 35 A maa, me, ɗekɗek to a ngani wa sem ham teptep ɓa ra. 36 Me, ɗekɗek to Kaa kungsǝ mabiri yaage pee hanka teptepra mabiri yage nsaad ngǝ tom peng peng.”

Yeso yǝ nkwaakǝ Farisiyawa ma Malǝmma masakaa sa

37 Pa Yeso yǝ feɗsǝ kan maarawa wa, pa eɗ Farisiyawa ke ya yar Yeso me ɓa ko ɗur usu ɓa se mbuseya. Pa Yeso ya ko ya kaɗa me ya se mbuseya. 38 Pa yaa Farisiyawa siya, yǝ wǝrsǝ Yeso yǝ soɓ nema pa yǝ se mbuseya ra wa, weɗara a ma.

39 Pa Ankundi yaa nkee me, “Saase Farisiyawa, sǝn soɓ ndiira nkoo mbraa wa ma nkwaa, pa ɗaan da saa sǝ kungsǝ ma yau ɗuura wa ma kwalakwalato. 40 Saase hauta ɓeta ta! Sem Kaa yaa yǝ werkǝsǝ ndiira ya, ǝn sase yǝ werkǝsǝ ɗaan da ɗǝm ya rau? 41 Pa sǝ na mbu ɗaan a nkwaasǝsa ɓa hanhanta, pa nsaad mbusa kǝsǝ tom ɗekɗek.

42 “Ən mbu manyamanyato ɓa a saani saa Farisiyawa, Me sǝ taa mbuka a kan puu a mbu sǝn waasǝ a ɓabra ɓa, sǝn nkaa sǝ hik fin sǝ naa zakka, pa sǝ lee tom mbu keke ɓa wa ɗǝm ma yauta Kaa ta. U nwa ndǝ siso pamsǝ me sǝ tom nwa, sem me sǝ lee fera ra.

43 “Ən mbu manyamanyato ɓa a saani ɓaa Farisiyawa ɓa, me sǝ yau hansǝ kaɗa u ma mbarta wa a hitsa kwau Yahudawa sa, ɗǝm toomamse a lumaa.

44 “Mbu manyamanyato ɓa a sani, me sǝ ngaa ntiinamse, u ɓaa maar sǝra wa, ɓetan siki asi ɓǝ mara.”

45 Fin a ɗaaso malǝmma masakaa sa ya kak me, “Malǝm, me ngǝ nkee maaso, ngǝ sǝrtǝn kǝn.”

46 Yeso yǝ kak me, “Saase malǝmma masakaa sa, ǝn mbu nyoorǝtara ɓa a saani, me sǝn nhii mbusa ɓeta u ɓaa nkaa ɓǝ toora wa, pa saase hana ma wate fin sǝ kwasi ɓaa ra.

47 “Ən mbu manyamanyato ɓa a sani, me sǝ mar tinamse ɓan nawanto Ka ɓa, si u sirta ɓǝsa todbǝsǝ wa. 48 Me maaso sǝ yau ma mbu sirta ɓǝsa tomsǝ ɓan; ɓǝ tod ɓan nawanto Kaa ɓa, pa sase sǝ maa tinamse ɓoso. 49 Ən susu maa mbuka Kaa wa yǝ nkee me, ‘Kǝnǝsǝ tung ɓan nawanto ɓa ma ɓahona sǝnaa, ɓaata ɓaa kǝɓǝ todɗo ɓaata kǝɓǝ na kongsa.’ 50 Me maaso, saase ɓaa kareyase ɓa, ɓaa kǝsǝ ma ma tuk monma ɓan nawanto ɓa nsaad, u ɓaa tuksǝ tǝng a ntiiri put ntaadiwa ya, 51 mbu masǝ monma Habila ra, a wo a monma Zakariya ra, yaa ɓaa toɗsǝsǝ a ɗaaso bagadi ma hit ɗekɗek wa, u yǝsǝ ɗaan a hit ɓǝɗ Kaa Urshalima ɓa wa. Ee nwa, nǝn nkeesǝ me, ɓaa kǝ kan kiita ɓaa kareyase ɓa, a ɗuura mbusǝsa ra nsaad.

52 “Ən mbu manyamanyato ɓa a saani, saa malǝmaa masakasa, me sǝ too mbu liki inntii maa mbuka wa. Saase ɗǝm sǝ kan da. Pa sǝ saa ɓaa ɓǝn kansǝn kan ɓan.”

53 Pa Yeso yǝ leesǝ hamsǝsa wa Farisiyawa ma malǝmma masakaa sa ɓaa ntii rǝka ma taa mbusa wa ɓolɓol, 54 Ɓǝn war me ɓaa ma a mbu kiya nkee ɓa.