Luk 13 | LlaSC | STEP | Kakake a fersiso ɓaatǝka ɓǝ nkee Yeso mara yaa Galili ya ra ɓaa Bilatus tisǝ ɓaa ɓǝ todɗo monma ɓoma a sautǝ ma mbu ɓǝ nǝksǝ Kaa wa.

Luke 13

Faata ma tumo

1 Kakake a fersiso ɓaatǝka ɓǝ nkee Yeso mara yaa Galili ya ra ɓaa Bilatus tisǝ ɓaa ɓǝ todɗo monma ɓoma a sautǝ ma mbu ɓǝ nǝksǝ Kaa wa. 2 Yeso yǝɓǝ kak ya nkee me, “Sǝn wǝr nga ɓa todsǝ yaa Galili ya maaso wa ɓǝ faɗ ɓeta nsaad tentenato yaa Galiliu? Me ɓǝsa toomsǝ wa. 3 Semra, nǝn nkeesǝn nkee me sǝ kon faata ra kǝsǝ wod nga ɓosa. 4 Wa sǝn wǝr nga ɓaa puu a haa kurkurun Siluwam u hito ɓoti wii ɓǝsǝ a ɗuura ɓǝ tod sǝɓa faɗ ɓeta nsaad ɓǝsǝ Urshalima tentenatou? 5 Semra nǝn nkeesǝn nkee me sǝ kon faata ra sǝkǝ wod nga ɓosa.”

6 Pa Yeso ya nkee mǝɗkǝra ya nkee me, “Ɓaa pǝta tom yake wan yǝsǝ ma ɓot sata Isra’ila wa a nyayo usu wa paya wo me yǝkǝ ɗot emɓǝsa paya taa hana auwe fin da. 7 Paya nkee yayǝn sengǝsǝ nyayo usu ya a sengge ‘Naso meeta taatǝn nǝn wosǝ me nǝ kǝr emngwate ɓǝsa pǝnǝ taa mbuka ra aa ɗaɗ ɗa yǝn kon ɗǝɗa ɓaata mbiu?’

8 “Yayǝn sengǝsǝ nyayo suwa ya yaa kak ya nkee me, ‘Ya kwang ya a lee kanuwa ɗǝm nhe kǝnaa nwa kunda naa nhii rungra nda sengge nkareke nhe. 9 Me ndǝ taa emɓǝsa karike nǝ keke me ndǝ taa ra pa nda ɗaɗ ɗa.’”

Yeso roɓ toonǝke ma mǝrkǝm

10 A kaa nwiiya Yahudawa ɓa Yeso ya fǝɗkǝra a hit kǝna Kaa wa, 11 Pa toonǝke u nsaa ntisǝsǝ ya tom puura meeta puu a haa kurkurun ma siyo suwa yǝn nkaa ya mel kǝɗ ɗa hana ngeek ra. 12 Pa Yeso yǝ wǝrsǝsǝ wa yaa yar yaa nkee me, “Toone ɓaa roɓngǝ a siyo nwaangon.” 13 Pa Yeso yaa ti neme nok susu ya nkaa ya mel kǝɗ yǝn nyoo Kaa.

14 Pa an wiyo Ham Kau Yahudawa ɓa aa nɗaa yǝ wǝrsǝ Yeso roɓ toone siya ka nwiiya Yahudawa ɓa paya nkee, “Ɓaa ɓǝsǝ kǝnso ɓa me tǝro kǝn mindike u pamsǝ me sǝ wo ɓa sǝ roɓ wa sem kaa nwiiya ra.”

15 Pa Ankundi Yeso ya kak ya nkee me, “Saa ɓaa ɗǝlmara raɓ ɓa! Sǝ toma tinima kaa nwiiya Yahudawa ɓa sǝn kiya naa ma kwarǝta kosǝ ɓǝ na mbraa rau? 16 Toone nya au Ibrahim nya nsaa kasǝsǝ wa naso meeta puu haa kurkurun pam keke me aa roɓ hana ǝn kaa nwiiya Yahudawa ɓa rau?”

17 Mara yǝ nkeesǝ ra a ti ɓan ɓǝn yausa ra ɓa ɓǝ kura ɗuura nwaara pepere ɓaata ra ɓǝ kura nepto ma mbu weɗara u yǝn tomsǝ wa.

Mǝɗkǝra a ɗuura em karaɓa ra ma yisti

18 Pa Yeso taa me, “Kuɓsutu Kaa wa yǝ nga mbiu? Kǝnǝ mǝɗkǝ ma mbiu? 19 Yǝ nga nkaama karaɓa ma, u eɗ ke yǝ toosǝ yǝ rǝk a ɓabra usu wa. Yǝ mbarsǝ wa, yǝ kang ɓota, pa rǝmɓa ɓǝn wo ɓǝ kaɗ a parme isi.”

20 Pa Yeso yǝ ɓaarǝ ya taa yaa nkee me, “Ma mbiu kǝna mǝɗkǝ kuɓsutu Kaa wau? 21 Yǝ nga yisti ^{▼▼Ən ndǝ mbuka tii nkaadǝng yǝ nfii kong ɓa} u toone ke yǝ too yǝ rootǝ ma nfaara kwang, pa yisti kaya yǝ pam nfaara kara nsaad.”

Inntii ɓong nya.

22 Pa Yeso yǝn kosǝnko Urshalima wa yǝ ɓǝɗ ura kwang kwangsa ma u ngeek ngeek wa yǝn fǝɗkǝ ɓeta. 23 Yake ya taa ya nkee me, “Yaa kwangya ɓeta ngeek madɗǝu Kaa kiya kon nkweera wau?”

Yeso ya kak ya nkee me, 24 “Sǝ kweetǝ sǝ kan ma lau inntii ɓong nya nwa, ɓeta dem, nǝn nkee se, ɓǝ kǝ kweetǝ me ɓǝ kana, ɗǝm ɓǝ nkaa ɓǝ kan da. 25 Me an ɗuur ya yǝ wee liki inntii wan, sǝkǝ nǝɗ ntaadi sǝ hob inntii sǝn nkee me, ‘Yaa kwangya nya, ǝtǝ wil inntii.’

“Pa kiyǝsǝ nkee me, ‘Nǝ maasǝ ra hana han sǝ fiɗsǝ ɓa ra’. 26 Pa sǝkǝ nkee me, ‘Ndǝ se ndǝ we ma ngiinga, ɗǝm ngǝ fǝɗkǝtǝ a ɗǝta.’ 27 Pa kǝ yǝ sǝ kak yǝ nkee me, ‘Nǝ maasǝ ra hana han sǝ fiɗsǝ ɓa ra’. Sǝ ɓaa ma niina, saase ɓan tom mbu kwalakwala ɓa wa!’

28 “A ham sǝsa ɓa kǝ tee kǝnso, ma kǝu ɗǝmta wa, pa me sǝ wǝr Ibrahim, ma Ishaku, ma Yakubu, ma nsaad ɓannawanto ɓa a kuɓsutu Kaa wa. Pa saase ma nkweerase kǝ sǝ mudkǝ ntaandi. 29 Pa ɓeta ɓǝ kǝ fiɗ ma kunda ra ma ɓoti ra, ma kala lawa ma kal war, ɗǝm ɓǝ kǝ kaɗ ɓǝ se mbuseya a kuɓsutu Kaa wa. 30 A hansǝsa ɓa ɓǝsǝ ndiira ɓa ɓǝkǝ wo a ntiiri ɓa ɓǝsǝ a ntiiri ɓa ɓǝ kǝ kang ndiira.”

Yeso kura nyorataara Urshalima

31 A fersiso ɓaatǝka ɓet Farisiyawa ɓa ɓǝ woo ɓaa nkee Yeso, “Me a nii a han ɓa ngǝ ko a hanka ɓol Hiridus yǝn kǝr me yǝkǝ ngǝ todɗo.”

32 Pa Yeso yeɓǝ nkee me, “Sosǝ nkee eɗ ‘Yǝn tomsǝ kwanatiro siya sa nkee me, naso nǝn hik saamse nǝn roɓ ɓeta ɗen maaso ɗǝm ka ɓa panǝ feɗ tinǝmǝna.’ 33 Hana maaso kǝna faɗ wiyo ma siko waano naso ma ɗene ma ka ɓa pamme a nkee me an nawanto Kaa ya yǝ wodɗonda me ɓa todsǝ Urshalima ra!

34 “Oi saa ɓaa Urshalima ɓa! Oi Saa ɓaa Urshalima ɓa! Saase sǝ toɗsǝ ɓan nawanto ɓa wa, sǝ muɗkǝ ɓaa ɓaa tung sǝsǝ ɓa, kan mininiu nǝn taasǝ me nǝ kwau emɓǝsa a ham nfina, nga yaa yǝn kwausǝ emɓisa a karngǝta wa, pasǝ yau ra. 35 Sǝ sengge, ɓaa lee ɗur waaso a kang nkwaatan. Pa nǝn nkeesǝ me, sǝnǝ wǝr ɗǝm ra ndub kaa sǝ nkeesǝ me, ‘Saltǝra kaɗan a sanii, yaa yǝn wosǝ a ɗǝnda Ankundi ya ra.’”