Luke 19

Zakka an kon samra ya

1Pa Yeso yǝ kan Yeriko tallǝn talǝ. 2Pa eɗ ke ǝn nyarsǝ me Zakka ndǝ ya kwang an kon samra ya yǝma kǝna dem. 3Yǝn ta me yǝ wǝr ndǝ yamni Yesou payǝ nkaa ra me ɓeta kau kwang. Lawa yǝ mbul. 4Pa ya mon a wiyo koyǝ ta winne ɓota ke me yǝ wǝr Yeso me Yeso kǝya talǝ ma lau ɗǝɗa susu. 5Pa Yeso yǝ worsǝ a hamsǝsa wa ya nik nuwa yaa nkee me, “Zakka a haɗ ngǝ hama me nawa kǝnǝ tom wee a ɗur wango naso.” 6Pa Zakka yǝ haɗ yǝ hama yaa kon ma kuɗa pengpengra. 7Ɓeta nsaad wǝrsǝ maaso wa ɓǝ ntii nhurunhuru ɓǝ nkee me, “Yǝ ko me ko yǝ kaɗ wee a yaa ‘tenatena yani.’” 8Pa Zakka yǝ ni kǝɗ wii, “Ankundi wa ya nkee me a sengge, Ankundi! A koɓo nǝsǝ ma siso sa, kǝnǝ ɓaa raɓ a to fin a na hanhanta me dem nǝ fǝk atike mbuka kǝnaa kwan kurun a mbu fin ɓa.” 9Pa Yeso yaa nkee me, “Nawa kon kwerawa won a tanda ran me sase Zakka kǝn ndǝ au Ibrahim ya. 10Me Au Ete ya, yǝ wo me yǝ kǝr ɗǝm yǝ kon nkweera ɓaa ɓǝ nfaasǝ ɓa.”

Mǝɗkǝra a ɗuura kuɓu ma hoota ira puura

11Ɓǝ kurasǝ mbu Yeso yǝn nkeesǝ ɓa wa yǝɓǝ nkee mǝɗkǝra me yǝ kǝk ma Urshalima ɗǝm ɓeta ɓǝn ɗimme kuɓsutu Kaa wa kǝya wo nakǝn. 12Yaa nkee me, “Eɗ ke ndǝ nkaama kuɓsa ma, yǝ faɗ a urko mǝbmǝb me ɓaa ko a ti a kuɓsutu, pa yǝ kanga. 13Pa yǝ yar hoota ɓǝsa puu yǝɓǝ na mina puu u koɓaa wa. Yǝɓǝ nkee me, ‘Sǝ tom lumu ma koɓaa sǝsa, me a kwii ndub me nǝ kangngan.’ 14“Pa ɓet uru ɓosa ɓǝn yausara ɓa tung ɓeta ndiira yǝ faɗsǝ wa me koɓa nkee yayǝ kosǝ a sani ya me, ‘Tǝ yau me eɗ ɗa ya kaɗ kuɓ watora.’ 15“Nɗiira ɓaa tisǝ yǝ tom kuɓu wa paya kang ɗuuru. Pa ya timi a yar hota ɓǝsa ɓa yǝ na ɓǝsǝ koɓa sǝɓa, me yǝ maa mbu ɓǝ tasǝ ɓoti a mbu yǝ naɓǝsǝ ɓa. 16“Yaa ntiiri ya yǝ wo yaa nkee me, ‘Ya kwangya, koɓa ngǝ nanǝsǝ ɓa nǝ ta pera puu asi.’ 17“‘Tomon yaɓ hora na kwalari ra!’ An taanda isǝ yaa kak me, ‘Ɓa yauma ngiinga a mbu ngeek ɓan me maaso kǝngǝ kaɗ ya kwang ya a ura puu.’ 18Ya raɓ ya yǝ wo kǝn yǝ nkee me, ‘Ya kwangya koɓa sǝnga nǝ taa pera wonon asi.’ 19“Pa an taanda isi, yaa kak me, ‘A tom ya kwang ya a ura wonon.’ 20“Pa ate hoora ya yǝ wo, yǝ nkee me, ‘Yaa kwang ya, a kon koɓaa sǝnga, nǝ ti kǝmma a tuksukra nǝ nhuukǝ.’ 21Nǝn kura kokto nwaago, nǝ maan me ngǝ ma kongsa. Ngǝn too mbu ngǝ tii ra ɓa, ngǝn ɗaɗ mbu ngǝ kabi ra ɓa. 22“An taanda isi ya kak me, ‘Kǝnǝ ngǝ kan kiita ma mbu ngǝn kansǝ ɓa, ngase hoora kwalakwala ra! Ngǝ maan me nǝn yawa maaso ra, ɗǝm nǝn too a mbu nǝ tira ɓa, nǝn ɗaɗ mbu nǝ kabira ɓa rau? 23Tomtomni ngǝ nhii koɓaa sǝnaa a han nhii koɓaa ɓa, me menǝ won wona ta sokǝra asi rau?’ 24“Pa ya nkee ɓaa nǝɗsǝ kǝnso ɓa, ‘Sǝ kon talanti u koɓaa isa a sanii, sǝ na yaa yǝsǝ ma pu siya.’ 25“Ɓǝ nkee me, ‘Ya kwang ya, yǝma usu puu!’ 26“Yǝ kak me, ‘Nǝn nkeesǝ me a yaa nsaad yǝsǝ ya, ɓaa kaa sookǝ, pa a yaa yǝ sem ma mbuka ra ya, hana u yǝsǝ ngeek wa, ka kon a sanii. 27Pa ɓaatakera ɓǝna ɓaa ɓǝn yausa me kama na kaɗ kuɓ ɓoso raɓa, sau ɓǝsǝ a ham ɓa ǝɓǝ tod a wii waano.’”

Yeso kan Urshalima

28Ndiira Yeso nkeesǝ mbusǝsa wa, paya faɗ a wiiyo yǝn koo ko Urshalima. 29Pa yǝ tomsǝ ngwang ma Betaniya ma Betani a kola Zaitun ra. Yeso yǝ timi emfǝɗkaa ɓisa raɓ, 30“Soo a ur ngeek a wiiyo a sani wa, me sǝn kan kana, kǝsǝ wǝr au kwarǝra kaasǝ kǝnso, u yaake pǝta laɓɓo ra wa. Sǝ kee, saa wo han ɓa. 31Me yaake taasǝ, ‘Mbu kwaa mbi sǝn nkeesǝsǝu?’ Saa nkee me, ‘Ankundi yǝn taataa.’” 32Ɓaa ɓaa timi ɓǝsǝ a wiyo ɓa, ɓǝ ko ɓǝ wǝr nga ka yǝ nkee ɓǝsǝ wa. 33Pa ɓǝn keesǝ au kwarǝra kaya wa, ɓanda kwaata ɓǝ taa me, “Mbu kwaa mbi sǝn keesǝ au kwarǝra si siu?” 34Ɓaa kak me, “Ankundi yǝn taataa.” 35Ɓaa wo a Yeso ni, ɓǝ haa lukta ɓosa ɓǝ mal a mbar au kwarǝra kaya, pa emfǝɗkaa ɓǝsa ɓaa kwasi yǝ laɓɓa. 36Yaa sikoo ɓeta ɗǝm ɓǝ kau nwaamǝta ɓǝ mal a ɗǝɗa. 37Pa yǝ wosǝ kwang ma ham ɗǝɗa kosǝ a Yol Zaitun waɓa nsaad ɓa ɓǝn ɓǝɗ ɓǝsǝ ɓa ma emfǝɗkaa ɓǝsa ɓǝn nyoo Kaa ma kwaro kokrok a mbu nhiinyanhiinya ɓǝ wǝrsǝ ɓa.
38“Saltǝra kaɗan a kuɓ yǝ wosǝ a ɗǝnda Ankundi ya ra!”
“Naupa a liura ɗǝm too a tom a Kaa ni!”

39Ɓaata ɗaan Farisiyawa ɓǝ kausǝwa ɓǝ nkee Yeso me, “Malǝm a nkwaakǝ emfǝɗkaa ɓǝnga!” 40Yǝɓǝ kak yǝ nkee me, “Nǝn nkeesǝ me hana ɓǝ roo seu ɗungate kǝɓǝ yauli.” 41Payǝ tomsǝ kǝk ma Urshalima wa yǝ wǝrsǝ ur susuwa, ya tee a ɗuura ira. 42Ya nkee me, “Me ngase, ngǝ maan mbu kǝngǝsǝ wo ma naupa ɓa maaso pa nawa ɓǝ nhuu kǝgǝn nuwesǝngan. 43Tǝromse ke kǝ wo a saani, u ɓataker ɓǝnga ɓǝkǝ mar kurtando ɓǝsǝ leurǝ ɓǝsǝ hem ɗǝm hana ma lau nawa. 44Ɓǝ kǝsǝ muɗku a putu saase ma em ɓǝsa nsaad. Ɓaa lee ɗungara fin ɓoti a ate wa ra, me sǝ maa ma fer wo Kaa wa saani wa ra.”

Yeso a Hit Kaa Urshalima wa

45Pa Yeso yǝ kan a taanda Hit ɓǝɗ Kaa Urshalima wa, yǝ ntii pǝǝ ɓaa ɓǝn fangsǝ mbusa ɓa 46Yǝɓǝ nkee me, “Nyorsǝ me, ‘Ɗuur waano kǝ yar me ndǝ ɗuur kǝnara wa,’ pa sǝ kang a tom ‘per nkwiiya wa.’”

47Nfee yǝn fǝɗkǝ a Hit Kaa Urshalima wa. Pa kuɓsa nek mbusa sa ma, malǝm masakaa sa ma ɓan wiiya ɓǝn taa me ɓaa todɗo. 48Pa ɓǝ ta ɗǝɗa ɓǝka tomra ra, me ɓeta nsaad ɓǝ ti marira a sendan.