Luke 3

Yohanna an Baptisma ya yǝ warkǝ ɗǝɗa

1A meera puu haa wonon ndǝ u kuɓsutu Kaisar Tibariya wa, Buntus Bilatus yǝn ngwamna Yahudiya wa. Hiridus yǝn tom kuɓsutu Galili wa eɗ isi Filibus yǝn tom kuɓsutu Ituriya ma Tarkunitas wa, Lisaniyas yǝn tom kuɓsutu Abiliya wa. 2Fersusu pa Hanana ma Kayafa ǝndǝ ɓan nek mbusa kwang kwang sa, Kaa yǝ na mara wo Yohanna au Zakariya ya a sanglo. 3Pa yǝ ɓaɗ nsaad a putsa leurǝsǝ Urdun sa, yǝn nkee mara kwalari ra, u kon nfaata wa me ɓǝ lee a tenatenato ɓoso. 4Nga ɓaa nyorsǝ a likarkar an nawanto Ishaya wa, me,
“Kwaro yaa yarma a sanglo yǝn nkee me,
‘Sǝ sǝk ɗǝɗa meen Ankundi,
Sǝ nǝɗkǝ ɗǝta kǝɗ meen sase.’”
5Sǝ kung serserta a ookǝ ɗungate, ma
kola a werkǝ ɗǝɗa loosǝra, a werkǝ ɗǝɗa sem kwalari ra me yǝ tom kwalari.
6Nsaad ɓeta kǝɓǝ wǝr kon nkweera Kaa wa.”

7Pa Yohanna yǝ nkee, ɓaa ɓǝ kausǝ me yǝ ɓǝ tom Baptisma ɓa yǝ ɓǝ nkee me, “Saa hurtaa, yaa nkeesǝ ni me sǝ mon nfiima ka wo a sani ɓau? 8Sǝ tom tinima u kaa weɗa me sǝ kon nfaatan nwa. Ɗǝm sǝ nti sǝ nkee nkweerase me, ‘Ibrahim ndǝ Paate ra.’ Pa nǝn nkeesǝ me hana a dungate ya Kaa kiya nkaa yǝ hik emba Ibrahim. 9Ɓaa wee ti kate wa a kunda ɓota ran, ɗǝm nsaad ɓot yǝ nsee emba yaɓ ra ɓa, ɓaa ka ɗǝǝ a putu a ti a ara.”

10Pa ɓeta ɓǝ taa ɓǝ nkee me, “Ya pa kǝta tom tomniu?”

11Yohanna ya kak ya nkee me, “Yayǝsǝ ma luktu raɓ ya ya ngwaɗ yayǝ sǝmsǝra ya, yayǝsǝ ma mbuseya ya sese ɗǝm ya pa ate kǝn.”

12Ɓan kon samra ɓa ɓǝ wo me yǝɓǝ tom baptisma ɓa taa ɓǝ nkee me, “Malǝm kǝtǝ tom tomniu?”

13Yǝɓǝ kak ya nkee me, “Sǝ kon mbu faɗsǝ mbu ɓaa nkeesǝ me sǝ kon ɓa ra?” 14Sosamse ɓosa ɗǝm ɓǝ taa ɓǝ nkee me, “Wato kau, tǝ tom mbiu?” Yǝɓǝ kak ya nkee me, “Sǝ tii ɓeta ma kwakwato ɓǝsǝ na koɓaa ra, sǝ pa paara a ɗuura ɓeta ra ra, sǝ hima ma mbu ɓan kwansǝsǝ ɓa.”

15Ka ɓan war wo Krisiti wa, pa ɓeta nsaad ɓǝn sen ɓǝ nkee me ma Yohanna ndǝ saye Krisiti tiu? 16Pa Yohanna yǝ ɓǝ nkee nsaad ya nkee me, “Nase nǝn tomsǝ baptisma ma mbraa. Pa yaake kǝn u yǝ faɗ nǝsǝ kwangto ya kiyǝ wo, u hana kurti taa isa ya nǝ nkaa nǝ kee ra. Ən sase kǝyǝ sǝn tom baptisma ma Wis Kaa wa ma ara. 17Yǝma nkoo ree usu a nem isi, me yǝ ree koma, ɗǝm kiyǝ kwau nse isi a pinɗo ɗǝm yǝ kǝɗ sangsangta ma ara u loora wa.” 18Ma ɗǝta ɓolɓol Yohanna yǝ nkeesǝ mara Kaa ra ɓeta wa.

19Pa Yohanna ya nkwaakǝ kuɓu Hiridus me sase Hiridus yǝ kon Hirudiya toone kobɓǝsi ya sa yǝ woɗa Filibus ya ɗǝm yǝ tom mbu sem kwalari ra ɓa.

20A feɗefeɗe isi Hiridus yǝ tǝblǝ mara ma mbu yǝ nkeesǝ me a maa Yohanna a kuɓlǝ ɓa.

Ɓa tom baptisma Yeso

21Ɓaa feɗsǝ tom baptisma ɓeta nsaad wa, Yeso kǝn a tom baptisma. Pa yǝn kǝnǝsǝ Kaa wa, liura a wili, 22pa Wis Kaa wa a ham a sani mbu ka ɓa nga tǝlko, pa kwarko a fiɗaa liura, yǝ nkee me, “Ngǝ auwane yaa nǝn yausǝsǝ ya, nǝn hur kuɗa ma sase dem.”

23Fer Yeso yǝ tiisǝ fǝɗkǝra wa yǝ ma meta puu haa taatǝn a ɓeta ɓaa toosǝ me ǝndǝ au Yusufu ya u yǝsǝ au Heli ya wa.

Sirta Yeso ta

24Heli au matat ya, Matat au Lawi ya, Lawi au Malkia ya, Malki au Yannaya, Yanna au Yusufu ya, 25Yusufu au Matatiya, Matatiya au Amos ya, Amos au Nahum ya, Nahum au Azaliya ya, au Najaya, 26Naja au Mataya au Malatiya au Shimeya ya, Shimeya au Josek ya Josek au Yahuda ya, 27Yahuda au Yowanaya, Yuwanan au Refaya ya, Refaya au Zarubabel ya, Zarubabel au Sheyatiyel ya, Sheyatiyel au Nir ya, 28Nir au Malkiya, Malki au Addi ya, Addi au Kosamaya, Kosama au Almadama ya, Almadama au Er ya 29Er au Joshuwa ya, yoshuwa au Eliyezere ya, Eliyezer au Yorim ya, Yorim au Matatya, matat au Lawi ya 30Lawi au Simon ya, Simon au Yahuda ya, Yahuda au Yusufu ya, Yusufu au Yohanna ya, Yohanna au Eliyakim ya, 31Eliyakim au Malaya ya, Malaya au Mainana ya, Malnana au Matataya Matata au Nathan ya, Nathan au Dauda ya, 32Dauda au Yesse ya, Jesse au Obida ya, Obida au Boaza ya, Boaza au Salmon ya, Salmon au Nashan ya, 33Nashan au Amminadab ya, Amminadab au Aram ya, Aram au Hesrunaya, Hesruna au Feresaya ya Feresa au Yahuda ya 34Yahuda au Yakubu ya, Yakubu au Ishaku ya Ishaku au Ibrahim ya Ibrahim au Tera ya, Tera au Nahor ya. 35Nahor au Serug ya, Serug au Reyu ya, Reyu au Feleg ya, Feleg au Eber ya, Eber au Shela ya. 36Shela au Kenan ya, Kenan au Arfakshad ya, Arfakshad au Shemya, Shem au Nuhu ya Nuhu au Lamekya, 37Lamek au Metuseloya ya Metusela au Anuhu ya Anuhu au Yaredya Yared au Mahalalel ya, Mahalalel au Kenan ya 38Kenan ya, au Enosh ya Enosh au Shituya, Shitu au Adamu ya Adamu ɗǝm au Kaa ya.