Luk 4 | LlaSC | STEP | Yeso kungsǝ ma Wis Kaa wa yǝ lee sen Urdun wa, pa Wis Kaa wa yaa too ya faɗ a sanglo,

Luke 4

Kuɓ nsaa wa Mǝdkǝ Yeso

1 Yeso kungsǝ ma Wis Kaa wa yǝ lee sen Urdun wa, pa Wis Kaa wa yaa too ya faɗ a sanglo, 2 a ham tǝrma pakurun nsaa yǝn pǝtasǝn pǝta. A tǝrma sǝma yǝ se mbuka ra, pa a peɗe peɗe ɗoora asi.

3 Pa shaitan ya nkee me, “Me ngǝ Au Kaa ya a nkee kundara ra yǝ kang nkaadǝng.” 4 Yeso yǝ kak yaa nkee me, “Nyorsǝ a mara Kaa ra me, ‘Ete yǝ ɗanyǝ ma mbuseya maɗɗa.’”

5 Pa Shaitan yaa too yaasa ko a hamka ɓoti, ya weɗa nok kǝnso nsaad kuɓsutu put ntaadiwa ɓa. 6 Pa yaa nkee me, “Kǝ nǝngǝ na nsaad kuɓsutu ma touwo, me ɓaa wee nǝ nan, kǝnǝ nkaa nǝ na hana yamni u nǝn yausǝ wa. 7 Me ngǝ nyoo nǝn, nsaad ka tom nwangǝto.”

8 Yeso ya kak me, “Me nyorsǝ me ‘A nyoo Ankundi Kaa ɓǝnga, ɗǝm sase seɗɗe kǝ nga sa tom hooto wa.”

9 Pa Shaitan yaa too yaa sa faɗa Urshalima, ya ti ɓoti a ɗuura Hit ɓǝɗ Kaa Urshalima wa. Pa yaa nkee me, “Me ngǝ Au Kaa ya, a tuulǝ a putu.” 10 Me nyorsǝ me,
“‘Kiya nkee ɓantimira ɓisa a ɗuura nga
ɓǝ ngǝ war nlaa, 11 kǝ ɓǝ ngǝ kaɗ ma nem ɓosa
me ngǝ hob
nata a kudara ra.”

12 Pa Yeso yaa kak me, “Ɓaa nkee me, ‘Ngǝ kong pǝta Ankundi Kaa ɓǝnga ra.”

13 Pa Shaitan pedsǝ nsaad pǝtamse isi wa, ya faɗ yaa lee kweɗ.

Ɓaa mbisi Yeso a Nazarat

14 Pa Yeso yǝ kang a put Galili wa kungsǝ ma Wis Kaa wa, mara ira a pam ura kong. 15 Yǝ fǝɗkǝ a hitsa kwau Yahudawa ɓosa, hana yamni yǝn nyoosǝ.

16 Pa Yeso ya wo Nazarat ham yǝ mbarsǝ ɓa, ya kana hit kwau Yahudawa ɓa, kaa nwiinya Yahudawa ɓa, ngaa yǝ sol sǝwa. Ya nii kǝɗ me kǝya kau likarkar Kaa wa. 17 Pa ɓaa na likarkar an nawanto Kaa Ishaya wa. Yǝ wilsǝwa ya kǝr ham ɓaa nyorsǝ me,
18 “Wis Ankundi wa a ɗuura na ma niina, me
ɓaa tau nǝ me na nkee mara kwalari ra hanhanta,
yǝ timinǝ me nǝ nawanto kaɗ saawa ɓa ɓaa new ɓǝsǝ ɓa,
na wil nuuwa ntaata, pa ɗǝm na hik ɓaa ɓan han ɓǝsǝ ɓa,
19 na nkee ɓeta me fer Ankundi kǝ ya hik ɓet ɓǝsa wa won.”

20 Yǝ pedsǝ kawo wa, yǝ mbǝrkǝ likarkar kawa ya na ya yǝn sengǝsǝ hit kǝna Kaa waya, ya kaɗ nɗaa. Tǝnaa nsaad ɓaa nhii nuuwa ɓǝn sengǝsǝ. 21 Pa ya ntii yǝɓǝ nkee me, “Naa wa likarkar Kaa ɓaa nyorsǝ ra kugun a ngweeme yasen.”

22 Ɓa ɓǝsa hamsǝsa ɓa nsaad ɓa kura nepto usu, ɓǝn wǝr mbu weɗara ɓa ma mara kwalarin piɗsǝ a ee isi ɓa, pa ɓǝn taa ɓaatǝ me, “U nwa ǝn au Yusufu ya rau?”

23 Yeso yǝɓǝ nkee me, “Nǝ maan kǝsa nkee me, ‘Siwi a roɓ eenwaango,’ ɗǝm kǝsǝnǝ nkee me, ‘A tom a ur waago mbu ngǝn tomsǝ a Kafarnahum ɓa kǝndau.’”

24 Pa ya paa rǝ yǝɓǝ nkee me, “Nǝn nkeesǝ ɓongtǝrato, ɓaa yawaa ma an nawanto Kaa ya a ur ɓoso ra. 25 Nǝn nkeesǝ ɓongtǝra, a kaa an nawanto Kaa Iliya yǝsǝ kǝnwa, toona Isra’ila ɓa ker ɓosa woɗsǝ ɓa dem. Ɓaa roo tiwo ra meeta taatǝn ma ofe mindike, ɓaa a tom winee ɗoora ya a put siso nsaad. 26 Pa ɓaa timi an nawanto Kaa ya Iliya a ɓoni hana ete fin da, ɓaa timisǝ a toonǝke ni u kerisi wodsǝ wa a ur Zarifat wa, a put Sidon wa. 27 Ɗǝm a fer an nawanto ya Elisha wa, ɓa ma siyo tǝmo wa ɓa kǝn laalaa a put Isra’ila wa, pa ɓaa roɓ hana fin da, ɓaa roɓ Naaman ete Suriya ya maɗ.”

28 Ɓa nsaad ɓǝsa hit kǝna Kaa suwaɓa, ɓǝ kurasǝ marasǝra wa, nfiima ǝɓǝ ma dem. 29 Ɓǝ nii ɓǝ hik Yeso ɓaa sa ko kal uru wa, a timra yolo ɓaa marsǝ ur ɓoso ra, ɓǝn taa me ɓaa tǝng ya nwii a putu. 30 Pa ya ɓaa ma ɗaaso ɓoso ya faɗ mbusa.

Yeso hik nsaamse

31 Pa ya ham ya faɗa urko Kafarnahum a put Galili wa, Kaa nwiiya Yahudawa ɓa yǝn fǝɗkǝ ɓeta. 32 Əɓǝ tom mbu weɗara ɓa a fǝɗkǝra ira, me mara ira yǝ ma kwangto.

33 A hit kǝna Kaa suwa yake kǝn yǝ ma siyo nsaamse wa, pa ya nik kwaro ma kwakwato ya nkee me, 34 “Oi! Mbu nteegǝ mbiu ma taseu, Yeso eɗ Nazarat ya? Ngǝ wo me ngǝtǝ tumuu? Nǝ maagǝn, ngǝ ya Kaa timisǝ ya.”

35 Yeso ya nkwaakǝ nsaamse ya nkee me, “A roo suwet! A fiɗa maabir eɗ sisi ya!” Nsaa kawa ya fang eɗ kaya a putu, pa ya fiɗi, yǝ tisǝ hundu ra.

36 Pa ɓeta nsaad ɓǝ ma ee ɓǝn wǝr mbu weɗara ɓa, ɓǝn kana ɗaaso ɓoso ɓǝn nkee me, “Uwa ndǝ nkamǝra mara mbiu wau? Eɗ ɗa yǝn nkaa ya nkwaakǝ nsaa a maabir ete ya ya fiɗi.” 37 Mbu Yeso sǝksǝ ɓa ɓaa kura a put siso nsaad.

Yeso roɓ ɓeta dem

38 Yeso yǝ fiɗsǝ a hit kwau Yahudawa wa, yǝ faɗa ɗuur Siman wa. Rǝf Siman toone nya yǝn wee kongsa ma songra. Pa ɓǝ kǝna Yeso me yaa kwasi. 39 Pa Yeso ya ko ya nǝɗ kǝk ma hamtǝr ɓǝsa, ya nkwaakǝ songra kara yǝ fiɗi, nok kǝnso toone kaya yǝ nii yǝɓǝ tom tinima.

40 Kaa kansǝn kan nwa ɓeta ɓaa sa wo ma ɓet ɓǝsǝ ma siyaa ɓolɓol ɓa. Yeso yǝ ntee hana yamni ɓǝ roɓo. 41 Nsaamse ɓǝ fiɗ a maabiri ɓeta ya dem ɓǝn ti kaura ɓǝn yauli ɓǝn nkee me, “Ngǝ Au Kaa ya.” Pa Yeso yǝɓǝ nkwaakǝ yǝ yau ɓǝ wil ee ra, me ɓǝ maasǝn me yǝ Almaseho.

42 Handa nweesǝ wa, Yeso ya faɗa ham ete sem ra ɓa. Ɓeta ɓaa kǝrǝ ɓaa wǝrǝ, ɓǝ wǝrsǝsǝ wa, ɓaa kǝna me yǝɓǝ lee ra. 43 Pa yǝɓǝ nkee me, “Paman na ko ma mara kwalari ra u Kuɓsutu Kaa wa ɓaata ura ɗǝm, me ɓaa timini siso.” 44 Pa yǝ toma nkeeyo mara kwalari wa a hitsa kwau Yahudawa sa a put Yahudiya wa.