Luke 7

Yeso roɓ hoora winee soosa Rooma ke

1Pa Yeso peɗ sǝ nkee mbusǝsa nsaad a kuraawo ɓeta wa, yǝ kan Kafarnahum. 2Kǝnso kǝn au hit winee nsoosa ke, u An taanda isi yǝn kurasǝ nebto ma sase ya, yǝn sisi kǝk woɗa. 3Yǝ kurasǝ mara a ɗuura Yeso wa, pa ya timi wiina ɓaa Yahudawa ɓa, me ɓa kǝna Yeso ya wo ya roɓ hoora ira. 4Winaa ka ɓa ɓǝ ko a Yeso ni ɓaa kǝna ɓa nkee me, “Eɗ ɗa, paman ngaa kwasi! Me yǝn 5yau ɓet ɓaata, ɗǝm yǝ martǝ ham kau Yahudawa ɓa.” 6Pa Yeso ya ko ke ma ɓosa, yǝ tomsǝ ngwang ma ɗuur kawa wa, pa winee nsosa kaya yǝ timi sik ɓǝsa me ɓa nkee Yeso me, “Kuɓ Kwang nsosa ya, ngǝ rǝka eenwaago ra, me nǝ maa ngǝ wo ɗaan a ɗuur nwaano ra. 7Me nǝ wǝr eenwano nǝ nyaman, nǝ maa nǝ wo a ngani ra, pa a nkee mara maɗ, hoora na kiyi roɓo. 8Me hana nase kǝn na kunda yaake ra, nǝma nsosamse a kunda na. Nǝn nkee eɗ ɗa me, ‘Ngo’ kiyi ko, nǝ nkee ate me, ‘Ngawo’ kiyi wo. Me nǝ nkee hoora na, ‘A tom mbu ɓa’ kiyi tomo.”

9Pa Yeso kurasǝ maaso wa, pa a tom weɗaara ira, pa yǝ kǝrtǝ a ɓaa kwausǝ dem ɓǝn ɓǝɗsǝsǝ ɓa, yǝ nkee me, “Nǝn nkeesǝ, nǝ pǝta taa nkamǝra na ɓongtǝra kwang nwa, hana a put Isra’ila wa ra.” 10Pa sik winee sosa u ɓaa timisǝwa kangsǝ ɗuur wa ko ɓa wo hoora kara roɓon.

Yeso nik autoone ke kerisi wodsǝ wa

11Tǝr kwang ra pa Yeso ya faɗa urko yarmee Nayin, emfǝɗkaa ɓǝsa ma tǝnaa dem ɓaa ɓǝɗǝ. 12Ɓǝ kansǝ ngwang ma inntii uru yawa ɓa pam ma ɓeta ɓǝn fiɗ pidi ma wodsǝra ɓee auwe kǝra, yǝ fin mbusa a maasi ni, pa ɗǝm kerisi woɗon, ɓeta dem a hur kawa ɓǝn ɓǝɗ toone kaya. 13Pa Ankundi wǝrsǝ toone kaya maaso wa ya wǝr maimaiyato usu yaa nkee me, “Ngǝ tee ra.”

14Ya ko ya ntee mbu too woɗa ɓa, ɓan too woɗa ɓa ɓa nǝɗ kǝɗ nok, Pa Yeso ya nkee me, “Ɓee auwe ya nǝn nkee ngǝ me a nii.” 15Au woɗsǝ kaya ya nii ya kaɗ ɗaa ya ntii kanno, pa Yeso yaa na maasi a neme.

16Pa kokto ǝɓǝ ma nsaad, ɓa too ɗǝnda Kaa ra ɓa nkee me, “Ɓong ɓong an nawanto Kaa kwang ya won a ɗaaso waado, Kaa yǝ wo me ya kon nkweera ɓet ɓǝsa.” 17Mara mbu Yeso tomsǝ ɓa, ɓaa a kura a put Yahudiya wa nsaad ma ur ngeek ngeek sa.

Yeso ma Yohanna an tom Baptisma ya

18Pa emfǝɗkaa Yohanna an tom Baptisma ya nkeesǝsǝ mbu tomsǝ ɓa kong wa, ya yar raɓ a ɗaaso ɓoso, 19yǝ ɓǝ timi a Ankundi ni me ɓaa taa me, “Ngǝn yaa kiyaa wo yau, ko tǝ war atike ɓolǝu?”

20Pa ɓǝ wosǝ a Yeso niwa ɓaa nkee me, “Yohanna an Baptisma ya timitǝ sase me tǝngǝ taa me, ‘Ngǝn yaa kiyaa wo yau, ko tǝ war atike ɓolǝu?’”

21Keke a fersiso Yeso yǝ roɓ ɓeta dem ma siyamse ɓolɓol, ɗǝm ma siyo nsaamsewa, ntaata dem ɓa taa wǝr handa wa. 22Pa Yeso yǝɓǝ kak ya nkee me, “Sǝ kang kosǝ nkee Yohanna mbu sǝ kurasǝ ma nkweerase ɓa, ma ɗǝm mbu sǝ wǝrsǝ ma nkweerase ɓa, ntaata ɓǝn wǝrǝ, puuta ɗǝm ɓǝn siki, ɓaa ɓǝsǝ ma siyo tǝmo ɓa, ɓǝ roɓɓon, kwaata ɓǝn kura, ɓaa ɓǝ woɗsǝ ɓa ɗǝm ɓǝ niin, ɗǝm ɓan nkee mara kwalari ra hanhanta. 23Saltǝra kaɗan a ɗuura yaa yǝ pǝn ma niina ra ya.”

24Pa ɓaa Yohanna timsǝ ɓa faɗsǝ wa, Yeso yǝ ntii nkee mara ɓaa kwausǝ dem ɓa a ɗuura Yohannan ra me, “Sǝ ko a sanglo me kosǝ sengge mbiu? Kiyaa falang falang u yoro ǝn nyaasǝ wau? 25Me sem maaso ra, yaa sǝ ko me kosǝ sengge mbiu? Atike tung luktaa kwalari wau? Awo, ɓaa ɓǝn tungsǝ luktaa kwalari u ma koɓa dem wa, ɓaa taanta kuɓsa ta. 26Pa sǝ ko me kosǝ sengge mbiu? An nawanto keu? Ee nwa, Nǝn nkeesǝ yǝ faɗ an nawanto yan. 27U nwa ǝn sase yaa ɓaa nyorsǝ a ɗuura ira ya me,
“‘Kǝnǝ timi an timira yaane a wii nwaango ya,
yaa kiya sǝk ɗǝɗa men wo nwaango ya.’

28Nǝn nkeesǝ, a ɗaaso ɓaa toona haa ɓǝsǝ nsaad ɓa, atike sem kǝn yaa yǝ faɗsǝ Yohanna an tom baptisma ya ra. Hana maaso, yaa yǝsǝ ngeek a kuɓsutu Kaa wa ya, yǝ faɗsǝn.”

29Ɓeta nsaad kurasǝ mara sǝsǝ rawa, hana ɓan kon samra ɓa kong, ɓa yau me ɗǝɗa Kaa ra ndǝ siso keke, mbu kwasi ɓa me Yohanna tomɓǝ Baptisma sase. 30Pa Farisiyawa ma malǝma masakaa Musa sa, ɓa mbisi mbu Kaa sensǝ ma ɓosa ɓa, ɗǝm me Yohanna tomɓǝ Baptisma sase ra.

31Pa Yeso ya se wiyo ma mara ya nkee me, “Me maaso, kǝ nǝ mǝɗkǝ ɓet kaare ɓa ma mbiu? Ɓǝ mini miniu? 32Ɓǝ nga emba kaɗsǝ a ham lumu ɓa, ɓǝn yar ɓaatǝ ɓǝn nkee me,
“‘Tǝ hursǝ tilon,
pa sǝ hirhira ra.
Tǝ kǝɗ pin ngwomra wan,
ɗǝm pa sǝ tee ra.’

33Me Yohanna an tom baptisma ya, yǝ wo yǝ seyaa nkaandǝng ra, yǝ weeyaa mbraa em ngwaate inabi ma ra, pa sǝ nkee me, ‘Yǝ ma nsaa.’ 34Au Ete ya, yǝ wo yǝn se yǝn wee, pa sǝ nkee me, ‘Eɗ ɗa yǝn se kwang, ɗǝm yǝn wee mbusa kwang, yǝn sik ɓan kon samra ɓa ya, ma “ɓan tentenato ɓa.”’ ▼

▼Ɓa ɓǝsǝ ɓǝɗaa Masaka Musa wa raɓa.

35Pa maa mbuka wa weɗa me u yǝsǝ keke ma lau emɓisa wa.”

Yeso a ɗuur Siman wa eɗ Farisiyawa ke

36Eɗ Farisiyawa ke kǝna Yeso se mbusaya wa a ɗuur usu. Pa Yeso ya ko ya kaɗa ham se mbuseya ɓa mee ɓa se mbuseya. 37A ur siso pee toone ke kǝn, yǝ kurasǝ me Yeso yǝn se mbuseya a ɗuur eɗ Farisiyawa suwa wa, pa ya wo ma yaro a au kǝnda ya u ma nseera kwalari wa u koɓa dem wa. 38Ya wo ya nǝɗ a ndiira lau natsa isa wa yaa oro, kǝlkǝlta ira ntiisǝ dako a natsǝ Yeso sawa pa toone kaya ya haarǝ ma nhii usu, a nii yaa weɗe yauta ma maa natsa wa pa yaa puk yar ma nseera kwalari kawa.

39Pa eɗ Farisiyawa siya wǝrsǝ mbu toonǝsisi tomsǝ ɓa wa, ya nkee a senda ira ya nkee me, “Mee ka eɗ ɗa ndǝ an nawanto Kaa ya, ma yǝ ma nkaamǝr toone tesǝsǝran, kama yǝ maan me tooneya ndǝ ya tentena ya.”

40Yeso ya nkee eɗ Farisiyawa kaya ya nkee me, “Siman, nǝ ma mbu kǝnǝ ngǝsǝ nkee ɓa.” Eɗ kaya ya nkee me, “A nkee maa nga, malǝm.”

41Yeso ya nkee me, “Yake kǝn yǝn ɓǝɗ ɓeta raɓ kwano, ya fin ya yǝn ɓǝɗsǝ koɓa u antinima ya kǝǝ taa a meera fin ma peekǝra wa, ate fin ya ɓan ɓǝɗsǝ koɓa u antinima ya kǝǝ taa a tǝrma puu wonon wa. 42Ɓǝ yamsǝ kwanoo wa, yǝɓǝ lee raɓ kou. Me a wǝr waago ya kǝǝ faɗ yawoo niu?”

43Yǝ kak Yeso ya nkee me, “A wǝr nwaano, ya ɓaa leesǝsǝ koɓa kwang siya.” Pa Yeso ya nkee me, “Ee ngǝ nkeen keke.”

44Ya sengge toone kaya, pa ya nkee Siman, “Ngǝ wǝr toone ya nǝu? Nǝ kana ɗuur waago ngǝ nanǝ mbraa na sob natsǝna ra, pa ya sob natsǝna ma kǝlkǝlta ira, yaa haatǝ ma nhii ɗuura usu. 45Nǝ kansǝ a ɗuur waago wa ngǝ weɗa yauta ma maa ɓaatǝ wara, pa tǝng nǝ kansǝ a ham ɓa wa yǝ lee ma natsa sǝnaa wara. 46Ngǝ puknǝ yaro a ɗuurana ra, pa yǝ puk yar ma nseera kwalari wa a natsǝna. 47Me maaso, nǝn nkee ngǝ me, tentenato usu kwangwa ɓaa leesǝn, me yǝ weɗe yauta kwang. Ya ɓaa leesǝsǝ tenatenato ngeek ya yǝn weɗe yauta ngeek.

48Pa ya nkee toone kaya me, “Ɓaa lee ngǝ tenatenato waagon.”

49Ɓa ɓǝn sesǝ mbuseya ke ma sase ɓa, ɓa ntii nkee ɓaatǝ wa me, “Uwa ndǝ yamni yǝn leesǝ tenatenato ete wau?”

50Pa Yeso ya nkee toone kaya ya nkee me, “Na ɓongtǝrato waago hik ngǝn, ngo nga kaɗ hur huru.”